2 Samuel 14 - Dupade Uruode

David juéga arorai ome dajnacari Absalón uté nanique, mu que pota jetiga chise ejórique

¹ Enga Sárvia uaté ujnacari Joab chiraja uje David jnusipísi gu uje tita ejode ome ujnacari Absalón uté uje chujé desai ica, ga pógu rome dayé ore.

² Enga Joab tibidi chequé irajaté iji ore idai uje i tu Tecóa. Ga Joab chojningame chequé: "Yeduguéjnai David jnusipísi gu uje que ujnacari casica diapo to rĩ. Jecute bebi yuru quigode udojo ome yeduguéjnai uté jne. Uje yigaidi u gu ujetiga uté juéga arorai ome dajnacari te rĩ. Ga o chequé jnusieté iji ua jne. Ga agui baguidedie jne uje ayoré jnusietedie ore pijogútodie daguidé u udire. Enga jé ca anire cucha ai unéningo aja babai jne. Yigaidi u gu jeta yeduguéjnai David a chose chequé jnusietebéraque aja ua jne, uje e iyajmé ua ome bajnusiétigai gajnetique cucha. Ga a uté jos eti bajogasúrique toi ica.

³ Ujetiga agúsiji yoqueduguéjna cuchábi iquei ga bepísi yojningane udojo quigode jnese jne." Ga jé u uje Joab chatata daru quigode ome chequé uaté.

⁴ Udojo quigade ga tecóagoto chequé chise David ga chichaga dagataidie aja jnumi iji iquei, ga ucuruté chise jnumi to. Enga pésu eduguéjnane ore gajnéone ore isoca iji David iquei. Ga jé u uje catecã́ri David ga chojningame: –Yeduguéjná, ¡átape ua aja yu jne!–

⁵ David chajnai uruode ga chojninga: –¿Cuchárique u a?– Ga chequé uaté chojninga: –Abai togué yu, ga yabai toi nanique.

⁶ Enga yabode gare ore, mu ore déji garai ica ga ore chujé ñane iji uté. Enga que uñeque déji ore ejórique ica jeta chaquĩ́ra ore ome ñane. Ga jé u uje uñai chichagu dajõrai enga cachodi jé u uje chimánaja jnumi.

⁷ Yijogasui ore jnari yu ome jetiga yẽra yabi yungóri casica ome ore, ga jé basa ga ore cho ujo ome úringárique chuque to uje chujé desai ica gu. Gusu yabi uté iji diri uje irodei dai casica gachidode cucha iji quigade, jé aja gajnei jnupe jeta chajire yui. Ujetiga ore chujé yape uecai tuté jne enga cho jetiga ore chibéro yagutíyamáni yape jne, ga jé u jeta yácariji te ¡paque! jne. Ga yabai toi casica e i togadeque iji erámi tudé. Bamo uje a gosi toi ga ca atique déji quigade ga que pujnusinamaite gosi uje que gosi atique déji quigánique gu.–

⁸ Ga David chojningame chequé: –Bo, ga acáji baguíjnai ga ca o báyugu ua. A yĩrarare babi uté gai jne enga a jé ca chuque babi uté jne.–

⁹ Ga chequé chojningame David: –Yoqueduguéjná, jé socaseti ore chaguhéta udojo babai jne uje bãrarare ayoré yungóri gai. Mu a iapade ore uyoque u jne jeta yoco yoquiba udore, jé aja yoquijogasúode ore uyoque.–

¹⁰ Ga eduguéjnai David chojninga: –Jetiga gosi jmongarája ua jne enga aroque gosi aja gadoi jne, enga a jé ca tibágapoi ua jne rĩ jeta pésapo bajuréraque to rĩ. Uje a yaquĩ́ra gosi jne ome ua gu.–

