2 Reyes 4 - Dupade Uruode

Proféta Eliséo chátaja chequé abai togué ome ajei jochaquéode udore cucha nanique

¹ Enga e chise diri nanique uje chequé abai togué tibágui Eliséo enga chijócha ajei údi ome re jeta uté chátaja uaté, uje profétade acadigode uñai u uaté abai casica to nanique. Ga uaté chósi tome dajei jochaquéode udore ome Eliséo uté: –Yabai casica cho darósõri iji ua to ica, mu e topı́si. Enga bamo uje uté chajna Pangarádejnai uruode iji jnumone. Mu yabai casica noñome déode iji dojode jnani gari, ga que yiraja yisocáringome yu ujetiga yo oré yabai ijnose carubode udore. Uje jnani uté chise yu ga chutai yu ome yabai casica ijnose carubode jeta yo oré. Ga jmongarája yabode uje jno ore údi jne enga cho daróguiji ore bisideque, ujetiga jé ca yimate yabai casica ijnose carubode iji gari. Jecute yayója ua ome uyoque.–

² Enga Eliséo chajnai chequé uruode ga chojningame: –¿Mu yo ringome ua ya, ujetiga yátaja ua? ¿Cuchárigo iji baguı́jnai uté uje qué déji uté?– Ga uaté chajnai uruode ga chojningame uté: –Barogué tuyu ga ı́jnonguipíse cucha pagutı́yabátique iji yiguı́jnai. Mu asébi su uje qué désiji garósape, mu cachi cucha abape, jé aja piábia. Ga aceite uté tṍraji ore acadie uña uje i tu olı́va.–

³ Ga jé u uje Eliséo cho uaté quique ome isocárique, uje chojninga: –Bo ga abágui bejominórone ore jnese ga atai ore ome co ajéguesátigo jne. Mu jé ca garósirase jne, mu jiei bamatatı́go co ajéguesácho jne jeta ajnája baguı́jnai ajei.

⁴ Quigade enga acáyoja baguı́jnai ajei jne, babode uhuaque, ga ajucho joride gai tiji uacaquigade.– Enga Eliséo chopósi tome rı̃: –Be ga asa aceite piábia suaté ga écãre asébi suté aja co ajégueságode udore jnese jne. Ujetiga e irágu uñai ga acha aja ti yui, iráguode jogadi.–

⁵ Uje chequé abai togué uaté chudute Eliséo uru quigode udore ome re, ga jı̃raque jnoji uté gari ga pésu ojningane cucha quigode jnese. Enga e dimane co ajégueságode jnese iji iguı́jnai ajei, enga jé u uje uaté suru dabode, uraque dabai. Uje ore daté chécãre aceite aja co ajégueságode udore, mu abode ore chátaja uaté uje jecucha ore di co ajégueságode ore údi iji uaté gatuaque.

⁶ Ga e irágu pı́ode udore jnese, mu ore daté cáma chiraja, ga chojningame dabode udore uñai: –Be co ajégueságode uñeque ga ajna aja de.– Mu abi chajnai daté ga chojninga: –Ité á, e ı́jnoque co ajégueságode arı̃a.– Enga jé u uje quene tita piábia ajei ome asétique.

⁷ Quigade enga chequé uaté tibágapoi Dupade iroi Eliséo rĩ, ujetiga chatata cucha dacate ueradode udore ome uté. Enga Eliséo chojningame chequé abai togué uaté: –Bo ga ẽra bãretade co ome barasade iji dati. Ga amate babai casé ijnose carubode ome orérigui jne. Mu a qué baplátarigui amirenie qué déji jne enga ajusípise amirenie guio jne enga babode, achome amirenie jne.–

Eliséo, iroi ore pota ujetiga ore cho sunémgoto uaté oré iji icaniratiguéode nanique

⁸ Enga chise diri nanique uje Eliséo chaquesu ore idai Sunem aja dajesui. Ga chequé até cho dedáji ore idai uté to, ga osõraquei déji ome Eliséo uté, ga uaté chajo raja ujetiga uté chacásãra uaté jogasúode ore. Iji udojo quigade nanique uje Eliséo chaquesu ore idai aja dajesui, mu que chimoque uje bası́ji chequé ibijogue iguı́jnai uté jeta taguı́ji ore gari.

