Apocalípsis 12 - Dupade Uruode

Arócojna guichayai jmongarája chequé icarẽ́

¹ Enga cucha pibojmai tṍraji guéode enga chequé. Enga uaté cho daguidéji guedé ojodie. Uaté chuchiéjna guedoside. Enga guédodie déji uaté ayoi coróna enga gariji yirídai.

² Enga chequé uaté ica déji ajei. Enga uaté chisa dabade ome dabi achaminone. Uje e idógosi ujetiga base.

³ Enga cucha pibojma uña tõrapóji guéode rĩ. Enga arócojna guichaya. Charumájna uté. Enga gatoidie gariti. Uté ayode coróna déji gatoidie jnese. Enga uedie chejna yijmanáyone.

⁴ Enga cho ujetiga arócojna guichayai tuté chajuguína guédodie iji jnumi enga péode gadioque, enga cari churuguse guédodie peque chojmarai enga tṍra ore aja jnumi gai. Unojo quigade enga arócojna guichayai cháji chequé icarẽ́ iquei. Gaidi tu gu ujetiga jĩraque tagu chequé abi ujetiga e base.

⁵ Enga chequé abi base enga diyoqui. Enga jĩraque ore choréji abi tiji Dupade iji guéode ujetiga déji Dupade gari iji dayaripi cuchábi. Mu erámone jogosórone a ore eduguéjna uté jne. Enga ujetiga uté e basája dáringárique eduguéjna, enga a ca ajéninga darúrique jne, enga ducunirone jnese iji erámone a ore tangaripísi uté jne enga a ore dopísi uruode quigode.

⁶ Uje e ore jno uaté abi údi aja gaté, enga uaté chayo enga chicáji erãpetarei. Uaté gaidi tu Dupade imani jogate uje e dimane iji iquei. Enga Dupade chirodipise uaté iji te jé aja dirode ome uaté uje 1.260 u.

⁷ Unojo quigade enga Dupade iróquegatéi uje i tu Miguel, irógode ore, ore cho dajocaningame arócojna guichayai, irógode ore iji guéode. Enga ore chujé ñane.

⁸ Arócojna guichayai, irógode ore jnusi jórogui rágome dajocaningai. Mu Dupade iroi Miguel, jorane ore sué ore gai. Enga ore chãraque guéode ome ore.

⁹ Enga arócojna guichayai tuté jiei íode. I bajai tu Ugai. I uñai tupo Dicoré te rĩ. I uñai tupo Satanás te rĩ. Enga uté u uje chãra erámone jogosórone ore jnese. Diga uté patĩ́ora darógode ore uje ore tṍra ore aja erámone.

¹⁰ Enga yudute dara ibisógode iji gaté uje chojninga: –Yoquidupade e chiqueta yógome yocumajósõri Satanás. Enga Yoquidupade e pijoguipis ome dáringai eduguéjna cuchape, enga Dupade utocaidi Crísto e pijoguipise ome erámi uje gajneque cuchade jnese iji. Chamáñaje e ducarãte Satanás uté iji gaté gu. Yocojningai uté u uje jecucha chijnime yocujode Dupade anguresóño iyoguéode iji dirode, dejade ore jnese iji Yoquidupade iquei.

¹¹ Enga jé cho yocujode Dupade anguresóño ore uje ore sué Satanás gai gu dáringai puruque iji Yocangarádejnai Jesucrísto iyoi uje uté gajnua u áyasa pẽrapaide chugué nanique. Adi jec upo rĩ uje ore sué Satanás gai to rĩ gu Dupade uru uréone to uje ore changureta enga que ore chagutu quitique ome darasade. Enga que ore chagutúapo dacuecaringuei rĩ ujetiga ore cho daba datatagode Dupade urúo udore.–

¹² Uje gojñangarãi tuté e chejna dojña bajade guesi enga tibidi gaté, erámi unirisórone ore enga chojningame ore: –Idaité uaque iji guéode é, anínaño uaque é. Uje e ore tṍra Satanás tiji uaquedai te é. Mu jnutiminórone uaque é, iyieja jóroque Satanás yui ome uaque é. Jé aja yote quedéjnane jogosórone uaque to é. Uje dicoré Satanás e basája uáguiji erámone ome dájningadatéode é. Chiraja gu uje eruei e idógosi é.–

¹³ Unojo quigade enga yimo uje ore tṍra arócojna guichayai uté aja erámi. Enga jĩraque uté chajna chequé icamasugué.

¹⁴ Mu yimo iji yenominone uje ore chisi ome arorei cuchábi ujnóngone ome chequé icamasugué tuaté ujetiga chója Dupade imani jogate iji erãpetarei. Ore gaidi tu gu ujetiga idájapise uaté iji dajnasṍri uté. Enga jé ore chṹra uaté ome posode iji sequeré gadióguedie enga peque uñai.

¹⁵ Enga yimo iji yenominone uje ugai tuté chojne dabogoro aja chequé quigade enga ibogoro pésu cutejmai yote dequejnangóri. Ajegaidi tu jórogu ujetiga chequé icamasugué tuaté toi iji uté to.

¹⁶ Mu jnumi chátaja chequé tuaté. Enga jnumi chuchẽre dabijnani gai enga chinire arócojna guichayai ibogoro ipesudi yote dequejnangore gai.

¹⁷ Jecute arócojna guichayai chugúja chequé tuaté. Enga jno enga pésu pocaningai ome uaté ape disi ejode ore. Enga ore u uje angoninguite guesaque ore ome Dupade iroquéode. Ore upo rĩ uje ore pésupúsu Jesucrísto uru uréone quigode uje chatata udore quigode ome ore nanique.

¹⁸ Enga arócojna guichayai cháji yote quedéjnai pijnanai uté.