Biblia Todo Logo
Bìoball air-loidhne

- Sanasan -

2 Samuel 10 - Dupade Uruode


David doi pocaningai ome síriagosode, amóngosode ore ga suépise ore gai

1 Udojo quigade ga amóngosode ore eduguéjna cuchábi toi uje i tu Nahás, ga ujnacari chácariji uté jogadi uje i tu Hanún.

2 Uje David chudute to uje ore eduguéjnai Nahás toi ga David chiroque darógode aja ujnacari yui jeta ore chatata David áyuguhebátigai ome Nahás uté ujnacari. Uje Nahás uté que suseque David ica, jecute David chopise dáyugu uté úringai toque.

3 Ga amóngosode ore eduguéjnai iroguipísode chojningame deduguéjnai uté uje i tu Hanún: "¿Ama ajos eti David irógode udore ore chedu deduguéjna David áyuguhebátigai úringai pute ome ua ya uje chiese jnusiétaque gu bai itoringai diríca? Mu ore chãra ránguiji deduguéjnai jnusiétigai úringai pute ga guidáyo udore ore ga a ore chajni yoquibai dirome ga a ore chujé yoque jnese iji yoquidai tudé dirome."

4 Ga amóngosode ore eduguéjnai uje i tu Hanún chisa David irógode udore ga ore chuju ore abuáyedie péode, jé ore chijna peque uñane iji. Ga ore chajugápo ore iguidedie iji dosate uñane te rĩ jé aja jnumi, ga que ore chijocase ore iguidedie to iji dosate uñane. Ga ore chimate udore, ga jé u uje ore chiroque ore aja ore idai yui.

5 Mu David chudute darógode ujnomei uje amóngosode ore chuju ore abuáyedie péode ga chiroque daróquegatéode aja ore yui jeta ore chácariji ore idai Jericó to, jé aja jeta ore abuáyedie suépo rĩ ga quene ore chicapóji David idai to rĩ. Gaidi u gu jeta jé ca ore chajéngome re iji darasapísode ore ujade.

6 Amóngosode ore chudute to uje David ájningaránguipísome darógode ore gajnéone amóngosode ore isoca, ga jé u uje ore pésu rome israélgosode ore yui jeta ore doi pocaningai ome ore iji uté. Ga ore doi oré tome síriagosode isoldádode uñane ujetiga ore cháta pocaningai aja amóngosode ore to. Ga síriagosode udore ore isoldádode chise 20.000 nanique ga ore idáidatéi i u Bet-rehob. Ga chutápoi soldádode iji maacatéogosode ore eduguéjna cuchábi uje i tu Sóba ga oidode iji uté isoldádode chise 1.000 iji ore nanique. Ga ore chijnapo 12.000 soldádode iji is-tóbgosode ore isoldádode to.

7 David chudute to uje amóngosode ore pésu rágome ore yui jeta ore doi pocaningai ome israélgosode ore. Ga David chiroque Joab, isoldádode ore aja ore yui jeta ore doi pocaningai ome udore ore.

8 Ga jé u uje amóngosode ore isoldádode chirote ore idai eruéode, jé basa ore oidode purása quedéjnane isoldácho ore chácariji guesi iji ore idai tuté, ga dimane ore ome David ore yui.

9-10 Joab chimo uje amóngosode ore chajuque dasoldádode ajei ga jé isocai u to. Ga desai uje i tu Abisai nóna uñane aja amóngosipísode ore idai, jé basa ga Joab nóna pocaningane imosórone ore, ga ore doi síriagosode ore iji amóngosode ore idai guesi.

11 Ga Joab chojningame desai: "Ujetiga síriagosode sué yoquibai gajneri, ga beyoi ore to jne iji yoquibai. Jé basa jetiga amóngosode ore sué uacabai gajiné a yicoi ore to jne iji uacabai."

12 Ga Joab chojningame dasoldádode ore: "Anínaño uágome udore ore yui. Ga yoco yoquijocaningame purása quedéjnane udore gu uje jé ore casite yóguiji yocuniri. Ga a yujnuéngo ore gai gajiné, ga jé u ujeta picotaque Pangarádejnai Dupade uté iji israélgosode yoquidáyode jnese. Chamáñaje uté gajneque yocuniri jnese gu. Yico ga Pangarádejnai Dupade a jé doi dasoca arétigome yoque jne."

13 Joab e ore dorási síriagosode mu jĩraque ore chayome Joab ore.

14 Uje amóngosode ore chimo uje síriagosode ore chayome Joab ore iji guesode, ga jé ore doi ore isocai to, ga ore chayome Abisai to. Ga ore chayója dedai ajei jnese. Joab ore noñome amóngosode ore iji te uje ore chayome ore ga ore chajni aja dedai Jerusalén to.

15 Uje síriagosode ore eduguéjnane chudute uje ore urasade ore chayome israélgosode diríca, ga jé u uje ore chimátapo ñane gaté rĩ ujetiga ore doi pocaningai ome israélgosode.

16 Ga síriagosode ore eduguéjnai Hadad-ezer tibidi darasade ore uje ore déji yote quedéjnai uéchai uje i tu Éufrates. Ga jĩraque ore di iji ore idai tuté uje i tu Helam. Ga síriagosode ore isoldádode eduguéjnai i tu Sobac ga uté chácariji dasoldádode ore iquei.

17 Ga David chudute to uje e dimane síriagosode ome pocaningai yui jeta ore doi ome israélgosode, enga nóna dasoldádode aja udore ore yui. Ga ore chaquesu yote quedéjnai uje i tu Jordán ga ore chirote ore yui iji uéchamitó iji ore idai Helam iquei. Ga síriagosode ore chise David ore iji uté ga ore chujé ñane iji uté.

18 Mu igasique ga síriagosode chijnime rome israélgosode uje ore chimo David adi te gu. Ga David ore yugode chise 40.000 iji síriagosode ore isoldádode uje buricade charisórone u ore. Ga ore yugode iji guebéquedatéode ungurayasórone ore chise 700 iji ore. Ga David chujé síriagosode ore asuté uje i tu Sobac, ga uté cachodi jé u ore jocaningai uté.

19 Ga síriagosode ore eduguéjna cuchábi Hadad-ezer jorane eduguéjna ore chudute David ore ujnomei uje ore sué darasade ore gai, ga jĩraque ore chiroque darógode aja David ore yui jetiga ore chatata dáringane ajéqueséo ome David uje ore dosóñime David uté jnese gu. Ga síriagosode que ore chatapója amóngosode ore to rĩ ome pocaningárique uje ore todo israélgosode gu.

© 2021 Ethnos360

Global Partners
Lean sinn:



Sanasan