2 Reyes 23 - Dupade Uruode

Judágosode ore eduguéjnai Josı́as uté naráraja Pangarádejnai uru iyiejnane gai iji darasade ore iquei, ga ore jnese chajo raja Pangarádejnai uruode udore úringane pigaicho nanique

¹ Eduguéjnai Josı́as uté quene cha chudute dajnéone Pangarádejnai uru quicho nanique uje utocaidı́so ore chajnerame ome uté. Enga jé u uje Josı́as tibidi pangarate ibijógode iji daniri Judá údode jnese, jé iji dedai Jerusalén údode to rı̃, ujetiga ore tibágui uté.

² Enga que gusu pangaránone ore, mu Josı́as chapuse darása ponáyone ore aja jnese ujetiga ore tibágui pijnane iji daniri uté Judá údode jnese rı̃. Jecute judágosode ore tṍraji dajñarenie ome uté, jé aja idaité ore jnese iji Jerusalén. Enga ayoré jmatágode déji, jé aja atade ore, jé aja sacerdóteode, jé aja profétade ore. Enga Josı́as pijnángaidóde udore jnese nóna deduguéjnai aja Pangarádejnai iguı́jnai uté yui. Enga jé u uje Josı́as doi darujna aode udore uje piyacho dirı́ca iji Pangarádejnai iguı́jnai ajei. Enga naráraja Pangarádejnai uru iyiejnane udore gai jnese iji dangarásorone judágose udore iquei.

³ Uje Josı́as e cha naráraja darujna aoı́so gai nanique, enga jé u uje cháguena Pangarádejnai iguı́jnai cutádedaté ejoi. Enga chisı́ome daru iyiejnane ome Pangarádejnai uté to. Ga chojninga: –Pangarádejná, a jé ca yimoque jne jeta yajna bojningane cucha iji jnumone gatuaque, enga a ca yuchı́e siñéngome baroqué gajnéone cucha, jé aja bapijogúsorone barúo, jé aja bajnéone estatutos ore jnese. A yejna yáyipie, yúringai ayoré ore jnese aja udore úringane pigaicho jne ome ua. Yigaidi tu gu ujetiga jé ca yimoque baru iyiejnane udore uñeque úringárique pipesute jne uje purusãrachóji darujna aode udojo.– Ga jé u uje eduguéjnai urasade ore chudute uruode udore ga ore chojningame deduguéjnai: –A jé uyoque u to jnese ujetiga yajógo yógaja Pangarádejnai uru iyiejnane úringane pigaicho to jne.–

Eduguéjna cuchábi Josı́as uté chajnangarase dupa quedéjnane gajnéone cucha jnese aja dejode nanique iji daniri Judá uté

⁴ Uje Josı́as chudute darasade uruode udore nanique, ga jé u uje chiroque datocaidode aja Pangarádejnai iguı́jnai ajei, ujetiga ore chijnime dupa quedéjnane gajnéone cucha jnese iji ajei. Enga Josı́as utocaidode u sacerdóteode ore eduguéjnai uje i tu Hilquı́as, jé aja Hilquı́as uté quigaminórone sacerdote, jé aja Pangarádejnai iguı́jnai piagode irodisórone ore. Ga ayoré gajnui Baal gajnéone cucha déji ajei, jé aja ore angurené dupa quedéjna Asera uaté gajnéone cucha udore. Mu que gusu udore, mu guédodie gajnéone cucha dépoji rı̃ uje judágosode ore chicha danguretigai aja guédodie udire jnese iji gaté to nanique. Ga Josı́as utocaidode udore chimáta cuchade udore aja ñane jnese enga ore chijnája Jerusalén guesi iji garáijnane uje chujé raja tuijnai uté uje i tu Cedrón. Quigade enga ore eduguéjnai Josı́as chãru dupa quedéjnane ore gai tiji jogadi uté, ga pioi chejnápise nanique. Ga gusu puchucurúode tiji jnumi nanique, mu ore jno puchucurúode udore údi aja ore idai Betel ga ore tṍraja uté.

