2 Reyes 6 - Dupade Uruode

Pangarádejnai etotiguei choqui guesi ome proféta Eliséo átedatéi uté uje pésu ga ajineré doi gaté ga chácariji yodi gai

¹ Ga e chise dirode uñeque nanique ga Eliséo acadigode proféta udore catecã́ri dacadisṍri uté iji uraque dáguedie jogadébei guiguı́jna. Enga ore chojningame uté: –Bamo arı̃a uje yipédujo guijnatajei uje ajãpe gu, bacajnaquéode jogadi ome yoque.

² Mu ujetiga amesẽre yocáyipiedie, ga a yirógo yoquimatapı́di jogate ichárique jne iji tié uaté Jordán edógai. Ga bacadigode proféta chojmara, chojmarane uyoque jnese ga yaquesúgo yoquiguı́jnai cutádedie, cutádode ore iji uté.– Ga Eliséo chimesẽre ore áyipiedie nanique, ga chojninga: –Jé areque. Boyo co.–

³ Enga ore jno, mu Eliséo acadigode proféta udore uñeque dejéna dacadisṍri aja ore quigade, aja tié uaté edógai nanique, ga chojninga: –Bebi ga ajı́nama barógode uyoque to á.– Enga Eliséo chajnai uruode ga chojninga: –Ejẽ́, a yijı́na uaque jne.–

⁴ Enga jé u uje ore nóna ñane aja tié uaté uje i tu Jordán, enga ore chise, ga jé u uje ore chaquesu poridie iji uté ome dáguedie jogatique guiguı́jna yui.

⁵ Uje ore chaquesu poridie udire, e mu cucha dacadi tocade ome Eliséo acadigode proféta udore uñai. Uje e chaquesúrase pojnaque iji tié edógai, mu oidé uaté ajineré jnoji daboté ga basája tié ajei. Enga uté tibite ome dáyuguhebátigai, ga chojninga: –¡Urénga, Yangaráni á! ¿Ama yo ringome jne a? Uje que yajné ajineré, mu basája tié ajei iji te.–

⁶ Enga Dupade iroi Eliséo chojninga: –¿Basája iji rique que a?– Enga acadi proféta uté chusẽre jogadi ga chojninga: –Basája ajei iji ti que.– Uje Eliséo chimo usẽrapı́di jogadi, ga chaquesu pite pajei ga tṍraja batigai tuté. Enga pésu ga ajineré jı̃raque doi gaté ga cho cucha pujnúone uje diguiji yodi uté gai nanique.

⁷ Ga Eliséo chiroque dacadi proféta uté aja ajineré tuaté yui, ga chojninga: –Be ajineré ga asa.– Enga jé u uje proféta uté chipotingare dajmanecai aja yui ga chijnája guesi.

Dupade iroi Eliséo chisa sı́riagosode eduguéjnai isoldate dipeséode ore nanique ga gose Pangarádejnai uje chátaja uté gu

⁸ Enga deréjnane udore u uje sı́riagosode ore eduguéjnai déji dajocaningai gai ome israélgosode ore gatuaque nanique. Ga jecucha pésu dáguedie ome dasoldádode eduguéjna gatéode nanique, ujetiga ore chucué dáyipie quicho ome dajocaningai uté nanique. Ga ore eduguéjna cuchábi pésu darengúone jogadode iji udore, udore, ga chojninga: –A yipéco yoquirengúi iji ti, ga yiroco israélgosode ore iquéode iji uté.–

⁹ Mu Dupade iroi Eliséo chiroque daquı̃raquéode aja israélgosode ore eduguéjnai nanique ga chojningame: –Sı́riagosode ore déji darengúi iji uacaquei ome dáringane acoyataque, ga jé ca ajnáñoji ore yui te jne, uje ore gaidi tu ujetiga ore toria chujé uaque gu.–

¹⁰ Jecute isráelgosode ore eduguéjnai chiroque guidáyode aja Dupade iroi Eliséo ojningápidi yui jeta ore chajmita. Enga jé u uje israélgosode ore chicai ti yúode ome. Mu que gusu chojmara uje Eliséo chatata sı́riagosode ore irengúone dacoyapı́cho ome israélgosode ore eduguéjnai uté. Uje sı́riagosode ore chapúsa dacoyapı́dode aja, mu jé isoca uje Eliséo chatata udore, enga jecucha israélgosode ore eduguéjnai dimane ome cucha dacatique yúrique, enga jé u uje uté chapite.

