Apocalípsis 21 - Dupade Uruode

Dupade pésu guéode, jnumi ore úringane icha jnese

¹ Dupade ujuyaquei tuté quigade enga yimo uje icha jnumi, guéode ore. Enga íjnoque yote quedéjnane iji. Uje jnupe bajai, gue bajade e ore íjnoque gu.

² Juan uyu u uje yipáñapísiji Dupade edójnari guidai Jerusalén icha uje doi jnumi iji gaté iji Dupade gari. Enga ueradéjnapise. Gajnua tu gapúraque ome yu uje que suseque re ome dajmasṍri yui.

³ Enga yudute pibijnacaraidie uje tṍraji guéode enga chojninga: –¡Ajire to! Dupade déji erámi unirisórone ore gari. Enga a jé charite ore gari jne, enga cho darása iji ore. Enga Dupade a jé upúsu jne ujetiga chácariji ore gari ujetiga ore cho dadupa ugurui iji uté jne iji deréjnane jnese.

⁴ Dupade a chinoningase darasade ore educadode jne. Enga a chinoningásapo pitoringai iji ore jne rĩ, jé aja pagoyedie, jé aja puyacade, jé aja pute urõsoringuéone. Cuchade udore ore déji erámi nanique, mu e ore chise deruéode jnese.–

⁵ Enga charipi cuchábi charipísõri catecã́ri yu to enga chojningame yu: –Cajire to. E yimate cuchade úringane icha jnese.– Enga chojningápome yu rĩ: –Arúsãrape yuruode unojo. Quique ũréo yuruode unojo ujetiga ore changuretapise jnese.–

⁶ Unojo quigade enga chojningame yu: –E yimate cuchade jnese. Yajnua tu purusãra bajé uje i tu A, jé basa yajnua tupo purusãra ejópise uje i tu Z. Chamáñaje bajaque yu ome cuchade jnese, mu uje cuchade udore chise deruéode mu jé yijogate. Jecute uté gosi uje cajnóriji, enga a yisi ome yote uecai tome uté jne uje tṍraji sibíjnai iji gaté enga bisideque yerani yote tome uté gosi.

⁷ Ujetiga Satanás ca chijnime uñeque ãrírique enga a yẽrája uté gosi te jne ome yimaningone cucha. Enga a uté idupade u yu jne. Enga a yopo yabíji uté gosi to jne rĩ.

⁸ Mu pisijnaringuéone ipesusórone a parãte udore ore jnese aja gajño pioi jne uje azufre ai nóna pioi ocaraidie aja gaté iji uté. Enga pitoringai erueminóripísi u uté jne. Gajño pioi quisórone ore u: sadodéchoquíode. Upo Dupade uruode otigayasórone ore rĩ. Upo pijnacóroráne ore rĩ. Upo ayoré yungórone ore rĩ. Upo jnanione, chequedíe ore jnese rĩ uje ore chachia ráguiji punganingane. Upo udore ore jnese rĩ uje ore chequetingare re ome pujopié gajnarénguenie. Upo ayoré gajnúone catecãraisórone ore rĩ. Upo urupatáquechoquíode ore jnese to rĩ.–

Jerusalén icha tṍraji guéode

⁹ Unojo quigade enga Dupade iroque garitíode uñai tibágui yu uje ore oidábode su agapiábode uje Dupade ujuyaqueque erueminóri dóji ajei. Enga uté chojningame yu: –Boji te á. A yingo Jesús uté gajmámia aja ua jne, uje Jesús uté u uje gajnua u áyasa pẽrapaide chuguéraque. Uje a acotépise uaté jne.–

¹⁰ Uje qué yenominone u uje Espíritu Sánto chingome yu, enga Dupade iroi uté jno yúdi aja cototé umaré gaté enga uté chingome Dupade edójnari idáidaté cuchábi Jerusalén ome yu. Mu yimo uje idáidatéi tuté doi jnumi tiji gaté iji Dupade gari.

¹¹ Obiréjna Dupade ingoningájnadatéi iji idáidatéi tuté. Enga nanganata. Gajnunie u cucaranenie uje ore íode u jaspe, cristal ore uje nanganatápise.

