2 Samuel 3 - Dupade Uruode

¹ Jecucha ga Saúl urasade pota jeta deduguéjna casica uté ape disi ejode basája charidi ga ore gajneque israélgosode ore. Jé basa ga David urasade ore pota jeta David gajneque israélgosode. Jecute ore doi pocaningane ome ñane gatuaque, ga siqueredie jiei ome ore jocaningane udore. Mu David isoldádode ore quérã ome dáringane pujnuéngaisóño. Jé basa Saúl ujnacari isoldádode que ore ujñapegápome pocaningárique to.

David abode íode u udojo nanique

² David ape basugode uje ore basíji ore idai Hebrón ore íode u udojo: ape basuque bajai i tu Amnón, ga daté i tu Ahinoam ga jezreélgoto uaté nanique.

³ Ga ape bajai quigaminóri i tu Quileab, ga daté i tu Abigail. Ga carmélgoto uaté ga chequé abai togué uaté nanique. Ga abai toi i tu Nabal nanique. Ga ape basuque ejogatei u Absalón, ga uté daté i tu Maaca. Ga gesuréogosode ore eduguéjna cuchábi Talmai uro uaté.

⁴ Ape basuque gagájnia i tu Adonías, ga uté daté i tu Haguit. Ape basuque garamia jogonóri i tu Sefatías, ga uté daté i tu Abital.

⁵ Ape basuque chojmaráitía i tu Itream, ga daté i tu Égla. Udojo ore batigai u David idai nanique uje i tu Hebrón ga ape basugode ore iríguidi jé u ore idai uté.

⁶ Ga jé isoca uje Saúl ujnacari Is-boset, judágosode ore eduguéjna cuchábi David ore isoldádode doi pocaningane ome ñane gatuac. Uje israélgosode cho deduguéjnai iji Is-boset uté marínga, soldádode ore eduguéjna cuchábi Abner upúsu uje casitágome pocaningane ga gajneque cuchade iji darasade ore ujade.

⁷ Ga Saúl casica mochápasa gapu déji uje i tu Rízpa, ga jnani bajai Ajá uro uaté. Mu chise diri uje Saúl ujnacari Is-boset uté chudute uje Abner moji Rízpa uaté gari bisidec. Ga Is-boset ájningarángome Abner uté. Ga chojningame: –¿Gotique gu a uje bamóji yai casica mochápasa casica gari to?–

⁸ Enga Abner ájningaránguipísome Is-boset uru quigode to. Ga chojningame: –Is-boset, ¿bajose judágosode ore gachitique tamoco aja yu a, uje bachietáyime yu? Uje bai casica iroguipise yu ica ga que yujuseque jogasúode uaque, ga jé chuságaja diri tudé. Ga yo yijõra iji uté iguiosode, jorane ore jnese to. Ujeta ca yugúsirásiji to ica ga a e David chorase daróguiji ua to. ¡Uje yatapísaja ua marínga, e bapésu yiyoguei ome chequé uaté iji diri tudé!

^9-10 A yi Pangarádejnai Dupade ajequigode jnese ome David jne. Ga a yijna bai casica Saúl jogadi iji bari jne enga a yisi ome David jne. Uje a uté u jne jetiga israélgosode uyoque jnese yoco yoqueduguéjna iji uté ga a jé ca gusu judágosode ome jne rĩ. Ga uté a cho dajnepídi iji ore idai Dan iji casaque garani yui, enga a chopo dajnepídi iji ore idai Beerséba to rĩ iji umusoi garani yui, jé aja israélgosode ore idáyode jnese iji udore ore ujai. Ujeta jé ca yipésu udojo ga ¡yipésupú ga Pangarádejnai Dupade cho dajuñame yu, ga datéringa jne!–

¹¹ Is-boset que chajnai Abner urúrique gotique uje dosóñime uruode udore gu.

¹² Ga jé u uje Abner chiroque darógode aja David yui ga chojningame darógode udore nanique: –Angoñome yuruode ome David ga oyósi tome jne: "Yoqueduguéjnai Abner chojningame ua: 'Israélgosode yocunirone udojo, ¿gosi gajnecho a ome bajéode?' Ga yoqueduguéjnai Abner chojninga: 'Jetiga amesẽre yáyipiedie udiji enga a jé u jne jeta yimáta israélgosode ore uyógaja bejode ga jé u jeta o bajnéngu yoque jnese.'"–

¹³ Ga David chudute Abner uruode ga chiroque daruode aja uté gaté to ga chósi tome daruode: "A yangári baru quigode jne mu yajéode u jeta abágui yu ga ajína Saúl uro casica aja gadoi uje i tu Mical. Mu que yipota jeta abágui yu jeta jé ca ajína uaté aja gadoi."

