2 Timotéo 4 - Dupade Uruode

¹ Yijócha bajei údi iji Dupade, Yocangarádejnai Jesucrísto ore iquei, ujetiga ejna ua aja Dupade iroquéode. Uje a Jesucrísto di jne enga eduguéjna cuchape jne. Enga uté a u jne ujetiga chajire ayoré uecade, ayoré togode ore adode aja quigode jnese.

² Jecute be enga acate ore jnese ome Jesús adode. Ujetiga pangarate ua, jeoga ca pangarate ua ome ore, mu jé ejna ua aja bacajnaquéode udore gatuaque. Ango ore isijnaringuéone aja ore, enga aquĩ́ra ore, enga opo ore quique rĩ. Enga ca bajénique dotã́raja ore ujetiga acate ore.

³ A chise dínique jne ujetiga ca ore tangárapoi Dupade uru uréone rĩ ujetiga pacadique ore ome. Mu a ore chucué pacadisõre tátigo ome raque ujetiga jiei ore. Enga a ore chacate ore ome ore ajegaidode cucha gatuaque.

⁴ A ore cho dedobóya Dupade uru uréone jne, mu a ore tangaripísi dacadisórone ojña bisidétigo jne uje cachi ore ipesucho dacajnaquéode udore.

⁵ Mu ua, enga ajusípise báyipiedie guio ujetiga etoque ua iji bajnéone cucha dacacho jnese. Ujetiga cucha gajnarétigo yore babai iji bagaidode Dupade iroquéo, mu adota ua ome cuchade udore jnese. Enga ajnusi ua ome bagaidode Dupade iroquéo ujetiga amánaja jnumi jne uje bacate ore ome piquetangóri Jesucrísto adode.

⁶ A yajnui tu cuchiso pẽrapáitique jne ome Dupade. E idógosi gu ujetiga ayoréode ore chujé yu.

⁷ Cho ujetiga yugúsiji pocaningárique gai uje yiji Jesús ujnomé ueradéjnai údi aja erámi. Mu e yejna yajnei pocaninga tuté guesi. Cho to ujetiga yugúsiji pigajñúraque gai rĩ uje yipésu Dupade iroquéode. Mu e yejnapo pigajñua tuaté guesi te rĩ. Enga yanguretigai ome Dupade jé jogadípise yu, jé aja deréjnai tuné.

⁸ Jecute dimane yajnetique yayo nanganataque jne iji Dupade idai ome yúringai ayoré ate ujñapetaque. Enga Yocangarádejnai tuté uje ũrepise ome dajirigode yocacho, uté u jne ujetiga chisi ome yajnetique yayo ome yu jne iji daríringárique dire. Mu que gusu yu ujetiga tẽrája yu jne. A tẽrapója dajnorasórone ore jnese rĩ uje ore jnatupúsu diringai yui.

Páblo utoquéode u unojo ome Timotéo

⁹ Timotéo á, acuepise basocárique jeta jĩraque abágui yu.

¹⁰ Démas cha yu gu. Chamáñaje ipotigádode u erámi jogonórone cucha gu. Enga jno enga chicáji Tesalónica. Enga Crescente chicáji Galácia. Jé basa ga Títo chicáji Dalmácia rĩ.

¹¹ Gusu Lúcas uje déji yari iji ne. Jecute acué Márcos, enga nóna ua aja ne jne. Enga Márcos u jne ujetiga cháta yisagode aja yu jne.

¹² Yiroque Tíquico aja ore idai Éfeso diríca.

¹³ Ujetiga acáji yu enga ajnoque yiguidé jne uje yijíñome Cárpo iguíjnai ica uje yiji iji Tróas. Ajnóngapo yigode darujna aode to, enga cuchiyi tupúsu yurusarane ujetiga ajnóngapo ore aja yu jne rĩ.

¹⁴ Guebéode ipesungóri Alejándro uté adode gajnarenguipíso ome yu diríca. Mu a Yocangarádejnai doi dasocáringome uté jne ome ipesudode udore.

¹⁵ Enga ajuse beo ome uté to. Chamáñaje chetaguipise yocacajnaquéode ome Jesucrísto gu.

¹⁶ Uje yĩrarare yibai iji taningai nanique iji eduguéjnane iquei, enga que Dupade anguresónique uñeque cháta raja yu nanique. Mu ore cha yu jnese. ¡Mu yipésupú enga ca Dupade cho dajuñame ore ome udore, jõ!

¹⁷ Mu Yocangarádejnai que cha yu to nanique. Enga chisi ome detotiguei tome yu ujetiga yacate purása quedéjnane ore ome adode jnese. Enga chãraque yu ome yúringárique chuque to.

¹⁸ Enga a jecucha doi enga chãraque yu iji yajnetígo cucha gajnarécho jnese jne. Enga a suse yio jne jé aja ujetiga yise uniri tiji gaté. Beyoi enga jecucha yicotágo Dupade iji deréjnane jnese ome ingoningájnai. Amén.

Páblo irasitigade erueminórone u unojo

¹⁹ Angoma yu aja Prísca, jé aja abai Aquíla. Jé aja Onesíforo jogasui ore jnese to rĩ.

²⁰ Erásto cháji Corínto diríca. Enga yijíome Trófimo iji Miléto uje ejnarétaque diríca.

²¹ Acuépisi basocáringome ujetiga acai yóguiji ne iji esoi yui te jne. Eubúlo, Pudente, Líno, Cláudia, jé aja yocujode Dupade anguresóño jnese ore irasique bei to.

²² ¡Yipésupú enga Yocangarádejnai Jesucrísto nóna ua aja quedéjnane gatuaque, jõ! Enga Dupade chatapísaja uaque jnese to, jõ. Amén.