2 Samuel 12 - Dupade Uruode

Dupade uruode júsõri Natán cho eduguéjnai David quique nanique enga chatata isijnaringuéone ome

¹ Ga Dupade chiroque daruode júsõri Natán aja David jeta chajmita. Uje Natán chise David ga catecã́ri ga chojningame: –Angarami yuru quigode udojo, David á, uje a qué yatata jnani gáningo ore ome ua jne uje ore idai jé chojmára. Ga ugúcharã́que uñai, jé jmataque uñai.

² Ugúcharã́i gachidedie jiei iji aquirájnanie, jé aja áyasadie ore.

³ Mu jmatai ga que gachidéraque áyasa cuse gotique. Mu dosi áyasa ababía oré ga quene désirásiji uté gari. Mu uje uté gaidé orábia áyasa abape quérãsi ga ueradape. Jecute uté abode canárosi suaté ga ore irasape suaté. Ga chacásãra uté iji atigade to ga chójija uté jopidode váso to enga mopóji uté gari iji mochádode. Ga jnani uté irasépisape ga chosi dababíji suaté.

⁴ Iji dire uñai ga jnacare disorã́quechoquí diji ayoré atai uté jetiga qué chidójnanga. Mu ayoré atai uté que chujé dachidéraque aquirájna urojna ome deyasṍri uté jnacare di gotique, mu doi jnani jmatai uté gachidábia áyasape ga chujé jeta ore tagu uaté.–

⁵ Ga David ájningaránguipísome Natán uruode ga chojninga: –Yurúo udojo iji Pangarádejnai Dupade iquei uje a yiroque yirógode aja ayoré atai uté gosi jne ga a cho daba dadode udore jne.

⁶ Ga a uté cho doré ome jnani jmatai jne ga a gagájni gueranéringui áyasai jne ome degábia gachidé áyasape gachisṍri. Uje que posongaquérique déji ayoré atai uté ajénique ome darása jmatai uje chijna gachidábia áyasa iji gari ga chujési gachidábia uje gusúsu, mu jé toria chujési suaté.–

⁷ Ga Natán chague ga jé u uje chusẽre David ga chojninga: –David á, ¡jé ua u yojningai jnani ataque! David á, angarami Pangarádejnai, israélgosode yocangureni Dupade uté uruode uje chósi tome ua que: "Uyu u uje yajegaite ua ica ome yurasade israélgose ore jeta ore cho deduguéjna cuchábi iji ua. Ga yibéro baguté joradie ica ome Saúl ga yicha ua aja uté jogadi.

⁸ Ga yẽrate uté iguíjna cuchábi ome ua, jé aja uté acoté dipesedie udire ore. Ga yimáta judágosode, israélgosode ore aja ñane ica jeta ore cho deduguéjna cuchábi iji ua jnese. Mu a ojningame yeranone udojo 'Qué garósosi, cáma cuchárique déji Pangarádejnai Dupade gueranone ome yu.' Ujetiga barúraso udojo ome yu ica ga a jé yõre bajnéone cucha.

⁹ ¿Gotique gu uje que be yuru quigode, mu babé yetégode cucha uje que yisípise unétique, mu jé bapésu? Ga bo bajuñame baroguipísi hitítagosi uje i tu Urías, ga bẽrame amóngosode diríca ga ore chujé uté ga bajna uté acoté aja ua.

¹⁰ Ga bapesudode udore basijnaringuéo gajnesṍri tupúsu yu, uje bóji hitítagosi Urías acoté gari ga chopise bacotedie to iji bejode. David á, a o baba basocade udore jne, enga a jé ca amópo pajesereringárique to jne rĩ iji baguíjna cuchábi udé ajei.

^11-12 Babode a ore u jne jeta a jé ca ore ajénique tejnuapója ua to rĩ. Enga a yisi ome bacotedie ome bajogasúrique jne enga a jé ca pógu re ome ua jne ujetiga moji udire ore gari. Bapógu basocade udore ome yu diríca, mu uyu ga yipésu yojningane cucha udore jnese iji barasade israélgose ore iquei jnese jeta ore pañaji jnese."–

^13-14 Ga David chojningame Natán: –Urénga yisijnaringuéone udore gajnesṍri upúsu Dupade.– Natán chojninga: –A jé ca Dupade cho dajuñame ua jne ome basijnaringuéone udore. Enga a jé ca atoi jne. Mu bape basugábi suté a su ujetiga Pangarádejnai Dupade chisi ome pitoringai ome. Uje Pangarádejnai Dupade chopise dáyugu re ome basocade udore gu, ga que chisípise basocade udore unétique.–

¹⁵ Natán e chajníja daguíjnai ga jé u uje uruode tocade ome Urías acoté casica, David ore ababi. Enga chejnárengosipíse re.

¹⁶ Ga David catecã́ri jórogui Pangarádejnai Dupade ome dababi jeta Dupade chiqueta. David que mopóji damochápirique gánique to rĩ, ga moji jnumi. Ga que jé cucha pibotique déji David ajénique. Uje chejna jóroque daguesi ome Pangarádejnai Dupade úringai picatecãraite.

