Apocalípsis 10 - Dupade Uruode

Juan chimo Dupade iroi uje chisasi darujna ahábi iji gaté

¹ Unojo quigade enga yimópo Dupade iroque ujopíerãi te rĩ uje doi jnumi tiji guéode enga gue abuja dóji ejode. Aquesua dopóji gatoi gai te rĩ. Edodie cho guedé ojodie uje nanganata. Enga otadéjna enga cho ujetiga pioi tṍraji otadode.

² Yimo iji yenominone uje darujna ahábi désiji uté jmanai uje pungaraque. Enga uté chuchiéjna yote quedéjnai ome darída ãrachua. Jeque chuchiéjna jnumone ome darída arasei.

³ Enga uté chejnapúsu daruode enga cho caraté quedéjnanie ajéode uje cho dajé. Enga jĩraque guéode uruode ore chajnai enga cho jetiga guei uru garitíode jé chojmára ore iji jnumi.

⁴ E dimane yu ujetiga yurúsãre guéode uruode udore. Mu yudute darade uje tṍraji guéode uje chojningame yu: –Apógu guéode uru garitíode ore uruode. Enga jé ca arúsãre.–

⁵ Diga yajire Dupade iroque ujopíerãi tuté uje chuchiéjna yote quedéjnai, jnumi ore. Enga chãrai dajmanai ãrachua tiji gaté.

⁶ Enga chojninga: –Dupa Pujnuéngaisṍri u yipijogúsõri uje jé ũrepise yu ome yojñane ome uaque. Enga yipijogúsõri uté u uje ipesute gaté, erámone, yote quedéjnane ore. Ipesudápo gaté, erámi, yote quedéjnane ore jogosórone cucha ponáyo ore jnese rĩ. Jecute yojningame uaque: –E íjnongapo piroditigade rĩ ome Dupade ojningane cucha uje a jĩraque tocade jne.

⁷ Jecute ujetiga Dupade iroque garitia chubúchu dabuchui te jne, enga a jĩraque Dupade ipoguiédedie dáyipiei tocade ome erámone jogosórone ore jne. Uje e áyipie aroi udire uje chingome darógode profétas ore nanique.–

⁸ Enga darade uje tṍraji gaté e catecãrápoi yu rĩ enga chojningame yu: –Boji ti é. Asasi darujna ahábi uje pungarangape, uje désiji Dupade iroi jmainie uje chuchiéjna yote quedéjnai, jnumi ore.–

⁹ Yijose Dupade iroi yui enga yutási darujna ahábi tiji. Enga chojningame yu: –Asasi enga agu. A cho cutérone jne iji babijnani. Mu a anire gai te jne enga a chigogája bajei te jne.–

¹⁰ Enga yisasi darujna ahábi iji Dupade iroi jmainie enga yagúsu. Uneréjna aja yibijnani. Cho cutérone. Mu uje yinire gai enga yajei urõso ome iringótigai.

¹¹ Enga uté chojningame yu: –Bajnei tu ujetiga atatapo Dupade áyipiedie rĩ iji pidai uásejnane, jé iji punire uásejnane rĩ, jé iji ore jogosórone uje ore uruode cãra rome ñane jnese, jé iji udore ore eduguéjna cuchape uásejnane to rĩ.–