2 Timotéo 2 - Dupade Uruode

Páblo cho Timotéo quique ujetiga chacãra raja jnacare jõcaratai uje doi Crísto adode

¹ Yabi á, ajnusi ua ome Dupade gueranone cucha omío uje yocajnecho udore uje yanguretágo Jesucrísto.

² Uje yacate ayorébuode ica, enga badute yacajnaquéode quigode to. Jecute be enga atata yuruode udore jnese ome bojode ayoréo uñane uje jé ũré ore to ome danguretigai ome Jesucrísto. Bagaidi tu gu ujetiga udore ore jno enga ore chajnerame pacajnaquéode udore ome dojode ayoré uñane to rĩ.

³ Enga adota ua ome báringárique ducañerájma ujetiga bepísi Jesucrísto iroquéode to. Enga bajnui tu jnacare jõcaratátique uje que chagutu rome pocaningai yúrique.

⁴ Uje jõcaratade ore déji dajocaningárique gai enga que ore áyipieraque dépoji daguíjnarique, dajogasúrique ore rĩ, mu ore áyipiedie jogadípise dasuté áyipiedie.

⁵ Adi jé u to ome uté gosi ujetiga ore déji dajñamitique gai. Ujetiga ca doi dajirisórone áyipiedie quigode enga a ca pisi uté gosi to jne.

⁶ Isocai jé u ome ayorérigo uje ore pésu dejnane. Ore isi bajai urásu uté gosi uje que chacho pésu dejnane uje diga e timate ore acade cucha.

⁷ Jé ca báyipieraque jnoji yojningane unojo cucha. Enga Yocangarádejnai a chingo unojo quitígo aja ua jnese jne.

⁸ Ca báyipieraque jnopóji Jesucrísto rĩ uje jnani bajai eduguéjnai David ape disi ejo. Uje toi mu Dupade chiquetápo rĩ iji itoringai. Uté ujnomé ueradi tu uje yacate yocujode ayoré ore ome, ujetiga piquetaque ore ome uté to.

⁹ Yidota yu ome ore ujuyaquéode udore jnese ome yu uje yatata Crísto adode. Enga pujurúgai yu to gu yatatagode udore. Mu que gusu uje ore suru yibai mu ore chigaru yu to ome ojnaquérodie enga ore cho pisijnaringuéone ipesungóri iji yu rĩ. Mu que pujurúgai Dupade uruode go.

¹⁰ Jecute que yimíninga yúringai ducañerájma go. Yigaidi tu gu ujetiga Dupade ajegaidode ore changureta Jesucrísto to jnese enga piquetaque ore ome Dupade to. Enga a ore gajneque Dupade ingoningájnai to. Uje Dupade átegoningáne udore que eruénique erãpe cuse go ome dajegaidode ore jnese.

¹¹ Jé ũrepise yu ome unojo: Ujetiga yipatíorango Jesucrísto uté enga jé basa ga yiquecágopo ome uté rĩ.

¹² Ujetiga yejnárejo yógome uté adode, enga a uté ujode eduguéjna uyoque to jne ujetiga chijna dáringai eduguéjna cuchape aja erámi tuné jne. Mu ujetiga yojnijome yocujórique ayoré: "Que yirajágo uté go." Enga a uté doi yoquisocai tuté to jne enga a chojninga jne: "Que yiraja udore ore to."

¹³ Ujetiga ca yidotágo yóguiji uté adode, mu uté que chécãre datique. Chamáñaje que toque gu ujetiga doi enga chinoningase dáyipieraque. Jecucha ũrepise ome uruode gu.

Cucha ueradi tu uje yucuegoi yocúringane Dupade iroque imeserãque

¹⁴ Opo barasade ore quique rĩ iji Yocangarádejnai iquei, ujetiga ca ore chicadígui unojo: ujetiga ore cha dabotaqué bisidégode ome ñane. Uje cachi ore botare ñane ome puruode quigode, enga que cuchárique tṍraji ore ibotaquéode udore gotique. Cachi ore ujode Dupade anguresóño tangári ore enga e que urénga ore tangárapoi Dupade urúpisode rĩ.