¹² Idáidaté cuchábi tuté ujuyaquéode déji enga chaparu gai. Enga umáño. Enga querújnapo rĩ. Enga piagode déji enga gariji yirídai. Enga Dupade irógode gaté unirísoño ore chirote piagode udore jnese. Enga jnani bajai Israel ujnacarode uje gare ore iji yirídai ore íode déji piagode udore.

¹³ Piagode déji dosadode jnese, enga gadiógode déji umusoi garani. Jeque gadiógode déji casaque garani. Jeque gadiógode déji guedé garani. Jeque gadiógode dépoji guedé cacadi te rĩ.

¹⁴ Cucarané cuchábedie déji ujuyaquéode udore údi enga gare ore iji yirídai. Enga purusãraque Jesús iroguipísode apóstoles ore íode iji udire. Uje ore irósõri Jesús gajnua tu áyasa pẽrapaide chuguéraque.

¹⁵ Enga yicatecãraisṍri Dupade iroque chijna pidi uje óro nanganatague. Chijna gu ujetiga chasingara idáidatéi, ujuyaquéode, ujuyaquéode piagode ore ome.

¹⁶ Dupade iroi chasingara pidi aja idáidatéi dosadode. Enga dosadode jé ore cho ñane jnese. Enga kilómetros u 2.200 iji dosate chojmara, chojmarane. Enga idáidatéi tuté umarítigai cuse to rĩ iji gaté enga jé cho dosadode.

¹⁷ Quigade enga Dupade iroi chasingarápo ujuyaquei umaningai rĩ enga 64 métros iji. Enga oidi chopise ayoréode uyoque yocoidode picho uje yasingaco cuchade ome.

¹⁸ Idáidatéi tuté adode nanganatácho jnese, uje óro uéguei enga díreca uéchade. Enga cho ajicaranone uje ichájna. Enga ore pésu ujuyaquéode iji cucaranenie uje i tu jaspe. Enga nanganata ujuyaquéode udore to.

^19-20 Uje ore pésu pujuyaquéode udore aja gaté enga ore cãra erã́todie ome ñane enga gare iji yirídai erã́todie udire. Enga erãto bajé u cucarané ueradé uje i tu jaspe. Erãto ejodie udire cucarané ueradei to uje udire íode u: zafíro, ágata, esmerálda, ónice, cornalína, crisólito, berílo, topácio, crisoprása, jacínto. Enga erãto ejópise i tu amatísta.

²¹ Piagode uje gariji yirídai udore jé pérla udire ore jnese. Dajerepise iji idáidatéi óro ueque enga nanganatapise. Enga cho ajicaranone uje díreca uéchai.

²² Yajire, mu que yimo Dupade iguíjnarique iji idáidatéi tuté ujetiga ore catecã́ri Dupade iji. Chamáñaje Yocangarádejnai, Dupa Pujnuéngaisṍre, Jesús, uje gajnua u áyasa pẽrapaide chuguéraque, ore charidi upúsu idáidatéi údode jnese gu ujetiga picatecãraite ore iji udore údode jnese.

²³ E que cucha guedé, guedoside ore ome idáidatéi idaisórone udore ore. Dupade chijñate ore gai gu ome dangoningájnadatéi. Enga guidáidatéi tuté idírecaringuéi tu Jesús uje gajnua tu áyasa pẽrapáideraque.

²⁴ Ayoré ponáyone iji ducunirone jnese a ore chajĩcára idáidatéi uté idírecaringuéi jne. Enga eduguéjnane iji erámone jnese a ore chisi idáidatéi uté gai, enga a ore tẽrája cucha omejnapísode ome uté jne.

²⁵ Enga a ca ore suruápo guidai piagode gáyode udore jne rĩ iji deréjnai údode. Enga a e ca pimópo dejátique jne rĩ iji guidáidatéi tuté.

²⁶ Enga erãpe ichai jogosórone a ore ajiriguipise Jerusalén ichai tuté ome deranone cucha ueracho jne uje ore chijnorapise uaté gu.

²⁷ Mu a ca pijnacórorã́rique chacája guidai tuté jne. Jé aja pisijnaringuérique ipesusónique, jé aja aringácachoquírique. Mu acápiesórone a u udore ore uje udore ore íode déji áyasa Jesucrísto yugode darujna ao uje pucuecaringuei quisórone ore íode déji jnese.