⁵ Enga que gusu Josı́as isocade udore, mu jé socárome sacerdote tágode udore to iji daniri Judá uté. Uje judágosode ore eduguéjna bajade uñane e ichajapite sacerdóteode udore aja dáringane sacerdote bisideque, ujetiga ore chãru cucha ai unérone inciénso ome dangurenone dupa quedéjna iji jogadébeode udore iji cucarãte orónenie ójodie udire. Enga jogate umarone udore déji judágosode ore idáyode nanique, jé aja jogadode udore iji Jerusalén dosadode to. Ga Josı́as uté chapuse sacerdote tágode udore aja jnese uje ore chãru cucha ai unérone ome Baal uté, jé aja guedé, guedoside, guédo querudie uje udire ı́ode u planéta, jé aja guédodie uñanie jnese to rı̃. Enga Josı́as chãraque ore úringane sacerdote ome ore, jeta jé ca ore chajnerame dajmapié noñánguenie údi.

⁶ Ga eduguéjnai Josı́as chijnimápo dupa quedéjna Asera uaté oré iji Pangarádejnai iguı́jnai ajei nanique rı̃, uje pipesudé iji pore pajénique. Ga chorei uaté oré iji Jerusalén guesi aja tuijnai uté uje i tu Cedrón. Ga ore chãru Asera uaté oré gai iji tuijnai Cedrón to nanique rı̃. Mu Josı́as chigotape to uje chijáro, chijáro, jé aja ujetiga gusu urui tiji jnumi nanique. Ga ore jnopo uaté urui údi rı̃ aja ayoré gajnaréngone ódedie jogadi ga ore chisite urui aja ore ódedie gai nanique.

⁷ Ga jnanione pésusu daguı́jnamone iji Pangarádejnai iguı́jnai ajei nanique ujetiga ore doi punganinga quedéjnane iji udore ajéode ome dojode jnanío ore, uje chiese ore gajnepı́di tu ome ore angurenone dupa quedéjna gu. Enga chequedı́e uñáringui chiro Asera gajnéone cárpa gatuaque iji guiguı́jnamone sudore ajéode to. Mu Josı́as doi udore ore iguı́jnamone sudore nanique ga chajnangarásaja dejode to nanique.

⁸ Udojo quigade nanique ga Josı́as doi sacerdóteode iji judágosode ore idáyode jnese ga chorei ore iji Jerusalén nanique. Enga ore bai tu uje ore chãru cucha ai unérone inciénso iji jogate umarone iji judágosode ore idáyode jnese nanique, uje puyaque mu. Uje sacerdótepise ore mu ore chãru cucha ai unérone iji ore aseradéjnane jogate umáño, jé iji ore idai Géba uté, enga ore chuságaja ore idai Beerséba uté, jé aja pidáyode udore ujaminórone pidáyo jnese. Que gusu uje Josı́as chorei sacerdóteode udore jnese iji Jerusalén nanique, mu pésu ore aseradéjnane udore jnese úringane iyonguerã́cho, uje ore chãru dẽrapáidode inciénso iji udore gáyode ica. Josı́as gaidi tu gu ujetiga ca pẽrapáidapo cuchárique iji ore gáyode rı̃. Udojo quigade nanique enga eduguéjnai Josı́as chicáji ore ujuyaquei jorı́dedie uña iji ore idai Jerusalén gai, uje urasade ore pı́pidebei aja ore idai uté ajei. Ga jé u uje Josı́as doi ore angurenone dupa noñatígo aseradéjna umarone udore ga chajnangarásapo ore aja dejode rı̃. Enga ore angurete noñángone udore aseradéjnane déji ore idai ajirisṍri uté ipesudé joride ejode, uje uté i tu Josué. Enga Josué ipesudé joride uaté déji arasé qui tiji jorı́dedie uña uaqué uje urasade ore pı́pidebei aja ore idai ajei.

