2 Samuel 22 - Dupade Uruode

David pésu daradé nanique ga chijñiecáraja ga chicota Pangarádejnai Dupade aja dachachagúgode

¹ Uje eduguéjnai Saúl, jorane ore chajna David aja quedéjnane nanique mu Pangarádejnai Dupade que juéga chutígome David gotique to nanique. Jecute David pésu daradé nanique uje chicota Pangarádejnai Dupade ome úringai picotaquéode gajnesṍri.

² Enga iradé achachagúgode u udojo: "¡Yangarádejná! Yañerasṍri tu ua. Ua u uje jecucha yayója ua ome cucha dacadode jnese. Ua upo rĩ uje bajnime yu iji cuchade ujade ¡janip!

³ Ua u uje yangureta ua ga Yudupade u ua. Enga bajnua tu cucarané uajáderaque ome yu uje timingue ua ga yacose yu iji bajmainie údi ga que pijnimique yu iji gotique. Enga jé bopise yoidéraque chequécadaté aja quedéjnane uje guebeque uajade uaté ga que cuchárique chósi ti iji uaté. Ga ore õrachade basíji gadode gu yoidé uaté uje yicháji ore yúode. Bajnui u cucha pipoguiétique iji cucarãte yorícorique ójo, uje que pimome yocujórique ayoré. Chamáñaje yayója ua ome yujnuéngaisórone cucha ga que tocápo yu iji bajmainie rĩ. Yiquetasṍri tu ua. Baqueta yu ome yumajosórone jnani júrurubécho ore ica uje que picasite ore mu.

⁴ Yangarádejná, bajneque picotaquéode udojo, uje que uñeque cho ua gu ome báringai posõrasõre. Uje yibidi ua ga jĩraque baqueta yu ome yumajosórone ore.

⁵ "Pitoringai chopise yote bayátique ica iji yiquéode uje chayója yiquéode ga yṍra yu aja sodi yúode ome uté ica. Ga yitodópisa yote bayai uté ica uje chayója gadode.

⁶ Pitoringai chopo pujuya pipesudéraque iji yiquéode ica rĩ, uje cuchárique basája ga que jé chejñu riji gotique.

⁷ Uje yisa yibade iji pitoringai iquei ica, ga yibidi Pangarádejnai Dupade ica ome yibijnacaraidie. Ga yibijnane chise yangureni Dupade iguíjna cuchábi iji idai ga chudute yagoyé quedéjnanie uje pitoringai chicárasiji gadoi ga uté jĩraque chijócãre pitoringai iji gadoi ga chichapo yu aja diri to rĩ.

⁸ "Uje Dupade uté chicáji gadoi ica ga jnumi cho cocho, cochóguiji uté iquei. Ga jé chopo gatajnoquei to rĩ uje cachi ayorérique chisa gatajnoquei cutádedie ga chijocásiji jogadode ga jé u uje chijocase gatajnoquei edodie iji gaté ga cho cocho, cochóguiji gaté. Mu Pangarádejnai irotáquedatéode u udore ome yu uje ájningaránguipíse uté enga chijocase jnumi, gaté ore ga ore cho cocho, cochóguiji uté jmainie.

⁹ Enga uté cho dájninga ga pioque úyujna gajnujnanie tṍraji uté ujunane aja guesi, enga pioque ocarai cuchábedie jé aja guegueraque cuchábode ore tṍraji uté pijnani. Enga pioque ocarai cuchábedie jé aja guegueraque cuchábode ore tṍraji uté pijnani ga yore yumajosórone ore gáyode ga chejna ore gai ¡júruru!

¹⁰ Uje uté doi guesi iji gatajnoquei ga gatajnoquei yuminóri chungare dabai ga cho borapeque pungaratique iji gatajnoquei yui. Ga Pangarádejnai u uje tṍraji gatajnoquei uté ga gue abuja utatájnanie tṍraji gatajnoquei ga Pangarádejnai chicha darídayode aja gue abuja utatájnanie gai ga choru udire aja jnumi.

¹¹ Ga uté choru cucha ujnóngone ga chója dajesúode iji emi gai.

¹² Iji uté dosadode ga guecoré cuchábode déji uté ejode.

¹³ Mu uté cho ajnoraque cuchábode iji re ga que pimoque uté ome ayorérique uyoque. Ga guegueraque cuchábode tṍraji uté dosadode jnese iji gai ga ejode cho nánga, nánga.