¹¹ Mu ájningaránguipı́se sı́riagosode ore eduguéjnai uté ome cucha dacate tocachugode udore. Ga jé u uje tibidi dasoldádode ore eduguéjna gatéode aja dari, ga chojningame ore: –¿Áma gosi iji uaque jeta tẽra yoque? ¿Gosi ingoque yáyipie quigode ome israélgosode ore eduguéjnai uté?–

¹² Ga soldádode eduguéjnane uñai chajnai uraque deduguéjnai uruode nanique ga chojningame: –Que yocuñeque u, Yangaráni, Yeduguéjná. Mu proféta déji israélgosode ore uniri uté uje i tu Eliséo, ga a uté u ujetiga ajnerámeo baruode ome israélgosode ore eduguéjnai. Pijoguipise cucha pipoguiédode ome uté, ga jé chuságaja baru pipoguiédode iji bamochápi jogadi uté.–

¹³ Ga jé u nanique uje sı́riagosode ore eduguéjnai chojninga: –Adójnachopı́sa bojningai proféta uté jogatique, ga yirajágo jogatique, ga jé u ujetiga yiroque yisoldádode uacuñéngo aja yui jne, jetiga asayo uté ga arı́ño údi aja de jne.– Quigade uje eduguéjnai utocaidode chajmita Eliséo jogadi, ga ore di uté ujnomei údi uje déji pidáyode uñai uje i tu Dotán.

¹⁴ Enga jé u uje sı́riagosode ore eduguéjnai chiroque dasoldádode aja Eliséo uté yui nanique. Ga jiei ore nanique, ga uñane choru buricade, jé uñane choru guebéquedatéode. Uje e dejaque ga ore di iji pidai uté uje i tu Dotán ga ore chaparu ore idai uté gai nanique.

¹⁵ Ga dire uñai ga proféta Eliséo iroi chobéri niriji iji direjnímei ga doi guesi mu ¡chimo jóroque re! uje sı́riagosode isoldate ore betı́gajnai déji uraque dedai dosadode uje ore chaparu ore gai, jé aja buricade, jé aja pocaningane gajnéone guebéquedatéo. Jecute Eliséo iroi chósi tome darósõri uté: –¡Yangaráni á, a jé ca toque guese pigaitı́gome yoque jne á, ga a yoquigachodi tudé, jõ! ¿Ga yoco pı́ringome yoque jne á?–

¹⁶ Mu Eliséo chajnai uruode ga chojninga: –Ca atodo jne. Uje yoquirotangórone jiépisiji yocari ga ore suépise yocumajosórone sı́riagose udore ore gai.–

¹⁷ Ga jé u uje Eliséo catecã́ri Pangarádejnai, ga chósi tome dajei jochaquéode ome uté: –Pangarádejná, bebi ga achẽre yiroi uté edodie gai ga chimo yoquirotasórone ore to jne.– Ga jé u nanique uje Pangarádejnai chõre Eliséo iroi uté edominone, ga chajire dejode mu ¡chimo jóroque re! uje pañaji uraque dajogapi cucarãte uté, ga irágupúsu ome burica dipeséjnane jé aja guebéquedaté dipeséode uje pioguéjnai déji udore dosadode jnese, ga udore ore tṍraji gaté. Ga udore chaparu Eliséo gai jnese ome uté úringai pãreque.

¹⁸ Mu uje sı́riagosode e ore cugujnárasiji Eliséo nanique, mu Eliséo catecã́ri Pangarádejnai ga chojninga: –Yijócha bajei údi ujetiga apésu ga soldate dipeséode udore ca ore chimópo dajiritique rı̃.– Ga Pangarádejnai tangáripı́si Eliséo ajei jochaquéode udore ga pésu ore úringane edoparicho.

