2 Samuel 19 - Dupade Uruode

^1-2 Uje David urasade chimo deduguéjnai uje po dajnacari Absalón ejode, enga ore tibágui Joab ga ore chingome. Ore irasique rome dáringane pujnuéngaisóño iji taningai, mu uje ore chudute uje David poji dajnacari quigade ga jé u uje ore po to.

³ Uje soldádode ore di iji dajocaningane ga jecucha ore irasique re uje ore sué damajosórone ore gáyode. Mu David isoldádode ore diji ore idai ga ore cho parágaja ore idai ga cho ujetiga ore umajósoningo sué ore gai, uje ore cho ugode aja degúi.

⁴ Que David cha dabijnane gotique uje tibite aja dagoyedie ga chojninga: –¡Absalón, yabi á! ¡Absalón, yabi á! ¡Yabipísi tu ua!–

⁵ Joab chicáji David iguíjna cuchábi jetiga catecã́ri, enga chojningame: –¡Yoqueduguéjná! Banguíra pajegátigai aja basoldádode ore. Uje ore diji guidai ga ore cho ugode aja yoquidai. ¿Ama jé ca cucha ome ua ya jetiga piberoque bamajosórone ore uniri, ga bape uecade uacaqui jé u tome uacáringane ayoré pórecajna, bacotedie, bamochápasadie, barógode ore?–

⁶ Enga Joab uté qué jno daruode údi ome David ga chojningame: –¡Yoqueduguéjná! Cho jetiga bajnorapise yoquetesórone ore. Jé basa ga betaque bameserãsórone baroque ore uyoque. A barasique ua jne jetiga barógode ore yitogoi jnese, jeta bajnacari Absalón ecápo rĩ. Uje uyoque u mu uje yocumajosórone chujérase yoque gu ua, uje yãrájo ua ome ore.

⁷ Yoqueduguéjná, be ga ango barasitigai aja basoldádode ore ga aquĩ́ra ore ome ore jnusiétigade. Ja seca ore jno jnese gajiné iji dejai tudé, ga ore noñome ua iji te jmete ga tita bejode ome ore jnese. Enga yurúo udore iji Pangarádejnai Dupade iquei. E jiei cuchade uje chise ua iji báringai jnacare gatode nanique, mu udojo a suépise udore gai jetiga barógode ore noñome ua iji te.–

⁸ Uje David chudute udojo ga jé u uje cha dajnusiétigai ga doi dasocabei ga chicáji ore idai ujuyaquei piagoi ga chácariji uté iji ore edominone jnese. Enga ore chudute jnese uje ore eduguéjnai e jnusiétigai íjnoque ga ore tibágui David iji charidi jnese. Mu Absalón isoldádode ore chajni jnese aja daguíjnane ga ore cha dáringane soldácho jnese uje ore todo David ore yui gu.

Eduguéjna cuchábi David chajni aja dedáidatéi Jerusalén

⁹ Ga israélgosode ore catecã́ri ñane jnese iji dedáyode údode jnese ga ore chojninga: "¡Chimo jóroque re uje eduguéjna cuchábi David u ica uje ijnimique yóguiji yocumajosórone filistéogose ore jmainie ica, mu yátago yógaja ujnacari diríca ga yijócãco dai iji yocuniri udé!

¹⁰ Uje yoco yoqueduguéjna iji Absalón diríca mu ore chujé uté iji pocaningai ga yiquetágo yógaja jnumi ga que yoqueduguéjnarique cuse to. ¡Chimo jóroque re uje que yibicoi Yoqueduguéjna cuchábi David ga chajniápo yoquibai te rĩ!"

