2 Samuel 5 - Dupade Uruode

Israélgosode ore cho deduguéjna iji David iji daniri údode jnese

¹ Iji dire uñai ga israélgosode ore tṍraji ore dáquiode unirone jnese ujeta ore catecã́ri David iji idai Hebrón. Ga que chimoque ore uáguedie uñáraque, mu ore déji jnese. Ga ore chojningame David: "Jé yoquiyoi chojmára iji jnumi jnese, uje yocãrapi u jnani bajai Israel jnese nanique.

² Uje yoqueduguéjnai tu Saúl ica mu ua upúsu uje bajnué yocumajosórone ore gáyode ica iji yoquijocaningane. Uje ua u ica gu rĩ Pangarádejnai Dupade ojningai jeta yoco yoqueduguéjna iji ua iji yocuniri údode, israélgosode uyoque jnese."

³ Israélgosode ore dayode isocai udé uje ore tibágui eduguéjna cuchábi David iji idai Hebrón jnese. Ga David chimesẽre ore áyipie quigode jnese ga chojninga: 'Uacaruode udore pijogúsõri jé upúsu Pangarádejnai Dupade uje uacajegaite yu ome yúringárique eduguéjna to.' Ga jé u uje ore chanire peduguéjnane ore pijogúsõre aceite aja David ójo jeta israélgosode cho deduguéjna iji uté iji daniri údode jnese.

⁴ Ga David guejnanie siquerei chise 30 años nanique uje judágosode ore cho deduguéjna cuchábi iji uté iji taningai nanique. Enga uté guejnanie siquerei chise 40 años ome úringai eduguéjna cuchábi iji israélgosode ore ujade.

⁵ Iji taningai ga gusu judágosode ore uje ore cho deduguéjna iji David ga guejnanie siquerei 7 años u, ga nóna pei nanique iji judágosode idai Hebrón uté nanique. Uje e israélgosode cho deduguéjna iji uté jnese ga chécãre dedai ga cho dedáji Jerusalén to iji uté. Ga guejnanie siqueré chise 33 años iji Jerusalén nanique ome úringai eduguéjna iji uté. Ga jé u nanique uje israélgosode, judágosode ore cho deduguéjnai iji uté jnese.

David cho dajocaningame jebuséogosode

⁶ Eduguéjna cuchábi David, jorane soldácho ore pota doi pocaningai ome jebuséogosode. Ore gaidi u jeta ore cho dajnéngu ore idáidatéi Jerusalén, ga David cho dedáji ore idai uté. Mu jebuséogosode ore chietáyime David ga ore chojningame uté: "Que togome ua jetiga o baniri iji yoquidai udé uje serẽrachuque ua gu ga que ajñapeque gotique. Ga a jé areque jetiga yirójo yocurása edoparigode, tatógode ore aja bei ga ore cho dajocaningame ua jne, mu a jé ore sué babai jne uje que ujñapeque ua gu. Jé basa ga edo omone, uajádode ore yácagoji yoquidai."

^7-8 Ga David chudute ore ichietabáitigade udore ga chojningame dajorane ore: "Boyo, ga yicoi edoparigode, tatógode udore ore ga jĩraque yujégo ore ¡pac! Ga yajnángo yodi ajnápi aja ore idai tuté uje chiese ore ujuyaquéode udore chãraque ore yui mu. Ga yico ga jĩraque yujégo jebuséo edoparigode udore ore uje yujãpise ore." Enga David cho dajocaningame ore ga chejnápise idaisórone ore ga cho dedáji ore idai tuté ga pésu ore idai uté i ichai ga chojningame David Idai Upúsu Udé. Ga ore idai uté íode uñai u Sión to. Uje David cho edoparicho iji ore angurenone ayoré gajnúo, ga jé ore chajnera David ujñiequéode údi gatuaque ome jebuséogosode. Ga ore chojninga: "Que pujuegate Dupade iguíjnai úringárique pibi ome edoparigode, tatógode ore." Ga ore ujñienone u jebuséogosode ore angurenone cucha quedéjna.

⁹ Ga David chajnerame ore ujuyaqué bajade jeta chise ore idai eruéode jnese uje David iguíjna cuchábi déji uté ajei to.

Tírogosode ore eduguéjna cuchábi Hiram chisi ome deranone cucha ome David

¹⁰ Ga David ujnomei e chajnera dádi ome dáringai ujnomerãque. Ga Dupa Pujnuéngaisṍri Ujopié jé jogate uté gari gatuaque.

