Apocalípsis 20 - Dupade Uruode

Yoqueduguéjnai Jesucrísto a eduguéjna cuchape iji sequeredie uje mil

¹ Unojo quigade enga yimo Dupade irógode gaté jogosóño uñai, uje doi jnumi iji gaté. Enga chijna ejo cuchabé joride erã́sori enga chátaja enuei uje ojnaque cuchape.

² Enga Dupade iroi gaté unirísõre chisa arócojna guichayai enga chigaru, enga suru gai tiji ejo cuchabé ajei. Enga guejnanie sequerei mil u iji ejo ajei. Arócojna guichayai tuté u ugai nanique. Enga íode jé u Dicoré, Satanás to.

³ Enga Dupade iroi tuté tṍra Satanás aja ejo cuchabé ajei uje que eruénique cuse. Enga surupúsu piagoi gai ome erãto ujetiga ca uté dopoi guesi te jne rĩ. Gaidi tu gu ujetiga ca uté chãrápo erámi unirisórone rĩ jé aja sequeré mil eruei. Mu quigade enga a ore chirapome jne rĩ, enga a dépoji erámi jne rĩ iji dire garósirigo.

⁴ Quigade enga yimo piyaripi cuchábode enga Jesús anguresórone ore chácariji gáyode. Uje Jesús e ujo eduguéjna ore ujetiga ore chajire erámi jogosórone ore adode aja quigode to. Enga yimópo Dupade uruode ipesusõripísode to uje ore chatata Jesús ujnoméone nanique, enga ore cho daba datatagode unojo. Jnani guichayai guetesórone u unojo ore, jecute que ore chichaga dagataidie aja jnumi iji uté gajnui iquei. Que ore juéga to ujetiga uté i dóji ore enochade jeoga ore jmanai. Jecute jnani guichayai irógode ore chaquesu udore ore etabídode nanique. Mu yimo uje ore ecápo rĩ. Enga Crísto ujo eduguéjna ore to iji sequeredie mil udire.

⁵ Mu udore ore gajneque pĩrijíninga bajai tuné ujetiga ore niji iji. Mu togode uñane a cáma ore niji to jne jé aja sequeredie mil eruei.

⁶ Pininaquei jogadi a u jne ome Dupade imeserane ore ujetiga ore gajneque pĩrijíninga bajai tuté to. Enga a ca ore chimo pisadodéringárique ome raque to jne iji pitoringai ejópisi. Mu udore ore a ore basája dáringáringo sacerdóteo jne ujetiga ore pésu Dupade adode aja quigode. Enga Crísto ujo eduguéjna ore to jne jé aja sequeredie mil.

⁷ Ujetiga sequeredie e chise mil eruei enga a ore chirapome dicoré Satanás jne rĩ.

⁸ Enga Satanás a chãra erámone unirisórone ore jnese iji erámone údode. A chãrapo eduguéjnai uje i tu Gog, jé aja uté urasade rĩ iji ore uniri Magog. Enga a ore chamáta ráguiji punirone uñane jnese ujetiga ore pésu pocaningai ome Jesucrísto. Enga a uásejna soldádode jne uje ore pésu pocaningai. Enga ore gajnunie u ujnanie ore iji yote quedéjnai pijnanane.

⁹ Enga yimo iji yenominone uje ore chubu uniri tuté údode jnese. Enga diga ore chaparu Dupade urasade gai uje ore déji darengúi. Enga ore chaparu Dupade ijnoranguipísi guidai gai to. Mu Dupade chiroque pioguéjnarique aja ore gai uje tṍraji gaté ome ore. Enga chejnápise udore ore jnese.

¹⁰ Enga parãte Satanás aja gajño pioi to uje azufre ai nóna pioi aja gaté. Chamáñaje aringácachoquípise uté gu. Enga jorane u jnani guichayai, iroque táquechoquí ore iji uje e parãte bajaque ore iji ica. Enga a ore chejnarenguipise dajnéone pujuyaquéo jne iji dejade, dirode ore jnese iji deréjnane jnese.

A pajirique erámi unirisórone ore adode aja quigode iji charipi cuchape póroroi iquei jne

¹¹ Enga yimo piyaripi cuchábi uje póroropise. Enga yimópo charipísõri to rĩ. Enga yimo to uje jnumi, gaté ore íjnonguiji uté iquei bisideque. Chamáñaje que ore charitique cuse gu.

¹² Enga yimo ayoré togode ore jnese uje ore chague iji Dupade iquei. Ayoré atade déji, enga ayoré gajnaréngone ore déji jnese rĩ. Enga yimo uje puchẽraque darujna aode gáyode. Enga yimo darujna ao uñai uje pucuecaringuei gajnesórone ore íode déji. Enga ore adode pijogúsorone u darujna aode udore. Chamáñaje purusãracho ore adode iji darujna aode udore nanique gu. Diga a pingo ore adode aja ore jne, enga quigade enga patataque ore quigode ome ore.

¹³ Enga piringarãque ayoré togode ore jnese; udore ore uje ore déji yote quedéjnane ajedatéode, jé aja jnaropié jogosórone ore jnese rĩ. Enga pajirique udore ore ipesudode aja quigode jnese, enga jé ore gajneque dapesudode udore quitígo.

¹⁴ Unojo quigade enga Dupade tṍra pitoringai, jnaropié ore aja gajño pioi jnese. Enga pitoringai erueminóripísi tu gajño pioi tuté.

¹⁵ Enga Dupade tṍra ore aja gajño pioi to uje que ore íode déji Dupade yugode darujna ao to, uje pucuecaringuei gajnengórone ore íode déji.