2 Samuel 18 - Dupade Uruode

David isoldádode ore sué Absalón gai ga ore chujé uté iji porebúrique nanique

¹ David doi dasoldádode ore iquei ga chisecãru ore nanique ga chisi ome ore eduguéjnane ome ore gaté ujetiga eduguéjnane udore ore pésu dáguedie iji uté nanique. Eduguéjna uñane ore irodigode soldácho 1.000, jé basa uñane ore irodigode 100. Ga adi jé u ome dasoldádode udore ore jnese ga soldádode ore cho dasutedie iji darodisórone udore ore nanique jnese.

² Ga jé u nanique uje David chiroque ore aja dajocaningai ga chojninga: –A yajuque uacáguedie jne ga gadioque uacajogadode ga uacuñane oyo uacasutepise iji yiroguipísi Joab jne; jé basa ga uacuñane oyo uacasutepise iji Joab desai Abisai jne uje udore ore daté i tu Sárvia; jé basa uacuñane oyo uacasutepise iji gátgosi Itai jne.– Enga chojningame dasoldádode ore: –A yi pocaningai to jne.–

³ Mu David irógode soldácho ore chojningame: –Yoqueduguéjná, ácariji ore idai udé ga apésu cuchade aja quigode iji de jne. Enga aroque soldate ijóningo ore aja yoque jne iji ujáningo. Ga jé dóji ga gusu yoque ome pocaningai. Uje yocumajosórone que ore ucuegode u yoque gotique, mu ore ucuei tupúsu ua iji yocujade. Ujetiga ore sué yoquibai ga ore chujé yocuñéngo ga que cho cuchárique. Uje ua upúsu orerãi ome yoque. Uje ayoré chojmára ua, mu ore chujé ua ga cho jeta ore yugode 10.000 iji uyoque.–

⁴ Ga eduguéjnai David chojninga: –A yiji arétique jne ome uaque.– Ga David basája ore idai piagoi ejoi ujetiga timíninga dasoldádode aja doi. Ga ore jochai chicáji David dosadi jnese, ga ore uáguedie jiei, ga 1.000 déji ore uáguedie uñane, jé basa 100 déji uñane.

⁵ Enga David catecã́ri Joab, Abisai, Itai ore ome dabi Absalón ga chojninga: –Ajuso yabi Absalón guio jne ujetiga jé ca cuchárique chosi ti iji, iji uacajocaningai uté.– Que gusu jetiga David chingo daruode aja Joab ore, mu chingome darógode ore jnese to, ga ore chududipise uruode jnese to.

⁶ Ga David isoldádode ore jnome israélgosode ore yui ga ore tuangóa ñane iji garai pari uje pórechoquíbu uté. Ga ore chujé ñane iji uté. Ga ore jocaningai uté déji efraíngosode ore uniri ajei.

⁷ Ga David isoldádode yugode iji israélgosode chise 20.000 iji ore.

⁸ Ga ore chujé ñane iji garai pari údode jnese, ga uñane chinguíra raja cuchade ga ore toi uje que chuque ore mu ome ore ujórique ayoré, mu jé ore toi.

⁹ Absalón choru burica quedéjna mu chajire daquei ga chimo dayé David isoldádode ore iji daquei. Enga Absalón oruté burica quedéjna chayója porebui údi uje poridie udire i tu encína. Enga Absalón gatui chimere riji poria caningóronie údode, ga oruté uaqué burica quedéjna chayo ga noñome Absalón iji gaté uje gatui chimere riji poria caningóronie iji uté. Ga cho cocho, cochógaja jnumi riji poria gaté.

