2 Samuel 20 - Dupade Uruode

Séba chijnime daru gajnarétigo ome David

¹ Jnani déji ore idai Gilgal uté uje jecucha dosója dejode. Ga uté chojninga: "Yoquigaitique cucha iji David jeta yibájoi uje que chisi yóguiji cuchárique, Isaí ujnacari uté. ¡Israélgosode uaque, yico ga yipéco yoquijocaningai ome David ore jne!" Ga jnani dosoi uté benjamíngose ga i tu Séba. Ga jnani bajai Bícri ape uté.

² Israélgosode ore cha David úringai eduguéjna gu Séba uté ga e ore nóna uté aja quedéjnane gatuaque. Mu judágosode ore nóna eduguéjnai David aja quedéjnane, ga ore nóna aja yote quedéjnai Jordán, jé aja Jerusalén.

³ David chajni aja daguíjna casica mu chise damochápasa casidica chequei uje ujnacari Absalón moji ore gari to ica. Ga chojningame darógode: "Boyo udire údi ga ore moji guiguíjna uñeque to jne uje que yipota jetiga yimopóji ore gari to jne rĩ. Mu ajuso ore guio jeta jé ca cuchárique chona ore. Ga David mochápasa casidica uje ore chejna yijmanáyone ore cãra ore iguíjnai jogadi enga ore cho abai toguedie jé aja dáringáringui toguei. Ga ore chiro dajuyaquéode iji ore iguíjnai dosadode jetiga jé ca piyapo udire ore rĩ. David chajni aja daguíjna casica mu chise damochápasa casidica chequei uje ujnacari Absalón moji ore gari to ica. Ga chojningame darógode: "Boyo udire údi ga ore moji guiguíjna uñeque to jne uje que yipota jetiga yimopóji ore gari to jne rĩ. Mu ajuso ore guio jeta jé ca cuchárique chona ore. Ga David mochápasa casidica uje ore chejna yijmanáyone ore cãra ore iguíjnai jogadi enga ore cho abai toguedie jé aja dáringáringui toguei. Ga ore chiro dajuyaquéode iji ore iguíjnai dosadode jetiga jé ca piyapo udire ore rĩ.

⁴ Enga eduguéjnai David tibidi dasoldádode eduguéjna ichai uje i tu Amása enga chojningame uté: –Abidi judágosode ore jnese ome yoquijocaningai yui. Enga a esápo yu iji Jerusalén dirome rĩ jeta dirode gadioc.–

⁵ Amása jno jetiga chimáta judágosode, mu ore mochádode chãraja David ojninga casodé.

⁶ David chimo uje Amása qué sase ga chojningame Abisai: –Jnani dosoi uté uje i tu Séba a sué Absalón gai ome datígo. Jecute bo ga ajína yisoldádode ga ajnáño uté. Ga a ore cho deduguéjna iji ua jne aja uté quigade. Ja seca uté chise idai dejnane uñeque jne enga que piyácapo uté rĩ. Ga jno dáringai júruru údi aja quedéjnane.–

⁷ Joab nóna David iguíjnai irodisõripísode ore uague gáredie uje ore uáguedie udire íode u ceretéode, peletéode ore. Jé basa ga Abisai nóna soldate ujñapetade ore ga jé u uje ore cháta raja ñane jeta ore chajna Séba uté jnese. Ga jé u uje ore jnoji dedáidatéi Jerusalén jnese.

⁸ Mu uje ore chise cucarané querua ejoi uje déji ore idai Gabaón gabi enga Amása chachai ore iji ore garani. Joab chigui daguidé uje pocaningane gajné uaté ga chijna daquesei uje déji pi ajei iji ógoro gai. Enga que piraque jetiga Joab chijnime daquesei uje quĩrique chayósi údi mu jĩraque iquesei chachẽre guesi iji pi.

⁹ Enga Joab chose Amása yui ga chayo abuayé údi ga cho jetiga jé tagu uré. Ga chojningame: –Yesa chá, ¿jé uajate uaque jnese e?–

¹⁰ Ga Amása chose Joab yui, mu que chiraja uje Joab chijnime daquesei iji dógoro gai, ga chichagu Amása ome ga jé u uje Amása cachodi tu. Uje Joab chichagu Amása ga changuñeri daquesei iji Amása arúbuchai ga uchade yore aja jnumi ¡jare! Joab chichagu Amása ga jĩraque toi ga que pogotaque uté. Ga Joab que chajirape cuchárique ga nóna dajorane ore ga ore chicáji dajesui uté, uje ore chajna Bícri ujnacari Séba uté.

¹¹ Ga soldádode uñai cháguena Amása ejoi ga tibidi Amása jorane ga chojninga: –¡Ujetiga gosode jé chijnóra Joab, David ore úringane pijõra ga gosi cháta raja Joab ore to!–

¹² Mu Amása déji dajeque pajei uje Joab chujé iji ga iyoi chayója sona. Mu soldate pijnai tuté doi Amása ga churugúsiji jnumi aja quedéjnai iji dajei. Ga chaco iguidé dañoré gai. Gaidi tu gu ujetiga jé ca pajirique uté ome soldádode ore uje ore cháguena gai ga ore toji gai jnese gu aja dajesúode.

