2 Samuel 17 - Dupade Uruode

Husai botare Ahitofel uruode nanique

¹ Udojo quigade ga Ahitofel chojningame Absalón: –Ajuéga ga yijína basoldádode uñéngo jeta ore chise 12.000 enga yajnángo David ore jé iji dejai udé jne.

² Ujeta David e eyuque ore iji ore iriguítigade ga ore tṍrai te ¡janip! ome David ore ga David tṍra rome ore. Mu David a dosóñime yuru quitígo dirome, ga jé u jetiga jorane ore chayome ga ore chisite rágaja erámi. A jé ca yujé uñeque jne, mu gusu ore eduguéjna cuchábi David jetiga yujé.

³ Enga a yujé bayé uté jne enga jorane ore chayo, ga jogadi u jetiga ore chatapója yoque to rĩ. Uje gajnareque gu uje uñane déji bayé gari, jé basa uñane yugúcoji bari iji de. Absalón á, ajuéga cuchade udore jne gu jeta chuque jnani chojmarai uté, ga jogadi u jetiga pajesereringai déji barasade uyoque jnese ome ñane.–

⁴ Uje Absalón iroguipísode israélgose ore chudute Ahitofel uruode ga uerate quigode ome ore jnese.

⁵ Enga Absalón chojningame ore: –Abichoi arquítagosi uje i tu Husai to jne ga yangácoi uru quitígo to jne.–

⁶ Enga Absalón chatata Ahitofel uru quiso ome Husai, ga chojningame: –¿Yicoi Ahitofel uru quiso jeta ueracho ome ua, jeoga jé ca yicoi?–

⁷ Ga Husai chojningame Absalón uruode: –Jecucha ueracho Ahitofel uruode gatuaque, mu gusu uruode udore ome bayé uje que déji yajénique.

⁸ Uje baraja bayé, irógode ore to uje que ore dosóñime cuchárique. Enga a ájningaránguipíse ore iji deréjnane udojo gu uje bajna bayé úringai eduguéjna iji gari. Ga ore gajnúone u cuchiso sijnaque abechutique uje poite atíguiji gari ga chirota dabi ga tagu dejode. Ga bayé chirajapise pocaningane isocade gu, enga cãra dajogadi ome dajorane ore iji dejade ujetiga jé ca piyaque uté iji dejai.

⁹ Enga a e chacose re iji dacoyapítique cucarã́tedó iji sañeque. Ujetiga beyoi ore iji dejai tudé gajiné, ga a ore chujé barógode udore uñéngo to jne, enga jé u ujetiga ore chatata bajnomei iji yocuniri údode ga a ore chojningame ua jne: "¡Eduguéjna cuchábi David sué Absalón isoldate dipeséode ore gai que!"

¹⁰ Uje barógode soldate udore ore tagu dejode ga ore cho cuchiso sijnátigo, mu a bayé suérase ore gai jne enga chose udore ore. Uje bayé, jorane pocaningane imósoño ore ga que ore dosóñime pocaningárique gotique.

¹¹ Mu qué yo baquique to jetiga abidi jnanione ore jnese iji ore idáyode Dan, Beerséba ore ujai ujetiga ore nóna ua jnese. Enga a quene ayoré dipesé uaque jne. Enga jé ua upúsu jeta ácariji udore ore iquei jne enga ore chijñaque ua aja pocaningai uté jne.

¹² Enga a bajorane udore soldátebú, uyoque u jne jetiga yucuegoi bayé iji jogatique iji sañeque, ga yujégo ore jne iji jogatique erãpe. Enga yejnángo udore ¡jaripe! jne ga a togadeque ore jogatique jne, bai casé, ore jnese. Ga a yocajnaminie su gue ayé orabidie jne uje chosi chúcu, chúgaja jnumi, ga jiei yoque ga que pimo yoqueruénique.

¹³ Mu ujetiga bayé chayome yoque ga pógu re iji ore idánique ujeta ujuyaquérigo chaparu gai, mu uje jiei yoque ga yicoi enuéringo ga yadígoja ore ujuyaquei uté ga yayógo údi aja tié jochai ga jé u ujetiga yucuegoi bayé iji ore idai tuté ga yujégo iji uté. Enga a jé ca yijíongome cucaranéringui iji ñane gai jne rĩ iji ore idai tuté uje ore pógu bayé iji ajei gu.–

¹⁴ Enga israélgosode, Absalón ore irasique Husai áyipie quigode ome Ahitofel urúiso quigode. (Mu Ahitofel uru quiso jé ũrepíso uje David ore eyuguipíso ore iji ore úringane urugu. Jecute Pangarádejnai Dupade pésu Husai uté uruode úringane unéño ome ore ga ore tangári uté uru quigode. Pangarádejnai Dupade uté gaidi u gu ujetiga Absalón nóna pocaningai gaisórone ore, ga jé u jeta chise dagachodi iji uté.)

¹⁵ Ga jĩraque Husai tibágui sacerdóteode uje ore íode u Sadoc, Abiatar ore. Enga chatata Ahitofel áyipie quiso ome israélgosode, Absalón ore, jé aja dáyipie quigode to.