⁹ Mu ome sacerdóteode udore uje Josı́as chorei ore iji Jerusalén, a jé ca pujuegádapome ore rı̃ ujetiga ore chimere riji dojode Pangarádejnai irócho sacerdote ome ore isagode cucha uje ore tẽrája Pangarádejnai uté iji gajnei gaserãte iji iguı́jna cuchábi uté. Jé ũré uje sacerdote ore, mu gajnareque uje ore tagúome dáringane sacerdote iji orónenie ójodie ica gu. Mu Josı́as juéga ome sacerdóteode udore ujetiga ore chagutı́ñame Pangarádejnai gajnéone arureque puyácho to uje ı́jnoque bisidi iji. Enga jé u uje ore cho dojode Pangarádejnai irógode sacerdote uñane jnese iji Jerusalén to uje ore ipérogai pan puyade udore jnese.

¹⁰ Enga Josı́as isocai upo nanique rı̃ uje pésu ore aseradéjna uñai úringai noñánguipı́se uje i tu Tofet, ujetiga jé ca pigaidápo rı̃ ome úringárique gaserãte. Uje judágosode ore abode gajneque ujetiga ore chiborome dangureni dupa quedéjna Moloc uté. Mu Josı́as pésu ujetiga jé ca uñeque chãrúpo dape diyoquı́rique jeoga ape diyequéraque iji dupa quedéjnai Moloc uté gajnei gaserãte gai jne rı̃. Enga ore aseradéjnai uté déji tuijnai ajei nanique uje i tu Ben-hinom.

¹¹ Judágosode ore eduguéjna cásodicáite uñane chicha dangureni guedé gajnéone burica iji Pangarádejnai iguı́jnai joride ejoi nanique. Enga eduguéjnai iróquegatéi cuse iji uté, uje i tu Natán-melec, enga buricade charidi uté idógosi uté iguı́jnai. Enga eduguéjnai iróquegatéi uté gajnepı́di u ujetiga chajire cuchade yúode iji dajogadi uté nanique. Ga eduguéjna cásodicáite ore cho puyáguiji guebéquedatéode to nanique rı̃, uje ore angureni guedé gajneque udore nanique. Mu Josı́as doi nanique ga chicha ore angureni guedé gajnéone burica aja sañeque nanique. Enga dopoi ore angureni guedé gajnéone guebéquedatéo nanique rı̃ ga jno údi ga chãru ore gai to nanique rı̃.

¹² Ga judágosode ore eduguéjna cásodicáite ore chiro dangurenone dupa quedéjna gajnéone gaserãte to nanique, ga ore chicha udore uñane aja daguı́jna cuchábi ójo. Uje eduguéjna casicaite Acaz pésu ajé uñai iji gaté yui nanique, ga ore chicha dorade gaserãcho aja ajé uñai uté ójo. Ga ore eduguéjna uñai uje i tu Manasés uté angurenone gajnéone gaserãcho déji to nanique uje uté pésu iji guesáringa gárode udore iji Pangarádejnai iguı́jnai dosadode. Mu eduguéjnai Josı́as uté chijnime ore aseradéjnane udore nanique iji jogadi uté ga chinoningase ore to nanique rı̃. Uje chı̃ropise ore, ga jno ore angurenone atuátigade urui údi ga tṍraja tuijnai nanique uje i tu Cedrón.

¹³ Uje israélgosode ore eduguéjna casicaite Salomón qué eca nanique ga chicha danguretigai aja purása quedéjnane ore angurenone ayoré gajnúo, ga chiro udore gajnéone gaserãte iji cucarãte orónenie ójodie nanique. Enga Salomón pésu gaserãte uñai ome sidóniogosode ore angurené noñánguepı́si uaté uje i tu Astarté; jé basa ga pésu gaserãte uñai ome ayoré gajnui Quémos uté, uje moábgosode ore angurete noñai tu; enga pésapo amóngosode ore angurete noñánguipı́si gajnei gaserãte to rı̃ uje i tu Milcom. Ga Salomón ipesudode gaserãte jogadi déji Jerusalén uécha uñai iji guedé garani yui nanique, iji cucarani ójo uécha uñai iji umusoi garani yui uje cucarani uté i tu Olı́vos. Mu Josı́as doi ga pésupúsu gaseranone udore úringane iyonguerã́cho nanique, ujetiga jé ca uñeque tẽrapome danguretique dupa uñeque iji rı̃.

