2 Reyes 5 - Dupade Uruode

Dupade iroi Eliséo uté chiqueta sı́riagosi Naamán uté ome ejnarei uté uje i tu lépra

¹ Sı́riagosode ore eduguéjna cuchábi ichajapite darógode uñeque aja dasoldádode ore iquei jnese nanique ome dáringa asuté, enga jnani uté i tu Naamán. Ga eduguéjna cuchábi irasiguipise Naamán isocai ga chosi iji gaté gu uje Pangarádejnai átapi uté gatuaque aja ore jocaningane ome ore umajosórone ore úringane pejnacho. Uje dicasepise Naamán uté ome dáringai jõcarataque, mu jé chejnáreque dequejnarei uté lépra isagode ome re.

² Enga sı́riagosode isoldádode jecucha ore pésu dajocaningame israélgosode udore nanique, uje ore pésu dajochade aja quedéjnane ome doriquéode. Ga chise dı́nique nanique ga ore toriasia israélgosode ore urábia uñáraque iji dajocaningane udore uñeque. Ga Naamán acoté uaté chosi darógabia iji gapu gatódabia suaté nanique.

³ Ga chise dı́nique ga ore isagábia gapape catecã́ri daroto ga chojningame: –Ujetiga yirósõri chicárasiji proféta uje déji ore idai Samária, ga uté a chiquetárase uté ome ejnarei lépra uté.–

⁴ Uje Naamán chudute ga jı̃raque tibágui deduguéjnai ga chajnerame ore isagábia israélgotábia uruode ome uté.

⁵ Ga sı́riagosode ore eduguéjnai chajnai uruode, ga chojninga: –¡Jı̃raque abágui! Ga a yiroque yurusarane aja israélgosode ore eduguéjna cuchábi uté jeta yingongara ua aja uté.– Ga jé u uje Naamán jno ga chijna daplátadie aja dajesui ome darogué ojningai tuté proféta yui jeta tẽrája uté. Ga uté iplátadie uje pipesudé iji plátapisedie chise 30.000 nanique. Ga chijnapo plátadie uñanie rı̃ uje óropise oidedie udire ga batigai chise 6.000 nanique. Ga chijnapo piguidé ueradéjnanie rı̃, ga chejna yijmanáyone oidedie daguidei udire.

⁶ Uje sı́riagosi Naamán chise Samária ga jı̃raque chijnare raja israélgosode ore eduguéjna cuchábi ga chisi ome deduguéjnai urusarane ome. Ga urusarane darúo chósi te: –Sı́riagosode ore eduguéjnai tu yu uje yurúsãre yurusarane ome ua ujetiga yingongara yiroguipı́si aja ua uje i tu Naamán. Lépra isaque yiroguipı́si uté, mu yirógaja bei ujetiga aqueta uté ome ejnarei tuté.–

⁷ Uje israélgosode ore eduguéjna cuchábi chajire dojoi eduguéjna urusarane enga chajuguipise aguté. Enga chisa daguidedie ga chajuque ¡cága! iji darobé gai ome dáyuguhebátigai uté, ga chojninga: –¿Ama Dupade uyu ome uté ajéode a, ujetiga yisı́ome pucuecaringuei ome ayorérique, jeoga yisı́ome pitoringai ome gosi? ¿Gotique chimo jóroque re uje jnani udé chiroque darusarane aja yu ujetiga yiquetárase lépra isatique ayoré?– Ga jé u uje israélgosode ore eduguéjna cuchábi chojningame daroque dejominórone: –¡Adójnachopı́sa sı́riagosode ore eduguéjnai uté isocai ome yu á, uje uté ucuei tupúsu pibotaquéode ome yu! A uté gaidi tu ujetiga chijnime dajocaningai ome yoque ¡jõ!–

⁸ Uje Dupade iroi Eliséo chudute israélgosode uraque deduguéjnai ujnomei uje chajnangarase daguidedie ome dáyuguhebátigai, enga chiroque daruode aja eduguéjnai uté. Enga Eliséo chósi tome uté: –¿Gotique gu a uje áyuguhebátaque ua ga bajnangarase baguidedie iji barobé gai dirı́ca ya? Be ga aroque sı́riagosi uté aja yu, ga a chimo uje Dupade iroi proféta déji yocuniri Israel tudé.–

⁹ Ga jé u uje israélgosode ore eduguéjnai chiroque Naamán aja Eliséo yui. Ga pi u doruti guebéquedaté aja Eliséo yui, ga nóna darótigo uñane aja dajesui to uje ore choru buricade, guebéquedatéode ore. Enga Naamán chise daqui uté ga chaquı̃́ra guebéquedatéi iji Eliséo iguı́jnai gabi.