¹⁵ Enga acuepísi basocáringome ua ujetiga Dupade irasiguipise badode jnese gatuaque. Enga bajnui tu ayoré pirótique uje que chajéngome datique go iji darósonique iquei. Uje cucha ueradi tupúsu ome ua ujetiga edu Dupade uru uréone ome bacajnaquéode jnese, enga jé ca écãre udore quitique.

¹⁶ Enga etaque dara bisidégode jnese uje cachi udore garani u erámi tuné. Enga jnanione ore jnese uje ore gaidode u dara bisideque jnutiminórone udore ore chicai ti yui ome Dupade adode, enga chajnera dádi ome date gajnaréngone udore.

¹⁷ Enga ore acajnaqué bisidégode udore jé ate uje chajnerame re, chajnerame re. Enga gajnui tu dequejnarétique uje tagu ayorérique enga que íjnoque to go. Adi tu ome Himenéo, Filéto ore.

¹⁸ Bamo uje ore cha tangári Dupade uru uréone, enga ore chacate darasade uje chiese togode e ore niji iji datoringane nanique. Enga yocujode Dupade anguresóño uñane ore changureta ore acajnaqué tágode udore, enga ore anguretigai ome Dupade uruode chicai udore yúode.

¹⁹ Mu que pumuchayaque Dupade ojningane cucha. Uje chojninga: "Yocangarádejnai chiraja danguresõre ũrepísode." Chojningápo rĩ: "Gosode uje ore cho Crísto anguresõre iji re enga ore gajnei tu ujetiga ore chetaque pisijnaringuéone jnese ome raque."

²⁰ Que gusu pagapi ueradode uje déji ayoré atai iguíjnarique uje ore ipesucho ore iji óro, pláta ore. Mu pagapi gajnaréngone déji to uje ore ipesute ore iji poridie, dachabéode ore. Mu quene ore chijnime pagapi ueradode ome dajñamini dire. Jé basa ga ore chijnime pagapi gajnaréngone iji dirode jnese uje íjnoque ore ajñaminone iji.

²¹ Ujetiga yipótago yoco pagapi ueradode enga yicoi enga yiyágo pisijnaringuéone jnese ome yoque. Enga Yocangarádejnai Jesucrísto angúroméone u yoque jne ome daroqué obiréjnane. Enga Crísto agutíyamánone u yoque to jne ujetiga dimane yógome yocátegoningáne jnese.

²² Be enga ayome jnacarode ore gajnéone piboqueréringa. Mu ejna ua aja báringai Dupade anguresõre ujñapetaque. Yojningai u ujetiga angureta Dupade, enga ajnóra bojode ayoréo, enga bajei cho sere ome ore jnese. Enga áta ua aja Dupade anguresórone udore ore uje ore chedu Dupade iji dáyipiedie to, enga ore chutṍri Dupade ome raque.

²³ Enga jé ca angári dara bisidégode. Uje cachi jecucha pibotaquéode garanone u darade udore gu.

²⁴ Que Yocangarádejnai ajéode u ujetiga irógode ore cháta raja udore ore to uje ore botare ñane. Jé basa ajegaidi u ujetiga paraque ore ome dojode ayoréo ore jnese, enga ca ore narañime ore adode uje ore chacate ore ome Dupade uruode.

²⁵ Cucha ueradi u to ome Yocangarádejnai irógode ore ujetiga ore cho quique angoninguite parigode mu ore susápo daruode quigode guio ome ore. Enga ore changureta Dupade ome ore ujetiga chécãre ore áyipiedie quigode enga ore chiraja to uje Dupade uruode u uréone.

²⁶ Enga socaseti ore changureta Dupade to, enga ore chayome Satanás. Uje bamo gu uje Satanás igarique ore nanique gu, enga que togápo ome ore rĩ ujetiga ca ore doi Satanás áyipiedie.