¹¹ Ga David ujnomei chise ore uniri idájai to uje i tu Tíro. Ga ore eduguéjna cuchábi iji uté uje i tu Hiram chiroque datocaidode aja David yui ga chisi ome deranone ome David. Ga chojninga: "A uyoque u jne jeta yátago baguíjna cuchábi úringárique pipesudája ua. Chamáñaje pore choquidie déji yocuniri uje i tu cédro jeta yajujo udire ome baguíjnai. Ga poridie ajúgusórone déji de to uje ore chirajapise jeta ore chajuque poridie ga ore chajuque poridie jne ome baguíjnai uté yui." Ga ore eduguéjnai chátaja jnanione to uje ore chirajapise jeta ore pésu guiguíjnane enga ore u uje ore pésu cuchade aja quigode jnese ome David iguíjna cuchábi yui.

¹² Ga David chiraja uje Pangarádejnai Dupade juegate úringai eduguéjna ome jeta urasade chagutíyame uté iji daniri. Uje Pangarádejnai Dupade ijnoraquei cuchadaté gu ome israélgosode ga que eruénique erãpe cuse. Chamáñaje cho darásapísode iji israélgosode gu.

David ape basuque ejode basíji idáidatéi Jerusalén nanique

¹³ Iji David idai Jerusalén uté ga David jé chõre dacotedie, damochápasadie ore ga abode jé ore chõre re to.

¹⁴ David ape basuque ejode iji Jerusalén ore íode u udojo: Samúa, Sobab, Natán, Salomón,

¹⁵ Ibhar, Elisúa, Néfeg, Jafía,

¹⁶ Elisáma, Eliáda, Elifelet ore.

Dupade chisi ome David úringai pujnuéngaisṍre ome

¹⁷ Uje filistéogosode ore chudute to uje israélgosode ore cho deduguéjna iji David jnese iji daniri, ga ore pota jóroga chisa David ga ore jnorase údi. Mu David chacája dedai ujuyaqueóde ajei ga que toc jeta ore chise uté.

¹⁸ Ga filistéogosode ore pógu ráguiji turéjnane edógade uje turéjnai uté déji pajmini Refaim ejode.

¹⁹ Ga David catecã́ri Pangarádejnai Dupade ga chojninga: –¿Jec areque jeta yiji pocaningai ome filistéogosode ga yejna ore jne a? ¿Ga asi ome yúringárique pujnuéngaisṍre ome yu jne a?– Ga Pangarádejnai Dupade chojninga: –Ejẽ́. Be ore ga a yisi ome báringárique pujnuéngaisṍre ome ua jne.–

²⁰ David chise filistéogosode iji ore idai uje i tu Baal-perazim enga cho dajocaningame ore iji uté. Ga David chojninga: "Pangarádejnai Dupade chopise yote bayátique ome filistéogosode ore. Chayója ore ga chijnare aja udore ore ga que ore chisa dejóringome yoque." Jecute ore chojningame filistéogosode cachodi uté Baal-perazim, uje ore uru qui tu Yote Bayai Jochai Jnupe.

²¹ Filistéogosode ore chayome David ore ga ore noñome dangurenone dupa quedéjna iji jnumone. Ga David, urasade ore chimáta ore angurenone dupa quedéjna udore aja ñane.

²² Mu filistéogosode ore chajni ga ore quítequiguíji turéjnai jochai iji cucaranone ore ujai uje turéjnai uté pajmite ga i tu Refaim.

²³ Ga David catecãrápoi Pangarádejnai Dupade rĩ jetiga Dupade ajéo ga ore dopoi filistéogosode rĩ. Mu Pangarádejnai Dupade chajnai uruode ga chojninga: –Ca acugujnáñoji ore iji bajogadi uté. Ayóyo ore gai, ga ca órañoji ore iquei ome ore jne, mu órañoji ore quigade jne ome ore jeta achẽ́cho ore. Ujeta eso porebui uje poridie udire i tu bálsamo, ga apócho uáguiji údode jne.–

²⁴ Pangarádejnai Dupade chósi tome David: –Ujeta adúcho cucha ajaramitóraque iji uacabai jeta tṍraji poridie udire ójodie ga jé u jetiga acugujnáñoji filistéogosode udore ore jne. Uje a e uacarajáyo uje e yi ome uacaquei gu, ga a yatapísaja uaque jne ujetiga ajnuéño filistéogosode ore gai.–

²⁵ David pésu Dupade ojningane cucha udore jnese enga sué filistéogosode ore gai, ga chicha degode aja ore idáyode ujade uje ore íode u Gabaón, Gezer ore.