¹⁴ "Pangarádejna eyúgojmai narare ga uruode cho guéode uruode uje yudúco jnese iji jnumi. Dupa Pirosobate Pujnuéngaisṍri tṍra úringai dara aja guesi.

¹⁵ Uje uté chisa dojodie ome yumajosórone ore to ga chopo ajnorane aja yumajosórone ore rĩ ga jé u uje ore chayója dajesúode iji uté iquéode.

¹⁶ Uje uté chichagu jnumi ome cutejmai dajñarique ga chubúchu yote quedéjna cuchábi ¡pu! ome dajñari ga chisídaja erámi ga jé u uje pipañaite yote quedéjnai uté chaquipie. Ga yumajosórone ore chudute Pangarádejnai uté cutejmane ijmongaquéode ome ore ga jĩraque ore jno.

¹⁷ "Enga jé u uje Pangarádejnai uté chájĩ yote quedéjna cuchábi urui ome yu ica, ga chisa yu iji urui ga yisa uté jmanai aja guesi ga chijnime yu iji yote quedéjna cuchábi chaquipie.

¹⁸ Ga chiqueta yu ome yumajósõre dicasepísode ore uje ore eteguipise yu ica. Ga que yugúsi cuchárique iji ore iquei ica uje uajate ore ica gu.

¹⁹ Que pajegaite yu ome yujórique ayoré nanique uje yurasade ore pota chui ome yu gu, ga que yujórique ayoré narare yimánique gotique nanique. Mu Pangarádejnai Dupade u uje narare yibai.

²⁰ Uje chiqueta yu ome yumajosórone ore gu uje chijnóra yu gu.

²¹ Pangarádejnai Dupade chimo yijmainie ica gu uje icha ome pisijnaringuéone, jecute chisi ome yijóningai ome yu gatuaque.

²² Chiraja gu uje jecucha yangári ga yijogate uté quigade gatuaque. Enga que yetaque uté uru quitique gotique ome yu.

²³ Uté uru pirosobádejnane déji yari, ga que yiyó ojningane udore uñeque gánique jetiga yipésu udore jnese.

²⁴ Jecucha yujuse yio iji Pangarádejnai Dupade iquei gu jeta ca paguhéta cuchárique yimánique bisideque. Jecucha yijíome cucha dacate gajnaréngone iji udore jmete.

²⁵ Jecute Pangarádejnai tẽrája yu gu uje chiraja uje que yimere pisijnaringuéone, yate arégode ore iji ñane.

²⁶ "Pangarádejná Dupade á, bajnorapise bajnorasórone ore gatuaque uje que ore chicai ti ome ua gotique, ga que acáji ti ome udore ore to. Uje gosi chañurupúsu dadode guio gatuaque, enga bañurupúsu uté gosi guio to.

²⁷ Jé basa ga ayoré ũrepísode uje ore chedu ua ome raque, ga jé basocai u udore ore adi uje bedupise udore ore to. Jé basa ayoré angoninguite parigode, ga Pangarádejnai Dupade que chisípise udore ore unétique to, enga a ujuyagaite udore ore jne iji dirode uñeque.

²⁸ Enga baqueta ayoré parágode uje que ore chicota re gotique. Mu barajapise ayoré dicotáreode ore iji yocujade, ga bajosi udore ore iji jnumi.

²⁹ Pangarádejna Dupade á, gusu ua uje bajñate yirípiedie gáyode iji utataringuéone.

³⁰ A áta ua aja yu jne jetiga yo yijocaningame yumajosórone ore. Enga a jé ca cucha gotígome yu jne jetiga ore ujuyaquéode déji yumajosórone ore idáyode gai. Ujetiga átaja yu, Yudupade á, ga yacája ore idai ajei ga yujé ore iji ore ujuyaquéode udore ajei.

³¹ "Dupade ipesudode cucha ome yoque ũrepíso jnese, ga que cucha uñeque cho udore gotique. Uje Pangarádejnai Dupade chĩ́care cuchade úringane pipesucho enga jĩraque pésu udore, jecute jé tiógarapísa jetiga pangurete Dupade uté ome uruode. Dupade chãraque gosi uje changureta uté ome cuchade jnese.

³² ¿Gosi u a jeta yĩ́caco Dupade i aja gosi? Gusu Pangarádejnai ujeta yĩ́caco Dupade i aja uté. Que Dupa uñeque déji jetiga chãraque ayoréode uyoque to.