⁹ Enga chequé uaté a chajmita Eliséo uté isocai ga chojningame dabai: –Adójnanga yuruode udojo. E yiraja uje Dupade iroque ũré jnani uté uje jecucha chaquesu yoquitiógarei aja dajesui.–

¹⁰ Ga chequé uaté chijócha dabai ajei údi ome jnani uté ujetiga ore chosõre, uje chojningame: –Omi tu ujetiga yajnerangome yoquiguı́jnai, ga yipécorásu yoquiguı́jna ajé ajã́tique iji ójo ome jnani uté. Ga yichagorása uté mochápirique aja uté to, jé aja mésaraque, charipı́rique, ibiotique ore rı̃. Ga a Eliséo tṍraji danı́nique ga a jecucha uté pusi yocorai ajé uña uté iji ójo jne jeta chise yoquiguı́jnai udé.–

¹¹ Ga e chise dı́nique nanique iji Eliséo diringane uñeque ga uté jé chijnare raja ore ipesudi guiguı́jna ajé uñai, enga cho dajñare iji uté.

¹² Quigade enga Eliséo catecã́ri daroi Giézi uté uje déji gari, enga chósi tome: –Giézi, abágui sunémgoto uaté ga ango jeta chise yóguiji de jne, yocupusiédi udé guiguı́jna.– Enga Eliséo iroi uté doi uruode, enga jé u uje chequé uaté tibágui ore iji ore charidi.

¹³ Enga Eliséo chojningame daroi Giézi uté: –Be ga ajnerame yuruode ome uaté, ga ósi tome: "¡Urénga! Bañurúpusu yoquio ome cutejmai bacaniratigué. ¿Ama bapotigátique cucha déji jeta yipésu ome ua ya? ¿Bajegaitique ujetiga yutai peduguéjnai uté, jeoga soldádode ore eduguéjnai ome ua? A yingo ua aja udore uñeque, jeta bajéo."– Uje ore añerato chequé chudute dajnéone Eliséo urúo, mu chajnai uruode ga chojninga: –Íjnoque. Que cuchárique chósi tiji yu iji yurasade ore ujade arı̃a.–

¹⁴ Uje Eliséo potapı́sa jeta chátaja chequé uaté, mu a ca uaté ipotigátique cucha cuse. Jecute Eliséo chucué daroi Giézi áyipieragome to, uje chojninga: –¿Yoco ringome chequé uaté ujetiga yosṍco ome cucha dacatique jne?– Ga iroi Giézi uté chajnai uruode ga chojninga: –Bamo uje ı́jnoque uaté abode, enga abai e choquı́jnapise. ¿Jé soca uaté pota datique to a?–

¹⁵ Enga jé u uje Eliséo chiroque daroi uté aja uaté yui, ga chojninga: –Ango uaté jeta chicáji de ga yicatecãrámi to jne.– Enga iroi uté doi uruode, ga chequé uaté tibágui Eliséo ore mu cháguena ore iguı́jnai piagoi.

¹⁶ Ga Eliséo chichaga cucha ueradode aja uaté yui, uje chojninga: –Iji siqueré ejo jogosṍri guedosi, enga a batique déji barúdi jne.– Enga chequé uaté chotigase Eliséo uruode ga chojninga: –Úngare, Yangaráni á. Jé ca o barupatáringame barogué uyu, Dupade iroi chá.–

¹⁷ Mu cucha dacadode udojo quigade ga Eliséo úringai ũré quene pijógome chequé tuaté uje chimo uje abi e déji ajei. Enga Eliséo ı̃carai casica guedosi jé u iji siqueré ejo uje chequé tuaté abi basosi.

