2 Reyes 25 - Dupade Uruode

Judágosode ore eduguéjnai Sedequı́as isocai uté uje tagu babilóniagosode ore eduguéjnai Nabucodonosor uruode aja ga chiborátaja Sedequı́as úringárique pisaque nanique

¹ Uje eduguéjnai Sedequı́as uté tagu babilóniagosode ore eduguéjnai Nabucodonosor uruode aja nanique, enga Sedequı́as guejnanie siquerei e chise 9 años nanique ome dáringai eduguéjna iji Jerusalén uté. Ga ore isecaranone guedosi e chise 10 iji siqueré uaté nanique, mu nónapo ore isecaranone dire rı̃ uje 10 iji guedosi tuté nanique, ga jé u uje e Nabucodonosor tṍraji daniri ujetiga cugujnáji Jerusalén nanique, uje Sedequı́as cha tangári uté gu. Enga Nabucodonosor nóna dasoldate dipeséode jnese nanique ga ore chicáji Jerusalén yui nanique. Uje ore chise ore idai uté, ga ore cho darengúji guesi, enga ore chaparu ore idai gai, jeta jé ca jerusaléngosode uñeque qué dopoi guetı́guiji uté rı̃. Enga que gusu ore adi uté, mu Nabucodonosor irógode soldácho ore pésapo dachiejnane iji ore idai dosadode aja ore ujuyaquei eruei to nanique rı̃, ujetiga ore choru dachiejnane aja ore idai ajei nanique.

² Enga iyajmaque Nabucodonosor isoldádode iji Jerusalén gai nanique. Enga Sedequı́as guejnanie siquerei e chise 11 años nanique ome dáringai eduguéjna, mu qué ore déji Jerusalén dosadode iji ore ujuyaquéode uéchai nanique.

³ Enga e chuságaja ore isecarãte guedosi gagájnia iji siqueré uaté nanique, enga nónapo ore isecaranone dire 9 rı̃, mu idaité e que ore chirajápo dasocáringome raque nanique rı̃. Uje chaguhédatéi e socárome ore gu iji Jerusalén uté ajei nanique, ga ı́jnonguipı́se cucha pagutı́yabátique garãtı́gome ore nanique.

⁴ Mu deréjnai uté jé upúsu nanique uje babilóniagosode ore quene chajnangarase jerusaléngosode ore ujuyaquei pei iji ore gai ga ore pésu edo iji ore ujuyaquei nanique. Mu judágosode ore eduguéjnai Sedequı́as, jé aja uté irógode soldácho jnese, ga ore chayome dajnei pocaninga nanique iji dejai uté. Ore chuchẽre ore joride uaté gai uje déji ore idai ujuyaqué gárode ore ujai, uje idógosiji eduguéjnai acadie pore jogadébei uté. Uje babilóniagosode isoldate dipeséode jé qué ore chaparu ore idai uté gai mu eduguéjnai Sedequı́as jé aja irógode soldácho udore tṍraji piagoi uté ome dáringane bayaque. Ga ore chajna dajere nanique uje chicáji tuijnai uté iji tié Jordán ejoi, uje i uñai tu Arabá.

⁵ Mu babilóniagosode isoldádode ore ajnapáidi jé u Sedequı́as uté nanique ga ore chisı́na uté iji garáijnai uje déji judágosode ore idai Jericó yui. Mu Sedequı́as uté irógode soldate jnese chayo nanique ga ore noñome deduguéjnai iji te jmete nanique ga ore chisite rágaja quedéjnane.

⁶ Ga jé u nanique uje Nabucodonosor isoldádode ore chisa Sedequı́as uté ¡saque! nanique ga ore jno uté údi aja deduguéjnai nanique, uje déji pidai uté uje i tu Ribla. Ga jé u uje pajirique judágosode ore eduguéjnai Sedequı́as adode aja quigode nanique, enga quene Sedequı́as uté chise dáringai pujuya ome Nabucodonosor uté nanique.

⁷ Enga jı̃raque babilóniagosode ore chujé Sedequı́as ujnacarode, ga jé ore cachodi tu uje ore topı́si. Enga chuque udore iji Sedequı́as edominone iquei nanique. Ga jé u uje Nabucodonosor chiroque darógode ore aja Sedequı́as uté ujetiga ore chusaque edodie, ga jé u uje edoparique nanique. Ga ore dopoi ojnaquérodie nanique rı̃ uje pipesudé udire iji bronce, ga ore chajo Sedequı́as jmanecade aja ñane ome ojnaquérodie udire. Ga jé u uje ore jno Sedequı́as uté údi aja Babilónia nanique.