¹⁹ Iji udojo quigade ga Eliséo tibágui sı́riagosode isoldádode ore mu que chingo dei aja ore ga chósi tome ore: –A jé ca eso uacacuei jnani iji de, uje uacajnai dajeque chicáji uti yui aja uacapotigádi uté. Que uacacuei pidai u yoquidai tudé arı̃a. Mu ajnáño yiquigade, ga a yi uacádi aja uacapotigádi jnani uté.– Enga ore chijñaque uté, mu Eliséo jno sı́riagosode ore údi aja israélgosode ore eduguéjnai idáipisi uje idai uté i tu Samária.

²⁰ Enga quene soldate dipeséode jnese ore chacája pidáidatéi tuté ajei nanique, ga Eliséo chijóchapo Pangarádejnai ajei údi rı̃ enga chósi tome dacatecãraitigade: –Pangarádejná, achẽre sı́riagosode udojo edodie gáyode ujetiga ore chimópo dajirigode to jne rı̃.– Enga Pangarádejnai pésu nanique ga jı̃raque sı́riagosode chimópo dajirigode rı̃. Ga ore chajire dejode, mu ¡chimo jóroque re! uje ore dépisi israélgosode ore eduguéjna cuchábi idai Samária ajei.

²¹ Uje israélgosode ore eduguéjna cuchábi chimo sı́riagosode iji dedai ajei, ga cho daji Eliséo uté ga chojninga: –¿Iapá, yujé ore jne a? ¿Ama bajéode u jeta yujé ore jne a?–

²² Mu Eliséo chajnai uruode ga chojningame: –Úngare, ca ajé ore jne. Que basocai tu gatuaque ujetiga ajé basagode soldate ore ome bojóraque jeoga basṍreraque iji bagaidi pocaninga, mu bajuéga diri tome ore. Jétapũré sı́riagosode udojo uje que basaque ore, uje que bajnepite ujetiga ajocase ore. Mu ası́ome cucha pibotı́go ome ore ga átaja ore jotatique cucha. Quigade enga ajuéga doi ome ore, ga a ore chajnı́ja deduguéjnai jne.–

²³ Ga jé u nanique uje israélgosode ore eduguéjnai uté pésu daninaquédatéi ome sı́riagosode ore, ga ore tagu dabose unérone ga subudé ore iji, ga ore chójiapo dajotade rı̃. Uje e ore básome chagúi nanique ga eduguéjnai uté chiroque sı́riagosode udore ore aja doi, enga jé u uje ore chajniapója deduguéjnai uté rı̃. Ga cucha dacadode udojo quigade ga sı́riagosode isoldádode básome dasocabé casica rı̃ uje ore pésu dajochade aja quedéjnane ome doriquéode iji israélgosode ore uniri uté.

Israélgosode ore chejnáreque re iji dayaguhédatéode jmainie iji ore idáidatéi Samária uté, uje iyajmaque uje sı́riagosode isoldádode chaparu ore idai gai

²⁴ Mu chise diri nanique ga sı́riagosode ore eduguéjnai Ben-adad uté chamáta darógode soldácho aja ñane jnese ome dajocaningai yui nanique. Enga ore chicáji israélgosode idáidatéi Samária uté yui. Ga ore chise ore idai uté ga ore chaparu gai, uje ore gaidi tu ujetiga ore cugujnáji uté.

²⁵ Enga iyajmaque uje sı́riagosode ore chaparu Samária uté gai, jecute chiborátaja chaguhédatéi ome idaité ore. Enga jé chuságaja diri uje ore chapúsa dabosode cucha aja. Uje ore tẽra burica quedéjnane gatoidie, ga oredie jiépisi ga pláta guebéode batigai chise 80 nanique uje ore doi gatoi oredie ome. Enga ore dopoi oré tome cucujnadatéode uchiérodie to nanique rı̃ jetiga ore tagápo rı̃, ga uchiérodie chı̃retási láta chojmarámi ga oredie batigai chise pláta guebeque cı́ncodie nanique.