¹¹ Enga israélgosode ore uruode udore chise David iji upusiédi guiguíjna. Mu David chojninga: "Gusu yurasapísode judágose uje que ore urúrique diji yu to." Ga chiroque darógode aja sacerdóteode yui iji Jerusalén uje ore íode u Sadoc, Abiatar ore. Ga irógode ore di ga jé u uje ore chojningame sacerdóteode udore: "Yoqueduguéjnai urúo udojo ome uaque que ga chósi tome uaque: 'Boyo ga acatecãchoi judágosode ore dayode jne uje yo yáyugu uje que ore tibidi yu to jetiga yajniapója Judá to rĩ ga yácarapóji yiguíjna cuchábi te rĩ iji Jerusalén.'

¹² Mu oyósi tome ore jne: 'Yoqueduguéjnai David chojninga que: Quedéjna uacasocade. Uje yurásapise judágosode uaque mu uacoyo ejo uaque uje uacabichoi yu. Uje uacojode israélgose ore tibidi yu to diríca.'"

¹³ Enga David chiroque daruode aja Absalón isoldádode eduguéjnai to uje i tu Amása. Ga chósi tome daruode ome uté: "E yicadígui cucha dacadi casodé, Amásá. Uje jé yitojmárangoji jnumi jnese ga yoquiguiose ñane. Jecute yipota jetiga yisoldádode ore cho deduguéjna cuchábi iji ua jne, ga bapácadi a u Joab charidi jne. Enga jé ca otigase yuruode udojo uje jé ũrepíso yuruode udojo. Mu ujetiga cachi yurúraso, enga jé areque jeta Pangarádejnai Dupade cho dajuñame yu."

¹⁴ Enga judágosode ore chudute David uruode ga ore áyipie qui chojmára jetiga ore tibidi David ga chajniapója ore idai to rĩ ga nóna daroguipísode aja Jerusalén rĩ.

¹⁵ Uje David ore chudute ore pijnane ga jĩraque ore chajniapója Jerusalén to rĩ. Uje judágosode ore chudute David ore ujnomei uje e ore chajni ga e ore chachai David ga ore chirote ore iji ore idai Gilgal jeta ore chátaja David ore jeta ore chaquesu yote quedéjnai uje i tu Jordán.

¹⁶ Simei uje chacacãre David ome daru noñángone ica, ga cháta raja judágosode ore to ga chachai David to. Benjamíngose Simei uté, enga jnani bajai Géra ape uté ga idai upúsu Bahurim.

¹⁷ Mu que gusu Simei gotique mu benjamíngosode uñane ore chachai David to enga 1.000 u David achaisórone ore. Ga Saúl casica iroguipísi Síba déji benjamíngosode ore ujade to ga nóna dabode uje ore chejna yirídai chojmarai, jé aja irógode uje ore chejna ayoré chojmarai. Ga bajaque Síba ore aja yote quedéjnai ome eduguéjna cuchábi David ore.

¹⁸ Ga Síba ore chirote David ore iji yote quedéjnai edúdi ujetiga ore chátaja abode, acotedie ore jeta ore chajuque yote quedéjnai. Chachai gu jetiga eduguéjna cuchábi David ca cha chosõre.

¹⁹ Uje David e chise yote quedéjnai ga Simei chayója uté iquei ga cṍraja uté iquei enga chijócha ajei údi uje chicota ome úringai eduguéjna. Ga chojningame: –Yoqueduguéjná, jé ca ajnusina yisoca casodica uje baboji Jerusalén ica. Enga jé ca bajénique dotã́rome yu jne.

²⁰ Yirajapise yadode ome ua, Yoqueduguéjná, enga gajnareque yadode ome ua. Jecute yo bajágu yu ome yujode joségose ore ga yachai ua to iji de.–

²¹ Mu Sárvia ujnacari Abisai chajnai Simei uruode ga chojningame: –Simei á, ¡jé tiógara jeta yujégo ua iji de! Uje que cucha iyieque gotique jetiga gosi cho darúja Pangarádejnai Dupade guerani eduguéjna ome daru noñatígo.–