¹⁰ Ga David isoldádode uñai chise Absalón uté ga tibágui deduguéjnai Joab. Ga chojningame: –Yimo Absalón que uje gatui chimere iji poria caningóronie iji gaté que.–

¹¹ Joab chojninga: –¿Gotique gu a uje a amo que, mu que ajé ga jé cachója uté ome ua? Ujetiga ajérase ga jé u jetiga yẽrárasaja ua. Ga yeranenie urásu pláta guebei uje chise 10, ga yatarásaja yigarupe orerãi.–

¹² Enga soldádi chojningame Joab: –A ẽrárasa yu ome bapláta guebetique jeta chise 1.000, mu a ca yujérase yoqueduguéjna cuchábi David ujnacánique. Uje soldádode uyoque jnese yudúco que gu uje eduguéjna cuchábi David chaquĩ́ra daroguipísode uágome dajnacari diríca jetiga jé ca ajocáso uté.

¹³ Ujetiga yujérase que, ga yajnéngui jóronguio bojningane udore bẽrapáicho. Mu cucha bisidécho uje a eduguéjna cuchábi David chududirase ga chujé yu to. Enga a jé ca arotárase yu iji uté iquei.–

¹⁴ Enga Joab chojninga: –A jé ca yejnapo deréjnai bisideque jne rĩ uje yicatecã́ri ua iji de.– Ga Joab doi queségodogóde ga chayója Absalón yui ga chise, mu qué eca iji gaté. Ga chimitingare uté ome queségodóque gadiógode udore iji gaté. Ga quítequiguíji Absalón iyobié ga jé u uje Joab chimate Absalón aja jnumi.

¹⁵ Enga Joab irógode soldácho uje ore chejna yijmanáyone ore doi Absalón ga ore chigota iji cachodi uje qué catája poria caningóronie.

¹⁶ Enga Joab chojningame darógode ore: –Abúchuyo uacabuchui jeta yocurásaisó ore cha chucajningárome israélgosode ore.–

¹⁷ Enga ore chisa Absalón ga ore tṍraja jnupe péroringai uje idája iji guesi, ga ore chanire cucaranenie aja uté ode gai ga unucódejna iji gai. Ga Absalón isoldádode ore chajníja daguíjnane uje ore chayome David isoldate uási.

¹⁸ Uje Absalón cáma atique cuse nanique ga jos eti abéraque re. Ga chiroque darógode ore aja turéjnai jochai uje ore chojningame uté Eduguéjna Cuchábi Gajnei Turéjna Jochai. Enga chojningame darógode ore iji uté: "Aróyo cucaranéringui aja gaté jne iji uté jeta idájai jnumi. Yigaidi tu gu jeta jé yo yipijoguto iji yoradie udire jne iji yiquigáningo. Ga a jecucha ore jnusina yi ome udire jne. Uje a jé ca yatique cuse gu iji yiquigáningo ujetiga ore jnusina yu ome uté." Enga jecucha israélgosode chojningame Absalón orai uté Absalón Pijogúsõri Doraque Monuménto Uté.

¹⁹ Ga sacerdóteode ore ujnacarode Ahimaas, Jonatán ore catecã́ri Joab enga ore chojningame: –Ajuéga ga yico pujnomei údi ome David uje uacajéyo Absalón, yoqueduguéjnai umajósõri. Ga a yojnijome uté jne: 'Pangarádejnai e cho dajuñame bamajósõri que, enga chijna etotiguei iji gari, enga a jé ca pésapo dasoca gajnarétigo ome ua jne rĩ.'–

²⁰ Mu Joab chojninga: –Jé dóji. Uje que uerate pujnomei uté gu ome eduguéjna cuchábi David. Uje ujnacare gu ga chosõre yui. Mu a yiroque uágome putoqué cucha uñeque jne rĩ iji ejórique.–

²¹ Enga Joab tibidi soldádode uñai uje etiopíagose uté ga chojningame: –Bo ga abágui yoqueduguéjnai David ga atata bamone cucha ome uté jne.– Uje etiopíagosi chimo uje Joab chirógaja eduguéjnai yui ga chirase utoquei ga chichaga datajidi aja jnumi uje chicota Joab ome úringai eduguéjna. Enga jno ga jé u uje chayóji David yui.

