2 Reyes 2 - Dupade Uruode

Pangarádejnai chijna Elı́as aja gaté iji úringai pórecajna nanique

¹ Enga e chirõre guedé batigárique iji Pangarádejnai ojningai deréjnai uté ujetiga chorei Elı́as iji gatajnoquei ome úyujnadatéraque uje chijnire jnumi aja dajesui. Mu iji deréjnai uté uje cáma cucha dacadode udore tocade enga Elı́as, Eliséo ore déji dáringane urugu iji ñane gari, uje ore tṍraji ore idai Gilgal uté.

² Ga Elı́as catecã́ri dajõrai Eliséo ga chojningame: –Ácarabı́ji de, ga gusu yu jne aja yajesui, uje Pangarádejnai e chutṍri yu jeta yicáji pidai Betel uté gu.– Mu Eliséo chetaque jeta ore cho jmı́ti, jmı́ti ome ñane, jecute chojninga: –Pangarádejna Uecai uté chiraja yuru iyiejnane udojo úringane ũréo uje a jé ca yiya yijı́na ua aja quedéjnane jé iji báringai ueca uté.– Ga jé u uje ore jnome daqui Betel uté yui.

³ Enga puague uña cuse iji Betel idaisórone udore ore ujade uje proféta udore. Ga proféta udore uñane chachai Eliséo uté iji garani, enga ore catecã́ri iji quedéjnai enga ore chojningame: –¿Ama e araja to a? Uje Pangarádejnai a chijna bangaráni tuté iji bari jne jé iji deréjnai tudé gajiné.– Enga Eliséo chajnai ore uruode ga chojninga: –Yiraja arı̃a. Mu jé ca ẽ́cachopo rı̃.–

⁴ Ga udojo quigade ga Elı́as catecãrápoi dajõrai Eliséo gaté rı̃ ga chojningame: –Eliséo, ácarabı́ji de, ga gusu yu jne aja yajesui, uje Pangarádejnai e chiroque yu aja pidai uñai uje i tu Jericó gu.– Mu Eliséo jé chajo raja ujetiga nóna aja quigode, ga chósi tome Elı́as uté: –Pangarádejna Uecai uté chiraja yuru iyiejnane udojo úringane ũréo, uje a jé ca yiya yijı́na ua aja quedéjnane jé iji báringai ueca uté.– Ga jé u uje ore jno ga ore nóna ñane aja daqui Jericó yui.

⁵ Mu jé isoca uje profétade uñane iji ore qui pidai Jericó uté tibágui Eliséo uté iji garani. Ga ore catecã́ri uté ga ore chojninga: –¿Ama e araja to a? Uje Pangarádejnai a chijna bangaráni tuté iji bari jne jé iji deréjnai tudé gajiné.– Mu Eliséo jé ate nanique uje chojninga: –Yiraja arı̃a, mu jé ca ẽ́cachopo rı̃.–

⁶ Ga jé isoca uje Elı́as chojningame Eliséo uté rı̃: –Bebi, ga jé ácarabı́ji de, ga gusu yu jne aja yajesui, uje Pangarádejnai e chutṍri yu jeta yicáji tié Jordán uaté jne.– Mu Eliséo jé isoca dasocai to uje que pota jeta chirame dajõrai Elı́as uté nanique, jecute chojninga: –Pangarádejna Uecai uté chiraja yuru iyiejnane udojo úringane ũréo, uje a jé ca yiya yijı́na ua aja quedéjnane jé iji báringai ueca uté.– Ga jé u uje ore jnopo rı̃ ga ore nóna ñane aja dajesui.

⁷ Ga ore chise daqui uté, ga Elı́as, Eliséo ore chácariji tié Jordán uaté edógai. Ga profétaiso uñane di iji ore quigábode uje ore batigai chise 50. Mu ore chácariji quedéjnai ome Elı́as, Eliséo ore, iji ore tiógarei.

⁸ Enga Elı́as chejñu daguidé dañoré ga jé chipocásuja ñane. Quigade enga chinguı́ra daguidé nañoré aja tié uaté. Ga tié uaté chajuque re ga nóña ga dajeque cajnore, ga ore chajna cajnóningai aja uéchai. Ga ore chise uéchai ga tié uaté yorepója ñane iji ore quigábode rı̃.