¹⁴ Enga Josı́as uté dopoi ore angurenone udore gajnéone cucarãte uejaque pipotingarãcho uje urasade cho puyáguiji nanique, ga chujé ore iji jnumone, ga urúji jnumone. Enga dopoi ore angurené Asera oredie rı̃ uje pipesudei udire ome pore pajéode, enga chaquesu aja jnumone, ¡jora, jora! ga a pépitabio nanique. Quigade enga Josı́as dopoi ayoré togode ore ajnoquéode rı̃ ga tṍraja danoningañane jogadode gáyode iji uté. Enga chı̃retapise jogadi uté ome ayoré togode ore ajnoquéode udore nanique. Ga Josı́as isocai jé u uté uje pésu jogadi uté úringai isójna nanique.

Judágosode ore eduguéjnai Josı́as jocaningai ome dupa quedéjnane jé chuságaja puniri Israel uté idáyode uñane to nanique

¹⁵ Que gusu uje Josı́as pésu dajocaningai ome pangurenone dupa quedéjna iji daniri Judá uté, mu socárome ore to iji israélgosode ore uniri nanique. Ga chise ore idai Betel nanique ga chajnangarase ore aseradéjnai aja dejode. Enga chajnangarásapo israélgosode ore eduguéjna casicaite Jeroboam oraque umarejna rı̃, uje uté chiro ome dangurenone dupa udore jeta chisi ore gai iji uté. Enga jnani bajai Nabat ujnacari Jeroboam uté u uje chiroque darasade israélgose aja pisijnaringuéone úringane pipesucho nanique. Enga que gusu uje Josı́as chajnangarase ore aseradéjnai uté iji ore idai Betel, jé aja Jeroboam oraque umarejna uté, mu chãru udore gáyode to nanique, ga chejnápise ore, ga gusu puchucurúode uje déji jnumi iji quigade nanique. Ga chãrúpo ore angurené oré gai uje pipesudé iji pore pajénique to nanique rı̃ uje ore angurené uaté i tu Asera.

¹⁶ Ga Josı́as chaparu dabai iji dayaridi nanique ga chajire cucarãte oroné gai mu chimo uje ore ódedie déji. Ga chiroque datocaitı́go aja ore ódedie, ujetiga ore chijnime ore ajnoquéode iji ore ódedie nanique. Josı́as chojninga: –Beyoi ore ajnoquéode ga ajnicho iji ore ódedie jne ga ajnáño aja Jeroboam gaserani casica jogadi gai.– Ga Josı́as chãru ore ajnoquéode gai iji Jeroboam casicaite orai gaserãte gai, uje gaidi tu ujetiga pésu jogadi uté úringai iyonguerãque nanique. Ga cucha dacate tocachugode udore jnese péropı́siji Pangarádejnai uru cásodicáite uje Dupade iro casicaite proféta uté e chatata nanique iji cucha dacadode udore iquei.

¹⁷ Ga Josı́as chajirápo dejórique nanique rı̃, enga chimópo ducóderaque rı̃ uje cucarãte uejátique déji ducode uaté gai. Enga Josı́as catecã́ri idaité ore ga chojninga: –¿Ama gosi u óderãi nanique a?– Mu idaité ore chajnai Josı́as uruode nanique ga ore chojninga: –Dupade iro casicaite proféta ode uaté nanique uje tṍraji puniri Judá uté. Ga uté júdode u basocade udore nanique uje papose pajnoquéode iji gaserani udé gai jne. Ga quene tocade uté júdi cásodicáite ome basocade udojo ome gaserani udé iji yoquidai Betel udé.–

¹⁸ Enga Josı́as chojningame udore ore nanique: –¡Ajı́oñome uté ode jne! Enga jé ca ajuécho ujetiga uñeque chijocase uté ajnoquéode jne.– Jecute que ore chijocase proféta uquécasicáite ajnoquéode, jé aja uje que pijocayaque proféta choquı́jnami suté ajnoquéode iji ode uaté ajei to uje uté tṍraji israélgosode ore achamini Samária nanique.