¹¹ Ga chequé uaté chojninga: –Yeduguéjná, atṍripísi Pangarádejnai, bangureni Dupa uté, ome yabi uté to ga jé ca juégame ijmongarájasṍri yoquijogasu. Uje yabode uñai e bijna uté gu, ga que yipota jetiga uté bijnápo rĩ. Ga a yiqueta yu aja jnumi jne iji udore ore quigade.– Ga eduguéjnai David chojninga: –Yurúo udojo iji Pangarádejna Dupa Uecai iquei ome ua uje a jé ca chuque babi uté jne enga a jé ca pijnimape gaterero chojmarátaque jne iji gatui.–

¹² Chequé chojninga: –Ajuéga darai ome yu ga yicatecãrami ua ome cucha chojmarárique.– Enga David chojninga: –Atata gotique.–

¹³ Ga uaté chajnai uruode ga chojningame: –Mu bapésu babai ome Dupade urasapísode israélgose uyoque to. Uje bajócãre bajnacaripísi ga cho darása iji purása quedéjnane ore to, ga gusu iji ore ujade.

¹⁴ Uje a chise dínique jne jetiga yitogoi jnese to. Jé yocopise yodi gu uje pojnéngaja jnumi ga quigade ga cho ¡taque! jogadi, ga que toc jetiga qué piranicápo yodi uté jne rĩ. A ore chãraque daniri ome gosi, ga idája uté gosi ome Dupade. Mu Dupade que chujé ayorérique gotique, mu chucué dasocáringome udore ore jnese uje idája ore iji uté, jeta ore diapóji gari to rĩ.

¹⁵ Mu yigaidi upúsu ome ua jetiga yingo yisadodéringane aja ua uje ore potapísa chui ome yabi. Ga yangureni u ua jetiga angári yuruode, ga apésu yojningane udojo jnese jne.

¹⁶ Ujetiga apota ga ajnime yabi, uyóguiji yocumajósõri uté jmainie to, uje uté pota jeta chibéro yocuniri iji erámi tudé, uje Dupade gajneque mu jeta chijnime yóguiji dapesudi udé jnupe, jeoga noñome yóguiji jnumi tudé jmete.

¹⁷ Yipota jetiga achajnai yuruode udojo ga apésu yajéchietaquérique. Yeduguéjná, baraja cucha dacadode úringane arécho, ga barajápo cucha noñángone úringane noñácho rĩ. Ga bopise Dupade irótique gaté unirísõre uje chiraja cuchade jnese. ¡Yipésupú ga Pangarádejnai, israélgosode yocangureni Dupa jecucha déji bari jõ, Yoqueduguéjná!–

¹⁸ Enga eduguéjna cuchábi David chojninga: –A qué yicatecã́ri ua ome barúiso quigode, ga ca apógu udojo ome yu jne.– Ga uaté chojninga: –Be ga acatecã́ri yu ome yurúiso quigode, ga a ca yipógu cucháringome ua jne.–

¹⁹ Ga eduguéjna cuchábi David chojninga: –¿A jé ca Joab uru quicho udore ome ua que, barúiso?– Ga chequé chojninga: –Yurúo udojo iji Dupade iquei uje jé upúsu baruode udore jnese, Yeduguéjná. Baroguipísi Joab u que uje chiroque yu aja bei, ga júcho udojo ome yu jeta yatatame ua jnese.

²⁰ Ga uté gaidi uqué gu jetiga écãre báyipie quitique ome babi casica, Yoqueduguéjná. Mu irajataque ua ga jé bajnui tupúsu Dupade irótique gaté unirísõre uje baraja yuruode ucode quigode jnese. Enga que cuchárique déji baniri jeta arajaque cucha dacatique iji baniri tudé.–

²¹ Uje chequé cha catecã́ri David ome cuchade udore jnese, ga jé u uje tibidi Joab to jetiga catecã́ri ome udore. Enga chojningame daroi Joab: –Yangári batocaidé uaté uru quigode que. Ga e yipésu yáyipie ome yujnacari uté. Enga abidi yujnacari Absalón ga chajniapója yoquibai to jne rĩ.–

