2 Samuel 8 - Dupade Uruode

David doi pocaningai ome israélgosode umajosórone jnese nanique ga Dupade chisi ome úringai pujnuéngaisṍre ome uté

¹ Iji udojo quigade ga David sué filistéogosode ore gai jnese. Uje David chachẽre ore iji uté ga cho jetiga chijna ore etotiguebi iji ore gari ga que filistéogotique chisa dejóringome David gotique.

² Ga David suépo moábgosode ore gai to rĩ. Ga chiroque uñane aja jeta ore chijnoque docórodie ga pésu ore jochai ga David cãra ore jogadode ome ñane ga ore jogadode gadioque. Ga David chiroque darógode aja ore jogate gárode jeta ore chujé ore, ga ore chicha jorane aja diri jeta ore cho daróguiji ore to. Ga David ore isagode udore moábgoso jecucha ore cho doré gatuaque ome David.

³ Ga sóbagosode ore eduguéjnai uje i tu Hadad-ezer chicárasiji dejna casodé ore idáyode uje déji yote quedéjnai Éufrates edúdi. Uje chudute to uje que ore tangári uru quitique, jecute dorási dajocaningai ome ore, mu David tṍraji te ome ore ga socárome ore iji uté. Ga jnani bajai Rehob ujnacari u sóbagosode ore eduguéjnai Hadad-ezer uté nanique.

⁴ Enga David chisa sóbagosode ore isoldádode to ga isagode batigai iji buricade orusórone ore chise 1.700, jé basa ga diguijnutíode ore chise 20.000 ore. Ga cho daróguiji dasagode udore ore to. Ga chibéro buricade guídogorodíe uje ore adíja udore aja guebéquedatéode. Mu cho dajnéngu guebéquedatéode uje chise 100, enga chucué burica omipísode iji buricade ujade jeta chadíja guebéquedatéode udore.

⁵ Mu síriagosode ore chudute sóbagosode ore eduguéjnai Hadad-ezer ujnomei uje David ore doi pocaningai ome ore ga ore sué ore gai. Enga jé u nanique uje ore tṍraji dedáidatéi Damásco ujetiga ore chátaja dajorane udore ore. Mu David ore sué síriagosode udore ore gai to, ga ore yugode iji ore chise 22.000 iji ore nanique.

⁶ Ga David chiroque dasoldate uási aja síriagosode ore idai Damásco yui. Ga ore chirote ore idai údode jeta jé ca síriagosode ore pésapo dasoldátique to rĩ. Ga síriagosode jecucha ore cho doré ome David to. Ga Pangarádejnai Dupade chisi ome David úringai pujnuéngaisṍre ome jé aja quitígo erámio jnese.

⁷ Ga David cho dajnéngu sóbagosode ore eduguéjna cuchábi Hadad-ezer gajné chequécadaté gáredie uje irógode jecucha ore chicháji uté iquéode gatuaque. Enga orerẽ́pise uté gajné chequécadaté udire to uje óro uéguei gu. Ga David jno udire údi aja Jerusalén nanique.

⁸ Ga David chase ore eduguéjnai iguíjnane ajéode iji guidáyode uje íode u Béta, Berotai ore ga cho dajnéngu sóbagosode ore eduguéjna cuchábi Hadad-ezer ugúchade uñane to rĩ uje pipesucho iji guebeque orerãi uje i tu bronce.

^9-10 Uje hamátgosode ore eduguéjnai uje i tu Toi chudute to uje David sué sóbagosode ore eduguéjnai gai uje i tu Hadad-ezer, ga chiroque dajnacari Joram aja David yui jeta chijnoque dayé gueranone cucha ome David. Irasique David gu uje David sué umajosórone gai que. Uje sóbagosode, hamátgosode ore yuque uñane to ica. Enga ore eduguéjnai uje i tu Toi gueranone u óro, pláta, bronce ore ome David.

¹¹ Ga David chicha dejnane ayoré ore gajnéone cucha orerã́cho aja Pangarádejnai Dupade iguíjnai ajei, jé aja ore eduguéjnai Toi gueranone cucha to. Ga David tẽrame Pangarádejnai Dupade gaté.

¹² David guejnane puníño u udojo nanique: Edom unirisórone, jé aja Moab unirisórone ore, jé aja Amón unirisórone ore, jé aja filistéogosode ore, jé aja amaléquegosode ore rĩ, jé aja sóbagosode udore uje ore eduguéjnai i tu Hadad-ezer nanique, uje jnani bajai Rehob ujnacare uté nanique. Uje David sué punirone udojo unirisórone ore gáyode nanique ga chisi ome ore ugúchade ome Pangarádejnai Dupade.

¹³ Ujnomeránguipíse David nanique. Quene chajni to iji dajocaningai uje doi edómgosode ore iji uté, enga dopoi edómgosode uñane to rĩ uje ore déji turéjnai uje i tu Echoi ga chejnápise ore iji uté to ga yugode ore chise 18.000 nanique.

¹⁴ David noñome dasoldádode iji edómgosode ore unirone udore jnese ujetiga ca togome edómgosode ujetiga ore chijnime rágome israélgosode ore jmainie. Jecucha ate nanique uje Pangarádejnai Dupade chisi ome David úringai pujnuéngaisṍre ome gatuaque iji jocaningane jnese.

David jorane eduguéjna ore íode u udojo uje ore chátaja ome jocaningane nanique

¹⁵ Ga David eduguéjna parágome darasade israélgose ore ga ũrepise ome ojningane cucha jnese ome darasade ore. Enga que cho dajuñame darásarique bisidec.

¹⁶ Ga David isoldádode ore eduguéjnai u Joab nanique ga David nero Sárvia ujnacare uté. Ga David iroguipísi cuse to uje urúsãra David, ujode eduguéjna ore áyipiedie quigode, ga uté i tu Josafat, ga jnani bajai Ahilud ujnacare uté to.

¹⁷ Dupade iguíjnai añerasórone ore déji David ore idai to uje ore isai jé u ore guẽrapáidode cucha ome Dupade iji uté, ga ore íode u udojo: Sadoc u uñai, uje Dupade iroque uté dai to nanique ga i tu Ahitob; ga Ahimelec upo uñai te rĩ, uje uté dai Abiatar u Dupade iroi to nanique. Ga David iroi cuse uje urusarane u David uru quigode ga chedu udojo uje churúsãre, ga uté i tu Seraías.

¹⁸ Ga David ejode irodisõripísode ore déji uje ore jõra David aja quedéjnane. Ga udore ore eduguéjnai cuse uje chiroque ore gaté ga uté i tu Benaía uje jnani bajai Joiada ujnacare uté nanique. Ga David cho eduguéjna iji dabode ore to nanique jeta ore chajire israélgosode ore yui to.