2 Samuel 7 - Dupade Uruode

Dupade chisi ome daru iyiejájnane ome David ujetiga cháta cuchade aja gatuaque

¹ Uje David iguíjna cuchábi e pimanique nanique, enga que áyipieraque dépoji pocaningárique rĩ uje Pangarádejnai Dupade e chisi ome úringai pujnuéngaisṍre ome gu ga e sué damajosórone gáyode jnese iji daniri ejode.

² Enga chojningame Dupade uruode júsõri uje i tu Natán: –Gajnareque ome yu uje yiguíjnai querúpise ga pipesute uté iji poridie uje íode u cédro, jé basa ga Dupade uruode pi cajo chácariji iguíjna cárpai údi.–

³ Enga Natán chojninga: –Jé be báyipie quitígo jeta ueracho ome Pangarádejnai Dupade uje jecucha Dupade cháta cuchade aja ua gu.–

⁴ Mu iji dejai tuté ga Pangarádejnai Dupade catecã́ri daruode júsõri Natán iji uté.

⁵ Ga chósi tome: "Natán, angome yiroi David uje a pipesute yiguíjnarique jne, mu que yojningai u uté jeta pésu aja gaté.

⁶ Acatecã́ri David uté ga ósi tome: 'Pangarádejnai Dupade uruode jé u udojo ome ua, David á: E iyajmaque ica uje yijnime israélgosode uáguiji Egípto nanique, ga yijína uágaja quedéjnane jé aja deréjnane udojo to. Mu que yo yiguíjna iji guiguíjna cuchátigo gotique, mu cachi cucha ao yiguíjnai aja yocajesúode erámio.

⁷ Ga que yiroque yipesudode ore adode ajirisóño uñeque aja nanique ujetiga pésu yiguíjnarique iji pore pajuguguedie petígo uje poridie udire i tu cédro.'

⁸ Jecute angopísa yuru quigode aja yiroi David jne ga ósi tome jne: 'Dupa Pujnuéngaisṍri chósi tome ua que: Uyu u uje yijnimique ua iji barodedie áyasai ica, David á. Ga yipésu ua ga yurasade israélgose ore cho deduguéjna cuchábi iji ua.

⁹ Enga jecucha yijína ua aja bapotigádode baquicho ica. Enga yejna bamajosórone ore ome ua jnese. Enga yẽra báringai jnani ujnomerãque ome ua ica iji erámi tudé, ga bajnomei chapuse purása quedéjnane ore aja iji erámi tudé údode.

^10-11 Enga yipesudápo israélgosode uacaniri ome uaque ica rĩ, jeta oyo parácho iji uté enga jé ca pijocayaque uáguiji uté ica. Jé aja uacamajósõri casodica uje jecucha ore tagu dejode ome uaque ica, ga yejnápise udore to ica uje yisi ome uacadode ajirisórone ome uaque ica ga uacoyo uaqueduguéjnane iji udore ore ica. Ga yisocai a jé u ome ua to, David á, jetiga yejna bamajosórone ga a o paráguiji baniri udé jne. Enga bape disi ejode a jiei ore iji baquigáningo jne.

¹² Ujetiga e atopoi to jne rĩ, mu a yipésu bape disi ejode uñeque ga a yo israélgosode ore eduguéjna cuchábi iji uté to jne.

¹³ Enga a yojningai uté u jne jeta ipesute yiguíjnai aja gaté jne, enga uté úringai eduguéjna cuchape a jé ca eruénique cuse jne.

¹⁴ Ga a uté cho daji yu jne, jé basa yo yabi iji uté. Ujeta uté atique gajnaréngome yu jne, enga a yaquesu údode jne, enga a jé yi jnani abechugode ore isocade to jne ome uté.

¹⁵ Mu a jé ca yijnime uté jne iji jogadi jne, enga a jé ca cho Saúl jne uje yijnimíji jogadi nanique ga yicha ua aja jogadi nanique.

¹⁶ David á, báringai eduguéjna cuchape a ca eruénique cuse jne, ga a jé chuságaja bape basutígo ore jne ga cho jetiga jé qué ua upúsu babode udore ore. Chamáñaje a jé ca yujuseque bape disi ejode udore ore jne, ga a yicha yu aja udore ore gajnetígo cucha yúode jne.'"

¹⁷ Enga jé u uje Natán chajnerame Pangarádejnai Dupade uruode udojo ome David, ga que chimoque Dupade ojningáiso quigode uñeque ome uté ujetiga chatata.