²² Mu David chojningame nero Sárvia uaté abi: –Jé ca agota udore, Abisai á. Uje que bajneque uté uruode gotique. Jecucha Sárvia ujnacarode uacasoca uje jĩraque uacoyo júruru. Uje yajníngoja Jerusalén ga que yipotapísa jetiga gosi chujé dojórique ayoré iji deréjnai udé. Uje yipota jeta gusu yoquininaquéode ome ñane uje Pangarádejnai Dupade chatire yúringai eduguéjna cuchape yibai iji deréjnai tudé gu.–

²³ Ga David catecã́ri Simei ga chojninga: –Yurúo udojo iji Pangarádejnai Dupade iquei uje a jé ca chuque uacuñeque jne, Simei á.–

²⁴ Ga Saúl ájnami Mefi-boset chachai David to. Uje David jnoji Jerusalén uje chayome dajnacari Absalón, ga Mefi-boset jnusipísi David ga chojninga: "A jé ca yẽ́sarapóji yotique to jne rĩ, enga a jé ca yujúapo yabuayé to jne rĩ, enga a jé ca yuruapo yiguidéraque to jne rĩ jé aja jetiga ga yoqueduguéjnai David diapóji yoque jne rĩ."

²⁵ Uje David diji Jerusalén ga jé u uje Mefi-boset tibágui David, ga David chojningame: –Mefi-boset, ¿gotique gu a uje que ajína yu to ica uje yicoji guidai udé ica?–

²⁶ Enga Mefi-boset chojningame: –Yajéode u jórogu ica jeta yijína ua to mu baraja uje yiñóña ga que toque urugúrique ome yu. Yiroque Síba aja burica quedéjnai ica jeta pésu ga yoru ga yijína uaque to. Mu que doi yiroquérique gotique. Ga chayome yu ga chachai ua iji barani ica.

²⁷ Yiraja uje Síba gaidi u jeta cho dojñame ua ica ga chiese yácariji ore idai udé gu jetiga ore cho deduguéjna cuchábi iji yu iji de ome Síba urupatáringane udore. Mu Yoqueduguéjná, uje jé bopise gaté unirisórone ore ome barajatígadatéode ga que arajaque ayoré tátique uyoque. Enga jé be arétigo iji udojo ome ua.

²⁸ Yiraja uje jecucha gajnareque yáqui casica adode ome ua ica, ga jé tiógara jeta chuque uté ape disi ejode ore uyoque jnese. Mu uyu ga que ajé yu to mu jecucha banejéru yu aja batigade ica ga cuchadaté uté ica ome yu uje yacásãra ua iji batigade gai. Enga a jé ca yipésapo bajuredie jne rĩ ome cucha dacadode udore, uje que cucha ome yu gu Síba uté adode ome yu, chamáñaje yajneque bosongaquéode gatuaque gu.–

²⁹ Mu David chojningame Mefi-boset: –Que cucha uñeque cuse rĩ jeta yicatecãcoi ñane ome. Uje e yingome Síba diríca jeta ajucho báqui casica gajnéone jnumío ome ñane jne. Ga a jé ca yécãrape yuru quitígome uaque jne rĩ.–

³⁰ Mu Mefi-boset chojninga: –Jé areque jeta Síba cho dajnéngu udore jnese. Uje que yucuei tu gotique ujetiga yajnetígo cucha jiei, mu yucueguipísi u bomitigárique. Ga yirasique yu uje bãriápo rĩ uje jé uajate ua ga bagúsapóji baguíjna cuchábi udé rĩ.–

³¹ Ga galaádgosi Barzilai tṍraji dedai Rogelim ga chachai David to iji yote quedéjnai. Gaidi u jeta cháta cuchade aja David ore to iji uté. Ga chingo raja David uje David e jno gu iji ore uniri.

³² Enga e choquíjnapise Barzilai uté ga guejnanie siquerei chise 80 años. Uje eduguéjnai David qué ore déji uté uniri ica iji ore idai Mahanaim ga jecucha chisi ome David ore posode ome ore ica uje ayoré ataque uté gu.

