2 Reyes 3 - Dupade Uruode

Acab ujnacari Joram isocade gajnarécho iji dáringai israélgosode ore eduguéjna nanique

¹ Uje judágosode ore eduguéjnai uté uje i tu Josafat guejnanie siquerei 18 nanique ome dáringai eduguéjna, enga quene Acab ujnacari Joram uté basája dáringai israélgosode ore eduguéjna nanique iji dedai Samária uté. Ga Joram uté guejnanie siquerei 12 nanique ome dáringai israélgosode ore eduguéjna nanique.

² Enga Joram uté pésu pisijnaringuéone iji Pangarádejnai edominone. Mu uté adode que cho dai casica Acab, jé aja daté Jezabel ore isocade ome ore úringane ate gajnarénguipı́so nanique. Uje Joram uté chijnime dupa quedéjna Baal uté gajné cucarané puyé iji dajogadi uté, uje dai casica Acab pésu ome dangureni Baal uté nanique. Ga uerate Joram isocai uté uje chijnime dai casica ipesudé uaté.

³ Mu gajnarétigai u uje Joram uté chajo raja eduguéjna casicaite Jeroboam ate gajnaréngone udore. Uje jnani bajai Nabat ujnacari Jeroboam uté pésu pisijnaringuéone unéningai ome darasade ore, enga Joram chiradája jmapiedie udire. Enga que Joram uté chicai quedéjnaringome dasoca gajnaréngone udore gotique to.

Purása quedéjnane eduguéjnai iji ore uniri Moab uté tagupúsu israélgosode ore eduguéjnai uté uruode aja nanique

⁴ Iji dirode udore nanique ga moábgosode ore eduguéjnai cuse uje i tu Mesa. Enga Mesa uté gachidedie áyasai jiei nanique. Ga uté jecucha cho doré ome dachidedie áyasai udire nanique, uje gajnepı́di jé u gu ome israélgosode ore eduguéjna bajai Acab uté. Ga guẽrapáidedie áyasai uje cho doré ome iji siqueredie jnese chise 100.000 nanique iji dachidedie áyasai udire ape choquı́ode nanique. Mu que gusu áyasadie abode udore uje moábgosode ore eduguéjnai chisi ome israélgosode ore eduguéjnai uté. Uje chuju dachidode áyasa choqui ore ojode iji ore gáyode to, uje udore batigai u 100.000. Ga chisiapome dajucáidode udore ome israélgosode ore eduguéjnai iji siqueredie jnese to rı̃.

⁵ Mu uje israélgosode ore eduguéjnai uje i tu Acab toi nanique, ga moábgosode ore eduguéjnai cha tangári israélgosode ore eduguéjna ejoi, ga que chopo doré nanique rı̃ ome uté.

⁶ Enga jogadi jé u nanique uje israélgosode ore eduguéjnai uje i tu Joram jnoji dedai Samária uté, ga chimáta dasoldádode aja ñane jnese iji daniri Israel uté údode nanique. Gaidi tu gu ujetiga dimane ore ome dajocaningai yui ome moábgosode udore ore.

⁷ Ga chirógapo darógode aja judágosode ore eduguéjnai Josafat yui nanique rı̃, jeta ore chajnerame uruode ome uté. Ga chósi te, uruode: –Moábgosode ore eduguéjnai tagupúsu yuruode aja. ¿Ama átaja uyu a, ome yigaidi pocaninga uté ome yumajosórone moábgoso udore jne?– Ga judágosode ore eduguéjnai Josafat chajnai israélgosode ore eduguéjnai Joram uruode ga chojninga: –Ejẽ́. Yoco ñane arı̃a, ga a yi báyipieragome jne. Cho jetiga yirógode soldácho upúsu barógode to, ga jé chopo rı̃ ujetiga yachidode burica upúsu bachidode burica. Ga a yátago yógaja uaque ome bagaidi pocaninga yui jne.–

⁸ Mu judágosode ore eduguéjnai Josafat pregúnta cúsome israélgosode ore eduguéjnai Joram uté, enga chósi tome: –¿Mu yocajnatique dajeque chicáji rique jne a ujetiga yicoi pocaningai ome ore?– Ga Joram chajnai dojoi eduguéjna uruode ga chojninga: –A yocajnai u dajei jne uje chajuque erãpetarei iji edómgosode ore uniri yui.–

⁹ Ga jé u nanique uje israélgosode ore eduguéjnai jé aja judágosode ore eduguéjnai ore jnome dagaidi pocaninga yui. Enga ore chajna dajeque cacachui uté ome dáringane urugu. Enga jé u uje edómgosode ore eduguéjnai cháta raja ore aja daqui yui iji erãpetarei uté. Mu uje ore guejnane dire chise 7 nanique, enga e que yote potique cusapo rı̃ ome ore, ga jé chuságaja ore isoldádode jé aja ore gachidode ore jnese, uje yodi chona ore jnese.