⁹ Uje e ore chaquesu tié tuaté, enga Elı́as pésu dapregúnta ome Eliséo, uje chojninga: –¿Bapotigátique cucha iji yu ujetiga yipésu ome ua ya? Uje cáma pijnimique uyu iji barosadi.– Enga Eliséo chajnai uruode, ga chojninga: –Yijócha bajei údi ujetiga yo yajnéngu bajongoto pujopié uaté uje chisı́ome báringai ujopı́erãque ome ua. Yigaidi tu gu ujetiga yibasája bayaridi uté, uje yajnepı́di tu iji yujode proféta ore ujade.–

¹⁰ Enga Elı́as chojninga: –Uajate bajei jochaquéode udore quigode ¡jõ! Mu ujetiga apañapı́siji uyu uje pijnimique yu iji barosadi, enga a quene bajegaidi cucha uté chise ua jne. Jé basa ga ujetiga ca amo yu aja doi, enga a jé ca o bajnéngu jne.–

¹¹ Enga Elı́as, Eliséo, jé qué ore nóna ñane aja dajei uje ore catecã́ri ñane ome cuchade. Mu ore chuniname eti guebéquedatéi di uje buricade churuguse uté, ga pioguéjnai déji dosadode jnese. Enga guebéquedatéi uté chajuque ore iji ñane. Ga úyujna di uje chijnire jnumi aja dajesui enga jno Elı́as údi aja gaté iji dabi guebéquedaté uté ajei.

¹² Enga Eliséo pañaji cucha dacadode udore jnese, enga tibite Elı́as gai uje jnome gaté yui, ga cho daji uté uje chojninga: –¡Iapá! ¡Iapá! ¡Uje bagúsi israélgosode yocujade, ga yoquirotangóri tu ua. Ga bajnui tu guebéquedatéode udore ome uyoque uje buricade orusórone soldácho ore choru aja dagaidi pocaninga yui ome dáringane pujnuéngaisóño!– Mu jı̃raque Elı́as cho ¡paque! ga Eliséo timı́ninga jóroga aja gaté mu que jé chimópo dacadisṍri tuqué rı̃. Enga jé u uje Eliséo chajnangarase daguidedie iji darobé gai iji gatócoro ¡cága! nanique ome dáringai jnusiétaque.

¹³ Uje Elı́as jnome gaté enga iguidé dañoré bası́ji gai. Enga Eliséo chijna dajõrai casé iguidé uaté ga e chajnı́ja daquigade. Ga chise tié Jordán uaté ga cháguena pijnanai.

Elı́as casé jogoto pujopiédaté e déji Eliséo

¹⁴ Iji udojo quigade ga Eliséo chijna Elı́as casé iguidé dañoré uaté uje bası́ji gai que. Enga chibote tié uaté ome ga tibite ga chojninga: –¿Déji rique Pangarádejnai, Elı́as angureni Dupa uté é?– Uje quene Eliséo chibote tié ome Elı́as iguidé dañoré uaté, mu tié jı̃raque chajuque re iji gatócoro, enga jé u uje Eliséo chajna cajnóningai aja uéchai.

¹⁵ Ga profétaiso udore uje ore idai u Jericó, ga ore pañaji Eliséo isocai uté to iji dayaridi iji quedéjnai. Ga ore chojningame ñane: –¡Cajicho to! ¡Elı́as casé jogoto ujopiédaté e déji Eliséo to!– Ga ore chachai Eliséo iji garani jnese ga ore chichaga dagataidie aja jnumi iji iquei jnese.

