2 Reyes 7 - Dupade Uruode

Dupade iroi Eliséo chatata cucha dacate ueradode uje chise israélgosode ore jne

¹ Uje eduguéjna cuchábi chotigase Pangarádejnai ome úringai Pátajasṍre mu Dupade iroi Eliséo chósi tome: –¡Angáchoi Pangarádejnai uruode! Yajnerámeone Pangarádejnai urúo udojo chósi tome uaque: "Guedé batigai a jé udé dirome enga a amóño jne uje a uacarasade ore tẽra cucha pibose uásejnane iji yoquidai Samária ujuyaquéode jorı́dedie ejode jne. Ga orabidie a garósosi jne. Uje a ore doi oredie ome harı́nai dirome uje sué harı́na uñane gáyode jnese ome dáringai uerate, mu gusu pláta guebeque chojmara ome 7 ikı́lode jne. Ga a ore doi trı́goi gajnui to dirome uje i tu cebáda ga ikı́lode 15 jne mu gusu pláta guebeque chojmarámi ome to dirome jne."–

² Mu eduguéjnai iroguipı́si uté uje ajirique ore eduguéjnai yúode gatuaque chotigase Eliséo uruode, ga chojninga: –¡Que toque, arı̃a! A Pangarádejnai upúsurásu ujetiga pésu bocadode iji gatajnoquei ga chamurase cucha pibosode yoquibai marı́nga, a jé ca toguı́rase ujetiga bojningane cucha udore tocade.– Enga Eliséo chajnapoi eduguéjnai iroguipísi uté uruode rı̃ ga chojningame: –Adójnanga yuruode udojo: A amopise cucha pibose uásejnane dirome ome bedodie, mu a jé ca agu to jne.–

Lépra isaque gagájnione udore chatata pujnomei ome darasade uje tita sı́riagosode ore iji ore irengúi

³ Iji deréjnane udore nanique ga lépra isagode jnanı́o chácariji ore idai Samária ujuyaquéode joride ejode iji guesi, enga gagájni ore nanique. Enga ore catecã́ri ñane nanique ome dayaguhéode quigode. Ga ore chojningame ñane: –¿Chimo jóroque re yoquiroditique cucha iji de? Uje gusu yiroco pitoringai yui.

⁴ Ujetiga yacágorása yoquidai ajei, mu a jé yitogórasi uje ı́jnoque cucha pibosode gu. Mu a yácagoji yoquiyaridi tudé mu jé cho yoquidai ajei uje yocódedie jogadi jé urásu to ome yoquiyaguhédatéi uté.– Enga ejnaretade udore ore pésu dáyipiedie ome ñane, ga ore chojninga: –¿Jé go que boyo ga qué yajmitágo sı́riagosode ore irengu casica jogadi to jne? A yichago yógaja ore jmainie jne. Ja seca ore juéga diri tome yoque, ga que pimo ujetiga ore chosõre yógome cucha pibotique to. Jé basa ga ore chujé yoque ga jé ore chujé yoque. Chamáñaje yoquiquique obiréjnai tu pitoringai gu iji udé.–

⁵ Ga e chise dejai nanique ga e ore niji ga ore jnome daqui tuté sı́riagosode ore irengu yui. Ga ore chise dadójnangamáni sı́riagose ore irengúi eruei mu ore tṍra rome uje que jé uñeque déji.

⁶ Chamáñaje Dupa Pujnuéngaisṍri pésu ga sı́riagosode isoldádode ore chudute cucha jocarãi. Ga ore ududigode jé cho guebéquedatéode jocarãpı́di uje chicáji ore yui, jé aja buricade ujnopode to. Ga ore chose ati pocaningai gaisõre dipeséode u. Enga jé u uje ore chósi tome ñane: –¡Obiréjna uje israélgosode ore eduguéjnai a e chutṍri datapiésoningo dojo eduguéjna ome uyoque to que, ga a cho ore oré jeta ore cugujnáji yoque. Ga a hitı́tagosode ore u, jé aja egı́ptogosode ore, ga a ore nóna dasoldate dipeséode aja yoque!–

⁷ Enga jé u nanique uje sı́riagosode ore chayome cucha dacate tocachui uté. Uje qué dejaque mu e ore chayo ome dagajñua. Ga ore edosare re ga ore chedo dajmainie aja dajesui, uje que ore pota rome dáringárique chuque gu. Ga ore noñome dacárpa dipeséode iji darengúi jnese, jé aja dachidode burica to rı̃, jé aja dachidode burica quedéjna to, enga chorase jetiga qué ore déji dagúchade ejode, uje que pijocayaque cuchárique iji ore irengúi uté.