¹³ Uje ore churugúsi Amása aja quedéjnai iji dajei ga jé u uje ibisoque soldádode ore aja Joab ore quigade rĩ uje ore chajna Séba uté.

¹⁴ Mu Séba jno ga que basíji daté ga quítequiguíji ore idai Abel-bet-maaca. Ga chimáta dayé Bícri iguiosode ore jnese iji uté.

¹⁵ Uje Joab jorane ore chise ore idai Abel-bet-maaca ga Séba e ore suru dabai iji uté ajei. Ga Joab isoldádode ore doi cucaranenie ga ore chujé aja ñane gai jetiga ore chacája ore ujuyaquéode ajei. Ga uñane ore chujé ore ujuyaquéode ome pidode jeta ore chimochẽre ga ore chacája ajei.

¹⁶ Enga chequé irajaté tibidi Joab isoldádode ore iji ore ujuyaquéode uéchai ga chojninga: –¡Jé cangáchobí yu á! Uje yipota jetiga abichoi uaqueduguéjnai Joab ga yicatecãrami uté.–

¹⁷ Uje Joab di ga chose chequé uaté yui ga uaté chojninga: –¿Joab jé u ua ya?– Ga uté chojninga: –Ejẽ́, Joab jé u yu.– Enga chequé uaté chojninga: –Jé cangarami barogué uyu yuru quigode.– Joab chojninga: –Be ga yangári barúrigo.–

¹⁸ Ga uaté chojninga: –Baraja yocáqui casodica ore uje ore chojninga nanique: "Ujetiga pibotaquérique déji uñéngo, enga jé arec ujetiga udore ore chingome cucha dacadode udore aja abélgotique." Áyipierãque abélgosode gu, ga ore chiraja cucha dacadode jnese. Abélgoto yu to, enga a qué yo baquigome bacuei uté cucha iji de yoquidai jne.

¹⁹ Bamo uje yoquidai tudé uerate ga sué israélgosode ore idáyode gáyode jnese. Enga que pocaningane gaisõre yoque gotique to iji yoquidai udé. Enga yijnórangopise eduguéjna cuchábi David to. Mu uaque ga ¡chimo jóroque re uje uacajéyo yocujuyaquéode iji yoquidai gai uje Pangarádejnai Dupade gajnecho mu!–

²⁰ Joab chojningame chequé uaté: –Que yicagóji de gu jetiga yajnangaráco uaquedai ujuyaquéode udore.

²¹ Mu yocajnai u jnani uje idai déji cucaranémui iji efraíngosode ore uniri ajei. Enga uté i tu Séba. Ga uté potapísa jeta chijnime yoqueduguéjna cuchábi David ga chácariji jogadi. Ga uté déji bedai udé jetiga chimáta jnanione uñane ga a cho dasoldácho iji udore ore. Mu ajuéga uté ome yoque ga asi ome yoque ga yijíongome uaquedai uté iji te jmete.– Ga chequé chojninga: –A yaquesúgo Séba uté etabi jne ga a yórango gatoi aja uaque jne iji jnumi.–

²² Enga chequé irajaté uaté jno ga nejéru guidai idaisórone ore údode jetiga ore chujé Séba ga ore idai jé ate te. Ga ore tangári chequé uaté ga ore doi Séba ga ore chaquesu etabi ga ore tṍraja Joab ore yui iji ore ujuyaquéode uéchai. Ga Joab chiroque darógode uñai jetiga chubúchu dabuchui ga ore noñome ore idai iji te. Enga Joab chiroque dajorane soldácho ore aja daguíjnane jeta ore chicáji, jé basa ga Joab chicáji Jerusalén jeta catecã́ri eduguéjnai David iji uté.

David ajegaidode jnanío ore íode u udojo nanique ujetiga ore cháta cuchade aja iji urasade judágoso ore ujade

²³ Ga David chichapo Joab aja jogadi casica jetiga soldádode ore chopo dasuté iji uté rĩ iji ore uniri Israel údode jnese. Enga chicha Joiada ujnacari Benaía aja úringai eduguéjna to. Ga David irodisõripísode soldácho ore cho deduguéjnai iji uté. Ga David irodisórone soldate udore jogadode gare ga ore chojningame uñane ceretéode, jé basa ore chojningame uñane peletéode.

²⁴ Uje David pota cuchárique úringárique pipesute iji daniri ga chiroque jnanione aja bisideque jeta ore pésu, ga que toc jeta gosi chetaque David ojningane udore. Ga David chicha udore ore ajirisṍri aja ore ejoi uje uté i tu Adoram. Ga uté ajirique cucha pipesudode aja quigode jnese iji Israel údode. Ga eduguéjna cuchábi David chiroque Ahilud ujnacari Josafat ujetiga churúsãre áyipiedie quigode gatuaque.

²⁵ Ga chirócapo daroi uñai aja ujetiga churúsãre cucha dacadode jnese iji israélgosode ore uniri jeta jé ca ore chicadígui udore quigode. Ga David iroi uté i tu Séva. Enga sacerdóteode ore eduguéjnane u Sadoc, Abiatar ore.

²⁶ Enga David iroi cuse uje i tu Íra ga sacerdote uté to mu David chedu rome daroi uté ga jecucha déji David iguíjnai gatuac. Ga uté idaipísi u Jair.