2 Samuel 24 - Dupade Uruode

David chiroque darógode nanique ujetiga ore chisecãru urasade ujetiga ore chiraja ore eruénique jnese

¹ Mu chise diri uje ájningaránguipíse Pangarádejnai Dupade ome israélgosode ore, enga pésu David áyipiedie iji ajei ujetiga pota urasade úringáringo pisecarãte.

² Enga David chojningame dajorámei soldádode asuté uje i tu Joab: –Bo ga asecãru yocurasade ujetiga yiraja ore eruénique jnese. Átaja dángosode ore to jne iji ore idai tuté iji casaque garani yui, jé aja beersébagosode ore to iji ore idai iji umusoi garani yui. Enga áta ore idaisórone aja ñane jne iji ore idáyode jnese iji ore idáyode udore ore ujai jnese.–

³ Joab chojningame David: –Yoqueduguéjná, cachi jiépisi yoque arĩa. ¡Ga yipésupú ga Pangarádejnai, bangureni Dupa pésu ga yiquérangopíse ga yãrangopísaja yoquibatiga bajai, jõ! ¡Enga yipésupú ga qué aqueca to jne jõ, ga apáñapísiji yoquibetígajnarique to jne! ¿Mu gotique gu a ujeta yurúsãco yocurasade ore íode ga yirajágo ore eruénique?–

⁴ Mu David jé chajo raja jeta Joab, jorane iroguipíso ore jno ga ore chisecãru israélgosode ore jnese iji daniri údode. Enga que toc jeta jé ca Joab, ore doi David áyipiedie.

⁵ Ga Joab, ore jno ga ore nóna dasoldádode enga ore chicáji yote quedéjnai uéchai ga ore chicha darengu bajai aja ore idai Aroer ejoi. Ga ore irengúi déji umusoi garani yui iji ore idai uté. Ga ore iyaque bajai ore idai uje i tu Aroer déji cucaranone ujai. Enga ore idáyode uñane idógosi uté uje ore íode u Gad, Jazer ore. Ga jé u uje ore chisecãru israélgosode ore iji cucaranone ujade udore jnese bajaque.

⁶ Hitítagosode ore uniri Galaad uté nanique, ga Joab ore quique ejoi u uté. Ga ore chisecãru israélgosode ore iji ore idáyode udore jnese, jé aja ore achamini Tahtim-hodsi uté. Ga ore jnoji uté ga ore chicáji ore idai uje i tu Dan-jaán ga ore chisecãru dángosode jnese iji uté. Ga ore jnopo rĩ ga ore chicáji ore idai Sidón ujetiga pisecarãte ore iji ore idai tuté to.

⁷ Uje Joab ore chimate dasecarãte bajade udore ga ore chicáji ore idai Tíro ga ore idai ujuyaquéode déji ore idai tuté gai enga soldádode ore jogadi déji uté uje ore chuse ore guio ome pocaningane yúode. Ga Tíro uté, ejominórone guidáyo u uje cananéogosode ore idáyo nanique, jé aja hevéogosode. Enga ore chisecãru idaisórone ore jnese iji ore idai Tíro uté. Ga ore jnopóji Tíro rĩ ga ore chicáji judágosode ore uniri, ga ore chisecãru idaisórone iji Judá jé aja uécha uñai iji umusoi yui. Ga ore chisecãru beersébagosode ore jnese iji ore idai uté to.

⁸ Ore chisecãru darasade iji udore, udore ga ore guejnane guedosi gagájni iji ti ga nóna dirode iji iquei uje chejna yu. Uje e ore chimate dasagode ga ore tibágui David iji idáidatéi Jerusalén jetiga ore chatata dasecaranone eruei ome deduguéjnai uté.

