Apocalípsis 11 - Dupade Uruode

Purusarane unojo ojningane u Dupade pijogúsõre gáreode ore ipesútedatéode

¹ Enga ore chisi ome pidi tome yu, uje ore erã́sori u ujetiga ore chatingara cuchade ome. Enga ore chojninga: –Ayague enga atingara cuchade aja Dupade iguíjnai eruéode. Enga asecãru Dupade icatecãraisórone iji jne uje ore chicota Dupade.–

² Enga ore jno daruode údi ome yu enga ore chojninga: –Mu jé ca atingara cuchade aja ajã́ro guesi to jne iji Dupade iguíjnai. Chamáñaje ore chisi ome ajã́ro guesi tuté ome purása quedéjnane ore gu. Enga purása quedéjnane udore a ore chejna guedosírigo iji Dupade edójnari guidai tuté jne. Enga a 42 guedosírigo jne. Mu a ca ore susípise cuchárique guio iji Dupade edójnari guidai tuté jne.

³ Enga a yiroque yipijogúsõre gárerigo aja ore jne ujetiga ore chatata yuru uréone ome ore. Enga a dirode 1.260 jne ujetiga ore pésu yiroquéode iji ore ujade. Enga a ore chigui bora utatadie jne uje imoi tu uje pujnusiétigai sué ore gai.–

⁴ Enga Dupade ipijogúsõre gáreode udore ore gajnunie déji Yocangarádejnai iquei iji gaté, uje Yocangarádejnai uté u uje gajneque jnumi. Enga udore ore gajnúone uñai u ore acaque gáreode uje ore i tu olívo enga ore gajnúone uñane upo papose pi gáreode rĩ.

⁵ Ujetiga uñeque pota chigócarique ome udore uñeque, enga a jĩraque pioi tṍraji uté pijnani tome ore enga chejnárase uté gosi.

⁶ Enga a pujopié déji Dupade ipijogúsorone udore ore jne ujetiga ore chaquĩ́ra guéode jé iji dirode udore uje qué ore doi Dupade iroquéode iji jnumi. Enga a udore ore ujopié etotiguei cuse to ome yodi ujetiga ore chinoningase enga nóña enga diquiyojna. Enga a udore ore ujopié etotiguei cusapo jne rĩ ome erámi ujetiga ore cho daru noñángone ome jnumi. Enga a jé ore doi dajéningome dajopié cuchabé uaté jne ujetiga tocade ome ore gatuaque.

⁷ Mu ujetiga ore chimate Dupade iroquéode udore iji jnumi enga jé u uje jnani guichayárique tṍraji ejopié tuaté uje que eruénique cuse. Enga jnani guichayai uté a pésõra Dupade ipijogúsorone udore ore jne, enga a sué udore ore gai jne, enga a chujépise ore.

⁸ Enga a ore chinguire ore ajnoquéode iji dajeque dajnanguémei jne iji ore idáidatéi tuté uje ore chujé Yocangarádejnai iji curesei gai nanique. Enga idáidatéi tuté jé gajnui u guidai uje i tu Sodóma nanique. Enga gajnui upo puniri Egípto rĩ. Chamáñaje sijnanguipise idaisórone udore ore gu.

⁹ Dirode a gadioque enga peque uñai jne uje ayoréode ore diguina idáidatéi tuté ujetiga ore chajire udore ore ajnoquéode iji jnumone. Enga a ore tṍraji ducunirone jnese iji erámone, enga ore déji jnese uje ore cãra daruode ome ñane. Enga a ca ore pota jne ujetiga ore chijóchame ore ajnoquéode.

¹⁰ Enga a pududique udore ore ujnomei jne iji erámi jnese uje e ore toi. Enga a pininaquei jogadi tu ome ore enga a ore tẽrája ñane jne ome darasitigade. Chamáñaje Dupade ipijogúsõre gáreode udore, uje ore chatata Dupade uruode ome ore, ore pésupúsu ore ujuredie ica gu.

¹¹ Enga Dupade chiringarápo ore rĩ uje e dirode gadioque enga nóna pei. Enga udore chaguepo rĩ enga ore chajuguipise jnanione ore agutedie uje ore pañaji ore.

¹² Enga Dupade ipijogúsõre gáreode udore ore chudute dajnéone dara uajácho uje tṍraji guéode uje chojningame ore: –Ocho gaté á. Enga jĩraque udore ore chacája gue abuja aja gaté. Enga udore ore umajosórone ore pañaji Dupade ipijogúsorone icoringai aja gaté jnese.

¹³ Jé u uje jnupe tãrarachuque cuchábi chijninguese idáidatéi tuté. Enga jé u uje chijninguesipise guiguíjnane jnese iji idai peque gatébi enga chejna guiguíjnane udore jnese iji. Enga togode iji uté 7 mil. Mu guidai idaisórone, uje ore chapídiji, ore chicota Dupade iji gaté ome dasadodéringadatéi.

¹⁴ E erámone unirisórone ore tṍra paguté sutabáidode cucha gajnaréngone uñai taja daquigade. Mu Dupade ujuyaqueque amiri qué déji enga a jĩraque di jne.

E Dupade iroque garitia chubúchu dabuchui

¹⁵ Enga Dupade iroque garitia e chubúchu dabuchui enga gaté unirisórone ore chudute pibijnacaraidie uje chojninga: –Deréjnai e di uje Yocangarádejnai Dupade, utocaidi Crísto ore gajneque punirone iji erámone jnese. Jecute erámone unirisórone udore ore jnese a ore cho dangarániji Dupade ore iji deréjnane jnese jne.

¹⁶ Enga pangaránone udore uje 24 ore, uje ore chácariji dayaripíode iji Dupade iquei, uje ore chudute ore icotaquéode, enga jĩraque ore chague to enga ore chichaga dagataidie aja jnumi iji Dupade iquei enga ore chisi Dupade gai to.

¹⁷ Enga ore chojninga: Yocangarádejná, yocacaranguipis ome ua uje Dupa Pujnuéngaisṍri tu ua. Yirajágo uje jé bajogate iji deréjnai tuné, jé bajogadápo to nanique rĩ iji taningápisi, enga a jé bajogadápo to jne rĩ ujetiga ãriápo iji jnumi rĩ. Yacãco babai uje bajna bajopiédaté etogue ome erámi unirisórone, enga e ore déji bádi jnese enga e bajnuéngai ore gai.

¹⁸ Ájningarãque erámi unirisórone ore jnese ome ua, mu diri e u ujetiga bájningai tocade. Deréjnai e u uné to rĩ ujetiga ajire togode ore adode aja quigode ujetiga apésu ore quigode. Mu a ẽrája barógode ore jne uje ore chatata baru uréone, jé aja udore ore rĩ uje ore chedupise ua iji dajéode, jé aja udore ore to uje ore cho cuchadatei iji bei. Ujetiga ujnomerãque ore, jeoga ca ore pijoque, mu a jé ẽrája banguresórone udore ore jnese jne. Enga diri e u uné to ujetiga opise bajuñame erámi umajósõripísode to.

¹⁹ Enga jé u uje Dupade iguíjna cuchábi chuchẽre dabai iji gaté. Enga yipáñangoji cuchade pi iji ajei uje Dupade uru pirosobádode pi cajo tu. Enga yimóngo ajnorane iji, enga yudúco cucha jocarã́quedatéi iji, jé aja guéode uruode. Enga jnumi tãrara to enga ebe dipesedie tṍraji gaté to.