Apocalípsis 22 - Dupade Uruode

Tié déji Dupade idáidatéi uje yocárepise enga pucuecaringuei déji tié uaté

¹ Enga Dupade iroque gaté unirísõre chingome tié tome yu uje uaté que iguínique cuse. Enga tié tuaté yocárepise uje pucuecaringuei déji uaté. Enga cho ajicaranone. Enga tié tuaté tṍraji Dupade, Jesucrísto ore charipi cuchábi. Uje Jesucrísto uté gajnua tu áyasa pẽrapáideraque.

² Tié tuaté dépisiji dajerepise gatócoro iji idáidatéi tuté. Enga poridie suéji tié dosadode uje pucuecaringuei déji udire adie. Enga poridie udire adie timate enga gariji yirídai iji sequeré chojmara. Enga adie udire que chimoque guedosíode uje timate. Enga bisite poria tuaté acarane ujetiga erãpe ichai jogosórone ore chóji enga que qué cuchárique chopósi tiji ore rĩ.

³ Enga Dupade acacáninga gajnaréngone ome erãpe bajai eruei upúsu guidáidaté ichai uté jne. Enga Dupade, áyasa gajnui Jesucrísto ore charipi cuchábi déji guidáidaté ichai tuté, enga udore ore irógode a ore chichaga dagataidie aja jnumi iji ore iquéode gatuaque.

⁴ Idáidatéi tuté jogosórone a ore chimópise Dupade jne ome dedodie. Enga a uté churúsãre dei tiji udore ore enochade jne.

⁵ A íjnoque dejai iji jne. Jecute que cucha guedé idírecaringuérique rĩ. E que cuchapo ibiotique idírecaringuéringo rĩ. Chamáñaje Yocangarádejnai Dupade a u jne gu ujeta chijñate ore gai iji uté. Enga a Dupade tẽra daríjogosórone ore ome ore úringáringo eduguéjna jne. Enga ore úringane eduguéjna a e ca eruénique cuse jne iji deréjnane jnese.

Qué idógosi Jesucrísto diringai jne

⁶ Diga Dupade iroi chojningame yu: –Yojningane cucha ome ua ũrepíso jnese enga pangurecho. Yocangarádejnai Dupade u uje chisi ome daruode ome jnani bajade nanique ujetiga ore chatata quigode. Enga jé uté upúsu uje chiroque darógode gaté unirísõre uñai aja darógode uaque ujetiga cho quique cucha piqueminórone ome uaque uje udore jĩraque tocade jne.–

⁷ Yudute Jesús uruode to uje chojninga: –¡Adójnacho uje a jĩraque yĩri jne! Enga pininaquei jogadi a u jne ome udore ore jnese uje ore dopísi yuruode quigode iji darujna aode unojo.–

⁸ Juan u yu uje e yejna yimone, yududigode udore guesi enga yichaga yigataidie aja jnumi iji yicatecãraisṍri Dupade iroque iquei. Yigaidi tu gu ujetiga yisi gai.

⁹ Mu uté chojningame yu: –Ca achaga bagataidie aja jnumi iji yiquei. Bojo Dupade iroque yu to, enga jé yo Dupade anguresórone uaque jnese. Yojningane u ore uje ore chatata Dupade uruode ome ore, jé aja udore ore jnese uje ore dopísi pacajnaquéode quigode uje purusãracho iji darujna aode unojo. Be enga achaga bagataidie aja Dupade iquei.–

¹⁰ Chojningápome yu rĩ: –Jé ca apógu Dupade uru quigode uje purusãracho iji darujna aode unojo. Chamáñaje e idógosi gu ujetiga cuchade udore tocade.

¹¹ Jé dóji enga ayoré sijnángone jé ore jno dasijnaringuéone údi. Jé cho udore ore to uje que ore chusípise deo ome cucha gajnaréngone. Jé ore dóji dadode udore. Mu ate omi doi enga jé jno date omone údi. Enga ujetiga gosi chisipise re ome Dupade, jé jno uté údi to.–

¹² Yudute Jesús uruode uje chojninga: –A jĩraque yibágui uaque jne. Enga dimane yeranone cucha iji yijmainie. Enga a yẽrája ayoré chojmara, chojmarane ore jnese jne. Enga a yẽratígo jé chirate ore ipesudode cucha jne.

