Apocalípsis 19 - Dupade Uruode

Iji guidáidatéi Babilónia úringai pejnaque quigade ga Juan chudute gaté jogosõre dipeséode uje ore chicotapise Dupade

¹ Quigade enga yudute gaté jogosõre dipeséode ore pijnacaraidie uje ore chojninga: ¡Alelúya! Yicotágo yocasuté Dupade uje chiqueta yoque ome dáringai ujopíerãque. Yicotágopo ome ingoningájnadatéi te rĩ.

² Chamáñaje ũrepise Dupade ome ajiritigade gu, enga que cho paraque ome dapesutique cucha. Enga jé tiógara uje cho dajuñame chequé dibéchoquía uaté. Chamáñaje uaté bai u dapesute gajnarenguipísode uje chacate erámi unirisórone ome punganinga quedéjnane. Enga Dupade jnutaque to ome darógode udore uje uaté chujé ore nanique.

³ Enga udore ore chojningápo rĩ: –¡Alelúya! Chamáñaje pioi uté úyujnanie a ca íjnoque jne uje chãru uaté gai.–

⁴ Enga pangaránone uje 24 ore, jé aja gaté unirísõre gagájnione udore, ore doi enga ore chichaga dagataidie aja jnumi iji Dupade iquei iji gaté. Enga udore ore chisi Dupade gai uje chácariji dayaripi cuchábi gai enga udore ore chojninga: –¡Amén! ¡Alelúya!–

⁵ Enga jé u uje yudute darade uje tṍraji charipi cuchábi ejoi enga chojninga: Beyoi enga acotáyo Yoquidupade jnese. Yojningane u uaque uje uacabeyoi iroquéode, jé u uaque rĩ uje uacoyo uacangaráni iji. Ujetiga ujnomerãque uaque, jeoga ca urénga uacajnomérique cuse, mu beyoi enga acotáyo Dupade jnese.

Diri di ujetiga Uté uje gajnua tu Áyasa Pẽrapaide e chisa dajmato iji gaté, enga pininaquei jogadi tu uté

⁶ Yudúdapo gáguedatédie ore ichora cuchábi te rĩ uje chichagu gatajnoquei tuté. Enga cho yote uode ajaramomínone uje cho uooo. Chopo guetórangone rĩ uje ajnorane chijna re aja jnumone. Enga ore chojninga: ¡Alelúya! Uje Yocangarádejnai, Dupa Pujnuéngaisṍre, e u yoqueduguéjnapísi.

⁷ Jecute beyoi enga yinínango yoque gaté. Enga beyoi enga yisígopíse Dupade uté gai. Deréjnai e u gu ujetiga Yoquiquetasṍri Jesucrísto, anguresórone ore nínapúsu ñane. Yojningai u Uté uje gajnua tu áyasa pẽrapáideraque ome yoque. Enga ore ininaquei gajnui tu jnacari uje quene gajmato ore chijna ñane. Uje uté gajmato e chigui daguidé ueradéjna, enga dimane ome dajmasṍri yui.

⁸ Enga ore chisi ome iguidé líno póroropisedie ome uaté enga ichapise uaté iguidé, enga que iguínique déji, enga nanganata ejode. Bora líno póroropise quigode u uje e que diquiyaque Dupade anguresónique iyoguérique.

⁹ Enga Dupade iroi chojningame yu rĩ: –Arúsãrape unojo: "Uje Dupade urúo udore enga ũrepíso uje a chamáta dajnacari Jesucrísto, anguresórone ore aja ñane jne ome dabose uneréjnane. Enga pirasitigai jogadi tu ome ore jne ujeta Dupade tibidi ore ome to."

¹⁰ Enga yicha yigataidie aja jnumi iji Dupade iroi tuté iquei ujetiga yicota to. Mu chaquĩ́ra yu enga chojningame yu: –Ca achaga bagataidie aja jnumi iji yiquei. Chamáñaje Dupade iroque yu to. Enga yopise uaque, bajorane uaque uje uacabeyopísi Jesús acajnaqué uréone quigode. Uacacotaquéode gajnengóri urásu Dupade enga gusupúsu. Yocatatagode Dupade urúo que garani u atatasórone uyoque go, mu garani u Jesús acajnaqué ũrepísode.–

Juan chimo burica póroroi charipísõri iji denominone

¹¹ Cucha dacadode unojo quigade enga yimo guéode uje chuchẽre dabai. Enga burica póroroi tṍraji. Enga charipísõri i u Uru Ũrei, uje eduguéjna uté. Enga chirodipise darasade. Enga que pésu pocaningárique bisideque rĩ.

