2 Samuel 13 - Dupade Uruode

Amnón chajo raja Tamar nanique, ga nena que tiógarapo dajate rĩ, jecute dajate moji uaté gari bisideque

¹ David ujnacari Absalón nero cuse ga gapu omepise uaté uje i tu Tamar. Ga David ujnacarode uñai cuse uje i tu Amnón ga daté jé cãra re ome Absalón ore daté. Ga Amnón uté ajegaidé Absalón nero uje i tu Tamar.

² Uje Amnón pota jóroga Tamar, mu chagutu rome jeta catecã́ri uaté, uje cáma chimo jnacánique gotique gu ga dayé ore cãra uaté jogadi. Ga uté áyipie jogadípise uaté, ga chejnáreque re ome dapotiguei ome Tamar uaté uje pota jóroga úringáraque picatecãrainé mu chagutu rome.

³ Mu Amnón jorámei dojo jnacare cuse uje i tu Jonadab. Enga uté chirajapise jeta chacose cuchade ga que pirajaque isocáringome ipoguiétique cucha. Ga David uyade uñai ujnacare uté uje uté dai i tu Simea.

⁴ Ga dirode uñai ga Jonadab chojningame dajõrai: –Amnón, ¿jé cuchárique tṍraji ua ya, yasutábia? Uje jecucha yimo ua ga basũrujnáji dirode jnese. Atata báyuguhebátiga gajnetique cucha ome yu.– Enga Amnón chojninga: –A yingome ua jne. Uje yajegaidépise yesai Absalón nero uje i tu Tamar uaté, jecute yujnusiétigade gajné tu uaté.–

⁵ Ga Jonadab chojningame Amnón: –Be bamochápi ga o ejnaretáguiji ua jne. Ujetiga bayé chise ua jne jeta chajmita ua ga ojningame bayé jne: "Aroque ina Tamar aja gadoi ga pésu yibotique cucha jne ga yagu ipesutique cucha jne. Ga a tijode cho jnángome yu jne." Ujetiga bena Tamar di babotígo údi iji ua jne, ga a ajire uje pésu babosode iji bamochádi uté ajei jne enga agu uaté gueranone udore ome ua jne.–

⁶ Amnón doi damochápi ga cho ejnaretáguiji re. Uje David tibágui dajnacari uté ga Amnón chojningame dayé: –Iapá, aroque ina Tamar aja gadoi iji de ga pésu tórtarique ome yu ga jno údi ome yu iji de jeta yagu.–

⁷ Ga David tibidi daro Tamar ga chojningame: –Abágui bajate Amnón iji iguíjnai ga apésu tórtaringome jne jetiga tagu uté to.–

⁸ Enga Tamar jno ga chicáji dajate iguíjnai. Ga jé u uje pésu harínai iji uté ujeta chimeri ñane, ga chibore iji Amnón iguíjnai uté ajei.

⁹ Ga Tamar chisa darori ga chisi ome dajai, mu que pota úringárique pibose. Ga chojningame dejominórone jnacare ore: "Beyoi guesi iji Tamar yoquejode."

¹⁰ Uje gusu Amnón ore iji iguíjnai ajei ga chojningame nena Tamar: –Bo yibosode údi aja yimochádi jogadi enga asi ome yu iji uté.– Tamar chisa dapesudi tuqué ga jno údi aja dajaté mochápi jogadi.

¹¹ Uje Tamar chisi ome dapesudi ome dajaté, ga dajaté chisa jmanegatadé ga chojningame: –Yerámiá, boji te ga amomíji yari iji de.–

¹² Enga Amnón nena Tamar chojninga: –Que pisoca gotique arĩa, yajábi á, ome israélgosode uyoque. Ujetiga jnacánique moji gapúraque gari bisideque ga chinguíra pajegátigai aja damochápasa uaté. Yajábi á, jé ca aminingara ua ome cucha dacate noñátique.