³³ Uje Barzilai chingo raja David, ga David chojningame: –Barzilai, ajína yoque to aja Jerusalén. Ga a jé yi basoca casé jne ome ua uje que ajuseque yoque diríca.–

³⁴ Mu Barzilai chojninga: –E garósi siqueredie ome yu jetiga yugúsi erámi udé to. Ujetiga qué jnacarirase yu ga a yijínarása ua aja Jerusalén, mu choquíjna yu ga a yácariji de jne.

³⁵ Yejnanie siquerei e chise 80 ga e que jé yirajápo cucha yiguíjnatique jeta unere, jeta deroco. Ga que yũrúapóji cuchade úringane pududicho to rĩ. Enga a jé ca yangárirási ayoré deyaque choquíode ore ijñiecárigo to iji baguíjnai, jeoga ijñiecaquérigui uje a jé ca yirajárase ore achachagútique to. Uje choquíjna yu ga que yipota jeta yijína jnacánique uágaja quedéjnarique ga yipésu uacajuréraque uje que toque jetiga yi udojo ga jnacánique arẽcho yu.

³⁶ Que cuchadaté gotique uje yachai uáguiji de ujetiga yátaja bacotedie, babode ore ujetiga ore chaquesu yote quedéjnai tudé. Que yucuei tu gotique ujetiga ẽrája yu ome udore.

³⁷ Mu Yeduguéjná, jé dóji ga jé yácariji yoquidai udé to iji yijorane ore ujade. Ga a yitoi dirome ga ore chicha yóderaque aja iapade ode ejoi to dirome. Mu Yeduguéjná, bamo yujnacarabi sudé uje iábi su Quimam. Ga ajuéga ga nóna ua ga chácariji yijogadi. Ga osi barógabi iji suté ome batoqué gajnetígo cucha.–

³⁸ Enga David chojninga: –Quimam, boji te, ga ajína yu to. Ga a yujuse beo gatuaque jne ga a yi bayé uru quigode udore ome ua jne.–

³⁹ Uje David e ore chicáji yote quedéjnai uéchamitó ga David chucu Barzilai uré, uje e ore cho jmíti, jmíti ome ñane gu. Ga Barzilai chajni aja dajogadi casé daguíjna.

⁴⁰ Enga jiei David jorane uje ore nóna aja ore idai Gilgal. Ga Quimam ore déji uté to, jé aja judágosode ore jnese. Ga jiei israélgosode uje ore déji David ejode iji uté to, mu gusu israélgosode pei u.

⁴¹ Mu udojo quigade ga israélgosode uñane jnese tibágui David to, ga ore chojningame David: –¿Gotique gu a uje gusu judágosode ore diríca uje ore chachai uaque iji yote quedéjnai edúdi diríca uje uacaquesúyo diríca? ¿Gotique gu a uje que ore chingo raja yoque diríca jeta yachagoi ua to?–

⁴² Mu judágosode chojninga: –¡Jé yocujo judágosipise eduguéjnai David uté gu! ¿Ga uacájningane garanone u udore a? Uje yachagoi ga que chimate yoque gotique ga que chisiapome cucha bisidétique ome yoque rĩ.–

⁴³ Mu israélgosode chojninga: –Israélgosode yocunirone chejna yijmanáyone, mu jé basa ga uacaniri chojmára, mu que ango uágaja yoque gotique diríca uje jiei yoque mu ga yachagórasi Yoqueduguéjna Cuchábi David to diríca. ¿Gosode diríca uje ore pijnangaite bajaque Yoqueduguéjna David bajaque diríca? Uyoque u diríca, jé basa ejopísode u judágosode uaque.– Ga judágosode, israélgosode jé ore isoca uje ore botare ñane, mu judágosode u uje ore dosópisaja dejode.