Babilóniagosode ore chejna judágosode ore idáidatéi Jerusalén uté, ga ore jno jerusaléngosode amiri casodica údi aja daniri Babilónia ome ore úringane pisacho nanique

⁸ Ga dirode e chise 7 iji ore isecaranone guedosi 5 iji siqueré uaté uje Nabucodonosor úringai eduguéjnai chise 19 áños, enga jé u uje Nabucodonosor uté iroguipísi chise Jerusalén nanique ome darósõri uté utoquéode, enga iroguipísi uté i tu Nebuzaradán. Enga Nabucodonosor irodisórone soldácho ore eduguéjnai tu Nebuzaradán uté nanique.

⁹ Uje babilóniagosode ore eduguéjnai Nabucodonosor iroguipı́si Nebuzaradán uté chise Jerusalén nanique ga jé u uje chãru Pangarádejnai iguı́jnai gai nanique; ga que gusu uté, mu chátaja eduguéjna cuchábode ore iguı́jna cuchábi uje i tu palácio nanique rı̃, enga chãru uté gai to. Mu que gusu udore uje chãru gai nanique, mu chãru guiguı́jnai chojmara, chojmarane gáyode iji Jerusalén uté nanique. Ga jé chuságaja ibijógode iguı́jnane nanique uje chãrúpo udore gáyode jnese to nanique rı̃.

¹⁰ Enga babilóniagosode isoldádode jnese ore nóna eduguéjna cuchábi irodisórone soldácho eduguéjnai Nebuzaradán uté aja Jerusalén. Enga Nebuzaradán uté chiroque ore aja ore idai Jerusalén ujuyaquéode iji gai nanique ga ore chajnangarásaja quedéjnane.

¹¹ Ga jé u nanique uje eduguéjna cuchábi irodisórone soldácho ore eduguéjnai Nebuzaradán uqué jno jerusaléngosode amiri casodica ore údi aja daniri Babilónia uté ome ore úringáringo pisacho. Mu que gusu ore, mu chátaja judágose amirone uñane jnese uje qué ore déji daniri uté, jé aja udore uje e ore tẽra rome babilóniagosode ore eduguéjnai Nabucodonosor bajaque dirı́ca.

¹² Mu Nabucodonosor iroguipı́si Nebuzaradán uté noñome jmataguipı́sode uñane iji judágosode ore uniri nanique. Ga que ore chácariji te bisideque nanique, mu Nebuzaradán uté chiroque dañomone udore aja ujetiga ore chajire ore guejnane yúode iji daniri uté, jé aja jeta ore chajire ore acadie úvai yúode to.

Babilóniagosode jé ore chuságaja Pangarádejnai iguı́jna cuchábi jogonórone cucha uje ore jno udore údi aja daniri to nanique

¹³ Enga babilóniagosı́so ore chase Pangarádejnai iguı́jnai ome cucha orerane uje pipesucho iji guebei nanique uje i tu bronce. Ga ore doi cutádedatédie uje pipesudei ore iji bronce, jé aja ore oragadé utugudé dugurenie, jé aja bajodaté cuchabé uaté rı̃ uje ore chı̃́care "yote quedéjnai" aja bajodaté uaté nanique, ga pipesudé uaté iji bronce to. Ga babilóniagosode ore chujé udore iji jnumone jnese nanique ga ore jno pépitade údi aja daniri Babilónia to.

¹⁴ Que gusu udore mu ore dopoi pı̃racadie rı̃, jé aja corángarangámone, jé aja ibioque quedéjnane isangurúone rı̃, uje ore chujnungu ibiogode ¡sere! ome udore, jé aja catı́beode, jé aja erásorone uñane uje sacerdóteode ore chinguı́rame dasatique cucha uñane iji Pangarádejnai iguı́jnai ajei, uje pipesute ore iji bronce. Enga babilóniagosode ore chajnose cuchade udojo iji jogadode iji Pangarádejnai iguı́jnai, ga jé u uje ore chorei doidode cucha udore iji daniri Babilónia to.

¹⁵ Enga babilóniagosode ore eduguéjna cuchábi irodisórone soldácho ore eduguéjnai Nebuzaradán, jé aja jorane soldácho, jé qué ore chase Pangarádejnai iguı́jnai ome cucha guebéode, jeta óro uéguedie u, jeoga plátapı́sedie u. Ga ore chise bajo ajámaminie udire uje ore chanire pioi gueguerade aja udire ajei, jé aja bajo ajenenie udire. Enga jé u uje ore chijna cucha ueradedie udire ga ore jnopo údi rı̃ aja Babilónia nanique.

¹⁶ Enga iménujna cuchade udore uje eduguéjnai Salomón uquécasicáite oracho iji guebei uje i tu bronce ome Pangarádejnai iguı́jnai nanique. Jecute ome cutádedaté gáredie udire, jé aja bajodaté cuchabé uaté rı̃ uje ore chı̃́care "yote quedéjnai" aja nanique, jé aja Salomón oragadé utugudé dugurenie, que toc ujetiga gosi doi ga chuguhese bronce iji udire ga chiraja ikı́lorique batigárique, uje jiépisi bronce iji gu.