¹⁴ Ga David chiroque daruode aja Is-boset to ga chojninga: "Ajnáño yacoté casica aja de uje i tu Mical. Uje yigaidé oré uaté ica ome bai casica uje oredie u filistéogosode ore ujnungunguenie aode ica uje chise 100 ica."

¹⁵ Ga Is-boset chiroque darógode aja Mical yui jeta ore chijna iji abai gari uje i tu Paltiel. Ga jnani bajai Lais ujnacare uté.

¹⁶ Mu Paltiel chajna uaté iji jnumone ga poji ejode. Chajna aja ore idai uje i tu Bahurim. Enga Abner chiroque Paltiel aja arorai iji ore idai tuté ga quene Paltiel chajni to.

¹⁷ Enga Abner chimáta israélgosode ore dayode aja ñane ga chojningame ore: "E iyajmaque uje uacapótayo jeta oyo uaqueduguéjna cuchábi iji David to.

¹⁸ Enga e chise deréjnai jeta yoco yoqueduguéjna iji David uté. Uje Pangarádejnai Dupade ajegaidome israélgosode uyoque jnese jeta yoco yoqueduguéjna iji uté. Uje Pangarádejnai Dupade uté jé urúo ome daroi David uté nanique ujeta chibéro israélgosode yocáyuguhebátigade ga chijnime yóguiji yocumajosórone filistéogose ore jmainie jne. Mu que gusu filistéogosode jeta chijnime yóguiji udore ore jmainie, mu a chisi ome yocúringane pujnuéngaisóño ome yocumajosórone ore jnese iji erámi údode jnese jne."

¹⁹ Abner catecã́ri Saúl casica urasapísode ore to uje benjamíngose ore, ga jé ore ajéode chojmára jeta ore cháta raja David ore to. Enga jé u uje Abner chicáji David iji idai Hebrón, ga chatatame uje israélgosode, jé aja benjamíngosode ore pota jnese jeta ore cho deduguéjna iji David jnese.

²⁰ Ga Abner, jorane jnani uje ore chejna yu ore diji David, ga David nína ore yui. Ga pésu dabose unérone ome ore yui ga chacásãra ore iji uté.

²¹ Mu uje ore cha chagu ga Abner chojninga: –A e yi jne ujeta yimáta israélgosode yocayode ore jeta yiríngo iji ua ga yisígome yocuru iyiejájnane ome ua jne. Enga jé u jne jeta yoqueduguéjna ua, ga a u jne jeta apésu bajegaitígo cucha iji yocuniri udé údode.– David chojningame Abner: –Bo ga ca o báyugu ua jne. A jé ca cuchárique chósi ti iji ua jne.–

Joab chujé Abner nanique ga Abner topísi

²² Joab jorane soldácho ore diji Abner quigade ga ore ujuya damajosórone ore ugúchade uje ore sué ore gai ga ore chejna ore ugúchade to. Mu Abner que déji Hebrón uje ore di, uje David e juéga arorai ome uté gu.

²³ Ga ore chingo dojñane ome Joab uje Is-boset isoldádode eduguéjna cuchábi Abner chise David que, ga David ore tangári ñane áyipiedie quigode que. Ga chudute uje David chojningame uté: "Bo ga a jé ca cuchárique chósi ti iji ua jne."

²⁴ Ga Joab quítequiguíji David ga chise ga chojningame David: –Yeduguéjná, ¿jé bajosigode ĩ́rique que uje baroque Abner uté aja doi que rĩ?

²⁵ A ajos eti jé ũré Abner uté ome daruode que. Mu gaidi u jeta chãra ua ga chidójnanga bajnéone cucha jnese. Ga a guidai uté ome ua que, ga a chatata cucha dacadode jnese jne ome deduguéjnai jeta di iji ore.–

²⁶ Uje Joab cha catecã́ri David ga chiroque darógode ore aja Abner quigade jeta ore chucué. Mu pógu dasocade udore ome David. Ga ore chise Abner uté iji ore erui ejoi uje déji ore idai Sira ejoi. Ga ore chojningame uté: "Ore pota jeta ajni to aja Hebrón."