⁹ Joab chojningame David: –Yoquisecaranone u jnacarode, jnanione udojo batigai uje pocaningai gaisõre dimanerase ore. Iji israélgosode ore unirone ga ore chise 800.000 iji ore, jé basa judágosode ore chise 500.000 iji ore.–

¹⁰ Mu udojo quigade ga David áyuguhebátaque ome udojo uje pésu iji Pangarádejnai Dupade iquei. Uje chiraja gu uje que ore úringane pujnuéngaisóño garani u ore uatigájnai gotique. Enga catecã́ri Pangarádejnai Dupade ga chingo dasijnaringuéone aja uté. Ga chojningame Pangarádejnai Dupade: –Yipésu cucha gajnaréquedatéi ome ua diríca uje yiroque yirógode ore aja yuniri údode ga ore chisecãru yocurasade ome pocaningárique yui. Mu yijócha bajei údi, Pangarádejna Dupade á, ujetiga acadígui baroi uyu yadode udojo uje yopise ayoré táyipietique iji baquei udé ome yadode.–

^11-12 Dire uñai ga Pangarádejnai Dupade chajnai David catecãraitigade. Ga David e niji, mu igasique ga Dupade uruode júsõri e chise David. Ga David iroguipise uté ga i tu Gad. Ga chojningame David: –Pangarádejnai Dupade quene catecã́ri yu jé iji de jeta yibágui ua enga yingome uruode ome ua. Ga Pangarádejnai Dupade chojningame ua: "Cácuebí basadodéringane gajnéone cucha iji yojninga gadiógode udojo ore.

¹³ Ga yojninga gadiógode u udojo ome ua jeta bajegaite uñeque ga atai ga a yisi ome ua jne, ga basadodéringai gajnéone u udojo: yujuyaqué bajai u jetiga chaguhéode chejna barasade, uáguiji uacaniri jne enga a siqueredie gare iji ti ome uacayaguhéode udore. Jõra upo rĩ uje guedosíode a gadiógome uacáringáringo bayácho jne ujetiga uacamajosórone ore socárome uaque ga ayóyome ore. Erueminóri u uje a dirode gadiógome cucha chungore cuchábi jne jetiga chequésãre barasade ore iji uacaniri údode jnese."– Ga Dupade uruode atatasṍri chojningame David: –Acué bajegaitíguiji cucha gadiógode udojo enga a yingopome yirósõri Dupade jne rĩ.–

¹⁴ Ga David chojninga: –Yirosóñime cuchade udore jnese ga chajo yu aja ñane ga que yiraja yajegaitíguiji udore. Mu ome yu ga ueradi u jetiga jé ca yayógome yocumajosórone ore jne. Uje jnanione uyoque ga que posongaquérique déji yocajénique ome yocujode ayoréo gu. Enga jé dóji ga Pangarádejnai Dupade u jne jetiga chisi ome dojningane udore uñeque ome yoque uje posõrasõre cuchape uté gu, jecute yijíome yóguiji uté jmainie ga jé doi dasocáringome yoque jne.–

¹⁵ Ga Pangarádejnai Dupade jĩraque chiroque cucha chungóri aja israélgosode ore idáyode jnese jé iji durasé iji diri uté uje catecã́ri David iji uté. Ga chequésãre ore iji ore idáidatéode Dan, Beerséba ore jnese, jé aja ore idáyode uñane jnese iji udore ujai. Ga cucha chungóri guejnane dire gadioque uje tagu israélgosode ga equesarane iji israélgosode chise 70.000 ore iji dire gadiógode udore nanique.

¹⁶ Pangarádejnai Dupade iroi pitoringa oisṍri gaté unirísõre e chise ore idáidatéi Jerusalén to jeta chequésãre ore iji uté to. Enga dósi de jeta ore toi jnese iji dedai Jerusalén uté to. Mu Pangarádejnai Dupade chimo ga chosõre Jerusalén idaisórone udore ore ga chaquĩ́ra daroi gaté unirísõre ome ore idai uté jetiga jé ca chamurásapo pitoringai ore gai te rĩ. Enga chojninga: "¡Aya é! ¡Jé ca bopo údi gaté rĩ uje e gusu!" Ga Pangarádejnai Dupade iroi, gaté unirísõre cha tṍra doidi pitoringa aja israélgosode ore gai. Ga uté déji jebuséogosi Araúna jogadi uje uté qué déji danasui trígo gai iji ore idai ejoi.