¹⁹ Que gusu iji ore idai Betel uqué uje Josı́as pésu dajocaningai ome dupa quedéjnane adode nanique, mu uté chijnime dupa quedéjnane gajnéone guiguı́jna iji ore idáyode jnese uje déji pachamini Samária uté údode to nanique. Uje israélgosode ore eduguéjna cásodicáite uñane ore chiro guiguı́jnane udore iji cucarãte orónenie ójodie nanique iji daniri uté, enga ore isocai uté ijnimique Pangarádejnai ájningamı́e ome raque nanique. Jecute Josı́as jmapié ome ore angurenone dupa quedéjna gajnéone cucha jé cunguésõripı́si uté isocai ome pangurenone gajnéone cucha udore iji ore idai Betel uté.

²⁰ Ga Josı́as doi sacerdote tágode jnese uje ore gajneque dupa quedéjnane iguı́jnane ujeta ore chajire yúode, enga chujé ore iji ore angurenone dupa gajnéone gaseradéjna gáyode. Udojo quigade ga Josı́as doi ayoré togode ore ajnoquéode ga chãru ore ajnoquéode gáyode iji gaseradéjnane udore gáyode gaté rı̃. Gaidi tu gu ujetiga pésupúsu gaseradéjnane udore úringane iyonguerã́cho. Enga jé u uje Josı́as chejnápise cucha dacadode aja guesi nanique iji pidáyode udore, ga quene chajni aja dedai Jerusalén nanique.

Judágosode ore eduguéjnai Josı́as chiroque darasade aja ore jnusinamáni dire Páscua isocade nanique

²¹ Cucha dacadode udojo quigade nanique ga judágosode ore eduguéjnai Josı́as chiroque darasade jnese aja ujetiga ore pésu dire puyai uté adode uje i tu Páscua. Enga Josı́as chósi tome ore: –Beyópisi pujnusinamáni dire Páscua uté adode jnese ome Pangarádejnai, uacangureni Dupa uté, jeta pisi uté gai iji dire puyai uté. Enga uacasocade udore a jé chopı́sirase Pangarádejnai uru iyiejnane uje purusãrachóji yoquiyade darujna ao udojo.–

²² Enga jé u uje Josı́as urasade ore dopı́si dajnusinamáni dire adode jnese uje i tu Páscua. E iyajmanguipise iji yui uje israélgosode, judágosode ore jmapié ome Páscua uté chise Pangarádejnai ajegaitı́guiji dire puyai uté isocai. Nanique uje cáma israélgosode, judágosode ore eduguéjnane rey cuse, ga ore dopı́si dajnusinamáni dire isocai uté ome Pangarádejnai, uje juéceode udore déji dajnepı́dode ome dáringane padode ajirisóño iji israélgosode ore uniri uté. Jé basa ga uje e israélgosode, judágosode eduguéjnane rey cuse, jé iji taningai jé aja uje Josías déji dáringai eduguéjna, mu jé que eduguéjnane udore uñeque isocai ome Páscua cho Josı́as isocai uté uje cáputapı́siji Pangarádejnai uru iyiejnane udore quigode jnese ome Páscua.

²³ Mu gusu uje Josı́as uté guejnanie siquerei e chise 18 años nanique ome dáringai eduguéjna, enga quene arécapo ore isocai ome dajnusinamáni dire Páscua uté rı̃ ome Pangarádejnai uté úringai pisı́gai nanique iji Jerusalén uté.

