Apocalípsis 16 - Dupade Uruode

Ore chojne pagapiábode uje Dupade ujuyaquéode déji ajei

¹ Enga yudute pibijnacaraidie uje tṍraji Dupade iguíjnai ajé puyaguipísi. Enga chojningame Dupade iroque garitíode ore: –Boyo enga ójneño Dupade ujuyaqueque gajnarénguipísode udore aja erámone uje dosíji agapiábode uje gariti.–

² Enga Dupade iroque bajai jno, enga chojne doidábi agapiábi aja jnumi, enga jĩraque udique gajnaréngone tṍraji ore jnese uje jnani guichayai urusarane déji ore, uje ore chichaga dagataidie aja jnumi iji uté gajnui iquei.

³ Enga Dupade iroque ejoi jnopo rĩ enga chójnesi doidábi agapiábi aja yote quedéjnai. Enga jĩraque nóña enga diquiyojna cuchabe. Enga diquiyojna uaté gajnui tu ujetiga tṍraji ayoré totique. Enga cucha ponáyone ore toi jnese to uje ore déji yote quedéjnai tuté.

⁴ Enga Dupade iroque gadioi jnopo to rĩ, enga chójnesi doidábi agapiábi aja tiedie, sibíjnane ore enga ore chécãrapo re rĩ enga diquiyo ore to.

⁵ Enga yudute Dupade iroque uñai uje gajneque pujuyaquéode ome yodi enga chojninga: –Dupade á, jé bajogate iji deréjnane unojo, enga jé bajogate to iji erámone taningane iquéode. Yocangarádejnai tu ua, enga jé tiógarapísa uje bo bajuñame cucha gajnaréngone ipesungórone udore ore. Uje ueque ua gu ome cucha gajnaréngone.

⁶ Chamáñaje udore ore yuque baruode atatasórone nanique gu, jé aja udore uñane to rĩ uje ore chedupise ua iji dajéode. Jecute jé ore tiógarapísa diquiyojnanie uje basi ome ore ujetiga ore chóji.–

⁷ Enga yudute darai to uje tṍraji gaserani iji Dupade iguíjnai ajei uje chojninga: –Jé ũré arĩ́e, Yocangarádejná. Dupa Pujnuéngaisṍripísi tu ua, enga jé ũrepise ua ome bajiritigade ore jnese.–

⁸ Enga Dupade iroque gagájnia jno enga chójnesi doidábi agapiábi aja guedé edo. Enga e ujopié déji guedé ujetiga ojo dotárenie tagu erámone jogosórone ore ome dáringanie ditaguei.

⁹ Dupade ujuyaqueque cuchábi tuté chujñungu ore gáyode chiẽque, chiẽque jnese. Mu que ore cha dasijnaringuéone. Enga que ore chisi Dupade gai gotique. Mu ore uruode gajnaréchopís aja Dupade. Uje Dupade u mu uje gajnei turásu ujetiga chaquĩ́ra dajuyaquéquedatéode udore.

¹⁰ Enga Dupade iroque garamia jno, enga chójnesiapo doidábi agapiábi aja jnani guichaya bajai charidi te rĩ. Enga jĩraque topié uté uniri jnese iji jnumi. Enga ijnangunújna cuchabé chise urasade ore jnese. Enga udore ore ajúgorodie cho ta-ta, ta-ta ome uraque da-urõsoringuéone.

¹¹ Mu que ore chajni Dupade gai gotique. Mu ore chajo raja dasijnaringuéone. Enga udore ore uruode gajnarécho gaté aja Dupade iji guéode iji gaté uje ipesute ore udigode, aja ore urõsoringuéone jnese múñi.

¹² Enga Dupade iroque chojmaráití jnopo rĩ, enga chójnesi doidábi agapiábi aja tié uje i tu Éufrates. Enga yodi iji tié jĩraque íjnoque. Enga eduguéjnane, uje ore tṍraji guedé garani, ore cho dajere iji tié uaté ome raque.

¹³ Quigade enga yimo nicoré uje tṍraji arócojna guichayai pijnani. Enga yimópo nicorenie uñai rĩ uje tṍraji jnani guichayai pijnani to rĩ. Enga nicorenie uña tṍraji jnani guichayai iroque aringacai pijnani to rĩ. Enga pujopié gajnarénguenie u nicoré gadióguedie udire ore jnese.

¹⁴ Enga pujopié gajnarénguenie udire garanone u Satanás irógode, enga ore ujopié etotiguei cuse ujetiga ore pésu cucha pitijabádode. Enga udire jno, enga ore chicáji erámi údode jnese ujetiga ore chamáta ayoréode eduguéjnane ore aja ñane ome pocaningai yui, uje a tocade jne iji Dupa Pujnuéngaisṍri ojningai uté dire.

¹⁵ "Angáchoi yu. Uje a yṍraji te janipe jne ujetiga ca ayorérique áyipieraque déji yu. Adi u oriechoquírique uje que pirajaque diringárique. Mu pininaquei jogadi tu jne ome udore ore uje niriji ore, uje ore iguidedie dimane iji ore. Chamáñaje a ca ore chimo pajegátigárique ome raque jne gu ome dáringáringo choquíbio."

¹⁶ Enga pujopié gajnarénguenie udire a ore chamáta dabididigode udore eduguéjna aja erámi uté jne uje i tu Armagedón iji hebréode uruode.

¹⁷ Enga Dupade iroque gariti doi enga chójnesi doidábi pagapiábi aja gaté yui. Jec u uje dara ibisógode tṍraji charipi cuchábi iji Dupade iguíjnai ajé gaté puyaguipísi. Enga chojninga: –E yimate cuchade jnese.–

¹⁸ Enga unojo quigade enga ajnorane tṍraji, jé aja cucha ajaramomítedatéi. Enga guéode uruode tõrapóji to rĩ. Enga jnumi tãrarapise ome jnupe tãrarachúquedatéi, uje uté sué jnupe tãrarachugode jnese jec iji erámi taningane nanique.

¹⁹ Enga idáidaté cuchábi Jerusalén dajuque enga péode gadioque ome jnupe tãrarachuque cuchábi tuté. Enga e pucuayagápo idáidatéode iji erámone údode jnese rĩ. Enga Dupade e jnusina idáidaté cuchábi Babilónia ipesute gajnarenguipísode to enga e chopise dajuñame uaté. Uje Dupade ájningaránguipíse ome idáidatéi Babilónia tuaté ome ipesute cucha gajnarenguipísode.

²⁰ Enga jnupe tãrarachuque cuchábi tuté chucuase cototedie jnese iji erámi. Enga que pimópo ore rĩ. Enga que pimópo yote quedéjnane abuedie ore jnese to rĩ.

²¹ Ebe cuchábedie basapóji guéode rĩ, enga basája erámone jogosórone ore gai jnese. Ébedíe udire chojmara chise 40 kílos. Jecute jnanione iji erámone jnese ore uruode gajnarécho gaté aja Dupade uje ujuyaquei que chajire re gu ome ore.