¹⁷ Enga ome cutádedatéisi uje gare udire, umaningai chise 8 métros, chojmara; jé basa ga ujuyaqué gatei uté uje déji cutádedaté eruei iji gatajidi pipesute iji guebeque uei uje i tu bronce to, ga umaningai chise métro chojmarai, mu nónapo médio métro rı̃. Ga ore adı́jadie ojnaquéroi uje ore chirója ujuyaquei uté, jé aja oradie cucha a gajnui iji dosadode to uje ore i tu granáda, bronce uéguei udire to, ga ore jochade udore chaparu ujuyaquei gai jnese iji cutade eruéode iji gaté yui, enga ueradei nanique. Enga cutádedaté gáredie udire jé cunguésõripı́si uñane ome dáringanie ueradei, ga ore garode jé chopise uñane to jnese. Mu babilóniagosode jé ore isocai chojmara ome cucha iménuone udore jnese uje pipesute iji bronce; ga ore chujé ore iji jnumone, ga ore jno cuchade udore pépitade údi aja daniri.

Jé chuságaja diri uté uje Pangarádejnai Dupade irógode sacerdote, jé aja pangaránone uñane iji Jerusalén, ore chise dáringane chuque iji babilóniagosode ore eduguéjna cuchábi jmainie nanique

¹⁸ Enga que gusu babilóniagosode ore eduguéjna cuchábi iroguipı́si Nebuzaradán isocade udore, mu uté jé chuságaja Pangarádejnai irógode sacerdote udore uje isaque ore. Ga sacerdóteode udore ore eduguéjnapı́si u uñai uje uté i tu Seraı́as; ga uté quigaminóri eduguéjna u uñai uje uté i tu Sofonı́as. Ga Nebuzaradán uté chisapo Pangarádejnai iroque ibijógode uñane to, uje gadioque ore nanique, ga ore gajnepı́di tu ujetiga ore chirodipise Pangarádejnai iguı́jnai nanique.

¹⁹ Ga babilóniagosode ore chisapo pangaránone uñane rı̃ uje qué ore déji dedai Jerusalén uté ajei nanique. Ga soldádode eduguéjnapı́si u ore isagode uñai; jé basa ga ore chátapo jnani 5 ore aja uté to rı̃ uje ore déji judágosode eduguéjna cuchábi jorámeone udore ujade, enga ore cho uté quique to ome cuchade nanique. Ga babilóniagosode ore chisapo eduguéjna uñai uté rı̃ uje uté gajnepı́di u nanique ujetiga chucué soldate ichárigo, ga churúsãre ore ı́ode jeta ore chacája eduguéjna irógode udore to nanique. Ga babilóniagosode ore chisapo jnani ibijógode uñane to rı̃ uje piyaque ore iji Jerusalén uté to nanique, ga ore batigai chise 60.

^20-21 Enga jé u nanique uje babilóniagosode eduguéjna cuchábi iroguipı́si Nebuzaradán uté jno dasáiso jnani udore údi aja babilóniagosode ore eduguéjna cuchábi Nabucodonosor uté, uje uté qué déji ore idai Ribla uté iji hamátgosode ore achamini uté. Ga Nebuzaradán chicha dasagode udore aja deduguéjnai Nabucodonosor iquei, enga jé u nanique uje babilóniagosode ore eduguéjnai uté chiroque darógode aja jnanione udore úringáringo chuque jnese iji pidai Ribla uté. Enga judágosode jé ore isocai uté uje ore chise dáringane ducañerájma iji punire unejai uté, ga que ore dépoji danirı́pisi rı̃.

Nabucodonosor uté ichajapite Gedalías uté aja úringai gobernador iji judágosode uniri uté, ujetiga chajire iñomone yúode iji uté nanique

²² Mu ome babilóniagosode ore iñomone jmatáguipı́so udore uje Nabucodonosor juéga ujetiga ore chácariji daniri Judá uté, ga babilóniagosode ore eduguéjnai Nabucodonosor pésu ore eduguéjna ichárique nanique uje i tu Gedalías. Enga Gedalías uté gajnepı́di tu jeta chajire darasade ore yúode iji ore uniri Judá uté ome dáringai gobernador uté. Ga Gedalías uté dayé i tu Ahicam nanique, ga dáquide i tu Safán.