¹⁰ Mu Eliséo que doi guesi ga que catecã́ri Naamán gotique to. Mu chiroque daroi aja yui ujetiga chajnerame uruode ome uté. Ga uruode chósi te: –Bo ga acáji tié uaté yui uje i tu Jordán. Enga ẽ́sariji ga gare iji ti jne. Ga a bejnarei ı́jnonguiji bádode jne ga baoi nóña ga icha jne.–

¹¹ Mu Naamán uté jı̃raque cho júruru ome uruode udojo enga jno ga cho chere chere aja dajesui. Ga chojningame darógode ore: –¡Cajichope to, uje Dupade iroi proféta uté poja yu ga que chachai yu iji yarani, mu chiroque daroi uté aja gadoi! Yijosipise ati uté a jé cháguerase, enga tagúrasome Pangarádejnai uté i ome dajei jochaquéode ome dangureni Dupade uté ome yu. Enga a jé chãrárasiji dajmanai tiji yudigode udore yúode ujetiga chiqueta yu ome yejnarei tudé lépra.–

¹² Quigade ga Naamán poja Eliséo uru quigode ome ojninga tié Jordán uaté to, uje chojninga: –Yoquidai Damásco jongotodie tié uje ore ı́ode u Abaná, Farfar ore suépise israélgosode udore jongotodie tié udire gáyode jnese ome dáringanie icha arı̃a. ¿Jé go ca yẽ́sariji udire ome yejnarei udé úringárique pinoningañaque?– Enga jé u uje Naamán chumuchásu re, ga surungu aja dajesui.

¹³ Mu uté irógode uñane sose uté yui enga ore cho daji Naamán uté uje ore nejéru údode, ga ore chojninga: –Iapá, ujetiga Dupade iroi uté chiroguirase ua aja cucha uajátique, ga a jı̃raque apésurásu, ¿jec ũré? Mu cho ujetiga etaque ojningai cucha ome ua uje serẽrája, jecute bãra ua iji quedéjnane. Omitigai turásu ujetiga jı̃raque be ojningai cucha ome ua, ga ẽ́sariji tié uaté jeta pinoningañaque ua.–

¹⁴ Ga Naamán tangári darógode ore inejequéode ome re ga chajnai tié Jordán uaté yui ujetiga chaca dedodie iji. Enga chaca riji yodi údi ga gare iji ti. Chaca dedodie iji, chaca dedodie iji, enga isocai uté jé péroji Dupade iroi proféta uté uru quiso ome re. Ga chajire re iji gare iji tia quigade mu udı́so e ı́jnonguiji gai. Enga aoi jé chosipı́some disi parátagabode ore aode, uje uerate aoi. Enga quene uté úringai icha jogadi u.

¹⁵ Enga cucha dacadode udojo quigade ga Naamán, jé aja irógode jnanı́o udore jnese iji gari, ore chajniápo Dupade iroi proféta Eliséo uté gai rı̃. Enga Naamán basája uté iquei ga chicotapise israélgosode ore angureni Dupa, uje chojninga: –¡Urénga! Quene yiraja uje que dupa uñeque cusipise iji erámi tudé údode jnese, mu gusu Dupa Uecai charidi tu baniri Israel tudé.– Ga Naamán chopósi tome Eliséo gaté rı̃: –Yijócha bajei údi ujetiga amesẽre yẽrapáidode udojo cucha ome ua, Yirósõri á.–

¹⁶ Mu Eliséo chajnai uruode ga chojninga: –¡Pangarádejna Uecai uté irógode uñai tuyu, enga yagúome uté i ome yuru iyiejnane udojo ome ua, uje a jé ca yijna bẽratı́go cucha uñeque!– Enga Naamán jé chajo raja jeta Eliséo chisárase gueranone cucha. Mu jé ate uje Eliséo chetaque ujetiga chisa.

¹⁷ Ga quene Naamán chojninga: –A ca apota yẽratique cucha, mu a qué yutai cucháriguiji ua gaté. Yijócha bajei údi ujetiga ası́ome bajnei jnupe petı́gome yu. Enga berani jnupe pei uté a jé chorase yachidode burica quedéjna gáningo ore jnungone cucha, jeta ore jno údi aja yocuniri. Yigaidi tu gu ujetiga yipésu yaseradéjnai ome berani jnupe pei uté. Enga jé iji diri tudé a jecucha yedu Pangarádejnai uté jne ome yachidode cuchiso úringáringo guẽrapáicho, ujetiga yãru udore gáyode ome uté, jé aja yẽrapáitigo cucha uñane jnese. Ome baroi tuyu ga a jé ca yẽrápo cucha pẽrapáidode uñeque ome dupa uñeque jne rı̃.–

¹⁸ Enga Naamán chojninga: –Mu cucha amiri qué déji uje que yiraja yisocáringome yúrique. Uje jecucha sı́riagosode yoqueduguéjnai edugádi tu yu aja dangureni dupa quedéjna Rimón uté iguı́jnai yui gatuaque ome úringárique pisı́gai. Ga yeduguéjnai uté na dacado aja yijmanecabi ajéode ga yicagóji angureni iquei ga yichajo yoquigataidie aja jnumi iji dupa quedéjnai Rimón uté iquei. Jecute yijócha Pangarádejnai ajéi údi ome yu ujetiga chı̃rorase yate gajnareque chojmarai uté. Uje que yajéode u gotique jeta yise dupa quedéjnai Rimón uté iquei, mu yoqueduguéjna cuchábi u uje chiroque yu aja uté yúode.–

¹⁹ Enga Eliséo chajnai Naamán uruode udore ga chojningame: –Boco, enga a pajesereringai nóna ua aja quedéjnane jne.– Enga Naamán quene jnoji Eliséo gari ome dáringai aroraque, mu cáma idája iji uté gotique.

