2 Reyes 9 - Dupade Uruode

Dupade iroi Eliséo chiroque dacadi proféta aja Jehú yui ujetiga chojne aseque puyai ójo gai ome úringai israélgosode ore eduguéjna

¹ Iji dirode uñeque nanique ga proféta Eliséo tibidi jnacare gatode uñáraque iji dacadigode proféta udore uague uaté ujade. Enga chojningame jnacari uté: –¡Aguito ga ajñuque baguidé umarejna uaté aja gaté ga ajose eruéode aja bagarubi údi, ujetiga ibisoque ua ga ayópise aja bajesui jne! Ga ajna aseque puyai piábia sudaque uje aceite tiji ajei tṍraji ore acadie uña uje i tu olı́va. Enga jı̃raque bo údi aja ore idai Ramot-Galaad uté.

² Ujetiga ese ore idai uté jne, enga acué jnacari iji uté uje i tu Jehú. Ga yojningai uté dayé i tu Josafat, ga dáquide i tupo Nímsi rı̃. Ga a ese uté jne iji jõráringo ajénique, mu ajnime iji jorane ajénique, enga adejéna uté aja guijnatajei ajei uñeque jeta gusu uáguiji.

³ Ga a asa bajnui aseque puyai piábia jne ga ójneja Jehú ójo gai jne, enga a ósi tome uté jne: "Pangarádejnai uruode quigode u udojo ome ua, ga chósi tome ua: 'E yingara bajogadi ome ore ga a israélgosode ore eduguéjnai tu ua jne.'" Mu ujetiga ejna baruode udore guesi ga acugujnáji joride ga achẽre gai ga ayópise, enga ¡jé ca ãra ua iji cuchárique jne!–

⁴ Ga jé u uje jnacare gatode uaté jno, proféta Eliséo iroi uté, ga quı́tequiguı́ji darósõri ojningápidi Ramot-Galaad uté.

⁵ Uje uté chise ore idai, mu ¡chimo jóroque re! uje israélgosode isoldádode ore eduguéjna gatéode chácariji ñane gari ome dague uaté. Enga jnacare gatode uaté chojningame ore: –Bajneque yuruode udojo á, Eduguéjná.– Mu Jehú chojningame uté: –¿Ama bojningai eduguéjna gosi iji yoque a?– Ga jnacare gatoi chajnai uté ga chojningame: –Yojningai eduguéjna u ua arı̃a.–

⁶ Ga Jehú chague ome uruode ga chacája guiguı́jnai ajei. Enga jnacare gatoi proféta uté nóna uté aja ajei, ga doi dajnui aseque puyaque ga chójneja Jehú ójo gai. Enga chojningame Jehú uté: –Pangarádejnai, israélgosode ore angureni Dupa uruode chósi tome ua: "E yingara bajogadi uje yajegaite ua ome báringai yurasade israélgose ore eduguéjna.

⁷ Enga bajnepı́di tu ujetiga ejnápise barósõri casicaite Acab ape disi ejode jnese. Enga a jé u jne ujetiga yo yujnutabádu Acab acoté Jezabel uaté uje chojne ome yirógode proféta ore iyojna dipesedie, jé aja yirógode udore uñane jnese uje uaté yuguipise ore. Yigaidi tu gu ujetiga yopise uaté oré ome isoca gajnaréngone udore.

⁸ Ga a pejnaque Acab casicaite jogasúode, ape disi ejode ore jnese jne. Uje a yejna uté ape disi diyoquı́ode aja jnanione ¡pógopógo! jne, iji Israel udé údode jnese. Ujetiga ducañerájma gosi, jeoga pañeraque gosi, mu a jé ca uñeque chapı́diji dı́nique jne.