Eliséo uté chatire sunémgoto abi ucuecaringuei gai te rı̃, ga gose Pangarádejnai uje tagúome Eliséo uté nanique

¹⁸ Enga chequé até, ore abi quérã, ga chise diri uje quı̃rique urẽja. Ga dirode uñeque nanique ga abi tibágui dai iji guejnai jogadi, uje dai uté déji dacatı́go cucha ı̃rasórone udore ore gari iji dejnai uté.

¹⁹ Mu urõsopise disi gatoi iji uté ga tibite dayé gai, ga chojninga: –¡Iapá, urõsopise yitaroi é! ¡Que yitiógara yitaroi achabode é!– Uje disi dayé chudute dabi pijnane ga jı̃raque chiroque darógode uñéngaja yui ujetiga chisa uté, ga chojningame daroi uté: –¡Bosi údi aja daté!–

²⁰ Ga iroi chisa disi uté, ga jno údi aja daté. Enga daté chicha dabi uté aja detarúdode gai, enga jé ore chuságaja guedé gatócoro uje disi chácariji uaté gai iji ore charidi uté. Mu uje guedé batigai déji gatócoro ga disi tosı́pisi.

²¹ Enga jı̃raque disi daté uaté chijna dape toi uté aja Dupade iroi mochádebei guiguı́jna ajé uñai iji gaté, enga na uté aja proféta Eliséo mochápi gai. Ga uaté suru joride gai iji dabi quigade, ga doi guesi tiji daguı́jnai uté.

²² Quigade enga uaté tibidi dabai ga chojningame: –Yijócha bajei údi ujetiga aguito ga aroque baroi aja burica quedéjna chequé yui ome uyu, ga yoru ga a chogué yu jne aja Dupade iroi uté yui. Enga a yise ga jı̃raque yı̃riápo jne rı̃.–

²³ Mu abai chajnai uruode ga chojninga: –¿Bagaitı́guirase jeta ese Dupade iroi uté iji diri tudé? Bamo uje cáma chise yocujnusinamáni dire iji guedosi tocachuque ichai uté arı̃a. Enga que dire puyai sábado upo rı̃.– Enga chequé tuaté chajnai dabai uruode ga chojningame: –Mu jé areque.–

²⁴ Quigade enga uaté chiroque daroi aja oruti burica quedéjna yui ujetiga chigaru ugúchade aja gai. Ga iroi nóna darósõri acoté taja dajei, ga uté chijñaque chequé iji oruti burica quedéjna gai. Ga chequé chojningame daroi: –¡Yico, ga yaguitógopı́saja proféta uté yui! Enga jé ca abásape to iji yui. Gusu ujetiga yaquı̃́ra ua, enga quene abase.–

²⁵ Enga jé u uje uaté jnome cucarani ójo yui uje i tu Carmélo, ujetiga tibágui Dupade iroi Eliséo iji uté. Uje qué idája chequé iji Eliséo ore mu uté e chimo uaté iji quedéjnai enga chojningame daroi Giézi uté: –¡Cajire to! Yocañerato sunémgoto uaté chicai gadoi.

²⁶ Bebi, aquejname ga achai uaté iji garani enga ojningame uaté: "¿Ama cho rique uaque, babai, babi, uhuaque jnese?"– Enga jé u uje Eliséo iroi jno, ga chachai uaté ga chingo. Mu jé aregue uaté, abai ore jnese ome uaté ojñane.

