2 Samuel 6 - Dupade Uruode

David nóna dasoldate dipeséode nanique jeta ore jno Dupade uruode pi cajo údi aja dedáidatéi uté uje i tu David Idáidatéi

^1-2 David chimáta dasoldádode aja ñane uje 30.000 u ore jnese. Ga David chiroque ore aja daquigade jeta ore jno Dupade uruode pi cajo údi aja dedáidatéi uje i tu David Idáidatéi. Dupa Pujnuéngaisṍri uje déji gaté, uté charidi u daruode pi uté cajo jogosórone gaté unirisórone oredie ujai.

^3-4 Ga Dupade uruode pi cajo uté déji jnani bajai Abinadab iguíjnai ajegatei, uje iguíjnai uté déji oroné gaté. Ga ore chicha Dupade uruode pi cajo uté aja guebéquedatéi ichai gai. Ga jnani bajai Abinadab abode ore nóna guebéquedatéi uté aja dajei uje ore íode u Úza, Ahío ore. Ga Ahío chácariji guebéquedaté iquei, jé basa Úza chácariji quigade.

⁵ David, ujode israélgosode ore nína raque iji Dupade iquei ga ore chẽráchu ome aja dajesúode. Ga ore chujé degode árpa aja dajesúode to, jé aja ore yugode cucha uña ga ore chijñiecáraja dajesúode ome dajocayade cucha.

^6-7 Ga ore chise pajmini uje ore pésu dajmini uté i ga ore chojningame Éra de Nacón. Mu uje aquirájnanie uchiejnane cho caru iji uté ga Dupade uruode pi cajo coyotáji dayaridi iji guebéquedatéi ajei ga Úza chisa uje que pota jetiga base gu. Mu chisa ga cachodi jé u uje toi ¡pac! iji Dupade uruode pi cajo dosadi. Pangarádejnai Dupade ájningaránguipísome Úza uté isocade udore nanique uje que gajneque gu ujetiga chisa Dupade uruode pi cajo uje cucha puyaguipise uté gu.

⁸ Mu David que chise Pangarádejnai Dupade isocade udore unétique uje Dupade chequésãre jõrai Úza uté. Ga pésu Úza cachodi uté i ga chojningame Pérez-úza, uje ore uruode udore qui u Ayoré Pórecajna Toi uje Toi Paque. Iji dirode udojo ga ore gajmini uté qué i tu dei iji deréjnane udojo to.

⁹ Uje David todo Pangarádejnai Dupade ga chojninga: "¡Jé yo píringome jne jetiga yijna Dupade uruode pi uté aja yidai!"

¹⁰ Uje David que potame dedai ga ore jno údi aja gátgosode uñai iguíjnai uje i tu Obed-edom.

¹¹ Enga Dupade uruode pi cajo uté guejnane guedosi gadioque iji Obed-edom uté iguíjnai. Ga cucha arégode tocade jnese ome Obed-edom, jogasui ore uje chuse Dupade uruode pi cajo uté guio gu.

David ore doi Dupade uruode pi cajo ga ore irasique rome uje ore di údi iji dedáidatéi

¹² Uje eduguéjna cuchábi David chudute to uje Pangarádejnai Dupade susípise Obed-edom, jogasui ore guio gu uruode pi cajo uje déji ore gari, ga David pota to jetiga jnopo údi aja dedai te rĩ. Ga ore doi ga ore irasique rome uje ore di údi.

¹³ Ga ore jnorásome David Idáidatéi yui ome Dupade uruode pi cajo uté, mu David chaquĩ́ra ore iji quedéjnai ga chojninga: "A jé yujé aquirájna choquírique bajaque jne ome Pangarádejnai Dupade, ga a yátaja áyasa urojnáraque jne."

¹⁴ Ga David chijna doidi efod uje ore pésu iji ore acai líno. Enga jé u nanique uje David chejna daguesi ome dáringai dara ome iji uté ejode ga chẽráchu ome aja dajesúode.

¹⁵ Uje David, urasade israélgose ore di Dupade uruode pi cajo údi iji David Idáidatéi ga ore chubúchu dabuchugode, enga ore ichorájna uje ore chachietai Dupade uruode pi cajo uté nanique gu.

¹⁶ Mu uje ore di Pangarádejnai Dupade uruode pi cajo údi ga David acoté Mical uje Saúl uro uaté, chajire daguíjnai bocadi mu chimo dabai David ga qué doi jobeyei iji Dupade uruode pi cajo ejode ga que abai isocai déji ajénique. Uje abai David uté cho ayoré gajnaréngone uje ore chapúsaja dasocade.

¹⁷ Uje David chiraja uje a doi Dupade uruode pi cajo uté jne, ga jĩraque pésu uté jogadi. Ga dimane Dupade uruode pi cajo uté gajnei guiguíjna iji iquei, ga ore di údi ga jé u uje ore nája ajei. Enga David tẽrája Dupade ome dachidode cuchiso uñane. Ga chipotame uñane jeta jé ca piboso to iji Pangarádejnai iquei. Gaidi u ujeta pajesereringai déji urasade ore ome Pangarádejnai Dupade to.

¹⁸ Uje cha dẽrapáidode cucha udore ome Dupade, ga chacacãre darasade udore ome daru omone ga chojninga: "¡Yipésupú ga Pangarádejnai, Dupa Pujnuéngaisṍri uté chicha dajmanai aja uacabáyode ga chuse uaqueo jne jõ!"

¹⁹ Enga David chisíome cucha pibosode ome ore jnese uje ore chimáta raja ñane iji jogadi uté, uje jiépisi jnanione, chequedíe ore jnese. David chisíome arurégode ome israélgose chojmara, chojmarane udore ore, ga chátaja tórtade uje pipesucho iji cucha adie uje íode u dátiles, úva cajnorenie ore to. Ga quigade ga jé u uje ore chajníja daguíjnane jnese.

²⁰ Ga David chajni aja daguíjnai to jeta chacacãre dabode, dacotedie ore ome daru omone to. Mu David acoté chachai iji garani uje Saúl uro uaté ga i tu Mical. Enga uaté chojningame David: –David á, yimo ua que ga babé jobeyei aja bajesúode iji barasade ore ujade que.– Ga uaté chujñieta David ga chojningame: –Uerate uje israélgosode ore eduguéjna cuchábi doi jobeyei iji dajeque pajéode. Ga chingo raja daróguedie, darógode ore ga jé chopise cojñoque ayoréode ore isocade to.– Ga chojningame dabai: –¡Que basocade udore dépisi yajénique!–

²¹ Ga David chajnai dacoté uruode ga chojninga: –Jé ũré ua uje yiji jobeyei gu yininaquei ome Pangarádejnai Dupade. Uje ichajapite yu aja bai casica jogadi ica uje bajate jogadi urásu, mu Pangarádejnai Dupade jé ajegaite yu ujetiga israélgosode ore cho deduguéjna cuchábi iji yu. Jecute yi jobeyei iji uté iquei. Que yi gotique iji yurasade uñeque iquénique.

²² A jecucha yisoca jne jeta yo ayoré pajnotáguiji yu gatuaque iji Pangarádejnai Dupade iquei uje uté u gu uje suépise yibai.– Mu David chojningame dacoté: –Bachietáyime yu ome yisocade udore que, e mu bojninganie udire yoquiróguei a ore chicota yu jne.–

²³ Enga Mical que disírique tṍraji gotique jé aja deruei.