Apocalípsis 2 - Dupade Uruode

Dupade uruode u unojo ome da-iglésia, danguresórone ore uague iji ore idai Éfeso

¹ Enga Jesús chojningame yu: –Arúsãrape yuruode ome Dupade anguresórone angaráni uje déji ore idáidatéi Éfeso. Enga ósi te ome barusarane: "Uyu u uje yiriguiji papose pi nanganatágode ore ujade, uje gare ore iji ti. Enga guédo garijitidie déji yijmanai ãrachua.

² Yiraja uacapesudode ome yu jnese uje que abéroyo uágome yiroquéode. Yirajápo to rĩ uje que achóyo beyoi Dupade uruode. Yirajápo to rĩ uje que eso cucha gajnaréngone ipesungórone ore unétique. Uje jnani urupatáquechoquíode chacája uacajade ome daringaquéode diríca enga ore cho Dupade iroguipísode iji raque. Mu jĩraque uaquetingacho ore enga uacarajáyo uje taque udore ore.

³ Yiraja uje uacadotáyo uágome cuchade. Enga uacoyo uacaba yadode. Enga uaquejnáño uacaguesi ome yu uje uacabeyoi yiroquéode. Enga que oyo caru ome uacasocade udore ome yu.

⁴ Mu yetétigai déji uaque: enga u uje uacajnórañopise yu iji taningai nanique, mu e uacajnoraquei doi jnumi ome yu.

⁵ Adójningachopísa uje idájapise uáguiji uacátegoningá cásodicáite jogadode. Beyoi enga ecãcho uaque, enga beyopoi uacátegoningáne udore rĩ uje uacapéso nanique iji taningane. Jé socaseti ca angáchoi yuruode udore enga yiborátaja jne á, ujetiga yi enga yijnime uáguiji papose pi garitíode ujade jne á. Jé basa ujetiga angáchoi yu enga a jé uacayarite papose píode udore jne.

⁶ Mu yimeserãpídi déji ome uaque to: enga u uje uaquetachopise Nicolás ajnangórone acajnaqué tágode. Jé yo uaque uje yeteguipíso to.

⁷ Ujetiga angoninguite guesaque uaque, enga ca ajusécho Dupade Ujopié Espíritu Sánto uruode ome Dupade anguresórone uaque uje chojninga: Ujetiga Satanás ca chijnime uacãrírique enga a yujuéga poria tome uaque jne uje déji yidai iji gatajnoquei. Enga a acho adie udire jne enga pucuecaringuei a déji uaque jne iji deréjnane jnese."–

Jesús uruode u unojo ome iglésia uaté iji ore idai Esmírna

⁸ Enga Jesús chojningápome yu rĩ: –Arúsãrape yuruode ome Dupade anguresórone angaráni to uje déji ore idai Esmírna enga ósi te: "Uacacatecãraisṍri tupúsu uyu uje bajaque yu ome cuchade jnese, enga ejo yu rĩ ome cuchade jnese. Uje yitoi nanique, mu yiquecápo rĩ.

⁹ Yiraja uacapesudode cucha jnese. Yiraja uje uacoyo uacaba yadode. Enga yirajápo uacajmátaringuéone rĩ ome yu. Mu que cho jetiga jmataguipise uaque. Uje uacagúchade déji gaté enga uásejna. Yiraja to uje judíode uñane, uje chiese ore doi Dupade adode, ore uruode gajnarécho aja uaque gatuaque. Mu obiréjna udore ore uje ore ajnai tupúsu Satanás.

¹⁰ A ejnárecho uaque jne, mu ca atodóyo yui jne. Chamáñaje Satanás a chetingare uacanguretigade jnese jne gu. Enga a ore suru uacuñane gáyode jne iji soldádode iguíjnane. Mu a ejnárechopise uacajnéone petingaquéo udore jne jé aja díningo ujetiga chejna yijmanáyone. A ore chujé uacuñane jne mu ujetiga gosi jno danguretigai údi jne ome yu jé aja datoringárique, enga jogadi a u jne ujetiga yẽrája uté gosi. Enga a yerani u pucuecaringué eyúgojmai jne ome uté gosi.

¹¹ Ujetiga angoninguite guesaque uaque enga ca ajusécho Dupade Ujopié Espíritu Sánto uruode ome Dupade anguresórone uaque uje chojninga: Ujetiga Satanás ca chijnime uacãrírique enga a ca arajáyo pitoringai ejoi urõsoringuéringo to jne."–

Jesús uruode u unojo ome iglésia uaté iji ore idai Pérgamo

¹² Enga Jesús chojningápome yu rĩ: –Arúsãrape yuruode to ome Dupade anguresórone angaráni uje déji Pérgamo enga ósi te: "Uacacatecãraisṍri uyu u uje yiquesei asicopise enga uo jnese.

¹³ Yiraja uacapesudode jnese. Yirajápo rĩ uje uacagúsoji idáidatéi tuté uje idáidatéi tuté idaisórone ore cho dangarádejnai iji Satanás. Mu jé uacabeyoi yadode iji udore ore ujade. Uje que oyo caru ome uacanguretigai tiji yu uje uacapáñañoji nanique uje Satanás urasade udore ore chujé Antípas iji dedáidatéi tuté. Uje Antípas uté changuretapise yu to nanique, enga chatatapísa yadode quigode ome ore.

