3 Juan 1 - Dupade Uruode

Juan chisi Gáyo gai

¹ Purusarane unojo urusãrasõre Juan uyu uje e choquíjna yu. Enga yurusarane unojo gajnengóri u ua, Gáyo á. Yijõrapise ua enga ũrepise yu uje yijnóra ua.

² Yijorámi á, yicatecã́ri Dupade ome ua ujetiga areque ua iji badode jnese. Jé aja bajóningai rĩ. Yiraja uje báyipie areguepise enga bapúja Dupade adode.

³ Yinínapúsu yu ica uje bojode Dupade anguresõre uñane ore tṍraji uáguiji te ica, enga ore chatata ica uje a ca acuta ome Dupade uruode ica uje bapésu, uje babepísi Dupade uru uréone quigode.

⁴ Pininaquédatéi u ome yu uje yabode ujnoméone chise yu uje ore doi Dupade uru uréone quigode jnese.

⁵ Yujoi Dupade anguresõre á, bapesudode ueradipíso uje que ajuseque bojode Dupade anguresõre ore uje ore chise uaque. Cuchiyípisode u ore uje quene ore chise uaque to uje ore tṍraji guidai uñane.

⁶ Udore uñane ore chatata badode iji Dupade anguresórone aquíningane iji uné uje que ajuseque ore enga bajnorapise ore diríca. Yijócha bajei údi ujetiga ore chisápo ua jne rĩ enga jé áta cuchade aja ore, ujetiga ca cuchárique chona ore iji ore quigode erámio. Bagaidi u gu ujetiga Dupade irasique ua ome bacaniratiguéode ome udore.

⁷ Chamáñaje ore gaidode u Jesucrísto iroquéode aja ore ajesúode erámio. Enga que ore chisa ayorérique guẽratique cucha ome raque, ujetiga jé ca uñeque changureta Dupade.

⁸ Jecute Dupade anguresórone uyoque yocajneque posõraquei ome udore ore ujetiga ca ore cho Dupade uru uréone uja uje ore jno údi.

Juan chatata Diótrefes ajei noñángone

⁹ Yurúsãre yurusarane unojo uñane ome bojode Dupade anguresóño uáguiji ta to diríca. Mu Diótrefes chetaque yáyipiedie quigode diríca. Pota dáringárique pangarate gu ome darasade. Yajnei urásu ujetiga tangári yu, mu tagu yuruode aja.

¹⁰ Jecute a yibágui uaque jne enga a yiqueta uté edodie jne ome adode. Uje pésu darupatáringane enga chedo yoque. Mu que gusu udore, mu que chise yocujode Dupade anguresóño ore unétique uje ore di iji uaque. Enga que juéga daguíjnai tome ore. Chetágapo rĩ ujetiga ayorérique uñeque chimesẽre ore enga uñeque chijna ore aja daguíjnai. Charángapo Dupade uruode ome ore rĩ ujetiga ore tangári to iji dojode Dupade anguresóño gari. Enga chijócãre ore.

¹¹ Gáyo á, ca arate dacate gajnaréngone udore. Baradigode urásu cucha arégode jne. Gosi uje pésu cucha arégode enga Dupade gajneque uté gosi. Mu gosi uje pésu cucha gajnaréngone enga que cunguésõri Dupade uje que chiraja Dupade.

Juan chatata Demétrio ate omone

¹² Demétrio que jnoji ore pijnanone uje ore chicota ome ipesute arégode. Enga cucha uréone chisi gai to. Enga uyoque upo to rĩ uje yajógo yógaja uje jnani areque Demétrio. Enga uacarajáyo uje yocatatagode ũrepíso.

Juan urusãraque erueminórone u unojo

¹³ Yuru uñane qué dérasi ome ua, mu a ca yicháji yurusarane jne ome ua.

¹⁴ Mu yipota eti jĩraque yicabíji ua jne. Jé u jne ujetiga yingopísa yuruode udore aja ua ujetiga e yugúcoji ñane gari.

¹⁵ Yajéode u ujetiga Dupade ajesereringai déji ua to, Gáyo á. Bojode Dupade anguresóño ore iji ne ore chingome ua uje unere bei ome ore. Yipótago to ujetiga angome yoquijorane ore iji uaité uje yipótago yimóngo ore to.