⁹ Ga yijmapié ome Acab uté jogasúode úringáringo pejnánguipı́so a jé chopise yisocai uté ome israélgosode ore eduguéjna casicaite Jeroboam uté ape disi ejode ore, uje jnani bajai Nabat ujnacari Jeroboam uté. Enga a jé chopome uté quigaminóri eduguéjna rı̃ uje i tu Baasa, ga Ahı́as ujnacare uté nanique, uje yejnápise ape disi ejode jnese to nanique.

¹⁰ Ga yurugaidé Jezabel uaté a toi jne mu a ca póchõro jne, ga tamocode a ore tagu uaté arione jne iji ore gajnei jnupe jne iji Jezreel ejoi."– Uje proféta jnacare gatoi uaté chejna Pangarádejnai uruode úringane púcho guesi ome Jehú uté, enga jı̃raque chuchẽre joride gai ga chayopise ome dagajñua nanique.

¹¹ Udojo quigade nanique ga Jehú doi guesi tiji guiguı́jnai uté ujetiga chajnésara dojode eduguéjna cuchábi iroguipı́so ore uague. Ga soldádode eduguéjna gatéode udore uñeque chojningame uté: –¿Ama jé areque cuchade jnese? ¿Ũrusoi uté gaitique cucha iji ua ya?– Ga Jehú chajnai uté uruode, mu pógu proféta uqué uru quigode, ga chósi te: –Cachi ibaguiete uyu. Uacamóño uje jecucha profétade udore jmapié tu uté jmapié, uje ore narare bisideque.–

¹² Mu ore chojninga: –¡Taque ua arı̃a! Ajnerame uté uruode ome yoque, ga ũrepise ua ome uruode quigode jne.– Jecute Jehú chatata proféta ojñane quigode ome ore. Ga chatata dajnéone Pangarádejnai uru quicho ome ore to uje proféta chajnerame uté, uje chojninga: –Pangarádejnai uruode chósi tome ua: "Aseque puyai uje pojnéngaja bójo gai imoi tu uje e yingara bajogadi, uje israélgosode ore eduguéjnai u ua jne."–

¹³ Uje ore chudute Jehú gajnéone Pangarádejnai urúo, enga jı̃raque jnanione jnese iji ore uague uaté chejñu daguite dañorane udore. Ga ore chitẽ́raja Jehú guı́dade údi iji ore imatapı́di guiguı́jna uté uchiejnane gai. Enga jé u uje ore chubúchu dabúchudie púpuri iji Jehú iquei, ga ore chinguı́ra dabijnanone aja dejode, ga ore chojninga: –¡Jehú u yoqueduguéjna cuchábi te é!–

Jehú uté chujé israélgosode ore eduguéjnai Joram uté nanique, enga Jehú uté u uje Josafat ujnacari tu, ga Nímsi ájnape uté

^14-16 Mu bajágome cucha dacadı́so udore, ga israélgosode ore eduguéjnai Joram uté déji dajocaningai gai iji ore idai Ramot-Galaad uté dirı́ca. Ga nóna dasoldádode israélgoso ore jnese dirı́ca uje ore chãraque dedai uté ome sı́riagosode ore eduguéjnai Hazael uté, isoldádode ore. Mu ore ajnangoque Joram uté iji dajocaningai uté dirı́ca, ga jé u uje chajnı́ja dedai Jezreel jeta ninguira sı́riagosode ore yupı́di iji uté. Enga uté chácariji damochápi gai, ga judágosode ore eduguéjnai Ocozı́as qué taquirı́ji uté ga jé ore déji ñane gari. Jecute piotiguei tu ome Jehú, ujóiso eduguéjna ore ujetiga ore cháta dáyipiedie aja ñane ome israélgosode ore eduguéjnai Joram uté úringárique chuque yui. Enga Jehú chojningame darotangórone soldate ore eduguéjna gatéode ore: –Ujetiga jé ũré ajnachoi yu ome yúringai uaqueduguéjna, enga uacajnepı́di u ujetiga ãracho doi ome Ramot-Galaad udé idaisórone jnese, ujetiga ca uñeque jno yujnomei údi aja eduguéjnai Joram uté iji Jezreel.– Uje Jehú chejna daruode udore guesi ome darotangórone ore enga jı̃raque choru dachidi guebéquedaté uje pocaningai gajneque, ga jnome ore idai yui uje i tu Jezreel.

