2 Samuel 15 - Dupade Uruode

Absalón pésu dajocaningai ome dayé nanique

¹ Cucha dacadode udojo quigade ga Absalón chucué dasoldátigo jetiga ore nóna uté aja quedéjnane. Ga Absalón doi guebéquedatéi oré ga chátaja buricade jetiga jecucha choru uté aja sona. Enga isoldádode ore chise 50 uje jecucha ore chayóji Absalón iquei uje uté choru dachidi guebéquedaté uté. Enga pocaningane gajneque guebéquedatéi uté.

^2-4 Absalón pota jetiga chijna dayé úringai eduguéjna iji gari, jecute chicha raja ayoré díode ore iquei uje ore ibaguiédi urásu dayé mu jecucha ga Absalón chãra udore ore ga chojningame ore: "Que gosi déji jetiga chajire uacajuredie gajnéone cucha aja quigode iji eduguéjna cuchábi iquei. Mu atatamome yu bajaque jeta yangarami quitígo to." Ga jecucha chojningame uñane: "Yijorámi á, ¿ṍraji rique? ¿Bajuré jé gajnetique cucha ya?" Ga jé u uje ore chingome dedai i tome, jé aja dãrapíode jnani bajácho íode to, ga ore chingopo dajuré gajnéone cucha aja Absalón uté rĩ. Enga jecucha ga Absalón chojningame ore: "¡Urénga, gajnareque ore isocade ome ua! ¡Chimo jóroque re uje que iapade tangári ua! Ujetiga uyu urásu uacadode ajirisṍri ga a yorase yujuñame gosi uje isocade gajnarécho ome ua." Ga jecucha Absalón uté isoca uje chácariji ore idai ujuyaquéode piagoi gatuaque iji durasedie jnese.

⁵ Uje israélgosode uñane ore di iji Absalón ga jĩraque Absalón chisa ore jmanáyone, jé basa ga chucu uñane uredie, jé basa ga chisa uñane pajei aja re.

⁶ Enga israélgosode jecucha ore isocabeque nanique uje ore chicáji eduguéjna cuchábi David yui, mu Absalón chachai ore iji ore garani bajaque. Enga Absalón nejéru israélgosode ore údode gu jetiga ore cha chichaga dajéode aja dayé, enga ore doi ga ore ajiríguipísi u Absalón yui.

^7-8 Enga siqueredie e gagájni ome Absalón isocade udojo úringane pipesucho. Mu iji dirode uñai ga tibágui eduguéjna cuchábi jeta catecã́ri ga jno ga chicáji ore idai Hebrón. Ga chojningame: –Uje qué yugúsiji síriagosode ore idai Gesur ica ga yicatecã́ri Pangarádejnai Dupade iji uté. Ga yósi tome yicatecãraitigade ica: "Dupade á, ujetiga ajuéga yu ome Jerusalén jeta yajniapója to rĩ, ga a yicáji Hebrón jne enga a yẽrája ua jne iji uté." Jecute ajuéga ga a yipésu yojningane udojo jne iji Hebrón. Uje Pangarádejnai Dupade chatirépo yu aja uaquedai udé rĩ, mu cáma yi yojninga casodé cucha ome uté.–

⁹ Jecute David chojningame Absalón: –Bo, ga acáji, yabi á, a ca cuchárique chosi ti iji ua jne.– Enga jé u uje Absalón chicáji Hebrón.

¹⁰ Mu uje jno ga Absalón chiroque darógode aja israélgosode ore uague uñanie yúode iji ore uniri údode. Ga chojningame ore: "Eso ore idáyode jne enga abúchuyo uacabuchugode jne ga abichója uacajesúrigo jne rĩ ga ojnicho jne: '¡Eduguéjna ichai déji yoquidai Hebrón to é! ¡Ga i tu Absalón, eduguéjna cuchábi David ujnacari uté!'"

¹¹ Ga Absalón dejéna jerusaléngosode uñane aja daquigade ga ore chise 200, mu que ore chiraja inejequei gajnetique cucha gotique. Ga ore jos eti dejéna ore gu dẽrapáidode ome Dupade, mu que u gotique.

