Apocalípsis 14 - Dupade Uruode

Dupade iquetade, uje 144 mil ore, ore chicota Dupade ome daradedie

¹ Cuchade unojo quigade enga yajire enga yimo Uté iji yenominone uje uté gajnua tu áyasa chugué. Enga uté cháji cototé gai uje i tu Sión. Enga iquetade, uje 144 mil ore, ore déji uté gari. Enga Uté i, jé aja dai Dupade ore íode déji ore enochade jnese.

² Enga yudute cucha jocarãpídi uje tṍraji guéode enga cho guéode uruode uje que cha daruode. Chopo tiedie jocarane rĩ uje ore cho uooo. Chopo ore ijocayade árpai jocarane rĩ, uje uásejnapise ijocayasórone.

³ Enga Uté iquetade erámi unirísoño udore ore chirate daradé icha iji Dupade charipi cuchábi iquei. Enga gaté unirísõre gagájnione, jé aja pangaránone uje 24 ore, ore chudúdapo ore iradé tuaté to jnese. Mu gusu 144 mil udore ore uje piquetaque ore iji erámi unirisórone ujade, uje ore gajné ore iradé tuaté ujetiga ore chirate.

⁴ Enga 144 mil ore u uje que ore doi punganingárique ome chequé quedéjnaringui. Enga ueque ore ome pisijnaringuéone. Enga ore nóna Uté aja quedéjnane uje uté u gu uje gajnua u áyasa pẽrapaide chuguéraque ome ore. Enga piquetaque ore nanique iji dojode erámi unirísõre ujade ujetiga pẽrate bajade u ore ome Dupade, jé aja ome Uté uje gajnua tu áyasa pẽrapáideraque.

⁵ Enga que purupatáringárique chimo 144 mil udore ore pijnanone. Enga ueguipise udore ore ome pisijnaringuéone jnese iji Dupade iquei.

Dupade iroque gadiógode ore chatata Dupade uruode ome erámone jogosórone

⁶ Cucha dacadode unojo quigade enga yimópo Dupade iroque uñai te rĩ uje chóna tijode iji erámone. Enga chacate ore ome Dupade uru eyúgojmane ujetiga ore changureta enga pucuecaringuei déji ore iji deréjnane jnese. Enga chapuse ore aja iji erámone jnese ome dacajnaquéode.

⁷ Enga uté chojningame ore iji daru uajádode: –Jé angachopísi Dupade é. Beyoi enga acotáyo uté to é. Deréjnai e u gu ujetiga uté chajire uacadode aja quigode. Beyoi enga acotáyopise uté uje ipesute erámi taningane, jé aja yote quedéjnane, sibíjnane ore jnese é.–

⁸ Diga Dupade iroque uñai tṍraji bajai quigade enga chojninga: –Idáidaté cuchábi Babilónia e pujnuéngai é. Idáidaté cuchábi Babilónia e pujnuéngai é. Enga a ca chacadápo erámone jogosórone ore jne rĩ é, ome dasoca gajnaréngone é. Uje que ore áyipiedie jnoji cucha gajnarenguipísode gatuaque é.–

⁹ Diga jĩraque Dupade iroque uñai tṍraji uté quigade enga chojninga iji daru uajádode: –Ajuso uaqueo ome jnani guichaya bajai enga ca asíyo uté gai to é. Ujetiga uacuñeque chisi uté gai, jeoga chichaga dagataidie aja jnumi iji gajnui iquei, enga a Dupade ujuyaquei chise uaque gosi te jne rĩ. Ujetiga uté urusarane déji uaque gosi enochai, jeoga uaque gosi jmanai, enga uté gosi a gajneque Dupade ujuyaquei te jne é.

