Apocalípsis 15 - Dupade Uruode

Dupade ujuyaqué ejode gariti

¹ Unojo quigade enga yimo cucha pibojma uñai iji gaté uje chajuque yaguté. Enga yimo Dupade iroque garitíode iji gaté uje dimane ore ome Dupade ujuyaqué ejode uje gariti ore. Enga yiraja uje a Dupade ájningai chimate raja guesi ome dajuyaqué ejode udore jne.

² Enga yimo cuchárique uje gajnui u yote quedéjnarique uje pioi nóna ajicaranone iji. Enga yimo ayoréode uje ore chague iji yote quedéjnai uté pijnanai, enga ore ijocayade árpai déji ore jnese uje Dupade gueranome ore. Yojningane u udore ore uje ore sué jnani guichayai, gajnui ore gai. Chamáñaje que udore ore juéga rome jnani guichayai tuté gajnei número to gu ujetiga purusãraque ore ome.

³ Enga ore chirate Dupade iroi Moisés iradé. Enga ore chiradápo Jesús iradé rĩ uje gajnui u áyasa pẽrapáideraque. Enga ore chojninga: Yocangarádejná, Dupa Pujnuéngaisṍripísi tu ua. Enga cucha pitijabácho bapesútedatéode. Pangarádejna cuchape ua ome erámi unirisórone ore, enga basocade ome ore que iyoguérique cus. Mu uome ua enga ũrepise ua ome baruode jnese.

⁴ Yocangarádejna, que uñeque déji ujetiga ca todo ua. Que uñeque dépoji rĩ ujetiga ca chisi babai. Gusu ua gu uje ueguipise ua ome pisijnaringuéone. Erámone jogosórone a ore chichaga dagataidie aja baquei jnese jne, enga a ore chicota ua. Uje ore chiraja gu uje jé tiógarapísa bapesudode udore jnese.

⁵ Unojo quigade enga yimo Dupade iguíjnai ajei gaté puyaguipísi uje chuchẽre dabai iji gaté, uje Dupade uru pirosobádode jogadi tu.

⁶ Enga Dupade iroque garitíode ore tṍraji Dupade iguíjnai ajé puyaguipísi tuté. Enga a udore u jne ujetiga ore chijna ujuyaqueque garitíode aja erámone to jne. Enga ore iguidedie líno enga póroropisi. Que iguínique cuse iji ore. Enga ore chadia dagarubode aja re uje chise ore aróbedie eruéode. Enga óro nanganatáguei.

⁷ Enga gaté unirísõre gagájnione uñai doi, enga chisi ome agapiábode ome Dupade iroque garitíode udore, enga óro nanganatágabí, uje Dupa Eyúgojmai ujuyaqueque gajnarénguipísode irágu ajéode.

⁸ Enga Dupade ingoningájnai, ujopié ore irágu ajé puyaguipísi tuté enga gajnunie u pioi úyujna. Enga que toque ujetiga pibi uté jé aja diri uté ujetiga Dupade ujuyaqueque garitíode tocade jnese, uje Dupade iroque garitíode ore jno údi aja erámi.