²⁷ Uje Abner di iji David ore idai ga Joab chachai uté ga jno údi aja ore idai ujuyaquéode eruei ga chãra jeta catecã́ri iji quedéjnai. Mu uté chujé Abner ga chichagu ica ome daquesei uje que chamurase desai Asael gu uje Abner uté yuque ica.

²⁸ Mu uje David chudute uje Joab chujé Abner ga David chojninga: "Dupade chirajapise uje que Joab isocai uté déji yajénique gotique diríca. Ga que dépoi yiroguipísode ore ajénique to rĩ. Ga que toc jeta gosi chaguhéta Abner, Ner ujnacari uté, úringai chuque yibánique.

²⁹ ¡Yipésupú ga Joab, bajogasúode oyo uacaba Abner uté úringai chuque jne jõ! Ga a jecucha pinoñai chisa uacape disi ejórigo jne, jé aja dequejnaréquedatéi uje i tu lépra. Jé aja chaguhei cuchátigo jeta chujé ore. Jé aja jeta chuque ore ome asṍreringui. Chamáñaje boria Abner úringai chúgome yu gu ga jé tiógara jeta pujuyagaite ua."

³⁰ Joab chujé Abner gu uje Abner chujé ore desai Asael iji ore jocaningai ica uje ore chujé ñane iji ore idai Gabaón ejode. Ga Joab desaque uñai uje i tu Abisai chiraja Joab ajéode mu que chaquĩ́ra ga jé bai tu to ome David.

³¹ Enga David chojningame Joab, jorane soldácho: "Ajnangaráso uacaguidedie iji uacabáyode ga aguíyo uacaguidé ojorenie, ga imoi u uje jnusiétaque uágome yoquijõrai Abner uqué." Ga ore jno Abner údi aja ore ódedie jogadi ga David jé jogate ore quigade.

³² Ga ore chijóchame Abner iji ore idai Hebrón uté nanique. Ga David yuare iji Abner ode ejode, ga idai idaisórone ore yuare iji ejode to.

³³ Ga eduguéjnai David pésu daradé ome Abner uté cachodi ga iradé júdi chósi te: "Abner á, ¡chimo jóroque re uje bagachóji yoquidai bisideque! Jé tiógara ujetiga chuque áyipie eyútigo, mu que áyipie eyuque ua gotique ujetiga chuque ua ome besórone udore.

³⁴ Uje que pigarique bajmanecade, barídogorodíe ore gu jeta chuque ua ome peduguéjnane iji yocujade, mu besórone udore ore chujé ua iji yoquidai udé pórecajna. ¡Gajnarénguipíse besórone ore isocade udore ome ua!" Uje ore chudute David iradé, enga jé u uje hebróngosode yuarepo iji ejode rĩ.

³⁵ Iji quigade enga ore tibágui David jeta tagu dabotique to uje guedé cáma chaca. Mu David chetaque ga chojninga: –Jnusiétaque yu arĩa, ga yibóji yijõra casé ejode aja guedéjnoringái, jecute que chagúrique déji yajénique jé aja guedéjnoringái. Ujeta yagúrasu cucha pibotique to iji yijnusiétigai jmainie ome yijõra casé ga ¡yipésupú ga Dupade chopise dajuñame yu jne jõ!–

³⁶ Uje hebróngosode chidójnanga David isocai uté ga ore chojninga: "¡Ũrepise David ome dajnusiétigade ome dajõra casé!" Ore irasique isocai uté, mu jé ũré uje David urasade ore chicota deduguéjnai gatuaque ome isocade jnese.

³⁷ Iji diri tuté ga que potigayaquérique déji israélgosode ore gotique ome deduguéjnai úringai ũré. Pijoguipise gu uje que uté pota Ner ujnacari Abner úringai chuque gotique.

³⁸ Ga David chojningame daroguipísode ore: –Adójnacho uje israélgosode yocangarate cuchábode uñai toi que iji yoquidai udé. Ga ujnomerãque uté to iji yocuniri Israel udé.–

³⁹ Ga David chojninga: –¡Chimo jóroque re uje Dupade ojningai eduguéjna uyu ica ome israélgosode, mu cho jetiga serẽrája yu iji diri tudé! Sárvia ujnacare jõcarataque gárode udore que ore dosóñime yu gotique, ga érãtique yiraja yisocáringome ore. ¡Mu yipésupú ga Pangarádejnai Dupade doi dasocáringome Abner yungóri uté jne, ga cho uté isijnaringuéone oré jne ga cho dajnéngu oré!–