¹⁷ Mu uje Jehú chicáji ore idai yui, mu ore idai añerasṍri cháguena gaté iji ore oragadé gai nanique uje déji ore idai Jezreel ujuyaquei dosadi. Enga uté timı́ninga cuchade aja quedéjnane iji dayaridi uté. Ga uté chimo Jehú uje chicáji ore yui, ga nóna dasoldate dipeséode. Enga jı̃raque tibite ga chojninga: –¡Soldádode ore besája gadoi te é!– Ga jı̃raque Joram chojninga: –Aroque soldate chojmaráringaja uté yui ga choru buricai ga a chingo jeta ajéquesé uté.–

¹⁸ Enga soldádode uñai choru buricai ga chachai Jehú uté ga chojninga: –Yoqueduguéjnai Joram pota chiraja ujetiga ajéquesé ua.– Mu Jehú chajnai soldádi uruode ga chojningame: –¡Que bajnepı́di tu yúringárique picatecãraite arı̃a! Ga ajnai ti yidoboi ga ácariji yiquigade jne.– Enga ore idai añerasṍri chatata dajirigode udore, ga chojninga: –Batocaidi uqué uje barógaja ore yui e chise ore, mu que diapo rı̃.–

¹⁹ Mu eduguéjnai chirócapo darógode soldácho uñai aja uté yui gaté rı̃. Ga chorúpo buricade uñai aja yui rı̃ ga chise Jehú to nanique enga chojningame: –Yoqueduguéjnai pota chiraja ujetiga ajéquesé ua.– Mu Jehú chajnai uté uruode ga chojningame: –¡Que bajnepı́di tu yúringárique picatecãraite arı̃a! Ga ajnai ti yidoboi ga ácariji yiquigade jne.–

²⁰ Ga ore idai añerasṍri chatatapo cucha dacate tocachugode ome deduguéjnai rı̃ ga chojningame: –Baroque ejoi uté e chise ore que, mu que diapo rı̃ ga jé cho bajai uqué uje que diapo rı̃.– Mu qué jnopo daruode údi gaté rı̃ ome deduguéjnai. Ga chojninga: –¡Urénga, guebéquedatéi ijocayasṍri a jé cunguésõri Jehú isocai uté, jõ, uje Nímsi ájnape uté! Uje ibisóguipı́se uté ga cho ũrusode aja gadoi, uje que chuse dajocayai guio.–

²¹ Uje ore eduguéjnai Joram chudute ore idai añerasṍri uru ejode udore ga jı̃raque tibidi darógode uñane, ga chojninga: –¡Jı̃raque beyoi yachidi guebéquedaté uté, ga adı́yo yachidode burica aja uté, uje a yoru jne aja ore yui!– Ga jé u uje irógode ore dopı́si uruode. Ga dimane israélgosode eduguéjna cuchábi Joram gachidi guebéquedaté uté enga jé u uje jno. Ga judágosode ore eduguéjnai Ocozı́as nóna uté aja dajei to mu ore cãra dorutode guebéquedatéo ome ñane. Ga ore jnome Jehú uté yui jnese jeta ore chachai uté to. Ga ore tuangóa uté iji jezreélgosi Nabot casicaite gajnepı́di casica jnupe.