²⁶ Ga dirode uñeque nanique uje qué israélgosode ore eduguéjnai déji ore idai ujuyaquei gai ome dáringai urugu, ga chequé déji uje tibite eduguéjna cuchábi uté gai iji dabai. Ga uaté chojningame uté: –¡Átabája yu é, Yangaráni, Yeduguéjná!–

²⁷ Ga ore eduguéjnai chajnai uaté pijnane nanique ga chósi tome: –Ujetiga Pangarádejnai jé ca chátaja ua, ¿ama a jé yorási ringome ua ya? Uje que cucha pagutı́yabátique déji yu arı̃a. Uje tita ore acade cucha iji ore inasupı́di jogadi uté, ga jé chopome ore ijoyai vı́noi uje ı́jnonguiji ore ijoyapı́di uté to.–

²⁸ Ga ore eduguéjnai qué jnopo daruode údi rı̃ ome chequé uaté ga chojninga: –¿Ama bajuré gajnetique cucha ya?– Ga uaté chajnai deduguéjnai uruode ga chojninga: –Yujo chequé uaté chojningame yu dirı́ca ome daringaquéode: "Be ga yujégo yocabode ga yajo ore arione jne. Ajepe babi bajaque iji diri udé, ga yajobu bajaque jne. Ga dirome ga yujégo yabi to ga yajo to dirome."

²⁹ Jecute yujégo yabi, ga e yajo arione dirı́ca uje yaréngoi. Mu dire uñai ga yicatecã́ri jórogui yujo chequé uaté ome dabi, uje jé urúo dirı́ca ujetiga yajo abi uté, mu a e pógu dirı́ca enga que yise jogatique.–

³⁰ Uje ore eduguéjnai chudute chequé uaté ojñane enga jé u uje chajnangarase daguidedie iji darobé gai ¡cága! ome dáyuguhebátigai uté. Mu qué digapóji ore idai ujuyaquei gai ga urasade ore pañaji uté iji úringai urugu rı̃, enga ¡chimo jóroque re! uje iguidé pujnusiétigade imoto déji iguidé ueradedie údi, uje chichagu gai ¡teque, teque!

³¹ Enga ore eduguéjnai tibite enga cho dáñiejáme Eliséo yui, ga chósi te ome dabijnane: –¡Yo yúñieja iji de ome Eliséo uté, ujetiga yaquesu etabi iji diri tudé gajiné! ¡Mu ujetiga jé ca yi yuruode udojo ome Safat ujnacari uté, ga omitigai turásu ujetiga Dupade chopise dajuñame uyu, ga a datéringa jne!–

³² Enga jé u uje ore eduguéjnai uté chiroque datocaidi aja Eliséo yui. Mu Eliséo déji daguı́jnai uje cucha dacadode udore tocade, enga israélgosode angarate ibijógode uñane déji uté gari iji guijnatajei, uje ore chácariji dayaripı́ode gáyode jnese. Mu cáma eduguéjnai utocaidi diji Eliséo ore mu Eliséo e catecã́ri pangaránone udore, ga chojningame ore: –Ayoré yusṍremei e chiroque datocaidi aja gadoi ujetiga chaquesu yetabi iji de gajiné.– Enga Eliséo chopósi tome pangaránone ore gaté rı̃: –Adójnacho yuruode udojo á: Ujetiga eduguéjnai utocaidi chise de, mu jı̃raque ajucho joride gai gajiné, enga adotáyo aja, ga ca ajuécho jeta uté chise guijnatajei. ¡E yudute uté irósõri ujnópoi iji uté quigábode, arı̃a!–

³³ Uje Eliséo qué déji daruode gai mu eduguéjnai utocaidi jı̃raque di. Mu a ca ujánique cuse uje eduguéjnai di to ga chichaga cucha dacate tocachugode aja Pangarádejnai. Ga chósi tome Eliséo: –¿Ama Pangarádejnai chátarása cuchárigaja yoque jne a? Uje cáma chátaja yoque, enga a jé ca yirote yui gaté. Obiréjna gu uje Pangarádejnai u uje guẽrate cucha gajnaréngone udojo ome yoque.–