Judágosode ore eduguéjnai Josı́as chejna daguesi ome Pangarádejnai uté uru iyiejnane úringane pigaicho jnese nanique

²⁴ Enga eduguéjnai Josı́as jnopo dajocaningai údi ome cucha gajnaréngone iji daniri uté, uje gaidi u gu ujetiga pésupúsu Pangarádejnai uru iyiejnane udore aja quigode jnese uje purusãrachóji darujna aode udore uje sacerdote Hilquı́as chise iji Pangarádejnai iguı́jna cuchábi ajei. Jecute Josı́as uté doi daijna quedéjnane udore uje ore tibidi togode nanique, jé aja pujopié gajnarénguenie etingarasórone uñane nanique rı̃ uje ore chatata cucha tocachugode iji piquéode, ga chijócãre ore jnese. Ga jé qué jno Josı́as isocade, uje dopoi ayoré gajnúone oredie to rı̃ iji darasade iguı́jnane ajéode jnese, jé aja ayoré gajnúone oredie iji pijogadode uñane, enga chinoningase ore. Enga Josı́as uté jé isoca ome ayoré gajnúone gajnéone cucha noñácho jnese uje pijoque ore iji dajogadode udore, uje Josı́as chinoningase ore nanique. Ga jé u nanique uje e icha ore idai Jerusalén, jé aja ore uniri Judá údode jnese ome ayoré gajnúone gajnéone cucha jnese nanique.

²⁵ Que Josı́as gajnúrique eduguéjna cuse nanique jeta cho uté ome úringai ujñapetaque nanique, jé iji iquei, jé aja quigade rı̃. Uje Josı́as chajo raja Pangarádejnai úringai pajnaque iji jnumone, ga chisı́ome re ome uté jnese jeta gajneque áyipie, etotiguei, jé aja úringai ayoré jnese nanique, enga jé u uje adode cáputaji Moisés urusarane Pangarádejnai uru quicho jnese.

²⁶ Uje uerate Josı́as isocade, mu que pajnique Pangarádejnai uté úringai tagu dejo, jecute úringai júruru uté jé jogate ome judágosode nanique. Enga gose ore eduguéjna casicaite Manasés uté ate gajnarénguipı́sode udore uje ijnimique Pangarádejnai ájningamı́e nanique.

²⁷ Ga cucha dacadode udojo jé chiborátaja uje Pangarádejnai chojninga: –A yijócãre judágosode ore iji yedominone to jne, ga ore gajnui a jé u israélgosode ore uje yijócãre ore iji yedominone nanique. Ga a jé yuságaja Jerusalén jne, yedójnari pidai udé, jé aja Yiguı́jna cuchábi to, uje a yṍra ore aja toniñeque jnese jne. Yojninga nanique: "A yo yiyaridı́ji udé jne ome yi úringárique pisı́gai." Mu a jé yijı́ome ore iji te jmete jne.–

Judágosode ore eduguéjnai Josı́as chise dagachodi nanique, ga urasade ore cho deduguéjnai iji ujnacari Joacaz iji quigade

²⁸ Enga cucha dacate amirone jnese iji Josı́as uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre judágosode ore eduguéjnane adode iji udore nanique.

²⁹ Mu iji deréjnane udore uje Josı́as uté qué déji dáringai judágosode ore eduguéjna nanique, egı́ptogosode ore eduguéjnai chicáji tié edógai yui uje i tu Éufrates, ujetiga tuangóa ası́riagosode ore eduguéjnai iji daqui uté. Enga egı́ptogosode ore eduguéjnai uté i tu Faraón Necao. Mu Josı́as chetaque ujetiga egı́ptogosode eduguéjnai chise daqui uté, jecute nóna dasoldádode ujetiga chãraque yui ome. Enga Josı́as chise uté iji ore idai Meguı́do, mu uje egı́ptogosode ore eduguéjnai Faraón Necao uté chimo Josı́as, enga jé u uje chujé uté nanique.

³⁰ Ga Josı́as iróquegatéode ore doi deduguéjna toi uté nanique iji Meguı́do uté, ga ore nája guebéquedatéi ajei ga ore jno údi aja idai Jerusalén. Ga jé u uje ore na uté aja gajné cucarã́tedó nanique ga ore suruápo gai rı̃. Iji Josı́as quigade nanique, ga judágosode ore doi ujnacari uje i tu Joacaz, enga ore chanire peduguéjnane ore pijogúsõri aseque aja Josı́as ujnacari uté ójo, enga jé u uje judágosode ore cho deduguéjnai iji Joacaz uté nanique.