¹³ Ujetiga amórasi yari bisideque ¿ga yorási ringome yúringáraque ũruso jne e? Enga a yocurasade israélgose ore chiraja badode jne ga a ore chojningame ua jne: "Táyipieque uté uje moji nena gari bisideque." Enga omi tu jeta acatecã́ri yocai eduguéjna David bajaque jeta juéga yu ome ua ga jé urásu jeta yimóji bari ga jé u ujeta o bacoté iji yu.–

¹⁴ Mu que paquĩraque Amnón ome nena. Ga jé chajo raja uaté, ga nena que tiógarapo dajate jecute dajate moji uaté gari bisidec.

¹⁵ Uje e Amnón moji uaté gari ga ijnoraquei ome uaté nóña ga petétiga ome uaté ga chojningame: –Ãriji iji yimochápi gai ga bome bajesúrique bu.–

¹⁶ Mu Tamar chojninga: –Úngare. Uje bamóji yari ga a o bacoté iji yu jne. Ujetiga ajócãrapo yu rĩ iji bejoi gajiné, ga jé u ujeta basijnaringuei ejoi tuté sué cucha noñaque bajade udore gáyode.– Mu jé ate uje dajaté que pota jetiga cho dacoté iji nena uaté.

¹⁷ Enga Amnón tibidi daroi ga chojningame uté: –Aroque chequé uaté aja doi ga ajuru gadoi ome uaté jne jeta jé ca tibágapoi yu iji de rĩ.–

^18-19 Ga Amnón iroi chiroque Tamar aja guesi ga surupúsu Tamar uaté yui. Tamar chigui doite ueradode uje eduguejẽ́ uaté to gu uje eduguéjna cuchábi uro uaté. Enga chajuque doidode iji daróbuchai, ga charo puchucurui ga chaníraja datoi, ga chaco dedodie gai ga poja dajesúode aja daguíjnai yui.

²⁰ Ga dajaguipísi Absalón chise nena uaté ga catecã́ri: –A bajaté Amnón u uje pésu bajegátigade ¡jõ!– Enga Absalón chojningame nena: Yerámiá. O paraque, ga jé ca opise báyugu ua ome cucha dacadode udore. Uje bajade uña uté ga a jé ca pute jne enga yocujórique ayoré a jé ca chiraja udore jne. Jecute jé ca o báyugu ua ome.– Tamar que chajniapója daguíjnapísi rĩ uje jõre gu. Jecute jé chácariji dajapísi Absalón iguíjnai to.

²¹ Uje eduguéjna cuchábi David chudute cuchade udore to ga ájningaránguipísome cuchade udore. Mu que chósi ti iji Amnón gotique. Uje ujnacare urẽjai tu ga que pota jeta atique gajnaréngaja uté. Uje chijnorapise uté gu.

²² Absalón que pésu cucháringome dayai Amnón uté, mu chetaguipise isocai ome nero Tamar uaté, uje moji gari bisideque gu.

Absalón cho dajnutabádu re ome dajai Amnón uje moji nero Tamar gari bisideque gu

²³ Iji cuchade udojo quigade ga siqueredie gare iji, ga Absalón, irógode ore chuju Absalón gachidedie áyasai ojode iji ore idai Efraín ejoi iji ore ajmini uje i tu Baal-hazor. Ga Absalón tibidi dayé ujnacarode ore jnese jetiga ore taguíji uté to.