⁸ Uje lépra isagode ucode quene di iji sı́riagosode ore irengúi eruei, ga ore chidójnanga uje tita ome ore, jecute ore chacája ore icárpa uñai údi ga ore tagu ore posode ga ore chójiapo ore jódode to rı̃. Quigade enga ore chisa pláta guebéode, jé aja pláta órodie to rı̃, jé aja ore iguidé ueradedie to rı̃, ga ore jno dajegaidode cucha údi jnese aja dapoguiépitı́go jeta ore cho dajnéngu jne. Enga ore diapo rı̃ ga jé ore isocai upo rı̃ uje ore chacapója uñai ajei gaté rı̃, ga ore jnopo cucha orerane údi rı̃ jeta ore pógupo udore gaté rı̃.

⁹ Mu igasique ga ore catecã́ri ñane údode ga ore chojningame ñane: –Gajnareque yoquisocai udé. Pininaquei jogadi urásu diri tudé mu que yoco cheme ga que yico pujnomé ueradi údi ome yocurasade ore. Ujetiga qué yiroco dire uñai yui ome úringárique pute, ga a yoco yoquiba uje que yatatago mı́raque gu. Ga boyo yico jé iji de ga yicagóji yoqueduguéjnai iguı́jna cuchábi ga yingongo pujnomei ome uté jogasúode iji uté jne.–

¹⁰ Enga jé u uje jnanione udore ore jnoji sı́riagosode ore irengúi uté nanique ga ore chajni Samária gai. Enga ore tibite joride irodisórone jnanı́o ore gai, ga ore chósi tome ore: –Yico sı́riagosode ore irengu casica, mu ¡chimo jóroque re uje que jé ayorérique déji! Enga que yudúco darárique iji siñeque. Gusu ore gachidode burica, burica quedéjnane ore iji ore irengúi uje ore chigaru aja ore jóchorone picho. Enga ore noñome dacárpa dipeséode iji darengu casé ga chorase jetiga qué ore déji dagúchade ejode mu titapı́some ore.–

¹¹ Uje ore ujuyaquei joride irodisórone ore chudute jnani gagájnione udore ore ojñane ga jı̃raque ore tibite darasade gai iji ore idai ajei ome pujnomei uté. Enga angarásorone uñane jno pujnomei údi aja eduguéjnai jogasúode udore iji iguı́jna cuchábi uté.

Pangarádejnai ichagájade darúo tocade jnese ome samáriagosode udore nanique

¹² Uje qué dejaque mu israélgosode ore eduguéjna cuchábi niji jmame iji damochápi uje chudute pujnoméone udore. Ga tibidi darógode dojo eduguéjna ga chojningame ore: –Yiraja uje sı́riagosode ore aringaquégoso dagúchade udore. Ore chiraja gu uje yoquiyaguhédatéode a chejna yógaja jnumi jne arı̃a, jecute ore chetingare yoque. Uje ore doi guesi tiji darengúi uté que, mu a ore pógu re iji garánique iji siñeque. Enga a ore áyipie gaidi tu ujetiga yicoi guesi tiji yoquidai Samária udé ome yoquibotı́go úringáringo pucuecho. Mu a yicórasi guesi tiji udé, mu piotiguei turásu ome ore ujetiga ore chachẽre yoque, ga a ore chisa yoque pórecajna. Quigade enga a ore chorase dajnéngu yoquidai jne.–

¹³ Mu uté quigaminórone eduguéjna udore uñai chajnai uruode nanique ga chojningame deduguéjna cuchábi uté: –Bamo uje chaguhédatéi e chequésãre yocurasade uñane, ga pitoringai gajmaque idaité yoque jnese iji de. Jecute yijócha bajei údi ujetiga ajuéga ga guidáyode uñéngo chicárasi sı́riagosode ore irengúi uté yui bajaque jne. Yaníri tu gu uje buricade amirone qué déji, ga a ore chijna uñane uje ore batigai chejna yijmanai ga ore chajmita cucha dacadode aja quigode jne. Ja seca sı́riagosode ore chujérase guidáyode ore mu que cucha, uje a jé ca cucha dacadode ujñapetáringárique cuse ome dácareode uyóguiji de gotique to, uje yoco togode jnese.–