³³ Dupade u yãrésõri eyúgojma ga que ayorérique cási yu iji uté ejórique. Uté u uje ipesute yúringai ayoré paraque, enga que yujórique ayoré doi ga chaguhéta cuchárique yibai.

³⁴ Dupade chatapísaja ayoré parágode ore uyoque iji cucha dacate iménuone jmainie. Ga yocajnúone u erámoro quedéjnane uje choru cucarãte yoricode, mu que ore basíji ójo gotique uje Dupade pésu ore guípiedie ga que ore cho caru gotique.

³⁵ Pangarádejnai Dupade u uje chacate yu ome pocaningane yúode jeta yiraja yisocáringome. Ga chisi ome yetotiguei ome yu jeta yayo docoji údi uje pipesudíji guebéode uje i tu bronce.

³⁶ Jecucha bãraque yu ome cuchade jnese, ga baqueta yu ome cuchade to. Enga caniranguipise ua ome yu ga yise yúringai ayoré ataque iji bajmainie.

³⁷ Enga bapésu yiquei ga icha jnumi, enga que cuchárique chósi ti iji yu iji yúringai urugu uje que yirípieraque cho caru gotique.

³⁸ "Uje yajna yumajosórone ga yejna ore ¡jaripe! enga quene yajni gu uje e yejnápise yumajosórone ore ¡jaripe!

³⁹ Uje yejna ore ga yajuque ore aja yejode ga que ore chapidápo gotique rĩ. Enga ore cṍraja yirídogorodíe údode jnese.

⁴⁰ Mu ua u uje bẽrate petotiguei ome yu iji yijocaningane. Ua u uje bajnué yichiétabaisórone ore gai ga ore chichaga dagataidie aja jnumone to iji yiquei.

⁴¹ Bapésu yúringai pirosobate ga yumajosórone ore chayome yu iji yiquéode. Ga bapésu yúringai pujnuéngaisṍre ome yetesórone ore jnese.

⁴² Yumajosórone ore chucué jórogui dátajasóño, mu que ore chise dátajasónique. Ore tibidi jórogui Pangarádejnai Dupade mu que chajnai ore.

⁴³ Uje yuchiéjna yumajosórone ore aja jnumi ga ore nóña ga jnupuñúringa. Enga yṍra ore pépitade aja quedéjnane iji dajei ga ore cho dachabeque paranone.

⁴⁴ Yurasade uñane ore pota chijnime pocaningai ome yu nanique mu bajnué ore áyipiedie gai nanique. Ga que ore chijna yúringai eduguéjna iji yari gotique, ga israélgosode ore cho deduguéjna iji yu iji ore unirone jnese. Ga que gusu yurasade ore gotique mu purása quedéjnane ore chopo deduguéjna iji yu to nanique rĩ.

⁴⁵ Purása quedéjnane ore tangári yu ga ore dosóñime yu jnese.

⁴⁶ Purása quedéjnane ore pógu jórogu re ome yu nanique. Quigade ga ore doi guesode iji dacoyapídode ga jé u uje yo yiróguiji ore to.

⁴⁷ "¡Pachietabaite Pangarádejnai Dupade! ¡Picotaque opejã yãrésõri Dupade! ¡Yipésupú ga pisígai Dupade ome ore jnese, jõ! Uje uté u uje chiqueta yu ga chãraque yu ome cucha dacadode jnese.

⁴⁸ Dupade uté u uje cho dajnutabádu yu ome yumajosórone ore. Ga uté jnuéngai purása quedéjnane ga tẽra ore ome yu jetiga yo yiróguiji ore to.

⁴⁹ Jiei yumajosórone iji purása quedéjnane, ga jiépoi ore iji yurasapísode ore to rĩ. Mu Yangureni Dupade chibéro udore iji yibai jnese. Pangarádejná, ua u uje bajnime yu iji yetesórone ore jmainie uje ore pota yúringárique chuque.

⁵⁰ Jecute yipésu yiradé udáguiji yurasade israélgose ore edominone, ga yijñiecáraja ga yicota ua aja yachachagúgode. Enga ore tangári yiradé udáguiji danirone údode jnese.

⁵¹ Jé ũrepise ua, Pangarádejná, uje bẽra bajegaidi eduguéjna úringai pujnuéngaisṍre ome, ga jiei uté jnuéngayode uje sué ore gáyode gu ua. Enga jecucha basi ome bajnoraquei ome David, jé aja ape disi ejode ore jnese."