Tãrarachuque Eliséo iroguipı́si Giézi uté nanique ga jnari Naamán uté guẽrapáidode cucha ome re

²⁰ Mu Dupade iroi Eliséo iroguipı́si Giézi uté jnusi Naamán guẽrapáiso dagúcha udore, uje pota chijna uñéngo. Ga chojningame re iji dáyipie: –¡Urénga! Paraguipise yangaráni ome sı́riagosi Naamán uté, uje que chisa iringuı́one dẽrapáiso uñeque. Mu uyu ga, a yayóna uté ga a yijna gueranone cucha uñeque, enga que taque yu. ¡Pangarádejna Uecai chiraja yuruode udojo úringane ũréo!–

²¹ Enga jé u uje Giézi toria doi ga chucajningárome Naamán uté. Mu uje Naamán chimo iji daquigade uje chayóna ore, jı̃raque base ga doi jnumi tiji doruti guebéquedaté uté ujetiga chachai uté iji garani. Ga chisı́ome dapregúnta ome Giézi uté ga chojninga: –¿Ama cucha dacatique chise uaque a?–

²² Enga Giézi chajnai Naamán ipregúnta uaté ga chojninga: –Jé areque yoque. Mu yangaráni chiroque yu aja baquigade gu jeta yajnerame ajei jochaquéode udore cucha ome ua, enga chósi te: "Quene jnacarode gare chise yoque que, uje ore tṍraji cucarãte orónenie iji israélgosode ore uague Efraı́n uaté. Enga Dupade irógode proféta uñane acadigode u. Jecute yijócha bajei údi ujetiga osõre ore ome berané casidé baplátai jé aja baguidedie udire. Ga pláta guebéode urásu uje plátapisei, enga batigai chise 3.000. Enga átapója baguidé ueradéjna gárerigui jne rı̃."–

²³ Mu Naamán chajnai uruode ga chojninga: –Jeta amesẽre yáyipie, ga jé ca gusu 3.000 iji plátapı́sedie jeta ajna, mu a yisiapo ujodie 3.000 ome ua to jne rı̃.– Enga Naamán chajo raja daruode ujetiga chisı́ome 6.000 ome. Ga doi bólsaraque ga na 3.000 aja ajei, ga napo daguidé ueradéjna aja ajei te rı̃. Ga dopoi bólsa uña rı̃, ga na 3.000 aja ajei, ga napo daguidé ueradéjna aja ajei te rı̃. Ga chisi ome bólsa gáredie udire ome daroque gárode ujetiga ore chijnoque iji Giézi iquei.

²⁴ Ga jé u uje Naamán irógode ore jno darósõri gueranenie bólsa údi. Mu uje ore chise oroné cháguesiringai iji Eliséo iguı́jnai yui, ga Giézi quene chisa Naamán irógode iringuienie bólsa udire iji ore jmainie ga chicháji guiguı́jnai ajei jeta chañuru guio. Enga Giézi uté chiroque jnanione udore aja doi, ujetiga ore chajniápo darósõri Naamán uté gai rı̃.

²⁵ Iji cucha dacadode udojo quigade ga Giézi chacápoja darósõri iguı́jnai rı̃, ga basája iquei. Enga Eliséo chojningame uté: –¿Ajnai rique que á, Giézi?– Enga Giézi chajnai uté ga chojninga: –Que yicáji siñeque arı̃a, yirósõri á. Jé yiyarite de.–

²⁶ Mu Eliséo chotigase uruode, uje chojninga: –¿Ama jé ca yugúsi bari to a, uje jnani uté doi jnumi tiji doruti guebéquedaté enga chachai ua? Yaríjogoto pujopié pésu yu ga yipáñapı́siji ua arı̃a.– Ga Eliséo chopósi tome daroi uté rı̃: –Tãrarachuque ua. Que bajnepı́di dire u arı̃a ujetiga asa plátadie jé aja piguidedie. Mu e bajna udire que, ga bagaidi tu ujetiga be oredie ome bacárigui pori olı́va jogatı́go, jé aja bacárigui úvai jogatı́go, jé aja bachitı́go tórodatéo, jé aja bachidérigui áyasai, jé aja barótigo, baróguerigui, jeta be oré tome udore ore to, ome báringai tãrarachuque.–

²⁷ Ga Eliséo qué jnopo daruode údi gaté rı̃ ome daroi uté ga chojningame: –Giézi á, jı̃raque Naamán uté ejnarei uté lépra a catája ua jne. Mu que gusu ua, mu a jé ca chimoque bape disi ejórigo uñeque to jne iji deréjna pitade jnese. Enga gose basocade udore.– Ga jé u uje Giézi jnoji Eliséo uté gari, mu e lépra isaque uté, ga cho chiẽc, chiẽque aoi iji gai ga cómejna isapı́dode údi.