2 Timotéo 1 - Dupade Uruode

¹ Páblo uyu enga yurúsãre yurusarane cárta ome ua, Timotéo á. Jesucrísto iroguipísode apóstol uñai u yu uje Dupade ajegaite yu ome udore gu. Dupade iroque yu ujetiga yatata Jesucrísto adode ome yujode ayoréo ore ujetiga ore changureta uté enga ore gajneque pucuecaringué eyúgojmai to uje Dupade chichaga aja yoque nanique.

² Timotéo á, cho ujetiga yabipise ua. Jecute yajéode u ujetiga Yocai Dupade, Yocangarádejnai Jesucrísto ore chatapísaja ua, enga ore chosõre ua, enga ore chisi ome pajesereringai ome ua to rĩ.

Páblo chingome Timotéo ujetiga chejna raja dasagode Dupade acho

³ Que yagutéraque cho jora ome Dupade go uje yiji iroquéode. Enga yisocai jé u yocai cásodicáite jnani bajaque ore adode uje ore doi Dupade iroquéode to nanique. Jecute yacaranguipísome Dupade ome unojo enga jecucha ga yujnusina ua to iji dirode, dejade ore jnese uje yicatecã́ri Dupade.

⁴ Que jnoji yajénique uje Dupade chirarese ua nanique uje yoco jmíti, jmíti ome ñane. Jecute yajéode u ujetiga yicapóji ua rĩ. Adi tu ujetiga yajnerame yininaquei iji bari.

⁵ Que jnoji yajénique to uje jé ũrepise ua ome banguretigai iji Dupade. Bacode Lóida, baté Eunice ore changureta Dupade bajaque nanique, enga yiraja uje jé bo ore ome ore anguretíga uréone to.

⁶ Jé yo baquique ome barajatigade ome bagaidode Dupade acho, ujetiga jé bo udore údi gatuaque. Chamáñaje Dupade tẽrája ua ome barajatigade udore gu nanique uje yicháji yijmainie aja babai enga yicatecã́ri Dupade ome ua.

⁷ Enga baraja uje Dupade que chisi ome pisadodéringárique ome danguresórone uyoque go, mu guerani tu picasitigai tome yoque. Enga guerani tupo pijnoraquei tome yoque rĩ, jé aja petotiguei ujetiga yidotágo yógome yoquipotigué ayoréode.

⁸ Enga ca agutu ua ome ujetiga atata Yocangarádejnai adode ome ore. Enga ca ajéngopome yu to rĩ uje ore suru yibai. Bamo uje yibai u Yocangarádejnai uté gu. Mu apésu bajnepítigo to ome pujnomé ueradi úringai patataque ome Jesucrísto, ujetiga uñéngo ore chise dáringáringo piquetaque to. Ujetiga ejnáreque ua jne ome batatagode udore marínga, a Dupade chisi ome picasitigai ome ua jne.

⁹ Dupade chiqueta yoque enga tibidi yoque aja re ujetiga urasapísode u yoque. Enga que yoquipesute ueradode u gotique uje Dupade chiqueta yoque gu udore. Úngare, chiqueta yoque gu uje áyipiedie u udire nanique uje cáma erã́tique cus. Chamáñaje chijnóra yoque enga pota cháta yógaja dajnacari Jesucrísto to.

¹⁰ Mu quene Dupade chingo dajnoraquei aja erámi uje Yoquiquetangóri Jesucrísto díji erámi. Enga Jesucrísto uté u uje sué pitoringai úringai pitoringa gai. Enga u to uje chijñate yoquibai ujetiga yirajágo pujnomé ueradi quigode uje garani tu Dupade enga yico pucuecaringué eyúgojmai ome yoque to.

¹¹ Dupade ajegaite yu ujetiga iroguipísode apóstol uñai uyu to. Enga chiroque yu aja purása quedéjnane uje que judío ore to go ujetiga yacate ore ome Dupade áyipie omenie quigode to.

¹² Mu yo yiba yatatagode udore, mu que yibéro yu ome go. Enga que yajéngome uje pujurúgai yu. Chamáñaje yiraja yangureni gosi te gu. Enga que potigayaquérique déji yu gotique ome yangureni tuté. Yiraja gu uje ujopié déji uté ujetiga susípise cuchade guio jnese uje noñome iji yari ujetiga yujuse ore guio, jé aja diri tuté ujetiga diapo jne rĩ.

¹³ Jé ejna ua aja yacajnaqué uréone uje yacate ua ome udore nanique. Ejnapo ua aja banguretigai to rĩ, bajnoraquei ore. Chamáñaje Dupade tẽra yógome cuchade udore gu uje yanguretágo Jesucrísto.

¹⁴ Bamo uje Dupade changureta ua ome daroquéode nanique. Jecute ejna ua aja bajnéone piroquéo udore. Enga yocaríjogoto Dupade Ujopié Espíritu Sánto a chátaja ua ome udore jne.

¹⁵ Baraja uje Ásia jogonórone ore cha yu jnese, enga Figélo, Hermógenes ore cha yu to rĩ.

¹⁶ Mu yajéode u ujetiga Yocangarádejnai chosõre Onesíforo, jogasui ore. Chamáñaje Onesíforo pésu yininaquei gatuaque gu enga que chajéngome yúringai pujurúgai.

¹⁷ Uje díji Róma enga jĩrique chucué yu, enga que cha chucué yu jé aja uje chise yu nanique.

¹⁸ Enga yajéode u ujetiga Yocangarádejnai juéga dosongaquéode ome uté to iji diri tuté jne ujetiga diapo jne rĩ. Baraja gu uje jecucha chátaja yoque to icaite rĩ uje yugúcoji Éfeso to.