¹⁷ Enga David chimópise Dupade iroi gaté unirísõre uté ome dedodie, ga jé u uje catecã́ri Pangarádejnai Dupade ga chojninga: –¡Chimo jóroque re uje bequésãre yurása para casodé ore uje que ore bárique cus ome ua mu! Uyu u márai ome ua. Uje yisijnaringuei tu ome ua uje yisecarãte yurasade ore diríca, enga a uyu urásu jetiga o bajuñame uje ate gajnarei tu yu. Ga jé gusúrasu yabode, yacotedie uyoque jeta o bajuñame yoque gajiné.–

David pésu daseradéjnai nanique ome Dupade ga chipotame dẽrapáidode dachite cuchiso ome Dupade

¹⁸ Jé u nanique uje Dupade uruode júsõri uje i tu Gad tibágui David jeta catecã́ri David iji uté. Enga chojningame uté: –Yoqueduguéjná, bo ga apésu baseradéjnarique ome Pangarádejnai uté iji jebuséogosi Araúna inasupídi iji trígo.–

¹⁹ Ga David doi ga pésu Dupade uruode júsõri ojningai uté.

²⁰ Ga Araúna déji dajarode udore gai ga chajire dejode iji danasupídi uté enga chimo uje eduguéjna cuchábi David chicáji yui, ga nóna darógode ore. Enga Araúna chachai David ga chichaga dagataidie aja jnumi iji uté iquei.

²¹ Enga catecã́ri David ga chojningame: –¿Jé gotique, yeduguéjná, uje bese baroi tuyu iji de?– Ga David chajnai ga chojninga: –Yipota jetiga yi banasupídi jogadi udé oréraque uje jecucha banasu trígo iji udé. Enga a yiro yaseradéjnarique iji udé jne jeta yẽra cuchisode uñeque ome Pangarádejnai Dupade iji de, ga a chijócãre cucha chungóri uté jne iji yocuniri Israel udé údode.–

²² Araúna chojninga: –Que yipota orerángome gotique mu be ga apésu baserani uté iji yinasupídi jogadi udé bisideque. Ga a yisi ome yachidode aquirájna choqui uñéngome ua to ujeta ẽrája Pangarádejnai Dupade ome udore. Ga yátaja yachidode buey erásorone picho jetiga adíyoja pioi ga átayoja yinasugode erásorone picho to, jetiga apotáyome uaquẽrapáidode udore ome Dupade.

²³ ¡Ga a yẽrate bisidécho udore jnese ome ua, yoqueduguéjná!– Mu Araúna chojninga: –Yeduguéjná, ¡yipésupú ga Pangarádejnai, bangureni Dupade chimesẽre bẽrapáidode udore ga chaquĩ́ra cucha chungóri uté ome yocurasade ore uyoque jne, jõ!–

²⁴ Mu eduguéjna cuchábi David chojningame Araúna: –Yacaranguipise ome ua uje bapota ẽra udore ome yu bisideque. Mu a yiji oréraque enga a yimate ua ome udore jeta atata orérigui jnese. Uje que yisocai u gu jeta yẽra cucha quedéjnarique bisideque ome Pangarádejnai Dupade. Gusu uje yeranone u yajnéone cucha uje yigaite oré udore.– Ga David chimate Araúna nanique ome inasupídi jogadi uté, ga cháta aquirájna choquíode oredie aja ñane ga chimate udore ga chisi ome pláta guebei ome Araúna uje chise 50, ga pláta ueguipíso udore nanique ga oredie jiei.

²⁵ Ga pésu daseradéjnai iji uté ome Pangarádejnai Dupade ga chipotame dẽrapáidode dachite cuchiso uñane ome Dupade jeta chĩro ore isijnaringuéone to. Ga dopoi dachidode uñane jetiga tẽrája Pangarádejnai Dupade ome ore rĩ ujetiga ajei chopo sere ome israélgosode ore rĩ. Enga jé u uje Pangarádejnai Dupade tangári David ga chijócãre cucha chungóri iji israélgosode ore uniri údode.