¹⁰ Enga a ájningaránguipíse Dupade ome ore jne. Enga Dupade ujuyaquei paguté sutabáide gajnesórone u udore ore jnese uje ore chisi jnani guichayai uté gai te é. Enga a garãte obiréjnane u udore ore aja gajño pioi uje tagu iji deréjnane jnese é. Enga que uñeque chapídome é. Enga Dupade, irógode ore iji gaté a ore pañaji udore ore iñosoringuédatéode iji pioi ocaraidie ajei te jne é. Que gusu ore mu a Uté pañaji ore to jne uje uté gajnua tu áyasa pẽrapáideraque.

¹¹ Enga qué jno dabijnane údi enga chojninga: –Enga udore ore iñosoringuéone a ca eruénique cuse jne é. A ca ore iñosoringuéone cho jnaque iji dirode, dejade ore jnese jne é. Chamáñaje ore chisi jnani guichayai, gajnui ore gai te gu é. Enga ore juéga jeta uté i dóji ore enochade gu é.–

¹² Enga jé jno daruode údi enga chojninga: –Jecute Dupade anguresõripísode ore gajnei tu ujetiga ore chidota rome dajnéone pequetingaquéo gatuaque á. Yojningane u ore uje ore doi Dupade ojningane cucha, enga jogadípise ore anguretigai iji Jesucrísto á.–

¹³ Enga yudute puruode uje tṍraji guéode ome yu uje chojninga: –Arúsãre cuchade unojo quigode enga ósi tome: A jé yoco ditijínanguiji Yocangarádejnai anguresórone ore jnese uje ore toina, jé aja uné iquéode.– Mu Dupade Ujopié Espíritu Sánto doi enga chojninga: "Jé u arĩ́e. Chamáñaje ore cho dajñare ome dasagode cucha, enga ore átegoningáne nóna ore to aja gaté."

Dupade ujuyaquei gajnesórone ore gajnúone u úva piránguenie uje acasṍri chijosipise

¹⁴ Quigade enga yajire enga yimo gue abuja pórorojna. Enga yimo jnanírique enga chopise ayorérique uje chácariji gai. Enga ayoi coróna déji gatoi uje óro nanganatague. Enga arámu asicoi déji jmanai enga dimane ome cucha pacade yui ujetiga na.

¹⁵ Enga Dupade iroi uñai dopoi guesi tiji Dupade iguíjnai te rĩ, enga uté catecã́ri gue abuja charipísõri enga chejnapúsu daruode enga chojningame: –Deréjnai e u arĩ́e. Bo enga aquesu cucha pacade iji erámone údode jnese ome boidi arámu asíco. Uje e cuchade timániji gu á.–

¹⁶ Jecute gue abuja charipísõri doi enga chaquesu cucha pacade iji erámone údode ome arámu asicoi enga chijna.

¹⁷ Enga Dupade iroque uñai dopoi guesi te rĩ iji Dupade iguíjna cuchábi uje déji guéode enga chijnapo arámu asíco uñai to rĩ.

¹⁸ Enga Dupade iroque uñai tõrapóji gaserani údi to rĩ iji Dupade iguíjnai uje ujopíerãque uté ome pioi. Enga uté tibidi arámu asicoi isangóri enga chojninga: –Aquesu úvadie ubugode iji erámone údode jnese é. Enga amáta ore aja pijoyapídi te jne. Chamáñaje e timachuguépisi gu.–

¹⁹ Enga Dupade iroi doi enga chaquesu úvadie ubugode iji erámone. Enga chamáta úvadie ore aja ore ijoyapite cuchábi ujetiga pijóya ore iji. Mu úvadie udire gajnúone u Dupade guetesórone ore iji erámone uje ore gajnei tu Dupade ujuyaqueque cuchábi.

²⁰ Enga ore chijose damátadie úvai iji dajoyapídebéi iji idáidatéi guesi. Mu que úva otadi u go uje tṍraji, mu ayoré iyo uje tṍraji. Enga pésu tié uje umarítigai chajni 300 kilómetros, jé basa enga úringai ajedaté chajníji buricade pijnani erã́sori.