Josı́as ujnacari Joacaz uté basája dayé charidi iji quigade, mu Joacaz uté iradigode u dáqui cásodicáite aja ore ate gajnaréngone nanique

³¹ Enga Josı́as ujnacari Joacaz uté guejnanie siquerei chise 23 años nanique uje quene basája dáringai eduguéjna nanique, mu garósi deréjnane ome úringai eduguéjna. Guedosı́ode gadioque ome úringai eduguéjna nanique iji dedai Jerusalén uté. Enga Joacaz daté i tu Hamutal nanique, ga uaté dayé i tu Jeremı́as nanique, uje idai tu Libna uté.

³² Enga gajnarécho Joacaz ipesudode cucha nanique iji Pangarádejnai edominone gatuaque, uje uté chajnapise dáqui cásodicáite jmapié gajnarénguenie iji jnumone.

Egı́ptogosode ore eduguéjnai Faraón Necao ichajapite Josı́as ujnacarode uñai aja dai casica charidi ome úringai judágosode ore eduguéjna nanique

^33-34 Uje judágosode ore pésu Joacaz uté úringai eduguéjna iji dai casica quigade nanique, mu egı́ptogosode ore eduguéjnai Faraón uje i tu Necao chãraque ujetiga Joacaz chácariji dáringai eduguéjna iji Jerusalén uté. Enga jé u uje Necao uté chisa Joacaz uté nanique ga jno údi aja pidánique uje i tu Ribla ga suru gai iji uté nanique. Enga ore idai Ribla déji hamátgosode ore achamini nanique. Udojo quigade nanique enga egı́ptogosode ore eduguéjnai Faraón Necao uté pésu judágosode ore eduguéjna ichárique iji Josı́as ujnacarode uñai nanique, ga chicha ujnacari Eliaquim aja dai casica charidi. Mu chécãre Eliaquim uté i, ga chı̃́care Joacim aja nanique. Mu ome Joacim desai Joacaz uté, enga egı́ptogosode ore eduguéjnai jno uté údi aja Egı́pto nanique, ga Joacaz toji punire unejai Egı́pto uté nanique. Enga que gusu egı́ptogosode eduguéjnai Necao isocade udore, mu uté chiroque judágosode aja nanique ujetiga ore cho doré ome uté to. Enga Necao uté chutai plátapı́sedie jiei uje batigai chise 3.300 ikı́lode. Ga a jé ca gusu plátadie nanique, mu chutai órodie to uje batigai chise 33 ikı́lode nanique, ujetiga judágosode ore cho doré ome egı́ptogosode ore eduguéjnai uté.

³⁵ Jecute judágosode ore eduguéjnai ejoi uje i tu Joacim pésu impuéstos ome darasade ore nanique ujetiga chisı́ome egı́ptogosode ore eduguéjnai ajegaidi casica pláta batigai ikı́lo ome uté. Ga jé u uje judágosode ore cho doré jnese iji ore idáyode jnese iji Judá údode. Enga ore imánenie chayúji ñane yúode, uje ayoré chojmarárique imánenie jé chirate dajóningane. Ujetiga ajóningarã́que gosi, ga imánenie orocoi jeta cho doré; jé basa ga jmataque gosi, enga garósi jetiga cho doré. Enga ore chasingarápisaja egı́ptogosode eduguéjnai ajegaipı́di casica kı́lo batigai iji órodie, plátadie ore jeta jé upúsu uté, ga quene Joacim chirógaja egı́ptogosode ore eduguéjnai Faraón Necao uté nanique.

³⁶ Enga Joacim guejnanie siquerei chise 25 años nanique uje quene basája dáringai eduguéjna. Ga chácariji dáringai eduguéjna 11 años iji dedai Jerusalén uté. Ga Joacim uté daté i tu Zebuda, ga uaté dayé i tu Pedaı́as, uje garani tu ore idai Ruma nanique.

³⁷ Mu Joacim uté adode gajnarécho iji Pangarádejnai edominone nanique. Ga uté chajna dáquiode ore quicujaidie ome dagaidode pisijnaringuéo jnese nanique.