¹⁴ Uje israélgosode ore eduguéjnai chudute uté áyipie enga juéga, ga ore ajegaidode jnanı́o choru guebéquedaté gárode uje buricade churuguse udore aja dajesui. Ga ore chicáji sı́riagosode ore irengúi ome dáringane guidáyo, mu eduguéjna cuchábi chósi tome ore bajaque: –Boyo, ga abáchoi sı́riagosode isoldádode ore irengúi uté, ga ajichopise cucha dacadode aja quedéjnane jne.–

¹⁵ Ga guidáyode ore jno ga ore chucajningárome sı́riagosode isoldádode ore. Enga ore chajna ore ucajningati dajeque enga ore chuságaja tié Jordán uaté uje ore chajna ore. Mu ¡chimo jóroque re! uje sı́riagosode ore iguidedie, jé aja ore ugúcha uñane déji udore, udore, udore, ga irágu ore ucajningati dajeque ome ore ugúcha basugode udore. Chamáñaje sı́riagosode garãcho udore uje ore edójnaringuéo gu ome dáringane bayácho. Uje guidáyode ore chajmita cuchade udore jnese enga jé u uje ore chajni deduguéjnai gai, enga ore chatata damone cucha jnese ome uté.

¹⁶ Ga jı̃raque Samária idaisórone chudute pujnoméone udore ga ore chayópisiji sı́riagosode ore irengújnai yui, ga ore chase ore ugúchade aja dejode. Enga ore ujuyápiso ore ugúchade, ga ore di údi iji dedai. Ga ore doi oredie ome cuchade, ga 7 ikı́lode iji harı́nai uté uje sué harı́na uñane gáyode jnese ome dáringai uerate, mu oredie garósosi ga gusu pláta guebeque chojmara ome ore. Ga jé cho trı́goi gajnui uje i tu cebáda, ga 15 ikı́lode iji cebáda mu gusu pláta guebeque chojmárami to. Ga cucha dacadode udojo jé péropı́siji Pangarádejnai ichagájade darúo udore.

Eduguéjna cuchábi iroguipı́si uté chise dagachodi nanique

¹⁷ Enga israélgosode ore eduguéjnai e chutṍri daroguipı́si uté bajaque ujetiga chajire cucha dacadode yúode iji ore ujuyaquei jorı́dedie iji ore idai gai. Ga iroguipı́si uté u uje ajirique deduguéjnai yúode gatuaque. Mu uje israélgosode ore chayópisiji sı́riagosode ore ugúchade yui, enga eduguéjnai iroguipı́si cṍra iji joride uaté. Enga urasade ore edójnaringuéo ga que ore chidójnanga uté, ga ore chuchiéjna uté iji jnumi ga topı́si. Enga Dupade iroi Eliséo uruode úringane tocachuque jogadi tu uje e chingome eduguéjna cuchábi uté uje chise Eliséo iji iguı́jnai dirı́ca.

¹⁸ Enga jé ũrepise Dupade iroi Eliséo uruode ome ore eduguéjnai dirı́ca, uje chojninga: –A ore doi oredie ome trı́goi gajnui dirome uje i tu cebáda ga orabidie garósosi jne. Ga ikı́lode 15 jne mu gusu pláta guebeque chojmarámi ome dirome jne. Ga a ore doi oredie ome harı́nai to dirome uje sué harı́na uñane gáyode jnese ome dáringai uerate, mu gusu pláta guebeque chojmara ome 7 ikı́lode to jne. Guedé batigai a jé udé dirome enga a amóño jne uje a uacarasade ore tẽra cucha pibose uásejnane iji yoquidai Samária ujuyaquéode jorı́dedie ejode jne.–

¹⁹ Mu eduguéjnai iroguipı́si uté uje ajirique ore eduguéjnai yúode chotigase Dupade iroi Eliséo uruode dirı́ca, uje chojninga: –¡Que toque, arı̃a! A Pangarádejnai upúsurásu ujetiga pésu bocadode iji gatajnoquei ga chamurase cucha pibosode yoquibai marı́nga, a jé ca toguı́rase ujetiga bojningane cucha udore tocade.– Enga Eliséo e chajnai eduguéjnai iroguipísi uté uruode dirı́ca ga chojningame: –Adójnanga yuruode udojo: A amopise cucha pibose uásejnane to dirome ome bedodie, mu a jé ca agu to jne.–

²⁰ Enga Dupade iroi Eliséo uru casodé quene tocade ome eduguéjnai iroguipı́si uté. Uje iroguipı́si cṍra iji ore ujuyaquéode joride uaté ga ayorébui chuchiéjna iji jnumi ga topı́si.