²² Ga sacerdote abi Ahimaas chojningame Joab: –Ajuéga ga jé yijogate etiopíagosi uté dosadi. Uje yipota jeta yugúsi to jetiga David tangári uté uru quitígo.– Mu Joab chojninga: –Yababi á, jé ca ajos eti David tẽrája pujnomei júsonique ome cuchárique jne. Uje a jé ca cucha uerate gotique ome David ujetiga chudute dajnacari ujnomei.–

²³ Mu Ahimaas chojninga: –Que yigaidi u jeta David tẽrája yu gotique, mu jé dóji ga yijína uté aja David yui.– Ga Joab chojninga: –Bo ga ayóna ga a ese jne iji sañeque, ga ajína uté aja qui.– Enga Ahimaas chayóna etiopíagosi iji turéjnai jochai uté ga bajagája iquei.

²⁴ David chácariji ore idai ujuyaquéode piagode ujai. Ga David iroi choru ore idai ujuyaquéode enga e chácariji piagoi gai iji gaté jeta chajire erámi. Ga jé u uje chimo jnanírique uje chayo iji ore yui, ga chayopise iji ore yui ga gusu iji dagajñua.

²⁵ Enga David iroi tibite ga chojninga: –Yimo jnani uje chayopísiji yoque ga ibisoque.– Enga David chojninga: –A pujnomei gosi oitique ome yoque. Uje jnani chojmára ga a uerate gosi iríringuírique pujnomé ome yoque.–

²⁶ Mu David iroi uje ajirique erámi chimo jnanione uñai te rĩ ga tibidi piagoi irodisórone: –Yimo jnanione uñai uje déji bajai uqué quigade rĩ. Ga que pimo jeta ucajningati u bajai uqué.– Mu eduguéjnai David chojninga: –A ore iríringuírique pujnomé a uerate jnese.–

²⁷ Ga David iroi chojninga: –A sacerdote Sadoc ujnacari u bajai uje i tu Ahimaas. Uje igajñua obiréjna ome yu.– Enga eduguéjnai David chojninga: –Jnani paraque uté, enga a jé cho iríringuírique pujnomé uje a uerate to.–

²⁸ Enga Ahimaas chijnare raja David iquei ga chichaga dagataidie aja jnumi ga chojninga: –¡Picotaque opejã Pangarádejnai, bangureni Dupa, Yoqueduguéjná, David á! Uje chisi ome pitoringai ome bamajósõri casodé ore jnese.–

²⁹ Enga eduguéjnai David chojninga: –¿Jé chorique yujnacari Absalón to a, jeta jé chapite to?– Mu Ahimaas chojninga: –Yimo ore uague cuchabé que, mu que yiraja gotique. Uje jĩraque Joab chiroque yu aja bei que gu. Jecute que yajiripise gotique to que.–

³⁰ Enga David chojninga: –Ácariji yirosadi uté ga jé bayarite uté jne.– Ga Ahimaas doi David uru quigode udojo.

³¹ Mu igasique ga etiopíagosi diringai tu to. Ga uté catecã́ri David ga chojninga: –¡Yojñane ueracho ome ua, Yoqueduguéjná! Uje Pangarádejnai Dupade cho dajnutabádu ua iji deréjnai tudé. Ga udore ore uje ore chijnime pocaningai ome ua diríca que ore dépoji erámi tudé to rĩ.–

³² Ga eduguéjna David chojningame etiopíagosi: –¿Yabi Absalón, qué chapite to a?– Mu etiopíagosi chojninga: –Yipésupú ga bamajosórone jé ore cho bajnacari uté jne jõ jetiga ore toi jnese. Uje ore uruode gajnarécho ome ua ica ga ore pota jeta ore chujé ua to.–

³³ Ga David chague ga choru uchiejnane aja erámi ajirisórone ore charidi iji ore ujuyaquei ójo, ga David poji uté ga chĩ́care dabi Absalón i aja dagoyedie ga chojninga: "¡Yabi á, Absalón! ¡Yabi á, Absalón! ¡Omi turásu jeta uyu urásu jeta yo yajnéngu báringai chuque! ¡Yabi á, Absalón!"