¹⁶ Enga Husai chojningame ore: –Aguitóyo ga arocho uacabode aja David ore yui, jé iji de. Enga jé ca ore moji guesáringane jne iji erãpetarei, ga ore chicáji yote quedéjnai Jordán uéchamitó jne, enga a jé ca chuque David jne ome ore, jé aja irógode ore.–

¹⁷ Mu sacerdóteode que ore ujnacarode déji Jerusalén gotique, uje ore abode udore íode u Ahimaas, Jonatán ore. Mu que ore tibidi ore jeta ore chise Jerusalén gotique. Ore todo gu jeta pirajaque udore ore ome Absalón. Jecute ore chiroque datocaite gatéode aja dajnacarode ore yui iji ore idai En-rogel. Uje pujnomei júsorone ore di ga jĩraque Ahimaas, Jonatán ore jnome jeta ore chingo udore aja eduguéjna cuchábi David gaté.

¹⁸ Uje Ahimaas, Jonatán ore jno pujnomei údi ome David ga jnacare uñai chimo ore ga jé u uje chingo Absalón to. Uje Ahimaas, Jonatán ore chudute uje Absalón irógode ore chajna ore, ga ore chicáji ore idai uje i tu Bahurim. Enga ore tibágui jnani uje chiraja ore ga pógu ore iji erui uje déji iguíjnai ejoi.

¹⁹ Enga jnani acoté chanire erui joride aja gai enga chinguire danasui trígo iji erui joride gai gaté. Enga que ayorérique chiraja uje jnacarode ore déji erui tuté ajei.

²⁰ Uje Absalón irógode ore chise chequé uaté ga ore catecã́ri ga ore chojninga: –¿Ahimaas, Jonatán ore déji rique?– Ga chequé chojninga: –Ore chise de diríca ga ore chicáji yote quedéjnai diríca.– Enga Absalón irógode ore chajna udore ore mu que ore chise ore, ga ore chajnésarupo Jerusalén to rĩ.

²¹ Uje Absalón irógode e ore jno ga Ahimaas, Jonatán ore jno ga ore chayo David yui jeta ore chingo dojñane aja ore. Ore chatatame David jetiga jĩraque ore jno ga ore chaquesu yote quedéjnai uje Ahitofel pota jeta cho dajocaningame ore.

²² Jecute David, jorane ore jno ga jĩraque ore chaquesu yote quedéjnai Jordán jeta ore chicáji uéchamitó. Iji direjnímei ga que ayorérique déji yote quedéjnai uéchai uté gotique.

²³ Ahitofel chimo uje Absalón que doi uru quigode, ga jé u uje chisa dachidi burica quedéjna ga choru ga chicáji dabatiga casicaite ore idai, ga chicáji daguíjnai ga pésu cucha dacadode aja quigode iji uté. Ga jé u uje doi enuei enga chigaru detabi ga choru daguíjnai ga chigaru enuei aja cutádi, ga cachója jnumi mu chiságui jnumi, ga jé cachodi u uté uje chigaru detabi. Ore chijnimíji cachodi ga ore chijóchame iji dayé ode ejoi.

David ore chise ore idai uje i tu Mahanaim

²⁴ David ore chise ore idai uje i tu Mahanaim. Ga Absalón, jorane israélgose e ore chajna ore ga ore chaquesu yote quedéjnai Jordán uté to.

²⁵ Absalón e chicha Amása aja Joab jogadi jetiga soldádode ore cho dasuté iji uté. Ga Amása daté i tu Abigail nanique. Enga ismaélgosi Itra ica déji uaté ajei bisideque nanique, ga abi base ga ore chĩ́care Amása aja uté. Ga Abigail daté u Nahás nanique, ga Joab daté Sárvia nero uaté nanique.

²⁶ Absalón ore chise ore uniri Galaad ga ore pésu darengúi iji uté nanique.

²⁷ Uje David ore chirõre ore idai Manahaim nanique ga Nahás ujnacari Sobi chachai David ore iji uté, uje Nahás uté idai upúsu Rabá uté uje déji amóngosode ore uniri uté nanique. Ga Sobi uté nóna dajorane uñane uje ore íode u udojo: lodebárgosi Amiel ujnacari u uñai uje i tu Maquir, jé basa rogelímgosi Barzilai u uñai uje uté idai déji ore uniri Galaad ajei.

^28-29 Ga jnacarode udore ore di dorade údi iji David ujetiga David, jorane ore, ore chitarana. Enga ore diapo ore ĩracadie údi to rĩ ujetiga ore chãrei cuchade iji udire. Ga ore diapo bajodíe údi rĩ iji ore jetiga ore tagája udire ome dabotígo. Ga ore diapo trígo urui údi to rĩ, jé aja cebáda urui ujetiga ore pésu tortíllas iji udore urui. Ore diapo ore irajũrane guejna údi to rĩ, jé aja cuguéode to, jé aja cutepéode, jé aja mantéca, aja quéso uje ore pésu iji aquirájnanie irisode, jé aja áyasadie ore to. Ga ore chojninga: –Yiríngo cuchade udore údi iji ua, Yoqueduguéjná. Uje a e eyuque uáguiji uacáringane urugúo uje uacaquesúyo erãpetarei aja uacajesui.–