Apocalípsis 13 - Dupade Uruode

Juan e chimo jnani guichaya gáreode iji denominone

¹ Yimone cucha unojo quigade enga yiyáji yote quedéjnai pijnanai iji yenominone. Enga yimo uje jnani guichayai tṍraji yote quedéjnai. Enga uté gatoidie gariti. Uedie dépoji rĩ enga chejna yijmanáyone. Uté ayode coróna déji uedie jnese. Enga purusarane déji gatoidie uje uruode gajnarécho aja Dupade.

² Yimoi jnani guichaya uté gajnui u carataque quedéjnai. Enga uté guídade cho yajogue quedéjnanie guídade. Jé basa enga pijnani cho caraté quedéjnanie pijnanone. Enga arócojna quedéjnai ipesute jnani guichayai tuté úringai pangarate ujetiga gajneque cuchade iji erámi jnese. Enga chisi ome dajopié tome jnani guichayai tuté ujetiga chijna.

³ Enga yimo paquesupídi tiji jnani guichayai gatoidie uña enga cho docódode. Cho jetiga ca chapídome gajneri. Mu docódi tuté jĩraque íjnoque. Enga erámone jogosórone ore tijapísa jnese. Jecute ore pésu uté ipotigádode cucha jnese.

⁴ Enga ore chisi arócojna guichayai gai uje uté guẽrate jnani guichayai ujopié tome. Jecute udore ore chisiapo jnani guichayai gai to rĩ. Enga ore chojninga: –Que uñeque déji uje cho jnani guichayai tuté. Enga que qué ducujnuéngaipo uté gai to rĩ ome cutejma ujopiédaté.–

⁵ Enga pujuegate ome jnani guichayai tuté ujetiga chicota re, jé aja ujetiga uté uruode gajnarécho aja Dupade to. Enga Dupade jé guẽrate deréjnane ome uté ome uru gajnaréngone udore ome re. Enga jé ore cho deduguéjna iji uté, jé aja guedosírigo ujetiga 42 ore.

⁶ Jecute jnani guichayai tuté que cha daru gajnaréngone ome Dupade. Mu chujñieta iguíjnai, urasade ore jnese to iji gaté.

⁷ Enga pujuegádapo rĩ ujetiga jnani guichayai cho dajocaningame Dupade anguresórone ore to enga sué ore gai. Enga uté ujopié chise erámi údode jnese. Enga ore cho deduguéjna iji uté iji danirone jnese. Enga Dupade jé juegate deréjnane ome jnani guichayai uté ome udore ore.

⁸ Enga erámi unirisórone jnese ore chopise dadupade iji jnani guichayai tuté. Yojningane u udore ore jnese uje que purusãraque ore íode nanique iji erámi taningai iquéode ujetiga ore gajneque pucuecaringuérique to. Enga darujna aoi tuté gajnesṍri tu Uté uje gajnua u áyasa pẽrapaide chuguéraque ome yoque nanique.

⁹ Ujetiga angoninguite guesaque uacuñeque, angaripísi yuruode unojo.

¹⁰ Gosode ujetiga suru uacabáyode iji soldádode iguíjnai, mu quigade enga a pujuruque udore gosode gai to jne. Adi jé u to ujetiga gosode chujé uaque ome daquesérigo, mu quigade enga a chuque udore ore to jne ome quesérigo. Jecute Dupade anguresórone uaque á, ca oyo caru ome ore jocaningane ome uaque. Mu adotáyo uágaja. Enga ca ayáyo uacanguretigai.

¹¹ Quigade enga yimo jnani guichaya uñai iji yenominone uje uté tṍraji jnumi údi. Uté uedie gare enga cho áyasadie uedie. Mu narare enga uruode cho arócojna guichayai uruode.

¹² Jnani guichaya bajai guẽrate jnani guichaya ejoi ujopié tome ujetiga eduguéjna cuchape to. Jecute uté pota jetiga erámone jogosórone ore chisi jnani guichaya bajai gai jnese, uje e piquetaque docódi tiji gatoi nanique gu.

^13-14 Enga Dupade juegabate deréjnane ome jnani guichaya ejoi uté ujetiga pésapo cucha pitijabádode rĩ iji jnani guichaya bajai iquei. Enga chiroque pioi aja jnumi iji gaté. Enga erámone jogosórone ore pañaji uté ipesudode cucha jnese. Uje erámone jogosórone ore chimo uté ipesútedatéode uje oidé tu jnani guichaya bajai ujopié tome, enga ore chicota jnani guichaya bajai jnese. Mu uté aringaquéo dapesútedatéode ome ore. Jecute doi datéringane rĩ ome ore uje chojningame ore: –Uacapáñañoji uté ujopié. Jecute apéso uté gajnúrique enga oyo uacadupa iji jne. Uje uté u uje quesei imanipídi dóji gatoi nanique, mu que toi ome.–

¹⁵ Enga udore ore doi enga ore pésu jnani guichaya bajai gajnui. Enga jnani guichaya ejoi pésu enga jnani guichaya bajai gajnui narare to. Enga gajnui tuté uruode chequésãre ore uje que ore chisi uté gai to go.

¹⁶ Uté chiroque erámone unirisórone to ujetiga purusãracho ore enochade, jeoga ore jmanai ãrachua. Chapuse ore aja jnese iji erámi údode: jnanione, chequedíe, disiode, ugucharane, jmatágode. Jé u ore jnese.

¹⁷ Enga jnani guichaya bajai ípisi u uje ore churúsãre iji ore enochade, jeoga uté gajnei número u ore urusarane. Ujetiga uñeque chetaque dáringárique purusãraque, enga que toc ujetiga dequẽrate cuchárique ome uté gosi. Que togápo rĩ ujetiga tẽra dagúcharique ome ore.

¹⁸ Que toc ujetiga pirajaque udore quitique ujetiga ca pirajatígadatérique déji gosi. Mu ujetiga déji gosi, enga uté gosi doi enga chejnapise darajatigai aja udore quigode enga jé u jne ujetiga uté gosi chiraja jnani guichayai tuté gosi. Enga quigode u unojo: ayorépise jnani guichayai uté to, enga gajnei número u 666. Enga ípisi tṍraji número udore.