2 Samuel 16 - Dupade Uruode

Mefi-boset iroguipísi Síba chachai David iji garani ga tẽrája iji dajeque pajei

¹ Uje David e ore jnopo rĩ ga ore tuangóa Jonatán casica abi Mefi-boset iroi Síba iji uté. Ga Síba uté chachai David to. Ga Síba chijñaque burica quedéjnaminie ga chujé deranone cucha pibose aja udire gai. Ga gueranone u arurégode uje chise 200, jé aja tórta quedéjnane uje pipesucho iji úva cajnorenie ga chise 100. Jé basa pore adie déji to uje chise 100 to. Ga chĩreta cucha aoi ome vínoi.

² Ga eduguéjnai David chojningame: –¿Gotique uje bajna udore aja de?– Ga Síba chojninga: –Burica quedéjnanie udire u ujetiga bacotedie uñáringui choru aja uacajesúode. Jé basa ga cucha pibosode ga barógode soldácho ore gajnecho jeta ore tagu. Jé basa víno ga ãre posode gajneque jeta ore chóji iji dajugugode erã́petarécho.–

³ David chojningame Síba: –¿Barósõri casica ájnami déji rique a?– Síba chojninga: –Chácariji Jerusalén to. Uje jos eti israélgosode ore chicháji dáqui casicaite jogadi, ga ore cho deduguéjna iji uté to. Jecute chácariji Jerusalén.–

⁴ Enga eduguéjna cuchábi David chojninga: –Yerani casodica cucha ome Mefi-boset a e bajnecho jne. Ga Mefi-boset jé dóji ga chácariji Jerusalén to jne.– Síba chichaga dagataidie aja jnumi iji David iquei ga chojningame: –Yacaranguipis uje basi ome cuchade udore ome yu. Yipésupú ga jecucha basoca udore jne ome yu uje bosõre yu gatuac.–

⁵ Saúl jogasúode uñai chise David to iji dajeque pajei iji ore idai Bahurim, enga cho darúja David ome daru noñángone. Ga uté dai i tu Géra, jé basa uté i tu Simei.

⁶ Uje eduguéjnai David, iroguipísode ore chicáji uté ejoi ga Simei uté chimitingare ore gai ome cucaranenie enga tibite ore gai ome daru noñángone.

⁷ Ga chojningame David: –¡Jõcaratáguebei chá! Bo caru ome bajesui.–

⁸ Enga chojninga: –Pangarádejnai Dupade e cho dajuñame ua ome bate gajnaréngone ome yoqueduguéjna cuchábi Saúl casica, jogasúode ore nanique, uje bajna yoquijogasui Saúl casica úringai eduguéjna iji gari ica ga bácariji uté jogadi. Enga Dupade chicha babi Absalón aja bajogadi ga quene basijnaringuéone chajni babai. Enga que agúsapoi cuchárique rĩ ome báringárique chigóca.–

⁹ Enga Sárvia uaté abi Abisai chojningame David: –¡Chimo jóroque re uje tamoco godoi uté botare yoqueduguéjna cuchábi! Yi jne enga yaquesu etabi jeta yujé.–

¹⁰ Mu David chojningame nero Sárvia ujnacari uté: –Jé dóji ga jé doi daru quitígo ome yu. Jé seca Dupade jé uru ome que, jecute cho darúja yoque. Uje que toc jetiga paquĩraque gosi uru quitique uje que pirajaque gu jeta Pangarádejnai Dupade ajéo, jeoga cachi gosi uru quicho.–

¹¹ Ga David catecã́ri daroguipísode ore, Abisai ore ga chojninga: –Yabipísi casé a pota yúringárique chuque, jétapũré benjamíngosi uté, uje eduguéjna Saúl gãrapíode u benjamíngosode udore ore to. Jé dóji ga ore cho darúja yoc. A Pangarádejnai u jne jeta jé doi dasocáringome cuchade udore jnese.–