¹² Enga nonapo dayé iroguipísode uñai to rĩ uje David jecucha ga tangári uté áyipiedie quigode to. Ga gílogose uté ga i tu Ahitofel. Mu jé isoca uje chãra uté ome danejequei gajnéone cucha ga chojningame: "Ajína yógaja Hebrón to ga yẽcója Dupade jne iji uté." Absalón gaidi u gu jetiga jiei israélgosode iji ejode, ga chingo raja udore jetiga ore cho deduguéjna cuchábi iji uté.

David chayome dajnacari Absalón ga jnoji Jerusalén nanique

¹³ Enga israélgosode uñai chise David ga chojningame: "¡Yocurasade chimáta rágaja babi Absalón gari jnese jetiga uté chijna báringai eduguéjna iji bari, enga basája bayaridi!"

¹⁴ Ga David tibidi darógode eduguéjna ga chojningame ore: –¡Yico ga yayógome Absalón uté, uje qué deréjnai déji gu! Aguitóyo ga yico jeta jé ca pocaningárique chise jerusaléngosode ore jnese jne iji yoquidai tudé. Ujetiga jé yácagoji de jne enga Absalón a chejna guidai idaisórone ome daquesei, ga gajnareque jetiga ore cho daba deduguéjna uyu iji de.–

¹⁵ Ga ujode eduguéjna ore chojningame: –Yoqueduguéjná, a jé yicoi bajequitique jne jeta omitigai u ome ua.–

¹⁶ Ga David jno ga nóna dabode, dacotedie ore jnese aja dajesui, ga noñome damochápasadie chequei iji daguíjnai uje ore chejna yijmanáyone jeta ore chajire iguíjna cuchábi yui.

¹⁷ Uje ore chise guidai eruei ga David chojningame ore: "Yipéco yoquijochatique aja yocajesui.

¹⁸ Enga a yiroguipísode ore u ujetiga jé ore jogate yirosadi. Jé basa ga yisoldádode ore uague gáredie doi yoquiquei jne uje ore irodique yiguíjna cuchábi diríca, uje udore uáguedie íode u ceretéode, peletéode ore. Jé basa ga udore iquepísi ga getéogosode ore u jne jeta ore chácariji uté uje 600 u ore. Ga yojningane ore u uje yo yidai iji ore idai to nanique uje i tu Gat."

^19-20 Ga jé u uje David catecã́ri darógode ore eduguéjnapísi uje gátgose uté to. Ga i tu Itai. Ga David chojningame Itai uté: –Omi tu jetiga barasade filistéogose uaque boyo ga acayóji uaqueduguéjna ichai to, ga beyoi uté ojningáringo cucha. Uje purása quedéjna uaque gu enga que yipota jeta ejnárecho uágome yu to. Ja seca eduguéjna ichai uté chusípise uaqueo jne ujetiga angoño uágaja uté to. Cho jetiga quene aríño iji yu to diríca uje uacoyo uaqueduguéjna iji yu to. Mu que yipota jeta ajínaño yu to uje que yiraja yiquitique dirome. Boyo ga, ajníño to, ga ¡yipésupú ga Pangarádejnai Dupade jecucha jnusina uacasoca omone ome yu ga chatapísaja uágome cucha dacadode jne, ga nóna uágaja quedéjnane jne jõ!–

²¹ Mu Itai chojninga: –Yoqueduguéjná, yurúo udojo iji baquei, jé aja Pangarádejna Dupa Uecai iquei uje a jé ca yimoque bajesúrique jne jeta yiquecáji, jeoga yitoji. Uje baroque yu gu.–

²² Ga jé u uje David chojninga: –Boyóji te ga ajínaño yoque to.– Ga jé u uje Itai nóna David aja ajesui, ga cháta raja darasapísode ore uje 600 u ore, ga uté jogasúode ore déji to jnese.

²³ Uje David ore jno ga ore urasade poji ore ejode. Uje ore jno ga ore chaquesu tié jochai uje i tu Cedrón. Ga soldádode chaquesu bajaque. Quigade ga David ore chaquesu to. Ga ore chicáji dajei uje qui tu erãpetarei.

