2 Timotéo 3 - Dupade Uruode

A gajnarenguipise erámi unirisórone adode jne iji Jesús diringai yúode

¹ Yajéode u ujetiga araja to uje gajnareque Jesús diringai yúode jne.

² Enga erámi unirisórone a dicotárechoquí ore jne. Enga a ore chijnorapise plátadie jne. A jé ore osorane u raque jne. Enga a ore uruode gajnarécho ome Dupade. Enga disírigo a ca ore tangárapoi daníngo jne rĩ. Enga a ca ore chacãrápo dojórique ayoré gánique jne rĩ ome cuchárique. Enga a ca ore áyipieraque dépoji Dupade atique rĩ.

³ Enga a ca posõraquérique dépoji ore ajénique jne rĩ ome dojórique ayoré. Jutareque ore, enga ore ipotigué gajnaréngone a sué ore gai gatuaque jne enga a jno ore údi aja pisijnaringuéone gatuaque to jne rĩ. A sijnanguipise ore ome dojode ayoréo, enga a ca ore susípise dojode ayoréo guio to go. Enga pate arégode guetesórone ore to rĩ.

⁴ A dequetangóño ore enga a ca ore susípise cuchárique guio to jne. Mu a ore chicota raque jne ome dáringáringo ayoredatéo. A ore ucueguipísode u erámi jogosórone cucha gatuaque uje chiese pininaquei garani tu cuchade udore ome ore. Mu a ca ore chucuepísi Dupade gotique to ujetiga ore chiraja atígo.

⁵ A cho jne ujetiga udore ore gaidode u Dupade adode to, mu a ore chotigase Dupade uruode iji dáyipiedie, jecute que ore chécãre datique. Jé ca áta ua aja jnanione udore ore to ujetiga ore adode u udore ore adode.

⁶ Enga a jnanione udore uñane chisõre iji guidai údode, enga ore chacája chequé áyipie eyúguedie iguíjnane ome daringaquéode. Uje chequedíe udire ipotigué gajnaréngone jno ore údi aja pisijnaringuéone gatuaque.

⁷ Chiese chequedíe udire potapísa ore chiraja cuchade, jecute ore chejna rángaja pacajnaqué quedéjnane gatuaque, mu que ore áyipieraque dépisiji cucha urénique gotique ujetiga ore chiraja udore quigode.

⁸ Yirajágo uje jnani bajade Jánes, Jámbres ore chijna pujopié quedéjnanie nanique enga ore u uje ore chetaque Moisés acajnaquéode to nanique. Enga jé adi tu to jnanione udore iji deréjnane unojo, uje ore chetaque Dupade uru uréone úringane patatacho to ome darasade. Áyipie eyuque udore ore enga que panguretigai dépisiji ore ome Dupade gotique.

⁹ Mu a ca cuchárique tṍraji jnanione udore acajnaquéode jne. Chamáñaje a jĩrique pirajaque ore ome erámi uje áyipie eyuque udore ore. Jé adi tu nanique ome Jánes, Jámbres ore uje ore dojnóngaja Moisés nanique.

Páblo cho Timotéo quique iji darusarane eruei

¹⁰ Mu Timotéo á, ua u uje bepísi yacajnaquéode quigode, enga barate yu aja yadode, yigaidode udore ore jnese uje yiji Dupade iroquéode. Bamo yadode gu uje ũré yu ome yanguretigade, yijnoraquéode ore ome Dupade. Bamo to uje que yacho yiji Dupade iroquéode enga que yagu yejórique ome yujode ayoréo to. Mu yidota yu ome yajnéone cucha dacate gajnaréngone jnese.

¹¹ Baraja uje ore cho damajo yu enga yo yiba yatatagode Dupade urúo gatuaque. A e barajapise to uje que ore suse yio go iji ore idáyode Antioquía, Icónio, Lístra ore, mu gajnarenguipise ore adode ome yu iji guidáyode udore jnese. Mu Yocangarádejnai chijnime yu iji ore ujuyaquéode udore jnese.

¹² Mu jé ũrepise yu ome unojo: ujetiga Jesucrísto anguresónique pota dopísi Jesús adode, enga jé basa a erámi unirisórone cho damajo uté gosi jne.

¹³ Mu arapatáquechoquíode, sijnángone ore a ca ore chibéro rome date gajnarenguipísode. Mu a ore isijnaringuéone chajnera dádi ome ore jne. Chamáñaje Satanás ãraque ore, enga jé basa ore chãra dojode ayoréo to.

¹⁴ Mu jé adota ua iji Dupade uru uréone uje pacadique ua ome nanique. Chamáñaje que potigayaquérique déji ua ome udore úringane ũréo nanique gu. Barajápo bacadisórone úringane ũréo to rĩ.

¹⁵ Jé ũré yu uje baraja ore urusarane Dupade urúo jé iji báringai disi nanique. Enga Dupade uru uréone udore upúsu uje pésu gosi úringai áyipierãque, enga udore u to uje imanique gosi aja úringai piquetaque to uje changureta Jesucrísto.

¹⁶ Dupade u uje chisi ome daruode ome purusãrasórone udore ujetiga ore churúsãre quigode. Jecute yocangúroméone urásu Dupade uruode udore ome yocacajnaquéode jnese. Ujetiga gajnareque gosi adode, jeoga cho paraque ome datique mu yocangúromei urásu Dupade uruode ujetiga yaquírango gosi, jé aja ujetiga yoco uté gosi quique. Jé u to ujetiga yoco pisoca omone quitígo ome yocujórique ayoré ujetiga uté gosi pota doi Dupade adode.

¹⁷ Yoquigaidi u gu ujetiga yocujode Dupade anguresóño ore chirajapise Dupade uruode quigode, enga ore chirajápo dasocáringome dátegoningáne jnese rĩ.