²² Enga Joram jı̃raque catecã́ri Jehú uje chimo uté, enga chojninga: –Jehú á, ¿ajéquesé ua ya?– Ga Jehú chajnai uruode ga chósi tome: –¿Ama ajéquesérase uyu a? ¡Que pajesereringárique cuse arı̃a! U gu uje baté Jezabel qué jno cutejmane date noñácho údi. Que chajire jnutı́gome dangurenone dupa quedéjna adode ujetiga pésu gatuaque, jé aja uje tagúome pujopié quedéjnanie isocade rı̃.–

²³ Uje Joram chudute Jehú uruode udore enga jı̃raque cho quiyı́guiyı́ ome dangurañai guebéquedaté, uje edosare re ome Jehú uruode gu. Enga e chayo ome dagajñua. Mu Joram uté tibite judágosode ore eduguéjnai Ocozı́as gai aja dajesui, ga chojningame: –¡Ocozı́as, yico é, uje Jehú a aringáca é!–

²⁴ Mu Jehú uté e na dojo aja doji carubi uté, ga chayopise údi, ga chicho Joram naránucadói enga ojo mungujnáji. Ga ojo chajuque iyobié aja dajesui. Ga Joram cho áidaja jnumi iji guebéquedatéi ajei. Ga e topı́si nanique.

²⁵ Enga Jehú chiroque deminóri eduguéjna Bidcar aja uté yui, ga chojninga: –Bo Joram údi aja Nabot gajnepı́di casica jnupe enga ṍraja ta ¡chaque! jne.– Mu uje Bidcar cáma pésu mu Jehú qué jnopo daruode údi ome uté rı̃, enga chojninga: –¿Ama jé ca báyipie déji cucha dacadi casodica to a? Uje yijı́nango ñane iji yocungurañai guebéquedaté ajei nanique, ga yugúcoji Joram dai casicaite Acab oruti guebéquedaté quigade, ome yocúringane uté irócho. Enga deréjnane udore u uje Pangarádejnai cho darúja Acab nanique.

²⁶ Enga Pangarádejnai chósi tome daru iyiejnane ome Acab uté: –Yipota ujetiga arajapise uje yimo bei iyoi dirı́ca uje uté i tu Nabot, jé aja ujnacarode iyode uje yimo to dirı́ca. Enga que toc ujetiga jé ca yo boré ome basocade udore. Enga bagachodi a jé upúsu bei casé gajnei jnupe jogadi udé.– Uje Jehú jnusina cuchade udore ome deminóri eduguéjna Bidcar uté enga jé u uje chagotápo darúiso ome rı̃, uje chojninga: –Be ga ṍra Joram aja dai casica urungureni jnupe udé ¡chaque! jne, uje Pangarádejnai uruode quigode jé u nanique gu ome uté.–

Judágosode ore eduguéjnai Ocozı́as chise dáringai chuque ome Jehú uté

²⁷ Uje judágosode ore eduguéjnai Ocozı́as pañaji uje Jehú chujé israélgosode ore eduguéjna cuchábi Joram uté, ga jé u uje todo ome re. Ga jı̃raque chayo iji dangurañai guebéquedaté uté, ga chijna dagajñua taja ore idai Bet-hagán uté yui. Mu Jehú, jorane ore chucajningárome ga ore chisı́na uté, enga Jehú tibite dajorane ore gai ga chojninga: –¡Ajéyo uté to é!– Enga ore chicho Ocozı́as uté iji dangurañai guebéquedaté uté ajei, uje uté ajnai dajeque chicáji oroné aja ore idáyabi Gur uté, enga idógosiji ore idai Ibleam nanique. Enga ore chichóji Gur uté yuábi. Mu ore ajnangoque Ocozı́as uté, mu qué chayo dáringai ajnangoque údi aja ore idai Meguı́do uté. Ga uté chise ore idai uté mu cachodi jé u, uje topı́siji.

²⁸ Mu uté iroguipı́sode ore na deduguéjna toi Ocozı́as uté aja guebéquedatéi ga ore chijnóngaja uté idai Jerusalén nanique. Enga ore chicha ode taja dai bajade ore ódedie jogadi uté to iji dáqui casicaite David idai uté.