¹⁷ Israélgosode ore angaránone uje ore déji David iguíjna cuchábi uté, udore ore doi David jeta ore chiringarája gaté iji jnumi, mu jé David ate uje moji jnumi. Ore chirógaja daquigade jeta taque to, mu que nóna ore gotique.

¹⁸ Uje dirode gare iji ti enga David ababi suté tosi. Mu que jnanírique déji jeta cási uté yui jeta chatata David ape toi uté ome. Ga ore chojninga: "Uje ore ababi qué ecási diríca ga yaquírango jóroque uté ome jnusiétigade diríca. Mu que doi yocurúrique. Jétapũré uje e abi casé topísi. Ujetiga yingongo uté ga que pimo jeta jnusiétigai sué gai jne."

¹⁹ David chimo uje iroguipísode ore catecã́ri ñane ga obiréjna ome David uje a ore júdi tu abi úringai toque ome ñane. Ga chojningame udore ore: –¿Disabi tosi a?– Ga ore chojningame David: –Ejẽ́, e tosi.–

²⁰ Enga David chague iji jnumi ga jé u uje chẽ́sariji yodi. Ga chanire cucha ai unérone aja dabai uje chécãre daguidedie. Ga chacája Pangarádejnai Dupade iguíjna ajei jeta chicota Pangarádejnai Dupade uté iji iguíjnai ajei. Quigade ga chajníja daguíjnai ga chucué dabotique jeta tagu.

²¹ Ga David iroguipísode chojningame: –¡Yoqueduguéjná, David á, chimo jóroque re uje babi casé qué eca diríca ga babo ejode ga que cucha pibotique dépoji bajénique rĩ, mu uje babi toi ga jĩraque bãriji iji jnumi ga jĩraque bacué cucha pibotique jeta agu!–

²² Mu David chojningame darógode uruode: –Uje qué yabi casé ecási diríca ga yibóji ejode ga yo yuyágome Pangarádejnai Dupade diríca. Yigaidi u jeta chosõre yu ga chicha yabi casé aja diri to.

²³ Mu uje toi ga a jé ca cuchárique tṍrarásiji jeta yṹra yu aja chaguhei. Yiraja uje a jé ca uté chajniapórase yibai iji erámi tudé, ga a jé ca déporási yari to rĩ. Mu uyu u jetiga yugúsapoi uté gari to jne rĩ iji dirode uñeque jeta ga yitoi to.–

David mopóji dacoté Betsabé gari gaté rĩ ga ore abi cusapo rĩ enga ore chĩ́care Salomón aja dabi uté nanique

²⁴ David tibágui dacoté Betsabé uje poji ore abi ejode. Ga chigaru dacoté uaté pajei aja re uje poji dape toi quigade. Enga David mopóji uaté gari gaté rĩ ga ore abi cusapo rĩ. Ga David chĩ́care Salomón aja ore ape basui uté. Ga Dupade chijnorasipise ore ape ejábi suté.

²⁵ Natán chise David gaté ga chojningame: "David á, Pangarádejnai Dupade irasique bape basui uté, ga chacacãre bape basui uté." Ga David chojninga: "A yipésu yabi i uñeque jne. Ga a yĩ́care Jedidías aja yape basui uté. Uje i qui u Pangarádejnai Dupade Irasigábi."

David nóna dasoldádode aja Rabá yui ga jé u uje ore sué ore idai idaisórone ore gai iji uté

²⁶ Joab jé ore isoca uje ore chejna raja amóngosode úringane chucho iji ore idáidatéi Rabá uté. Ga e idógosi jeta ore sué idai idaisórone ore gai.

^27-28 Ga Joab chiroque darógode uñane aja David yui jetiga ore tibidi uté. Uje ore di iji David ga ore chojningame: "Joab chojningame ua que: 'E yejnángo Rabá idaisórone aja tié edúdi, jecute yajéode u jeta amáta basoldate amirone iji ta ga qué yiroco bei iji de. Jeta agúsoi de to ga yicopoi ore rĩ ga yujnuéngo ore gai, ga a jé yocurasade israélgose ore icotai tu ua ome yoquejnane udore ore jne. Uje gajnareque jeta gusu yu ga ore chicota yu jne, ga ca ore chicota ua to jne.'"

²⁹ Ga David nóna dasoldádode ore aja Rabá yui jetiga cháta raja pocaningai gaisórone darása ore to. Ga jé u uje ore sué ore idai idaisórone ore gai iji uté.

³⁰ Ga ore chijna rabágosode ore eduguéjna cuchábi gatoje iji gari uje pipesudé iji óro ueguepísei, ga kílode chise 33 kílos nanique ga ore chadíja cucarané nanganatáguedie aja gatoje uaté to. Ga ore chadíja David gatoi. Ga David chajnose ore idai tuté ome cucha orerane uñane to.

³¹ David cho daróguiji uecade iji rabágosode ore idai ga jno ore údi aja sañeque ga ore pésu ladríllode ome David. Jé basa uñane chaquesu poridie, jé basa ga uñane chajuque ore aquesudie udire iji ore quigade. Ga ore suépo amóngosode ore gai te rĩ iji ore idáyode uñane jnese, ga chiroque ore aja daroquéode to. Ga quene u uje David, isoldádode ore jnese chajniapója dedai Jerusalén uté rĩ.