2 Samuel 1 - Dupade Uruode

David chudute nanique uje e chuque Saúl, ujnacari Jonatán ore iji israélgosode ore jocaningai ome filistéogosode

¹ Iji Saúl úringai chuque quigade ga David, jorane ore chajniapója dedai Síclag. Ga ore di iji dajocaningai ome amaléquegosode uje ore jno dacotedie údi diríca. Ga dirode e gárome David ore iji Síclag uté.

² Iji dire gadióguei ga jnani di iji David ore iji uté. Ga chajnangarase daguidé iji daróbuchai ga chanire jnumi aja datoi, ga imoi u uje jnusiétaguipíse uté. Uje di iji David ore ga uté gatoi chisípise jnumi iji David iquei uje dosóñime David gu.

³ David catecã́ri ga chojningame: –¿Jé ṍraji rique é?– Ga uté chojningame David: –Yayome filistéogosode ore diríca ga yṍraji israélgosode ore irengu casé.–

⁴ Ga David chojninga: –Atata bojña quitígo ome yu.– Enga jnani chojningame David: –Israélgosode ore chayome dajocaningai casé diríca, ga ore yugode jiei iji ore. Ga ore chujé Saúl, ujnacari Jonatán iji to.–

⁵ David chojninga: –¿Gotique gu a uje baraja uje ore chujé Saúl, Jonatán ore?–

⁶ Ga uté chojningame David: –Yimo Saúl diríca ga chugutána dasõre diríca. Ga filistéogosode ore isoldádode jé jogate Saúl quigade diríca, ga e ore chirõre jeta ore chisína diríca. Ga ore choru guebéquedatéode, jé aja buricade ga jé ore chicáji Saúl yui.

⁷ Ga iji uté diríca ga Saúl chajire daquigade ga chimo yu ga tibidi yu, ga jĩraque yibágui uté.

⁸ Ga uté catecã́ri yu diríca ga chojninga: "Jé ua ¿gosi a?" Ga yojninga: "Amaléquegose yu."

⁹ Ga uté tibidi yu diríca jetiga yigota uje qué chapídi jóroque diríca.

¹⁰ Ga yijose uté yui diríca ga yigota. Obiréjna ome yu diríca uje que toc jeta uté qué chapídapo to rĩ. Ga yijnime uté ayoi iji gatoi diríca, jé aja jmaneropié jeta yisi ome ua iji de, Yeduguéjná.–

¹¹ Mu David, jorane jnani jĩraque ore chajnangarase daguidedie iji daróbuchade uje jnusiétaguipíse ore gu.

¹² Ga ore poji Saúl, ujnacari Jonatán ore ejode, jé aja ore yugode ore ujo israélgose ore jnese. Ga ore yuare iji ore quigade uje ore sué Dupade urasapísode ore gai gu. Ga ore chuságaja guedéjnoringái ome dagoyedie ga que cucha pibotique déji uñeque ajénique.

¹³ Ga David catecã́ri jnacari uje iringui pujnomei údi iji ore ga chojninga: –¿Jé ua gosi tiji purasade?– Ga uté chojningame David: –Purása quedéjna yu ga amaléquegose yu, mu yácariji uacaniri Israel udé.–

¹⁴ Ga David chojninga: –Amaléquegosi á, ¡chimo jóroque re uje que atodo Pangarádejnai Dupade guerani uté yoqueduguéjna gotique to ga bagota uté diríca!–

¹⁵ Ga David tibidi dajorane jnani uñai ga chojninga: –¡Be uté ga ajé!– Ga jĩraque doi David uruode ga cugujnáji amaléquegosi ga chujé.

¹⁶ Ga David chojningame: –A jé bagaidi u bagachodi ome yoque iji de uje batata pujnomei ome yoque uje ua u uje bajé Pangarádejnai Dupade guerani casica yoqueduguéjna.–

David jnusiétigade ome Saúl, Jonatán ore gajné iradé udaque nanique

¹⁷ Enga David pésu daradé, pujnusiétigai gajné, ome Saúl, abi Jonatán ore nanique.

¹⁸ Uje e déji dáringai eduguéjna ga chojningame darógode: "Acacho judágosode ome yiradé casé achachagúgode. Yigaidi u jetiga jecucha ore jnusina deduguéjna casé gatuac." Ga uté iradé i cuse ga i tu "Docoji Gajné Piradé," enga purusãracho iji aode uje i tu Jaser. Ga chósi te:

¹⁹ "Israel á, pajnongoque bape ujnomerane iji banirone cucarãcho udojo. ¡Chimo jóroque re uje ore chejna bape dicaséode ore iji yocujade!

²⁰ Yipésupú ga jé ca pujúcho udore ore iji filistéogose serẽrachugode udore ore idáyode jõ, uje ore íode u Gat, Ascalón ore. Yigaidi u jeta ca ore pésu darásadie filistéagotodie ore achietaquérigo. Jeta jé ca filistéagoto serẽrachuguedie ca ore chachietáji rangome yoqueduguéjna cuchábode udore ore úringane chuque ujnomei. Chamáñaje dupa quedéjnane angureto udire ore gu ga yujãpise udire ore.

²¹ Ga yósi te ome cucarani Gilbóa uté jeta jé ca gue ayéraque basapója uté jne rĩ ga a chise dáringárique erãpe chiriritaque jne. Uje ore chujé yoqueduguéjna cuchábi Saúl iji uté gu. Enga cucarani uté jé upo rĩ uje yocasuté chuguedie ore umajosórone chuchiéjna yocuniri pijogútodie chequécadaté iji jnumone iji cucarani uté. Ga Saúl oidé chequécadaté nanganatagué bijnáringai jé u cucarani uté ga que qué chijnanápo dejórique gánique.

²² Uje Saúl, Jonatán ore díji dajocaningane ga ore õrachade que tita gai ome ore umajósõre dicaséode ore iyode, jé aja ore íode. Uje pujnuéngaisṍripíse ore gu.

²³ Saúl, ujnacari Jonatán jecucha ga ore chijnóra ñane, ga ore nóna ñane aja quedéjnane. Uje que ore cãra dajesúrigo ome ñane iji dáringane ueca, ga jé ore chuságaja dáringane chucho jnese ga ore patĩ́ora ñane. Ga cugujnachuque Saúl, ujnacari ore ga ore sué arore chótique gai ome dáringane cugujnachucho. Ga que cuchiso uajátique etotiguérique cho Saúl, ujnacari Jonatán ore etotiguejnai gotique.

²⁴ Israel urábidie suaque á, abóyoji Saúl ejode to. Uje uté cho daróji uaque diríca ga cho jetiga chadia uacaguidé ueradérigui aja uaque uje pipesudé udire iji ore acai líno ga póroropisi piguidedie udire. Enga cho jetiga chadia uacajnápeque nanganataque ueratígo aja uacádode jnese uje pipesute pujnápeode udore iji óro ueque.

²⁵ ¡Chimo jóroque re uje ayoré dicase casodé ore chejna raja dáringane chucho iji pocaningai! ¡Jonatán cachója cucarãte choquíode ujai, ga eruei tu!

²⁶ ¡Jonatán, áyuguhebátaguipíse yu ome ua! ¡Yijõrapísi u ua gu! Uje que ese yunerotiguérique ica. Ome yu ga bajnoraquei sué chequé pacotedie ore gajnéone pijnoraqué gáyode uje bajnorapise yu ica.

²⁷ ¡Chimo jóroque re uje ore sué dicasepísode ore gáyode diríca ga ore chimate ore aja jnumi! ¡Ga ore chimochẽre ore õrachade aja jnumone!"