²⁷ Mu uje uaté quene chise cucarani uté ójo, enga chijnare raja Dupade iroi Eliséo enga jı̃raque chisa uté guı́dade ¡saque! ome dajnusiétigade. Mu Eliséo iroguipı́si chachẽre jeta chejñu isagode iji darósõri guı́dade. Mu Eliséo chaquı̃́ra uté uje chojninga: –Jé dóji ga ca ejñu isagode iji yu. Uje áyuguhebaté uaté, mu Pangarádejnai pógu ome yu ga cáma chingome áyuguhebátigai gajnetique cucha ome yu.–

²⁸ Sunémgoto uaté catecã́ri Eliséo ga chojningame: –Yangaráni á, ¿Ama yutai yatique iji ua iji taningai ica ya? Que yutáji ua gotique. Mu ¿yuruode cho ringome ua ica ya? Yojninga: "Jé ca o barupatáringame uyu," ¿jec ũré a?–

²⁹ Enga Eliséo chosõre uaté yui uje chudute uruode udore, ga chósi tome daroi Giézi uté: –¡Aguito ga ajñuque baguidé umarejna uaté aja gaté ga ajose eruéode aja bagarubi údi, ujetiga ibisoque ua ga ayópise aja disi togábi suté yui jne! Enga jé ca abası́ji yúrique. A gosi pota chaquı̃́ra ua jeta chisı́rasome dasalúdode ome ua, mu jé ca abásape ga ca ası́ome barasitigade ome uté to.– Enga Eliséo chopósi tome daroi gaté rı̃: –Ajna yogué uaté to aja bajesui ga a ese disi jne iji guijnatajei ga ajé yogué aja edodie gai jne.–

³⁰ Mu chequé disi togábi daté chetaque jeta Eliséo ca chicai uaté iguı́jnai to, ga chojningame uté: –Yisı́ome yuru iyiejnane ome ua iji Pangarádejna Uecai iquei, uje a jé ca yijı́ome ua iji báringai ueca udé, ujetiga ca ajı́na yu aja yiguı́jnai jne.– Jecute Eliséo niji ga chajna uaté aja iguı́jnai.

³¹ Mu Eliséo iroguipı́si Giézi jno bajaque ga bajagája disi togábi to. Ga chujé Eliséo ogué taja edodie gai. Mu que cuchárique cho cheme iji disi uté, ga pijoque uje ı́jnoque ujñari. Ga Eliséo iroguipı́si chachai Eliséo iji garani ujetiga chatata disi isocai ome uté. Enga chojninga: –Disi uté jé ate uje que niji gotique.–

³² Ga Eliséo quene chise chequé uaté iguı́jnai ga chacája guijnatajei mu chajire disabi uje terẽtási iji mochápi gai mu que cuchárique cho cuyúguiji. Enga jé ũré uje tosı́pisi.

³³ Enga jé u uje Eliséo surúpusu disi togábi uraque daquigade ome guiguı́jnai joride, ga gusu ore iji guijnatajei. Enga jé u uje chijócha Pangarádejnai ajei údi iji guijnatajei uté.

³⁴ Quigade enga Eliséo terẽtási disi togábi gai iji damochápi uté, ga chujé dabijnani taja disabi pijnani gai. Ga chujé dedodie aja edodie gáyode. Ga chujé dajmana ajã́ronie aja uté jmana ajã́ronie gáyode rı̃, jé aja ujetiga disabi e gai jũruápo garósi rı̃.

³⁵ Ga Eliséo niji ga chacája ñane iji disabi ejode ga chicáji ti ga chajniápo rı̃, uje chisṍriji guijnatajei. Enga dopoi disabi rı̃ ga terẽtapóji gai te rı̃. Ga quene disabi cho jatise. Ga jatı́seode gare iji ti uje cho jatis, jatise. Enga quene chuchẽre dedodie gáyode.

³⁶ Ga Eliséo tibidi daroguipı́si Giézi uté ga chojningame: –Abágui sunémgoto uaté, ga ango uaté ujetiga chicáji de.– Ga Giézi dopı́si darósõri uruode. Ga chequé uaté chise Eliséo ga uté chojningame uaté: –Jé areque ujeta ajna babi.–

³⁷ Ga chequé uaté nı́napúsu re uje abi qué eca ga chichaga dacuruté aja jnumi iji Eliséo guı́dade iquei. Quigade enga uaté chague ga chisa dabi ga jnoji Eliséo ore gari.