²⁴ Ga Dupade iguíjnai adode añerasórone uje ore íode u Sadoc, Abiatar ore, ore nóna levígosode uñane ga ore chijnoque Dupade uruode pi cajo aja ore idai eruei ga ore chácariji uté jeta David jorane ore chejna raja uéchai jnese.

²⁵ Uje David e chise uté tiógarei to ga chojningame Sadoc: –Atireyo Dupade uruode pi cajo uté aja yidai te rĩ. Ujeta Pangarádejnai Dupade ajéo jne ome yu ga a jé yopise uruode pi uté cajo jne, ga a yajniapója yijogadi jne, enga a jé yugúsapoi uté ejoi gatuaque jne rĩ.

²⁶ Mu ujetiga ca Pangarádejnai Dupade chise yunétique jne enga a ca chatire yu jne, ga jé arégome yu to uje que piyaque yijogadi ga jé doi dasocáringome yu.–

²⁷ Ga David chojningápome sacerdóteode uñai uje i tu Sadoc: –Yajegaidi u uté gu ujetiga Abiatar, uaque ajníñoja yoquidai enga oyo parácho iji uté. Ga bajnacari Ahimaas chácariji bari iji uté, jé aja Abiatar ujnacari Jonatán jeta chácariji dai gari iji uté to.

²⁸ Mu jé basa ga uyu ga a yácariji garáijnane jne iji erãpetarei ajei, ga a yirote pujnoméringo yúode jne jeta jecucha arócho pujnoméringo aja yu jne iji uté.–

²⁹ Enga Sadoc, Abiatar ore chijnoque Dupade uruode pi cajo aja ore idai Jerusalén ga ore chácariji uté to.

³⁰ Enga David ore choru oroné cuchabé aja daqui yui uje uaté i tu Olívos. Ga David poja doruté uaté gaté. Enga chuchíe jnumi ga chaco datoi gai uje imoi tu gu uje jnusiétaque David. Jé adi u to ome jorane uje ore choru oroné uaté ga ore poja gaté ga ore chaco datoidie gáyode to.

³¹ Ga ore chingome David uje iroguipísi Ahitofel u uje chatapísa raja ujnacari Absalón uje chijna úringai eduguéjna iji gari. Ga David catecã́ri Pangarádejnai Dupade jetiga Ahitofel áyipie íjnoque bisideque uje cho quique Absalón ome cuchade gu.

³² Uje David chise ore guẽrapáidode jogadi iji oroné ójo uje ore tẽrája Dupade ome dẽrapáidode udore iji uté ga arquítagosi Husai chachai iji garani. Uje chudute David ujnomei uje bayaque David ga chajnangarase daguidé iji darúbuchai ga charo jnumi ga chaníraja datoi ga chachai deduguéjna cuchábi David ujeta nóna aja úringai bayaque.

³³ Mu David chaquĩ́ra uté ga chojninga: –Que yipota jeta ajína yoque, uje cachi jiei yoque gu.

³⁴ Mu bo ga ajníja Jerusalén to ga opise Absalón iróguiji ua to jne enga angári Ahitofel uru quitígo to jne. Ga ojningame Absalón: "Cachi bayé iroque yu ica, ga a jé baroguipísode uñai upo yu iji de rĩ ga a yípisi baroquéode to." Enga jé u uté ujetiga a angaripísi Ahitofel ore uruode ome ñane iji uté to.

³⁵ Ga ango baduditígo ome sacerdóteode uje ore íode u Sadoc, Abiatar ore.

³⁶ Jé basa ga a ore chiroque dajnacarode Ahimaas, Jonatán ore aja gadoi jne, ga a ore chingo cucha dacadode udore aja yu jnese jne.–

³⁷ Ga David jorámei uté uje i tu Husai diji ore idai Jerusalén, mu tuangóa Absalón iji uté uje quene di dáringai eduguéjna cuchape údi iji Jerusalén ga irasique raja dajesúode.