²⁹ Ga Ocozı́as casé uté u uje quene basája dáringai judágosode ore eduguéjna ica uje Acab ujnacari Joram casé guejnanie siquerei e chise 11 años ome dáringai israélgosode ore eduguéjna nanique.

Israélgosode ore eduguéjna casicaite Acab acoté Jezabel uaté e chise dáringa chugué ome Jehú uté

³⁰ Cucha dacadode udojo quigade nanique ga Jehú jnome ore idai Jezreel yui. Ga eduguejẽ́ Jezabel chudute uté ujnomei to uje chicárasiji ore idai uté, enga pésu re ujetiga dimane ome uté yui. Uaté churúsãre dedute ajéode, enga chariguétapo dacãrai rı̃. Quigade enga uaté chicáji daguı́jna cuchábi bocadode uñeque iji ajé uñai iji gaté yui. Enga chajire dajei garani ome Jehú iji dayáguesiringai iji uté.

³¹ Uje Jehú chise ore idai ujuyaquei joride ga chacája ore idai nanique, ga jı̃raque Jezabel tibite gai iji dádi. Ga chósi tome dabijnane ome uté: –Zimri, ¿ajéquesé ua ya? ¡Ua u uje bajé beduguéjna cuchábi dirı́ca arı̃a!–

³² Enga Jehú chajire Jezabel iji dabai iji guiguı́jnai bocadi, enga tibite ga chojninga: –¿Ama gosi iji uaque jetiga cháta raja yu jne á? ¿Jé gosi jne á?– Mu Jezabel iróquegaté gárode, jeoga gadiógode ore tajirome Jehú uté iji dádi, ga cho jetiga ore pota cháta rágaja uté.

³³ Ga Jehú tibite udore gai ga chojningame ore: –Asayo uaté ga óraño aja jnumi ¡tuc!– Enga jı̃raque ore doi Jehú uruode ga ore chamorásiji bocadi ga ore tṍraja jnumi ¡tuc! Mu Jezabel uaté taratáji jnumi, enga iyojna chaca iguı́jnai dosadi. Enga iyojna catapója Jehú gachidode burica iji ejoi, uje ore churuguse uté gachidi guebéquedaté uté. Enga Jehú jé chagotápo uaté rı̃, uje choru guebéquedatéi enga chuchiéjna Jezabel iji jnumi gaté ¡cháca! ¡cháca! ¡chac!

³⁴ Quigade enga Jehú chacája guiguı́jna cuchábi ajei ga tagu dabosode, enga chátaja dajotai uje chóji to. Uje Jehú cha chagu nanique ga chósi tome darógode uñéngo: –Beyoi Pangarádejnai urugaidé chequé uaté ga ajóchayome. Chamáñaje eduguéjna cuchábi uro uaté gu, ga jé tiógara jeta pijóchame uaté.–

³⁵ Ga ore tibágui uaté cachodi tuqué ujetiga ore chijóchame uaté, mu gusu gatodajnoquei iji cachodi, jé aja eruéode - uaté jmanáyone, guı́dade ore, iji jnumone.

³⁶ Ga uté iróiso ore chajni ga ore tibágui Jehú jeta ore chingo Jezabel isocade aja. Ga Jehú chojninga: –Cucha dacadode udojo jé péropı́siji Pangarádejnai uru cásodicáite, uje tı́sbegosi Elı́as uté chajnerame ome ore nanique ome dáringai Dupade iroque proféta. Uje chojninga: "Tamocode a tagu Jezabel uaté arione iji ore gajnei jnupe iji Jezreel ejoi jne.

³⁷ Mu a ca póchõro Jezabel uaté jne. Mu arione pépitade, ajnoquebode ore gajnúone a u puchatı́go jne uje pisidique aja quedéjnane iji ore gajnei jnupe uté. Enga a jé ca toguı́rase ujetiga uñeque chiraja uje uaté u."–