Apocalípsis 18 - Dupade Uruode

Guidáidatéi Babilónia e pujuyápise

¹ Quigade enga yimópo Dupade iroque uñai rĩ uje ujopíeranguipíse uje tṍraji gaté. Enga uté chijñate erámone gai jnese ome dangoningájnadatéi.

² Enga uté pijnacarachi aja jnumi uje chojninga: –Idáidaté cuchábi Babilónia e pujuya é. E pujnuéngai yé. A ca ayorérique chopo dedáji jne rĩ é. Uje nóña enga gajnarénguipíse é. Enga jogosórone u Satanás iroque gajnaréngone, aja pujopié gajnarénguenie jnese, aja chugúpẽre gajnarénguenie ore rĩ é.

³ Uje uaté isoca gajnarénguipísode chuságaja erámi unirisórone ore jnese, enga ore iradé tu. Enga eduguéjnane iji erámi jnese ore tungarája uaté jnese uje ore chirate. Enga uaté chimate oredie gaisórone aja guesode ome ore úringane atácho iji erámi údode ome uaté cutejmane ipotiguédatéo.–

⁴ Enga yudúdapo dara uajádode uñane rĩ uje tṍraji gaté uje chojninga: –Yanguresórone uaque á, boyóji udore ore gari iji Babilónia tuaté é. Enga jé ca átayo uágaja udore ore isijnaringuéone to é. Idógosi gu udore ore gajnei pujuyaqueque é.

⁵ Uje ore isijnaringuéone chujé raja ñane gai, enga chichagu gatajnoquei te é. Jecute dimane Dupade ujetiga cho dajuñame ore ome ore ate gajnarenguipísode é.

⁶ Mu uaté ujuyaquédatéode ome yanguresórone jé qué iyiécho. Jeque yujuyaquéode enga a ca iyiécho ome uaté jne. ¡A yõre yujuyaquéode ome uaté, ga doble jne!–

⁷ Enga Dupade chojningápo rĩ: –Boyo enga asíñome pujuyaqueque cuchátique ome uaté jne ujetiga chopise daba dapotiguédatéode, jé aja dacotaquédatéode ome re. Chamáñaje uaté chojningame re: "Yajnua tu eduguejẽ́ cucháberaque. Enga que toque go ujetiga chequé eca yu jne. Enga a ca yimo páyuguhebátigarique ome yu jne rĩ."

⁸ Jecute uaté gajnéone pujuyaquéquedatéo a chise uaté jne iji dire chojmarai uje pujuyaquéode unojo u: pitoringai, páyuguhebátigade, chaguhedatéode ore. Que gusu udore mu a papose uaté gai to jne. Chamáñaje Pangarádejna Cuchape Dupade, enga a ca ajéninga darúrique jne ome uaté.–

⁹ Enga eduguéjnane iji erámone uje ore chirate uaté aja ate gajnarenguipísode a ore chimo pioi ocaraidie, úyujnanie ore uje tṍraji idáidatéi tuté. Enga a ore popísiji uaté ejode jne.

¹⁰ Enga udore ore a ca ore cunguésõri uaté gajnei pujuyaqueque. Mu a ore chisa dabade jne, enga a ore chojninga jne: –­¡Ja jõõõ! Yosõcopísi jóroque guidáidaté cuchábi Babilónia uaté. Uje ujnomerẽ́ uaté ica. Mu chunina mu dajnei pujuyaqueque e yore gai.–

¹¹ Cucha guẽrasórone ore iji erámone a ore popóji uaté ejode to jne rĩ. Uje ore chiraja gu uje e que diquigaidé oré ore ugúchade gu. Uje jecucha udore ore tẽra cucha orerane ome uaté gu.

¹² Enga ore gueranone u óro nanganatáguedie, pláta, guebeque uñane to rĩ uje ore íode u bronce, hiérro ore, cucarané ueradedie, jé aja pérladie rĩ. Ore chijnapo borapeque cangarátubiode uje ore ipesucho iji líno, séda ore uje uruchachade chichagu iji ñane rĩ. Ore chijnapo pore ueradedie rĩ uje udore ai uneripíso. Ore chijnapo cuchiso uedie, uje ore pésu datuátigade iji rĩ. Ore chijnapo tábla oreranguipísode rĩ.