¹⁰ Enga jé u nanique uje áyuguhebátaque israélgosode ore eduguéjnai Joram uté, ga chojninga: –¡Urénga, a Pangarádejnai chorei eduguéjna gadiógode uyóguiji de gu ujetiga chicha yógaja moábgosode ore jmainie jõ!–

¹¹ Mu judágosode ore eduguéjnai Josafat uté pésu dapregúnta ome ga chojninga: –¿Ama ca Pangarádejnai irótique proféta déji dojo to a? ujetiga yicatecãcobi uté ome Pangarádejnai uté uru quitı́go.– Enga israélgosode ore eduguéjnai iróquegatéi u uje chajnai Josafat uté, ga chojninga: –Eliséo u arı̃a uje déji dojo to, uté uje dai i tu Safat. Ga uté u uje cháta cuchade aja Elı́as nanique.–

¹² Ga Josafat chojninga: –Pangarádejnai angúromei proféta u uté arı̃a jeta chatata uruode, ga a chingome yoque jne.– Enga jé u uje eduguéjna gadiógode udore ore jno, israélgosode ore eduguéjnai, jé aja judágosode ore eduguéjnai Josafat, jé aja edómgosode ore eduguéjnai uté. Ga ore tibágui Eliséo uté iji charidi.

Eliséo chatata cucha piqueminórone ome Joram, jorane eduguéjna gárode ore uje ore yuchome moábgosode ore jne

¹³ Uje Eliséo chimo israélgosode ore eduguéjnai uje i tu Joram ga iyieja yui tome jeta chise. Ga catecã́ri uté ga chojningame: –¿Ama yimerirase uyu iji ua ya? Bo, ga acué bai casica angurenone dupa quedéjna irógode proféta tácho ore uru quitı́go ome ua. Jeoga ajnai baté angurenone dupa quedéjna irógode udore, ga acué ore uru quitı́go ome ua.– Mu israélgosode ore eduguéjnai chajo raja darai ome Eliséo, ga chojninga: –Úngare. Yijócha bajei údi ome yoque iji de gu uje Pangarádejnai chorei eduguéjna gadiógode uyóguiji de ujetiga chicha yógaja moábgosode ore jmainie.–

¹⁴ Ga Eliséo chajnai uruode ga chojningame: –Yirósõri u Pangarádejna Uecai uté uje Pujnuéngaisṍripı́si tu. Ga uté chiraja yuru iyiejnane udojo úringane ũréo iji de ome ua. Ujetiga ca ajı́narása judágosode ore eduguéjnai Josafat aja de, enga a jé ca yajirirase bei gotique. Mu yo cuchadaté iji Josafat uté gu, jecute yujuéga yi ome ua.–

¹⁵ Enga Eliséo qué jnopo daruode údi rı̃, uje chojninga: –Beyoi ga ajnáño jnanı́rique aja de uje chirajapise ore ungurañane árpa, ga a chijocase detique árpa iji yocari jne.– Ga e ore di jnani údi, ga chijocase ome ore. Enga Eliséo chudute ore ungurañane jocarane enga Pangarádejnai ujopié base Eliséo gai nanique, ga chisı́ome daru quigode ome uté, ujetiga Eliséo chajnerame ome ore.

¹⁶ Enga jé u uje Eliséo chojninga: –Pangarádejnai chósi tome daruode ome uaque: "Beyoi ga ajóchayo uaquerugode iji jnumi iji tuijnai tudé údode jne, ga jiei jne uacapesutı́go.

¹⁷ Enga a yisi ome yodi ome uaque jne, mu a jé ca guéode tṍraji gaté ome uaque. A ca emi iringuiápoji uaque jne rı̃. A jé ca amóño udore gotique, mu a yodi irágu uaquerugode ajéode dirome jne iji tuijnai tudé údode. Enga a ójiyo jnese dirome, jé aja uacarógode soldácho jnese, jé aja uacachidedie aquirájnai, jé aja uacachidode uñane jnese rı̃."–

¹⁸ Ga Eliséo qué jno daruode údi gaté ome ore rı̃, ga chojningame ore: –Cucha atı̃́ape sudore ome Pangarádejnai ujetiga pésu yodi ome uaque arı̃a. Mu que gusu ipesudode cucha udore ome uaque, mu a chicha moábgosode udore aja uacajmainie to jne.

¹⁹ Enga a ejnáño ore iji ore idáidatéode jnese jne uje ore ujuyaquéode chaparu ore idáyode gáyode, jé aja ore idai ibijógode ore jnese rı̃. Enga ajnangaráso ore idáyode udore aja quedéjnane. Enga aquesúyopo ore acadie pore to jne rı̃ uje adie déji enga anguı́raño jnumone bisideque jne. Ujetiga eso sibı́jnane iji ore uniri údode ga acosáyoja ome jnumi jne ga jnumi irágu ajéode jne. Ga beyopoi cucaranenie jne rı̃ ga ajninguésoja ore guejnane jne ga ca ujárique cuse jne ome ñane.– Ga udore u Pangarádejnai uruode uje Eliséo chajnerame ome eduguéjna gadiógode udore ore nanique.