¹⁴ Mu yetégode cucha qué déji uaque: enga u uje uacuñane iji uaquedai Pérgamo que apótayo piyátique ome jnani bajai Balaam adode. Uje uté chacate dojoi jnani bajai Balac nanique ujetiga pésu pisijnaringuéone unéningárique ome israélgosode. Enga Balac uté doi enga chingo gapudíe aja ore ujetiga ore tungarája ore. Enga chingopo ayoré gajnúone gajnéone cucha ãrío aja ore to ujetiga ore tagu. Chamáñaje cucha puyácho gu udore ome israélgosode nanique ujetiga ore tagu.

¹⁵ Yetaque to uje uacuñane déji uje que ore chibéro rágome Nicolás acajnaqué tágode. Chamáñaje yetaguipise pacajnaquéode udore gu.

¹⁶ Jecute beyoi enga ecãcho uacadode. Mu ujetiga etácho yuruode udore enga a jĩraque yĩri jne iji uaque, enga a yo yijocaningame angoninguite parigode udore ore jnese. Enga yõráchai a u yiquesei jne uje tṍraji yibijnani.

¹⁷ Ujetiga angoninguite guesaque uaque, enga ca ajusécho Dupade Ujopié Espíritu Sánto uruode ome Dupade anguresórone uaque uje chojninga: Ujetiga Satanás ca chijnime bãrírique enga a yisi ome maná ome ua jne ujetiga agu uje qué pipoguiete. Enga a yisiapome cucarané pórorabia ome ua jne rĩ. Enga a yurúsãre bei ichárique iji cucarané tuaté jne. Mu a ca ayoré uñeque chiraja bei tiji, mu gusu gajnesṍri ua ujetiga araja bei tiji."–

Jesús uruode u unojo ome iglésia uaté iji ore idai Tiatíra

¹⁸ Enga Jesús chojningápome yu to rĩ: –Arúsãrape yuruode to ome Dupade anguresórone ore angaráni uje déji Tiatíra enga ósi te: "Uacacatecãraisṍri u yu enga Dupade Abi upúsu yu. Yedodie gajnunie u pioque ocaraidie, jé basa yirídade gajnúone u guebeque nanganatágode uje guebéode udore i u bronce.

¹⁹ Yiraja uacapesudode cucha jnese. Yirajápo uacajnoraquei, uacanguretigai to rĩ ome yu. Yiraja to uje que achóyo apéso yajegaidode cucha. Yiraja uje jiei uacapesudode iji taninga cásodicáite ome yu, mu uacapesudode ome yu iji deréjnane unojo suépise bajade gáyode.

²⁰ Mu yetei cucha qué déji uaque: enga yetei cucha u uje uacangáchoi chequé iji uacajade uje isocade u chequé bajé Jezabel isocade to nanique. Uje chequé tuaté cho Dupade uruode atatatóji re mu chãra yirógode uaque ome dacajnaqué tágode. Enga uaté acajnaquéode quigode u ujetiga ca abéroyo uágome punganingane ome gapu quedéjnanie. Enga u to ujetiga acho ayoré gajnúone gajnenie cucha arágajñui to rĩ.

²¹ Yisi jórogome deréjnane ome chequé uaté. Socaseti chécãre datígo. Mu que pota go. Enga que cha tungarája jnani quedéjnane go.

²² Mu ujetiga ca ore cha chirate uaté aja adode jne enga a yo yujuñame uaté jne. Enga yujuyaquei u jne ujetiga dequejnaréquedatérique chise uaté jne. Enga a chejnarenguipise re jne iji damochápi. Adi jec u udore ore jnese rĩ uje ore tungarája chequé uaté. A ore chejnarenguipise yujuyaquérique to jne ome raque.

²³ Enga a yujé uaté abode to jne rĩ. Enga yanguresórone ore chiraja jnese jne uje que yeruojmárique cucha cuse ujetiga ca yiraja. Yirajápo ore áyipie pipoguiédedie jnese to rĩ. Enga a chise deréjnai jne ujetiga yajiripise ayoréode ore adode aja quigode jnese. Enga jé u jne ujetiga ore gajneque dapesudode cucha oréraque.

²⁴ Mu que tiatíragosode uacuñane doi uaté acajnaqué tágode to ome re. Uje chiese uaté angarásoningo chirajárase Satanás isocádatérigo to ujetiga ore chirate, uje chiese cucha pibojma jne. Jecute yo uacaquique ome cuchade udore:

²⁵ Gusu ujetiga ajóyo uágaja uacaríjogonórone udore yurúo ome uaque jé aja ujetiga yĩriápo jne rĩ iji uaque.

^26-28 Ujetiga Satanás ca chijnime uacãrírique jne, mu uacajóyo uágaja uacasagode yiroquéo jne, jé aja uacatoringárique, enga a yisi ome guédo niríngoro ome uaque jne. Enga erámi unirisórone a ore cho deduguéjnane iji uaque jne. Jecute eduguéjna uaque jne enga uaquetotiguei a gajnui u pogué guebetique jne, jé basa ga a ayoréode ore jnese uje ore déji jnumi yui ome uaque ore gajnúone a u pĩraca docora jne iji dachabei, uje que ore bisitique pijoque ome uaque. Chamáñaje yai Dupade ipesute yúringai eduguéjna, enga jé tiógara ujetiga yipésu yanguresórone úringáringo eduguéjna to jne.

²⁹ Ujetiga angoninguite guesaque Dupade anguresórone uaque enga ca ajusécho Dupade Ujopié Espíritu Sánto uruode."–