²³ Judágosode ore isoldádode eduguéjnane uñane qué ore déji daniri Judá uté nanique, jé aja ore irógode soldácho, uje a ore chayome babilóniagosode ore eduguéjnai jocaningai to ica, ga ore chisite rágaja quedéjnane. Ga soldádode ore eduguéjnane ore ı́ode u udojo: Ismael u uñai uje uté dayé u Netanı́as; Johanán u uñai to uje uté dayé i tu Caréah; Seraı́as upo uñai rı̃ uje netófagose uté dayé nanique ga dayé uté i tu Tanhumet; Jaazanı́as upo uñai rı̃ ga maacágosode uñai ape uté nanique. Uje soldádode eduguéjnane udore, jé aja ore irógode soldácho udore jnese, chudute Gedalías ujnomei uje e babilóniagosode eduguéjna cuchábi pésu uté úringai gobernador uté, enga ore basája Gedalías uté iquei jnese iji charidi uté iji ore idai Mízpa nanique, enga ore chingongara raja uté.

²⁴ Uje ore chise Gedalías uté, ga Gedalías chisı́ome daru iyiejnane ome soldádode eduguéjnane udore, jé aja ore irógode soldácho ore jnese, jeta jé ca ore todórasa cucha dacatique iji ore iquéode. Ga chósi tome ore: –Jé ca atodóyo babilóniagosode eduguéjnai iroguipı́sode ore. Ácayoji yocuniri udé, ga beyoi babilóniagosode ore eduguéjnai áyipiedie quigode jnese jne, enga a jé ca cuchárique chósi tiji uaque jne.– Enga jé u uje Ismael, jorane ore jnoji Gedalı́as uté gari nanique.

²⁵ Mu Ismael que chimesẽre gobernador Gedalı́as áyipiedie gotique uje cho ore quique, ga chise ore isecaranone guedosi 7 iji siqueré uaté nanique, ga Ismael, jé aja jorane uñane uje ore chejna yijmanáyone, ore nóna uñane aja ore idai Mízpa yui nanique. Ga ore chise Mízpa uté enga jé u uje ore cugujnáji gobernador Gedalı́as uté enga ore chujépise uté. Enga ore chátaja Gedalías uté jorane eduguéjna nanique ga ore patı̃́ora uté nanique, uje babilóniagose udore uñane, jé basa ga judı́ode u uñane. Ga eduguéjna cuchábio Ismael uté dáqui gatéode ore to nanique, ga uté dayé i tu Netanı́as, ga dáquide i tu Elisáma.

²⁶ Uje judágosode ore chudute Ismael uté ujnomei uje chujé ore eduguéjna casé uje babilóniagosode ore eduguéjna cuchábi ichajapite aja charidi, enga ore dosóñipı́some babilóniagosode ore yui nanique. Ga jé u uje ore chayóji daniri údode jnese, ga ore quı́tequigája egı́ptogosode ore uniri uté. Judágose ponáyone jnese chejna raja doi, ujetiga ayoré atade u, jeoga ayoré jmatágode u, mu jé ore isocai chojmara nanique. Enga ore jorane u soldádode ore eduguéjnane udore aja dajesui nanique.

E chise diri nanique uje babilóniagosode ore eduguéjna ejoi chosõre judágosode ore eduguéjna bajai Joaquín uté nanique, ga chijnime uté iji pujurúgayode ore jogadi uté

²⁷ Uje judágosode ore eduguéjna bajai Joaquín guejnanie siquerei e chise 37 años nanique iji babilóniagosode ore uniri ajei nanique ome dáringai pisaque, ga babilóniagosode ore eduguéjna uñai cuse uje uté i tu Evil-merodac. Iji siqueré bajé uje Evil-merodac uté basája dáringai eduguéjna nanique ga uté chijnime ore jurúgai judágosode ore eduguéjna nanique uje i tu Joaquín iji ore jurúgaipidi ajei nanique. Ga cucha dacadode udore tocade uje ore isecaranone guedosı́o 12 nanique iji siqueré uaté, ga ore isecaranone dire 27 nanique iji guedosi erueminóri uté nanique.

²⁸ Ga babilóniagosode ore eduguéjnai Evil-merodac uté que chuseque Joaquín nanique, ga uerate uruode ome, enga chosi Joaquín uté iji gaté iji dojode eduguéjna pisacho ore ujade jnese, uje purása quedéjnane ore eduguéjna uñane déji Joaquín uté gari to ome dáringane pisacho iji Babilónia uté.

²⁹ Uje Joaquín uté e doi guesi iji ore jurúgaipidi ajei ga chejñu dáringai pujurúgai pijogútodie daguidei iji re nanique, ga chacája piguidé uñanie nanique. Ga jecucha ga chacásãra babilóniagosode ore eduguéjnai nanique iji dirode jnese jé aja dagachodi nanique.

³⁰ Enga que gusu uje Joaquín uté chacásãra babilóniagosode ore eduguéjnai gatuaque, mu ore eduguéjnai uté jecucha chosõre Joaquín uté to nanique iji dire chojmara, chojmarane ore jnese, jeta jé ca cuchárique chona uté. Enga icaniratiguéode udore jé chuságaja Joaquín uté cachodi.