2 Samuel 21 - Dupade Uruode

Gabaóngosode ore chutai Saúl ape disi ejode uñéngo iji eduguéjna cuchábi David ujetiga chuque udore ore

¹ Uje israélgosode ore eduguéjnai u David nanique ga chaguhé cuchábode socárome ore ga guejnanie siquerei gadioque nanique. Ga David catecã́ri Pangarádejnai Dupade ga chojninga: "¡Pangarádejna Dupade á! ¿Gotique gu a uje bẽra chaguhei ome yurasade uyoque?" Enga Pangarádejnai Dupade chajnai David ga chojninga: "Jé yẽrate chaguhei ome uaque gu uje uaqueduguéjnai casicaite Saúl, abode ore chujé gabaóngosode ore nanique. Gabaóngosode ore gajneque uacayode jnani bajácho uru iyiejnane nanique jetiga jé ca chuque ore jne iji israélgosode ore ujade. Mu Saúl ore chó uacayode uruode udore gai enga ore cho dajocaningame ore ica ga e yo yujnutabádu udore, ga yẽra chaguhei ome israélgosode uaque."

² Ga David tibidi gabaóngosode ore asutedie jeta catecã́ri ore. (Mu que israélgose gabaóngosode ore gotique, mu amorréogose amíño udore ore nanique. Mu Saúl chetaque ore nanique ga chujé gabaóngosode udore uñane, ga que doi dayode jnani bajácho uru quitique gotique. Chiese chujé ore gu uje pota jeta gusu israélgosode iji daniri gu.)

³ Uje gabaóngosode ore asutedie diji David, ga David chojningame ore: –Yiraja uje yoqueduguéjna casica Saúl cho dajocaningame uaque ica, ga chó yocayode jnani bajácho uru iyiejnane gai ome uaque ica. Ga angoño yu ujetiga jé yo ringome jne jetiga yoco yocoré ome udore. Pangarádejnai Dupade urása israélgosode uyoque, ga yucuei tu ujetiga yipéco cucha arétigo iji uté edominone jé aja ujetiga uacajéode cho sere ome yoque ga acacã́chopo israélgosode uyoque ome cucha omone rĩ.–

⁴ Ga gabaóngosode ore asutedie chojninga: –Que yutágoi israélgosode uaque gotique ome Saúl jocaningai ome yoque jeta oyo yocoré. Que yipótago jeta uacarasade israélgose uñeque cho daba udore to ujetiga chuque gosi.– Ga David chojninga: –Ango bajegaitique yisoca aja yu jeta yo ringome uaque.–

⁵ Ga ore chojningame David: –Que yocájninga gajnéone u israélgosode uaque jnese, mu yocájningai gajnei u uté uje pésu dáyipie noñánguenie ome gabaóngosode uyoque yocúringáringo pejnacho ica. Uje uté áyipie u ica gu jeta ca yocujórique gabaóngose chapídiji israélgosode uacajade ica.

⁶ Gusu uje yipótago jeta asi ome Saúl uté ape disi ejode uñéngo ome yoque jetiga gare ore iji ti ga yico ore údi aja Pangarádejnai Dupade ajegaidi Saúl idai casica, yoquidai Guibeá. Ga yigaco ore etabídode iji uté ga ore cho cocho, cochógaja jnumone iji Pangarádejnai Dupade edominone jne ga ore cho daba dáqui uté jocaningai ome yoque.– Enga David chimesẽre ore áyipie ga chojninga: –A yisi ome ore ome uaque jne.–

⁷ Mu David que juéga Mefi-boset ome ore, Jonatán abi uté uje Saúl ájnape. Uje David jé urúo iji Pangarádejnai Dupade iquei nanique gu ujetiga jé ca chuseque Jonatán atígo ore iji quigáningo.

⁸ Mu chisa Saúl acotedie uñai ape gárode, uje uaté i tu Rízpa. Ga jnani bajai Ajá uro uaté. Ga Rízpa uaté abode íode u udojo: Armóni u jõrai, jé basa Mefi-boset u uñai, uje uté i jé u Jonatán abi i to nanique. Ga chisa Saúl uro abode to uje ore chejna yijmanai. Ga Saúl uro uaté i tu Merab. Ga udore ore dai tu Adriel. Ga meholágosi Barzilai ujnacare Adriel uté.

⁹ Ga gabaóngosode ore jno Saúl abode, ájnamone udore ore údi aja cucarani ójo uje déji ore idai ejoi. Ga ore chigaru udore ore etabídode iji Pangarádejnai Dupade iquei ga ore chigaru ore etabídode aja poridie jmanecade iji uté ga ore cho cocho, cochógaja jnumone. Ga Saúl abode, ájnamone ore patĩ́ora ñane iji uté uje e ore na dacade uje i tu cebáda.

¹⁰ Mu Saúl acoté Rízpa uaté chigui doite ojórãi uje imoi tu úringa jnusieté, ga choru ore cachopié uaté oroné to ga chácariji ugaredo ga chajire ore yugode dape yui iji dirode jnese jetiga chugúpẽre chagúode jé ca tagu ore arione iji diri, jé basa chirodápo ore ejode rĩ iji dejai jetiga cuchiso chagúrique jé ca tagu udore ore iji dejai. Enga uaté chácariji ore ejode jé aja uje guei tagu ore ga ore cha na cebáda uaté nanique.