¹³ Bajaque yu ome erámi nanique. Enga a erámi íjnongapo jne rĩ mu a jé yijogate jne. Enga yajnua tu purusãra bajé uje i tu A. Enga yajnua tupo purusãra eruemito te rĩ uje i tu Z.–

¹⁴ Pininaquei jogadi tu ome udore ore jnese ujetiga puruguei ore iguidedie enga póroroi. Uje a udore ore gajnei tu jne ujetiga ore chacája Jerusalén icha piagode. Enga a ore gajnei tupo jne rĩ ujetiga ore tagu poria adie uje pucuecaringuei déji.

¹⁵ Mu Dupade a chãraque dedáidatéi tuté ome cucha gajnaréngone ipesungórone ore jnese jne. Yojningane u udore ore uje ore chécãre pisoca omone quigode enga ore chachia ráguiji cucha gajnaréngone udore. Upo Dupade uruode otigayasórone ore rĩ. Upo pujopié gajnarénguenie etingarasórone rĩ. Upo udore ore jnese rĩ uje ore pota pungáningane ome jnani quedéjnane, jeoga chequé quedéjnanie. Upo ayoré yungórone rĩ. Upo ayoré gajnúone catecãraisórone ore rĩ. Upo udore ore jnese rĩ uje que ore chibéro re ome daringaquéode.

¹⁶ Enga yudúdapo Jesús uruode rĩ enga chojninga: –Jesús uyu enga yiroque yutocaidi gaté unirísõre aja uaque ujetiga ajnerañome uté ojningane cucha ome yanguresórone ore jnese iji dedáyode. Bajaque yu ome eduguéjna cuchábi David nanique, mu uté ape disi ejo yu to. Enga yajnua tu guédo niríngoro ome yingoningájnadatéi.–

¹⁷ Dupade Ujopié Espíritu Sánto, áyasa gajnui Jesucrísto gajma ore dejéna uágaja daquigade. Enga ore chojninga: –Boyóji te é.– Jecute udore ore jnese uje ore chudute ore pijnane enga ore doi to enga ore tibidi to enga ore chojninga: –Boyóji te á.– Uacuñeque ujetiga cajnóriji, enga gosi tibágui ore pijnane udore enga chóji yote uecai iji ore gari. Chamáñaje Dupade guẽrate bisideque gu yote uecai tuté.

¹⁸ Udore ore jnese uje ore chudute cuchade quigode uje purusãracho iji darujna aode unojo beyoi enga ajusópise uaqueo. Chamáñaje ujetiga pajnerame pacajnaqué icha quedéjnarique aja Dupade uruode unojo enga Dupade a chajnerame uté gosi gajnetígo pujuyaquéo ome uté gosi to jne, uje pujuyaquéode udore purusãracho iji darujna aode unojo to.

¹⁹ Jé basa enga ujetiga uñeque doi enga chĩro purusarane unojo uñéngo iji darujna aoi unojo enga a Dupade chĩro uté gosi i iji degode darujna ao to jne uje pucuecaringuei quisórone ore íode déji jnese. Enga a charángapo dedáidatéi dedójnari to jne rĩ ome uté gosi, uje idáidatéi tuté isoca ueradéjnane purusãracho iji darujna aode unojo.

²⁰ Uté uje chingo cuchade unojo ome yu chojninga: –A jĩraque yĩrípise jne.– Enga yichajnai uté uruode enga yojninga: –¡Amén! Yocangarádejna Jesús á, jé yajéode u to. Jĩraque ãriápo jne rĩ iji yoque.–

²¹ Yajéode u ujetiga Yocangarádejnai Jesucrísto chatapísaja uaque jnese ome dacaniratiguédatéi. Qui jé upúsu. ¡Amén!