Tocachucho Eliséo ajnerámeone Pangarádejnai urúo jnese uje chajnerame ome eduguéjna gadiógode udore ore

²⁰ Enga chise dire uñai enga jé ũrepise Eliséo ajnerámeone Pangarádejnai urúiso. A jé chorase guedé batigai uté iji direjnı́mei uje jecucha israélgosode ore tẽra dẽrapáidode cucha ome Dupade, enga ¡chimo jóroque re! uje quene yodi tṍraji edómgosode ore uniri yui ga chayója quedéjnane, ga irágu ore erugode ajéode jnese iji tuijnai uté údode, jé aja jnumi jnese.

²¹ Mu moábgosode jnese e ore chudute pujnomei dirı́ca uje eduguéjna cuchape gadiógode udore ore cugujnáji ore jne. Enga jé u uje jı̃raque moábgosode ore eduguéjnane tibidi jnacarode, jnanione ore iji ore uniri uté údode jnese ujetiga dimane ore ome eduguéjna gadiógode udore ore yui. Enga ore chapuse udore ore jnese aja uje ore chimécãre pocaningai gajnéone cõráchacho. Ga jé u uje moábgosode isoldádode udore ore chimáta ñane aja daniri eruei uté ome damajosórone ore yui.

²² Mu dire uñai ga moábgosode ore chobéri niriji iji direjnı́mei. Enga ore chajire desórone ore uniri yui. Mu ore chimo israélgosode ore erugode iji quedéjnai enga guedé chichaga raja yodi ga cho ujetiga gatı́jna ga ore chose diquiyojnanie iji.

²³ Ga moábgosode isoldádode udore ore chojningame ñane: –A eduguéjna gadiógode udore ore doi pocaningai ome ñane que. ¡Ga a ore iyojnanie u udire jõ! Ga a ore chejna ñane aja jnumi ome dajocaningárique.– Ga ore chopósi tome ñane rı̃: –¡Moábgosode uyoque é, beyoi ga yachẽ́co ore ugúchade ga yoco yocajnéngu jne é!–

²⁴ Mu uje moábgosode ore di iji israélgosode ore irengúi ga israélgosode ore chague jmame ga ore cugujnáji ore, ga moábgosode ore chayo jórogome ore. Ga jé u uje israélgosode ore chuságaja moábgosode ore uniri uté uje ore chujé ore aja ore ajesúode ¡jnac! ¡jnac! ¡jnac! enga ore suépise ore gáyode.

²⁵ Ga uje israélgosode ore chacája moábgosode ore uniri uté nanique, enga ore chejnápise ore idáyode ¡pógopógo! uje ore chajnangarase cuchade aja dajesúode, jé aja ore ujuyaquéode iji ore idáidatéode udore gáyode. Enga pocaningai gaisórone jnese ore chisa cucaranenie ga ore tṍraja ore guejnane ga chojmara, chojmara. Ga cucaranenie chı̃reta ore guejnane nanique, ga ı́jnoque jetiga guesáringarique qué dépoji ore guejnane udore nanique rı̃. Ga ore chicosápoja sibı́jnane rı̃ iji ore uniri uté jnese, ga ore chı̃reta sibı́jnane udore ome jnumi. Enga que gusu uté, mu ore chaquesúapo ore acadie pore arẽ́ jnese nanique rı̃ uje ore acadie pore udire adie déji, ga ore chaquesu aja jnumi ¡jnac! ¡jnaque! ga cho ¡jui! ¡jui! jnumone. Mu gusu ore idáidaté chojmarai uje que ore chajnangarase ore ujuyaquei tiji gai, ga ore idai amiri uté i tu Quir-haréset. Mu pocaningai gaisórone uñane chaparu ore idai gai ga ore cugujnáji uté. Uje ore cho dõráchatı́guiji dachogaranone ga ore chicho ore gai ome cucaranenie iji ore ujuyaquei ajei. Enga jé u uje ore sué ore gáyode, mu ore ujuyaquei jé jogate gaté.

²⁶ Ga moábgosode ore eduguéjnai Mesa uté e chiraja uje israélgosode a ore sué gai jne. Enga chucué dasocáringome re, ga nóna darógode soldácho ore uje ore batigai chise 700 nanique. Enga ore chijna daqueséode ga ore ajegaidi u jórogu ujetiga ore cugujnáji edómgosode ore eduguéjna cuchábi iji datiógarei, mu que ore chijnime ãrı́rique.

²⁷ Jecute moábgosode ore eduguéjnai uté doi dape bajai nanique uje chácarásiji dayé charidi jnérase ome úringai eduguéjna. Mu doi dabi uté nanique ga tẽrame dangureni dupa quedéjna. Uje chujéja ore idai ujuyaquei gai ga chãru uté gai ome dáringai pẽrapaite nanique. Ga cucha dacadode udojo chiborátaja pájningadatéi, uje peteguipise israélgosode ore nanique. Jecute israélgosode ore chijnime ráguiji dajocaningai, ga ore chajnı́ja daniri jnese.