¹² David chojninga: –Yo paráguiji yáyuguhebátigade udore jmainie, ga yirote jeta Pangarádejnai Dupade chajuque yajnéone pacacáninga gajnarécho udore iji yibai, ga jé u ujetiga chiroque yajnetígo ore acacáninga omío ome yu to.–

¹³ David, jorane ore, jnome dajesui. Jé basa ga Saúl casica jogasúode uñai uté jé ate uje chacacãre ore ome daru noñángone. David ore chajna cucarãte oroné edúdi, jé basa ga Simei choru cucarani iji ore dosadi, ga chimitingare ore gai ome cucaranenie gatuaque. Jé basa chicosápo ore gai to rĩ ome jnumi.

¹⁴ Uje eduguéjnai David ore chise yote quedéjnai Jordán enga eyuque ore iji ore iriguítigai ga ore chácariji yote quedéjnai uté edúdi jeta ore cho dajñare iji uté.

Absalón pota chijna dayé úringai eduguéjna iji gari nanique

¹⁵ Uje qué dayé ore déji dagajñua, mu Absalón e ore diji Jerusalén. Enga jiei israélgosode ore uje ore nóna Absalón aja ajesúode, jé aja dayé iroguipísi casica Ahitofel.

¹⁶ Enga David jorámei arquítagosi uje i tu Husai uté chimo Absalón ga chachai ga tibite ga chojninga: –¡Pachietabaite yoqueduguéjna ichai, israélgosode uyoque! ¡Enga a jé jogate dapácadi uté gatuaque jne!–

¹⁷ Ga Absalón catecã́ri Husai uté ga chojningame: –¿Jé ca yai jorámei u ua ya? ¿Gotique gu a uje que ajína uté to diríca?–

¹⁸ Enga Husai chojninga: –Que togome yu jeta yijína uté to uje yirote ua iji udé to gu. Chamáñaje Pangarádejnai Dupade ichajapite ua aja báringai eduguéjna, ga israélgosode, ore yoco yoqueduguéjna cuchábi iji ua jnese. Jecute omi tu jeta yugúsiji de to bejode, ga yi baroquéode to ome cuchade.

¹⁹ Que gusu jetiga yo yijõra iji uté, mu omi tu jeta yopo yijõra iji uté abode gaté to rĩ. Enga, Yeduguéjná, yajéode u jeta jé yisocai uté chojmára ome bayé, uaque. Bamo uje yigaite bai iroquéode diríca, ga a yijiápoi baroquéode to jne rĩ.–

²⁰ Absalón jecucha catecã́ri Ahitofel ome isocárique yúrique. Ga Ahitofel jecucha cho uté quique. Iji dirode uñai ga chojningame uté: –¿Jé yo ringome ore jeta jé ca ore chotigase yúringai eduguéjna?–

²¹ Ga Ahitofel chojningame Absalón: –Be bayé acoté casidé uje noñome ore iji daguíjna cuchábi diríca jeta ore chirote iguíjnai. Enga amóji udire ore gari jne. Enga a israélgosode ore chudute udojo uje bamóji bayé acotedie gari ga a ore chimo jne uje badojnóngaja bai, ga a jé ore chirate ua jne ga a ore dojnóngaja bai to jnese. Enga a ore irasique bei jnese jne.–

²² Enga Absalón pésu cárpabi iji daguíjnai ójo ga moji dayé acotedie gari iji uté údi jetiga israélgosode ore pañaji Absalón adode jnese.

²³ Iji deréjnane udore nanique ga Ahitofel ujnomei cuse uje irajataque uté ga ore chicota ome irajatigai, ga ore chojningame: "Abichoi Ahitofel ga angáchoi uru quitígo jeta acatecãchoi. Chamáñaje uté uruode quigode jé cunguésõri Dupapísi uru quigode to gu." Jecute David dopísi Ahitofel uruode quigode, ga jé chome Absalón uté to.