²² Enga Joab chichaga datajidi aja eduguéjnai David iquei ga imoi u uje chicota David ome úringai eduguéjna. Enga chojningame: –Yoqueduguéjná, diri tudé e u uje yiraja yúringai posõrataque ome ua. Uje bangári yutocaidé chequé uaté uru quigode uje yutṍri uaté que. Ga a atire bajnacari yocasutábia Absalón yoquibai jne.–

²³ Joab jĩraque jno ga chicáji ore idai Gesur jetiga nóna Absalón aja dayé ore idai te rĩ uje i tu Jerusalén.

²⁴ Mu eduguéjna cuchábi David chojninga: "Ga a jĩraque Absalón uté chicárasiji daguíjnai jne, uje que yipota jeta tibágui yu gu." Enga jé u uje Absalón jĩraque quítequiguíji daguíjnai uje dayé que pota jetiga chise ejórique.

²⁵ Iji israélgosode ore ujade que jnanírique déji jeta cho Absalón uté ome enocha goningai. Ga israélgosode ore chicota dasutábia Absalón uté uje jnacare uerate. Uté abubíe, igosi que ore soringárique cuse gotique.

²⁶ Uje Absalón charengu datui uje umare, mu jecucha chaquesu datui gatuaque iji siqueredie ga chajire datui batigárique uje chuguhese ga chise 2 kílos. Ga uté chuguhese datui iji dayé ore gajné balánza gai to, gaidi u jeta ca potigayaque ome ujórique ayoré uje jé ũrepise ome datui batigai. Chamáñaje israélgosode jecucha ore chicota darása acãratade nanique gu.

²⁷ Absalón acotẽrachuque, ga abode gadioc, jé basa abia chojmára. Ga abia i tu Tamar to, ga ueradé abia to.

²⁸ Absalón guejnanie siquerei e gare iji Jerusalén mu cáma chise dayé gotique to.

²⁹ Ga Absalón chutṍri Joab jetiga tibágabi eduguéjna cuchábi ga chijócha ajei údi ujetiga juéga dei ome ga Absalón tibágui, mu Joab que pota. Absalón chutõrápo jórogui Joab rĩ ga chojninga: "Abágabi iapade jeta juéga dari ome yu ga yibágui to jne." Mu jé ate uje Joab chetaque iroquéode ga que doi Absalón iroquéode gotique.

³⁰ Ga ájningarãque Absalón ome Joab ga chojningame darógode: –Idógosi Joab guejnai iji yejnai to, ga e acade cebáda e uchui. Ga beyoi udore ga ãcho gai jne ome pioi.– Absalón irógode ore doi ga jé u uje ore chãru Joab guejnai uté gai.

³¹ Uje Joab chimo dejnai uje pioi tagu gai ga quítequiguíji Absalón iguíjnai. Ga tibidi Absalón ga chojningame: –¿Gotique gu a uje barógode ore chãru yejnai gai que?–

³² Absalón chojninga: –Yiroque yirógode aja gu uje betaque yutoquéode diríca uje yiroque ua aja yai yui diríca jetiga ango yuruode aja. Jecute abágui iapade ga angoma jne uje tibidi yu diríca iji punire uñai Gesur uquécasé, mu que juéga jetiga yibágui. Ga angome uje omi urásu diríca jeta jé ca tibidi yu iji ore idai uté diríca. Angome uje yipota jeta qué yĩrarare yibai iji uté iquei to. Mu ujetiga uté chiraja yibárique ga chujé yu jne.–

³³ Enga jé u uje Joab tibágui eduguéjna cuchábi David, ga chatata Absalón uru quigode ome jnese. Enga eduguéjna cuchábi David quene tibidi Absalón uté. Uje Absalón diji David ga chichaga datoi aja jnumi ga ucuruté chise jnumi iji iquei. Ga David chiringare dajnacari ga tagu uré.