Apocalípsis 17 - Dupade Uruode

Chequé dibéchoquía gajneque Dupade ujuyaquédatéi jne

¹ Unojo quigade enga Dupade irógode uñai uje ore chójnesi doidábode agapiábio aja jnumi, udore uñai chise yu enga chojningame yu: –Juan, boji ti enga ajína yu á. A yingo chequé dibéchoquía tome ua jne uje ore chudute uaté ujnomei iji erámone jnese. Uje uaté charidode u yote quedéjnane. Mu a yingo uaté gajnei pujuyaquéquedaté ome ua jne.

² Enga erámone jogosórone ore eduguéjnane jnese ore cháta raja chequé tuaté ome unganingane. Enga jé chopo erámone unirisórone ore rĩ. Ore chirate chequé tuaté aja isoca gajnaréngone to, enga ore gajnúone u yote pioi yugode uje que ore chiraja cuchárique eruénique ome re.–

³ Enga Dupade iroi jno yúdi aja erãpe eyutiguei iji yenominone uje Dupade Ujopié Espíritu Sánto chingome yu. Enga yimo chequé tuaté uje cháji cuchiso guichaya charumájnai gai. Enga purusarane déji uté gai uje uruode gajnarécho aja Dupade. Enga uté gatoidie gariti, enga uedie chejna yijmanáyone.

⁴ Chequé tuaté iguidé charumájna enga cho eduguejénie ore iguidedie uje ugúcharẽ́ ore. Enga uaté tujúna dajnápeode uje óro nanganatáguei. Tujúnapo cucarané ueradedie rĩ, jé aja pérladie ore rĩ. Uaté chisasi dajopidábia uje óro nanganatagape. Enga cho jetiga isoca gajnarenguipísode jnese irágusupúsu suaté.

⁵ Enga chequé uaté purusãrai pi déji enochai uje pipoguiécho quigode enga chósi te: "Yi tu guidáidaté ujnomerãi i, uje i tu Babilónia. Enga pisoca gajnarenguipísode ipesusórone ore jnese iji erámi tuné ore iradé tu yu aja cuchade udore jnese. Jé cho dibéchoquídie jnese rĩ ore iradé tupo yu rĩ."

⁶ Enga jĩraque yiraja uje uaté cho yote pioi yuguedie. Mu que yote pioi yugué uaté go, mu uaté ũrusoringuei tṍraji Dupade urasade iyojnanie ome. Chamáñaje uaté yugode jiei gu iji Dupade urasade ore, jé iji Jesús adode atatasórone ore. Enga uje yiraja uaté adode udore, enga chajuguipise yaguté.

⁷ Enga Dupade iroi chojningame yu: –¿Gotique gu a uje cuchade udore chajuque baguté? A yo quique cucha pibojmane quigode iji chequé uaté jne, jé iji uaté charipi cuchiso guichayai to uje uté gatoidie gariti enga uedie chejna yijmanáyone.

⁸ Cuchiso guichayai tuté uje bamo iji benominone déji erámi nanique, mu qué íjnoque iji deréjnane unojo. Mu a dopoi guesi jne rĩ iji dayaridi ejo cuchabe uje que eruénique cuse. Mu quique obiréjnai u datoringai tuté jne uje e que qué nijiápo rĩ iji. Mu ujetiga erámone unirisórone ore chimo cuchiso guichayai tuté uje dépoji erámi rĩ, enga a ore tija jnese jne uje diapóji erámi rĩ. Mu itijabáisórone u udore uje que ore íode déji Dupade yugode darujna ao uje churúsãre pucuecaringuei gajnesórone ore íode iji uje cáma pipesute erã́tique nanique.–

⁹ Enga Dupade iroi chojningápome yu rĩ: –Piraguipise yuruode unojo. Jecute adójnachopísa. Uté gatode garitidie qui tu cototé garitidie uje chequé tuaté chácariji udire ore gai.–

¹⁰ Enga Dupade iroi chojningápome yu rĩ: –Uté gatode garitidie qui tupo eduguéjna garitíode rĩ. Chejna yijmanai iji udore ore e ore cha dáringane eduguéjna. Mu uñai iji ore jé qué eduguéjna uté iji deréjnane unojo. Mu uñai cáma di, uje a ore eduguéjna to jne. Mu a díningo garósi jne ome ejoi uté ujetiga eduguéjna.

¹¹ Mu eduguéjna ejópisi a u cuchiso guichayai tuté jne uje déji erámi nanique, mu e que dépoji rĩ. Enga uté a basája dáringárique eduguéjna jne iji eduguéjna bajaque garitíode ore quigade. Enga e gadioque ore iji ti, eduguéjnane udore. U mu garitíode udore ore, a jé uña jne ejopísi tuté. Enga e gare ome uté uje basája dáringai eduguéjna. Mu ujetiga e chejna udore guesi, enga quique obiréjnai a u datoringai jne, ujetiga toi enga ca diapo jne rĩ.

¹² Bajiredie uei udire iji cuchiso guichayai tuté uje chejna yijmanáyone, ore gajnúone u eduguéjnaringo jne uje cáma udore basája dáringáringo eduguéjna. Mu Dupade a guẽratique guedé batiga chojmára jne ome udore ore ujetiga ore basája dáringárique eduguéjna. Enga a jé ore nóna cuchiso guichayai tuté jne aja gaté.

¹³ Enga eduguéjnane udore ore, uje ore chejna yijmanáyone, a ore cho deduguéjna cuchape iji cuchiso guichayai tuté jne.

¹⁴ Enga a ore pésu pocaningai ome Jesús, uje gajnua tu áyasa pẽrapaide chuguéraque. Mu Jesús a sué udore ore gai jne. Chamáñaje pangarádejnai u gu enga sué pangaránone gáyode jnese. Eduguéjna cuchape to enga sué eduguéjnane uñane gáyode jnese to rĩ. Enga uté jorane ore dopísi deduguéjnai tuté uru quigode. Chamáñaje Dupade ajegaite udore ore gu nanique.–

¹⁵ Enga Dupade iroi chatatapo yote quedéjnane quigode ome yu to rĩ. Enga chojninga: –Bamo chequé dibéchoquía iji benominone que, uje cháji yote quedéjnane. Udore qui tu uje uaté adode chise punirone jnese iji erámi údode.–

¹⁶ Enga yicatecãraisṍri tuté Dupade iroque chojningápome yu to rĩ: –Eduguéjna erueminórone udore uje ore gajnunie u uedie uje chejna yijmanáyone a ore chetaguipise chequé dibéchoquía tuaté jne. Enga jé cho cuchiso guichayai uje a chetaguipise uaté to. Enga a ore cugujnáji uaté jne. Enga a ore chejñu uaté iguidedie jne. Enga a ore tagu uaté arágajñunie jne. Iji unojo quigade enga a ore chãrúpo detepídode gai rĩ ujetiga ca diquimópo uaté atique rĩ iji erámone.

¹⁷ Enga Dupade ipesudé ore áyipiedie udire ujetiga ore cháta rágaja cuchiso guichayai. Dupade ijocayaque udore ore gu ujetiga uru diyajmane tocade jne ome ore ipesudode.

¹⁸ Chequé tuaté uje bamo iji benominone qui tu idáidaté cuchátique uje chijocase erámone jogosórone ore eduguéjnane jnese.–