2 Reyes 16 - Dupade Uruode

Jotam ujnacari Acaz isocade gajnarécho iji dáringai judágosode ore eduguéjna nanique

¹ Uje Remalı́as ujnacari Pécah uté guejnanie siquerei chise 17 años nanique ome dáringai israélgosode ore eduguéjna, enga Jotam ujnacari Acaz quene basája dáringai judágosode ore eduguéjna to nanique.

² Acaz guejnanie siquerei e chise 20 años uje quene basája dáringai judágosode ore eduguéjna to nanique. Ga chise 16 años ome dáringai eduguéjna iji Jerusalén uté. Mu Acaz uté que pésu cucha arégode iji Pangarádejnai edominone gotique, uje angureni Dupade jé u mu. Jecute idája dáqui casicaite jmapié iji, uje dáqui casicaite David jecucha pésu cucha arégode iji Pangarádejnai edominone nanique.

³ Mu judágosode ore eduguéjnai Acaz jé iradigode u israélgosode ore eduguéjnane aja ore angurenone dupa quedéjna adode to nanique. Enga ¡chimo jóroque re! uje chuságaja dı́nique nanique ga Acaz chibore dabi ome purása quedéjnane ore angurete noñángone, ayoré gajnúo. Ga uté isoca noñai uté jé péroji daniri uté unirı́sõre bajade isoca noñángone gáyode. Uje purása quedéjnane udore ore ajningaraque puniri uté nanique, mu Pangarádejnai chijócãre puniri uté achamisõre bajade udore iji israélgosode ore iquei, ga israélgosode ore cho daniri iji puniri uté iji ore quigade nanique.

⁴ Enga jecucha Acaz isocabeque to nanique rı̃ uje chapuse dẽrapáidode cucha jogadode aja nanique. Uté tẽra dẽrapáidode cuchiso iji ore aseradéjnane jogadébeode iji cucarãte umarone jeoga orónenie ójodie to, jeoga póredatédie jnese uburúdode u, mu chapuse jogadode udore jnese aja ome dẽrapáidode cuchiso uje tẽrame dangurenone dupa quedéjna, jé aja cucha ai unérone inciénso uje uté chãru gai iji jogate umarone udore to.

Acaz urasade judágose ore umajosórone pésu pocaningai ome ore nanique

⁵ Enga jé u nanique uje sı́riagosode ore eduguéjnai uje i tu Rezín cháta raja israélgosode ore eduguéjnai uje i tu Pécah ome uraque dagaidi pocaninga yui ome judágosode ore idai Jerusalén uté. Enga ore chise Jerusalén uté, ga ore chaparu judágosode ore eduguéjnai Acaz, urasade ore idai Jerusalén gai, mu que toc ujetiga ore chijnime Acaz uté ãrı́rique.

⁶ Enga deréjnane udore jé u to uje edómgosode ore eduguéjnai dopoi pocaningai rı̃ ome Acaz, urasade judágose ore, ga chijnapo edómgosode ore idai casica iji judágosode ore gari rı̃ uje i tu Elat. Quigade enga edómgosode ore eduguéjnai chijócãre Elat uté idaisórone judágose ore uje ore chácariji uté. Ga quene edómgosode ore chácarapóji dedai Elat uté nanique rı̃. Ga jé chuságaja deréjnane udojo to uje edómgosode ore chopise dedáji Elat uté rı̃.

Judágosode ore eduguéjnai Acaz chutai ası́riagosode ore eduguéjnai ujetiga cháta raja uté ome damajosórone ore nanique

⁷ Judágosode ore eduguéjnai Acaz uté chimo uje sı́riagosode, israélgosode que ore cha pocaningai unerai nanique ome darasade judágose ore. Enga jé u uje Acaz chiroque datocaidode aja ası́riagosode ore eduguéjnai Tiglat-piléser uté yui. Ga utocaidode ore chajnerame deduguéjnai ajei jochaquéode ome uté, uje chósi te: –Eduguéjná, bajnacari tu yu, ga baroi tupo yu rı̃. Be ga arota yu ga ajnime yu iji sı́riagosode, israélgosode ore eduguéjnane josipiedie jmainie. Bamo uje qué ore cho dajocaningame yu, ga a jé ca yitiógarapo ore rı̃.–

⁸ Ga Acaz chiroque deranenie pláta aja Tiglat-piléser uté to ome danejequéode ome ası́riagosode ore eduguéjnai uté. Uje Acaz chijnime plátapı́sedie jé aja órodie jnese uje déji Pangarádejnai iguı́jna cuchábi ajei uté. Ga a jé ca chedu udire iji Pangarádejnai iguı́jnai nanique mu chátapo dañeranie pláta, óro jnese aja to rı̃ iji daguı́jnai uje déji añeratı́go jogadode. Ga jé u uje Acaz utocaidode jno deduguéjnai imátadie pláta údi aja ası́riagosode ore eduguéjnai.