¹¹ David chudute to uje Saúl mochápasa casica uaté que jnoji dabode ore ejode.

^12-13 Ga uaté isocade chijõrorase eduguéjna cuchábi David, ga jé u uje jno ga doi Saúl, abi Jonatán ore ajnoquéode uje qué déji ore uniri Galaad ajei iji ore idai Jabés. Uje Jabésgosode ore toria Jonatán, dayé ore ica iji bet-sángosode ore idai ajã́ro uje ore chuguhese ore iji uté ica iji filistéogosode ore jocaningai casica quigade. Ga ore jocaningai uté jogadi u Gilbóa ica. Uje e di Saúl ore ajnoquéode údi ga jé u uje David chojningame darógode: "Beyoi Saúl casicaite abode, ájnamone ore ajnoquéode to uje Rízpa uaté chirote ore ejode, ga yijóchangóme ore to."

¹⁴ Ga jé u nanique uje ore chijóchame Saúl, ujnacari Jonatán ore ajnoquéode to iji Saúl dai casicaite Cis ode ejoi iji ore idai Zéla uté. Ga ore ódedie udire déji benjamíngosode ore uniri ajei. Uje ore doi eduguéjna cuchábi David uru quigode udojo ga jé u uje Dupade quene tangárapoi ore icatecãraitigade rĩ ga chiroque guei aja ore uniri jetiga guéode tagúpo ore to rĩ, ga jé u uje siqueredie omépo ome ore to rĩ.

Filistéogosi, David ore chujé ñane iji dajocaningai nanique, mu Abisai chimo ore ga doi filistéogosi uté enga chujépise

^15-16 Mu udojo quigade ga filistéogosode ore dopoi pocaningai ome israélgosode ore rĩ. Ga David, isoldádode ore doi filistéogosode ga ore socárome ore iji uté. Mu uje David eyuque ga filistéogosode uñai uje ayoré yoríco uté e idógosi jeta chujérase David. Ga yorícopise jnani uté ga i tu Isbi-benob. Ga uté chijna dasõre ga asõre kílode chise 30 kílos, ga chijnapo dagarubi te rĩ ga chadíja quesé ichai aja dagarubi uté.

¹⁷ Mu Sárvia abi Abisai chimo David uje filistéogosi, ore chujé ñane ga doi filistéogosi uté to ga Abisai chujé uté. Iji ore jocaningai uté quigade ga David iroguipísode ore chisíome daru iyiejnane ome deduguéjnai uté, uje ore chojninga: "David á, filistéogosode e ore chujérase ua que, enga a jé ca yujuéjopo rĩ ujetiga ajína yógaja pocaningárique. Uje bajnui upúsu pibioque papótique iji israélgosode yocuniri enga que yipótago jeta gosi chujnungu pibioi uté sere."

Dupade chisi ome israélgosode ore úringane pujnuéngaisóño ome ore nanique

¹⁸ Iji ore jocaningai tuté quigade ga filistéogosode ore dopoi pocaninga uñai te rĩ ome israélgosode iji ore idai Gob ejoi. Enga israélgosode ore chujépo filistéogose yoricode uñai te rĩ iji dajocaningai ejoi uté rĩ. Enga húsagosi Sibecai yuque filistéogose yoríco ejoi tuté nanique. Ga filistéogose yorícoi tuté i tu Saf nanique, enga uté gãrapi u jnani bajaque ujnomerane ore uje umaripise ore ga ore abubíedie suépise ore ujode jnanío ore gai nanique.

¹⁹ Udojo quigade ga israélgosode ore dopoi dajocaningai ome filistéogosode iji dajocaninga bajai jogapi ore idai uté ejoi uje i tu Gob. Iji ore jocaningai tuté ga beléngosi Jaare-oregim ujnacari Elhanán chujé Goliat iji ore jocaningai tuté. Ga gátgose Goliat ga ayoré yoríco to. Ga Goliat jmanáijna ga pésu dasõre poté ga querújna asõre poté.

^20-21 Enga israélgosode ore dopoi dajocaningai ome filistéogosode ore rĩ iji ore idai Gat ejoi. Ga ayoré yoricode uñai dépoji filistéogosode udore ore ujade to rĩ, enga jmainie gare iji yirídai, enga guídedie jé chopo rĩ uje garapo iji yirídai te rĩ. Enga ayoré yoríco uté dayode ore to nanique. Enga jnani jmané dipesei uté dopísi Goliat casica isocai enga chojningame ore: "Israélgosode uacuñeque cási yu ga yujégo ñane." Mu David ape uñai uje i tu Jonatán doi uté ga chujé ¡pac! Ga David urẽjai uje i tu Simea ujnacare Jonatán uté.

²² Jnani bajaguipísi casicaite gátgosi Réfa ape disi ejo ayoré yoríco gagájnione udore ore uje David, irógode ore chujé ore iji dajocaningane udore nanique.