David icatecãraitigade quigode u udojo ome Pangarádejnai Dupade uje chacãre gai nanique

¹⁸ Enga David chacája Dupade iguíjnai cucha ao enga catecã́ri Dupade iji uté, ga chojninga: "Pangarádejná, cachi que cucha uyu gotique ujetiga o ayorédaté iji yu. Jé cho yai casica ore uje que cucha yoque gotique.

¹⁹ Mu que cuchadaté yu gotique ome baruode ome yabode ore uje bachaga yocúringáringo eduguéjna cuchape aja yape disi ejode uyoque gatuaque. Que jnani dacasutéraque uñeque cho ua gotique ome bacaniratiguérigo ome barótigo.

²⁰ Ga que yiraja yuru quitígome ua gotique rĩ, uje bamo yu iji de, enga barajapise basocáringome baroi uyu, ga uerate basocade jnese ome yu gatuaque.

²¹ Uje bẽrate cucha pitijabádode udojo ome yu ica gu uje jé bajéo ome yu jeta cucha dacadode udore di iji yu to ga jé u jeta yiraja bacaniratiguédatéode ome yu to.

²² Jecute yicota ua iji de, Pangarádejná, ome cutejmai bacaniratiguejna. Uje que ayorérique cunguésõri ua ga que dupa uñeque cuse iji baquei. Uje que yudúco dupa uñeque ujnomérique to jeta jé cho ua.

²³ Que punire uñeque déji erã́tique jeta cho barasade israélgose yocuniri udé to. Uje bajna yóguiji yoquigarisórone ore jmainie nanique ga borei yóguiji erámi tudé nanique. Enga basocade udore ome yoque picotaqué gajnecho, ga yitijago ua ome badode udore. Mu que gusu yoque mu yocujode ayoré ore tija bapesútedatéode udore ome yoque to. Enga bamate erámi tudé unirísõre bajade ore aja jnumi ica uje babo yocúdi iji Egípto ica, ga udore ore patĩ́ora dangurenone dupa quedéjna ome ua ica, ga dimane erámi tudé iji yoquiquei ica ome ua.

²⁴ Pangarádejná, bagaidi u nanique ujetiga o barasapísode iji israélgosode ore uyoque iji ducunirone unirisórone uñane ore ujade. Jé basa ga israélgosode uyoque, ga yoco Yocangarádejna Dupa iji ua to gatuaque."

²⁵ David qué jno daruode údi ome Dupade ga chojninga: "Pangarádejná Dupá, jecucha be ga baru iyiejnane udore ome baroi uyu tocade jnese jne, ome yatígo ore jnese, enga a jecucha israélgosode ore cho dangarániji udore ore jne iji yocuniri udé.

²⁶ Picotaque opejã ua, Pangarádejná, ome erámi unirisórone ore jnese. Ga ore chojningame ua: 'Ujopíerãque israélgosode ore angureni Dupa ga pangarádejna eyúgojma uté.' ¡Yipésupú ga jé bojningane udore jé jogate baroi David uyu, yatígo ore gatuaque jne jõ! Enga a jecucha ua u jetiga ajuse yabode ore guio gatuaque jne iji ore úringáringo eduguéjna.

²⁷ Pangarádejna Dupa Eyúgojmai tu ua, ujopíerã́quedaté ua rĩ ga ua u uje bangongara yúringai eduguéjna ome yu ica, ga ua upo to rĩ uje bangongara yabode aja yu to rĩ jeta eduguéjna udore ore to jne. Jecute baroi uyu que yugúsiji cuchárique mu jé yicási baróbuchai qui ujeta yijócha bajei údi ome yape eduguéjnane udore ore.

²⁸ Pangarádejná Yudupá, Dupa Ugurui tu ua. Yiraja uje jé ũré ua ome bojningane cucha udore jnese. Jecute a jecucha yabode ore, yimóngo bosongaquérigo gatuaque jne ome yoque. Uje baroque yu gu ga que toque jetiga baruode udore jé ca tocade ome yu.

²⁹ Ga ajusípise yape disi ejórigo ore guio to jne jetiga jé udore qui tu te ome dáringáringo eduguéjna gatuaque. Pangarádejná, ua u gu uje jecucha bacacãre yabode ore, uyoque, jecute a baroi David uyu yape disi ejode uñeque a chise dáringárique eduguéjna jne ga ca eruénique cusapo jne rĩ iji deréjna pitade."