Venénonie déji ore posode nanique, mu proféta Eliséo pésu ga uneréjnapo rı̃

³⁸ Iji cucha dacadode udojo quigade ga Eliséo jno ga chajnı́ja ore idai Gilgal uté. Mu chaguhéode socárome ore iji ore uniri Israel uté nanique. Enga dirode uñeque nanique ga Eliséo acadigode proféta ore déji dague iji uté gari to, uje uté chacate ore iji ore idai Gilgal uté. Ga Eliséo chiroque darótique aja ore posode úringane pipesucho yui, uje chojningame uté: –Acha ólladaté aja pioi ga apésu bãraquei guı́so ome yacadigode proféta udojo, enga yacásãcoa ñane jne.–

³⁹ Enga Eliséo acadigode proféta udore uñai uje qué jnacare chucué ugarabidie gotórigui iji monte jeta chicháji ore ı̃raca piagoi to. Mu chise duchubie gajnua dugútique iji datã ga na adie udire aja daguidé nañoré urepei uté. Ga Eliséo acadi proféta uqué chajniapója ore iguı́jnai rı̃, ga doi duchubie gajnunie udire ga chajugája ore ı̃raca piagoi gai jóra, jóra, jóra. Mu que chiraja uje chigoguipise, ga chequésãrirase ore.

⁴⁰ Ga Eliséo iroi e di jnanione ore posode údi ga chécãraja ore agapı́ode udore. Enga quene ore chetingare uté ãraquei guı́so uté, mu que ore tiógara, uje chigoguipise gu. Enga ore chinguı́ra dabijnanone aja Eliséo uté, ga ore chojninga: –¡Urénga, Dupade iroi chá, a venénonie déji baroi ãraquei ga a chequésãre yoque jne!– Enga que toc ujetiga ore tagu.

⁴¹ Mu Eliséo chojningame daroi: –Be harı́nai ga ajna aja ne.– Uje iroi di údi ga jé u uje Eliséo tṍra harı́nai uté aja daroi ãraquei ¡jmuc! Ga chojninga: –Écãrapója ore agapı́ode ga ore tagu jne.– Ga ore chetingare mu uneréjnapise. Ga e ı́jnoque venéno iji.

Eliséo pésu arurégode iquéraningai ome dacadigode proféta udore ore uague uje ore batigai chise 100 nanique

⁴² Iji dirode uñeque nanique ga jnanı́rique tṍraji dedai Baal-salisá uté, ga di iji Eliséo, enga chijnoque degode arurécho uje ore batigai u 20 iji dajnungué bólsa ome Dupade iroi uté. Enga pipesute arurégode udore iji ore acai cebáda a bajade uje ore chijáro ga ore pésu harı́nai tiji. Ga que gusu arurégode udore uje baal-saliságosi chisı́ome Eliséo, mu jé uté chátaja degode trı́goi aja dajnungone cucha udore to uje cáma pidasucho. Enga Eliséo chisi ome arurégode ome daroi ga chojningame: –Be ga ajuguı́na yacadigode proféta ore uague, ga a ore tagu jne.–

⁴³ Mu iroi chajnai uté ga chojninga: –¡Garósi arurégode arı̃a! ¿Ama yorási ringome ujetiga yajuguı́na jnanione udore uje ore batigai chise 100?– Mu Eliséo uté chajo raja daruode, ga chojninga: –Be ga ası́ome ore, ga a ore cho dabotı́ji jne. Uje Pangarádejnai jé urúo ome yu gu. A jé chise ore jnese jne, ga amı́ningo a qué déji jne iji quigade.–

⁴⁴ Ga jé u uje Eliséo iroi doi uruode ga chicha arurégode aja Eliséo acadigode proféta udore ore iquei. Ga ore tagu jnese ga que uñeque charoriguı́ji. Enga ore posode iredie qué déji. Enga cucha dacadode udore jé péropı́siji Pangarádejnai uruode udore uje chatata ome Eliséo que.