¹³ Udore ore gueranone u cucha pibosode gajnéone udore to uje ai unéño uje udore uñai i tu canéla. Jé upo cucha ai unérone rĩ uje ore chãru, jé aja cucha ai unérone to rĩ uje ore changuñéra dabai uje udore uñai i u mírra. Ore chijnapo yote pioi, aceite, harína ore rĩ. Ore chijnapo cuchisode aja rĩ: buéyode, áyasadie, buricade ore. Ore chijnapo guebéquedatéode aja rĩ. Ore chijnapo dasagode ayoréo rĩ ujetiga ore tẽrapo ore rĩ.

¹⁴ Enga a ore chojningame uaté jne: –Bedójnarione cucha a e ca ore chajniápo babai jne rĩ. Jé chopo bagúcha orerane ore jnese rĩ. Udore ore bijna, enga jé ore bijnápis ome ua.–

¹⁵ Enga cucha guẽrasórone udore ore, ugúcharanguipíse ore ome deranone cucha ome idáidatéi tuté. Mu ore todo ujeta gajnei pujuyaqueque chise ore to. Jecute idája ore iji. Mu ore poji ejode to rĩ.

¹⁶ Enga a ore chojninga jne: –¡Ja jõõõ! Yosõcopísi jóroque idáidaté cuchábi Babilónia. Uje guidáidaté ueradéjna diríca, enga gajnui tu chequé ueradéjna uje ueradéjnai iguidedie to uje líno orerẽ́ enga uruchachade chichagu iji ñane iji. Uje uaté tujúna dajnápeode uje óro nanganatáguei, jé aja pérladie, cucarané ueradedie ore jnese to.

¹⁷ Mu uaté chunina mu ugúcha dipesé ueradéjnane íjnonguipíse. Que gusu cuchade guẽrasórone uje ore cho dáyugu uaté, mu pangaránone iji uraque dabíode cuco ore chopise dáyugu uaté to, jé aja piésorone ore jnese to. Mu udore que ore cunguésõri uaté to, mu idája ore iji.

¹⁸ Uje ore chimo pioi úyujnanie iji idáidaté cuchábi gai, enga ore chojningame raque: –¿Ja jé qué diquiyaguirase idáidatérique uñeque a, ujetiga cho uaté ome úringa até ome dagúchade?–

¹⁹ A ore popóji uaté ejode rĩ, enga a ore chojninga: –¡Ja jõõõ! Yosõcopísi jóroque idáidaté cuchábi tuté. Uje cucode gachisórone areque yoque gu uaté. Mu uaté chunina mu gajnei pujuyaquéquedaté chejna.–

²⁰ Mu gaté unirisórone uaque á, anínaño uaque ome cucha dacadode udore. Jé aja Jesús iroguipísode apóstoles uaque, anínaño uaque to. Jé aja Dupade uruode atatasórone uaque to, anínaño uaque to. Jé u uaque to uje uacoyo uacajnéngu Dupade, anínañopúsu uaque to. Chamáñaje Dupade cho dajuñame idáidatéi uté gu ipesute gajnaréngone ome danguresórone uaque.–

²¹ Enga yimo Dupade irógode uñai uje ujopíerãque. Enga uté doi enga chisa cucarané cuchabé uje cho ore ugutádode erã́todie cucaranei. Enga doi enga tṍra cucarané tuaté aja yote quedéjnai. Enga chojninga: –Idáidaté cuchábi Babilónia a gajnua tu cucarané tunaque jne, uje yṍra uaté aja yote quedéjnane. Chamáñaje a ca pimópo guidáidaté cuchábi jogonórone cucha jnese jne rĩ iji deréjnane jnese.–

²² Enga Dupade iroi e icatecãraini tu guidáidatéi Babilónia uaté enga chojninga: –A e ca pududigápo ore ijocayade árpai jocarane iji uacajã́ronie jne rĩ, jé aja pubuchugode trompétas, fláutas ore jocarane rĩ. Enga a e íjnonguipíse pisagode iji ua jne rĩ. Enga a ca pududigápo ayorérigo jne rĩ ujetiga ore chijáro cuchárigo iji ua.

²³ Ibijoguipísode u cucha ẽrasórone nanique uje ore cho dedai iji ua. Jé cho barasade udore ore uje chiese daijna cuchape ore to nanique, uje ore jno daringaquéode udore údi aja erámone údode jnese. Mu cuchade udore e chise deruei. Enga e que pimo bajicaradéjnaringo. E que pududigápo bajñamítedatéode rĩ uje uacapéso ome jnacánique ujetiga chisa dacotéraque.–

²⁴ Dupade cho dajuñame guidáidatéi tuté gu isijnaringuéone. Cuchiyi tupúsu uje chujé Dupade anguresórone ore iji erámi údode, enga chujépo uruode atatasórone ore rĩ.