¹⁶ Ga profétade udore ore catecã́ri Eliséo uté, ga ore chojningame: –Cajire to, uje jnanione déji barógode yocujade uje uajate ore, enga ore batigai chise 50. Enga yijóchago bajei údi ujetiga ajuéga ga ore chucué bangaráni jne. Que pimo gu ujetiga Pangarádejnai ujopié chijna aja gaté yui, ga chamurásiji cucaranone uñeque ójo. Jeoga tṍra uté aja tuijnárique iji sañeque.– Mu Eliséo chojningame ore: –Jé dóji, jé ca aroque ore jne.–

¹⁷ Mu jé ore chajo raja Elı́as úringárique pucueque, jé aja ujetiga Eliséo chajéngome ore uruode ga quene juégame ore, uje chojninga: –Beyoi, ga acueyoi jeta acueyoi.– Ga jé u uje ore chiroque uñane uje ore batigai chise 50, ga udore guejnane dire gadioque iji datã uje ore chucué jórogui Elı́as uquécasé.

¹⁸ Quigade enga ore chajnı́ja Eliséo gai, uje uté qué chácariji ore idai Jericó uté, enga ore chojningame uté: –Yucuego jórogui Elı́as uquécasé, mu que yico uté.– Enga Eliséo chagota daru casodé ome ore uje chojninga: –¿Ama jé ca yuruode u ome uaque dirı́ca? uje yaquı̃́ra uágome uté úringárique pucueque dirı́ca.–

Eliséo pésu yote uneroi uté, ga nóña ga yote unere ome jericógosode udore ore, enga gose Pangarádejnai uté osongaquéode nanique

¹⁹ Cucha dacadode udojo quigade ga Jericó idaisórone ore catecã́ri Eliséo, ga ore chojningame uté: –¡Urénga! Yocangaráni á, uerate yoquidai tudé jogadi ome yoque, mu bai tu u uje gajnareque yodi iji. Enga yote uneroi uté chiborátaja dequejnaréngone ome idaisórone uyoque, ga que cucha pacatique suépo iji jnumi gotique rı̃.–

²⁰ Ga Eliséo chojninga: –Beyoi bajo icháraque uje cáma panire cuchárigaja ajei, ga anı́cho echoi aja ajei jne, ga ajnáño aja de.– Ga jı̃raque ore doi uruode ga ore di údi iji Eliséo.

²¹ Enga Eliséo chijna ore iringuié bajo uje e echoi déji ajei ga jno údi aja ore jopidi simı́jna uté. Ga tṍra echoi aja yodi uté ¡jmuc! Ga chojninga: –Pangarádejnai uruode chósi tome ua, yodi á: "E yipésu ujetiga añóña ga yote unere ua. Ga a jé ca apésapo dequejnarétique, pitoringárique ome idaisórone ore jne rı̃. Ga a uerate jnumi jne, ga cucha pacade suépo iji jnumi rı̃."–

²² Ga jı̃raque nóña ga yote unere uquécasé ome idaité ore. Ga úringai unere uté jé chuságaja deréjnane udojo, ga jé péropı́siji Eliséo uru quigode uje chajnerame ome ore que.

Dupade uruode júsõri Eliséo uté cho darúja disi urejane ore, ga gose ore ujñiequé gajnaréngone udore

²³ Enga Eliséo jnoji ore idai Jericó uté ga jnome pidai uñai uté yui uje i tu Betel, enga choru oroné aja dajesui. Mu betélgosode ore ape diyoquı́ode uñane uje quı̃rique urẽja tṍraji dedai uté ga chachai Eliséo iji garani. Ga ore tibite uté gai ome dajñiequéode, enga ore chojninga: –¡Gatodichábiá, bo ome ua ga ejna ua aja gaté yui é! ¡Bo ome ua ga ejna ua aja gaté yui é, Gatodichábiá!–

²⁴ Enga Eliséo chajire daquigade ga toji ore gáyode. Enga jé u uje uté chutṍri Pangarádejnai ome ore úringáringo pujuyagaite nanique ome darúñiejnane. Enga jı̃raque cuchiso chequé gáredie uje i tu óso tṍraji monte ome ore, ga chajnangarase udore uñane aja dejode. Ga ore yugode iji disi urejane udore ujade chise 42 nanique.

²⁵ Uje Eliséo jnoji disi urejane cachodi uté, ga jnome cucarani uté yui uje i tu Carmélo. Mu uje jnoji cucarani uté uje i tu Carmélo uté, ga chajniapója pidáidatéi Samária uté rı̃.