¹² Buricai charipísõri tuté edodie cho piogode ocaraidie enga cho jmíti, jmíti, jmíti. Enga uté chacája ducayo coróna dipeséode. Enga purusarane déji uté uje chatata i. Mu que diquirajaque i quigode ome ore. Gusu uté uje chiraja.

¹³ Enga diquiyojna cho cheme aja uté iguidé gáyode. Enga uté ípisi tu Dupade Uruode.

¹⁴ Enga yimo jõcarataque dipeséode uje ore chajna deduguéjnai uté. Enga líno ore iguidedie enga póroropisi. Enga que iguínique dépoji ore iguidedie udire rĩ. Enga udore ore cháji burica pórorode gáyode jnese.

¹⁵ Enga quesé asicoi tṍraji buricai charipísõri bajai tuté pijnani. Enga angúromei a u quesei uté jne ujetiga chicha erámi unirisórone ore aja jnumi yui iji ore unirone jnese. Enga a ore eduguéjna cuchape uté jne, enga a chijna pogué guebetique jne ome dáringai Pujnuéngaisṍre. Enga ujetiga uté dayé Dupa Pujnuéngaisṍri ájningárique tocade jne, enga jé u ujetiga uté chopise dajuñame erámi unirisórone ore jnese jne.

¹⁶ Enga purusarane déji uté iguidé. Enga dépoji etarútepiédie iji etarúdi gai te rĩ. Enga purusarane udore chojninga: "Eduguéjna querui u uté ome eduguéjnane jnese. Pangarádejna uté to, enga que pangarátique cho uté."

¹⁷ Diga yimo Dupade irógode uñai iji yenominone. Enga uté chague iji guedé edo. Enga uté chejnapúsu daruode enga tibidi chugúperone enga chojninga: –Chugúpẽre chagúode á, boyóji te jnese é. Amátayo uágaja Dupade imaningone uacaboso é.

¹⁸ Uje idógosi ujetiga Yocangarádejnai sué erámi unirisórone gai te jne á. Enga a yugode uásejna iji ore jne á. Beyoi enga acho ore arágajñunie jne á. Acho jõcaratade, eduguéjnane, ore irógode jne rĩ á. Achópo buricade to jne rĩ á. Achópo ore charipísorone ore to jne rĩ á. Boyo enga apúso ore iji jnumi te jne á, ujetiga acho ore á. Acho ayoré atade, jé aja ayoré gajnaréngone ore jnese á.–

¹⁹ Iji darade unojo quigade enga yimo jnani guichaya bajai, erámone jogosórone ore eduguéjnane uje e ore chamáta dasoldádode aja ñane ujetiga ore pésu pocaningai ome buricai charipísõri, isoldádode ore to.

²⁰ Mu buricai charipísõri tuté sué ore gai, enga doi enga chisa jnani guichaya bajai. Dopoi ejoi to rĩ enga chisapo rĩ. Enga tṍra ore jnese aja gajño pioi uje azufre ai nóna pioi aja gaté. Uje ejoi tuté ãraque erámi unirisórone ore jnese ome daringaquédatéode nanique. Uje pésu dapesútedatéode diríca ome dangaráni jnani guichaya bajai ujopié. Enga chiroque darane udore ore aja ujetiga purusãraque ore enochade ome jnani guichaya bajai i. Enga chirógapo ore aja rĩ ujetiga ore chichaga dagataidie aja jnumi iji uté gajnui iquei.

²¹ Enga buricai charipísõri tuté doi jnani guichayai anguresórone enga chujé ore ome daquesei uje tṍraji pijnani. Enga chugúpẽre chagúode doi enga tagápo ore arágajñunie rĩ. Enga ore icadie guejna iji ore.