²⁴ Ga Absalón tibágui dayé David to ga chojningame uté: –Yirógode qué ore chuju yachidedie gai iji de, mu a yingome ore jne ga ore chujé uñáringui jne ga abáchoi yu to jne, baroguipísode uaque, ga acho yoquiguérigui to jne.–

²⁵ Mu eduguéjnai David chojninga: –Yabi á, que toc jeta yibájoi ua ga yajo iji bari uje jiei yoque ga a yejnángo babotígo jne.– Absalón jnari dayé ome jeta taguíji gari to, ga jé ate dadi uje chojningame dayé: –Ajína barógode ore aja de jne ga achóji yari to jne.– Mu dayé chojninga: –A jé ca yajo iji bari to jne mu yipésupú ga jé ca cuchárique chósi ti iji uaque jne jõ iji uacatigai uté, ga anínaño uaque jne iji ñane gari.–

²⁶ Enga Absalón chojningame dayé: –Ujetiga jé ca áta ua aja yoque to jne enga aroque yocuyai Amnón aja gadoi jne jetiga chacásãra yoque to.– Ga David chojningame dajnacari: –¿Gotique gu a uje bapota jeta bayai uté nóna ua iji de?–

²⁷ Enga Absalón chijócha dayé ajei údi jetiga dayé abode ore jnese tibágui atigai uté to. Ga jé u uje dayé juéga ome dajnacarode jnese jeta ore chicáji áyasadie jogadi uté. Ga jé u nanique uje Amnón uté nóna ore to aja Absalón atigai uté nanique. Ga Absalón pésu dãraca piagoi ome dayade, desade ore ga uneripise ipesudi uté.

²⁸ Enga chojningame darógode ore: –Adójnachopísa Amnón jne. Jetiga subudé ga ũruso iji dajódi yoquijotaque jne, ga a yiroque uágaja uté jne ga jĩraque ajéyo uté jne. Ga jé ca atodóyo jne jetiga ajéyo uje a uyu u jeta yo yiba uté, mu uaque ga a ca oyo uacaba gotique jne. Ga ca agutúyo uágome uté jne.–

²⁹ Enga jĩraque Absalón irógode ore doi darósõri uruode ga ore chujé Amnón, ga desade uñane ore doi dachidedie cabáyu quedéjna ga ore choru ga ore chayome Absalón uté jocaningai jnese.

³⁰ Uje qué ore déji dajei ga ayoré gojñangarãque bajai chise David, ga cho dojñame uté ga chojninga: "Absalón chejna babíso ore que, ga que uñeque chapite gotique que."

³¹ Ga eduguéjna cuchábi David chajnangarase daguidé iji daróbuchai, ga cṍraja jnumi uje áyuguhebátaque gu. Ga iroguipísode iji ejode ore chajnangarase daguidedie iji daróbuchai gai to.

^32-33 Mu David uyai Simea abi Jonadab chojningame David: –Yoqueduguéjná, jé ca angári ayoré gojñangarãi tuté. Uje obiréjna uje Absalón yui tu Amnón ga gusu yuque uté, uje jnusina gu uje uté moji nero Tamar gari bisideque ica. Jé ca ajos eti bajnacare dacasutéisi ore toi jnese.–

³⁴ Ga Absalón chayo, mu uté uyade e ore chayóji dayé David iguíjnai yui ga ore ajnai tu dajei uje tṍraji ore idai Horonaim. Ga chicáji Jerusalén jogapi cucarãte edúdi. Ga David irógode uñai uje ajirique erámi, chimo ayoré urugúode ga tibágui David ga jé chingo.

³⁵ Ga Jonadab chojningame David: –Babode e ore di. Jé upúsu yurúiso ome ua.–

³⁶ Uje Jonadab cha catecã́ri David, ga jĩraque abode di ga ore popise uje ore diji dayé. Enga David, irógode ore popise Amnón ejode jnese to.

^37-38 Mu Absalón chicáji gesuréogosode ga chácariji ore eduguéjnai Talmai gari iji uté ga guejnanie siquerei gadióguiji ore idai tuté. Ga jnani bajai Amiud ujnacare ore eduguéjnai Talmai uté. Mu David jecucha poji dajnacare urẽjai Amnón quigade iji úringai chuque.

³⁹ Ga udojo quigade ga David áyipie doi dajnacare Absalón jetiga chajni ga chajire uté to. Uje jnusipísi uté gu.