⁹ Uje Acaz utocaidı́so ore chise ası́riagosode ore eduguéjnai Tiglat-piléser nanique, enga uté chimesẽre judágosode ore eduguéjnai Acaz utoquei. Ga jé u uje Tiglat-piléser uté chamáta dasoldádode ga ore chicai sı́riagosode ore uniri ome dajocaningai. Ga ası́riagosode udore ore chise sı́riagosode ore idáidatéi uje i tu Damásco ga ore cugujnáji uté, ga ore sué sı́riagosode udore gáyode. Udojo quigade ga ası́riagosode eduguéjnai cho dasaguı́ji idaité ore ga jno ore údi aja daniri uté ga chiroque ore aja pidai uté uje i tu Quir. Mu ası́riagosode ore eduguéjnai Tiglat-piléser uté chujé sı́riagosode ore eduguéjnai Rezín uté nanique.

Judágosode ore eduguéjnai Acaz chichaga dajéode aja dupa quedéjnarique gajnetique gaserãte, ujetiga ore chiro uté gajnui iji Jerusalén

¹⁰ Iji cucha dacadode udojo quigade uje ası́riagosode ore eduguéjna cuchábi Tiglat-piléser e sué sı́riagosode ore gai iji ore idai Damásco uté, enga jé u uje judágosode ore eduguéjnai Acaz chicáji Damásco yui ujetiga tuangóa ası́riagosode ore eduguéjnai Tiglat-piléser iji uté. Uje Acaz chise Damásco uté nanique ga chimo gaserani iji uté uje dupa quedéjnarique gajnei gaserãte uté, ga jı̃raque chichaga dajéode aja uñeque to ujetiga ore chiro uté gajnui iji Jerusalén. Jecute churúsãre ore aserani adode jnese aja umaningai, aja abubı́e, iji darujna aórique. Enga churúsãre gajnui to ga chiroque darusãrai aja Pangarádejnai iroi sacerdote nanique uje i tu Urı́as, ujetiga pésu Acaz gajnetique gaserãte iji Jerusalén uté. Enga pota jeta jé chopise gaserani uté uje chimo iji sı́riagosode ore idai Damásco uté.

¹¹ Ga jé u nanique uje sacerdote Urı́as uté chajire deduguéjnai Acaz urusarane uje chirógaja uté, ga chedu quigode uje pésu Acaz ojningai gaserãte uté. Enga chopise gaserani uté isocai uje déji sı́riagosode ore idai Damásco, ga e dimanepı́some judágosode ore eduguéjnai Acaz yui ujetiga diapo rı̃ iji Damásco uté.

¹² Uje eduguéjna cuchábi Acaz chajni iji Damásco enga chimo Urı́as ipesudi gaserãte uté iji Jerusalén, enga jé u uje sose yui enga jı̃raque tẽra dẽrapáidode cucha iji gai.

¹³ Uje doi dẽrapáidode cuchiso ga chujé ore ga chãru ore gai iji gaserani uté. Enga Acaz chiborápo dẽrapáidode arroze quedéjna ubucho iji gai to rı̃, jé aja uje chojne dẽrapáidi vı́no aja gai to. Enga tẽra dẽrapáidode cuchiso uñane uje pajesereringane gajnecho udore, ga chimesẽre ore iyojnanie daserani gai to.

¹⁴ Enga Acaz doi Pangarádejnai gajnei gaserãte uje déji Pangarádejnai iguı́jnai iquei, uje pipesute iji bronce nanique, ga chécãre jogadi ga chicha gaserãte ichai uté aja jogadi. Iji taningai ga gaserãte bajai uté déji Pangarádejnai iguı́jnai, ore oraque ichai ujai, mu Acaz chicha Pangarádejnai gajnei gaserãte aja ore oraque ichai uécha uñai iji casaque garani yui.

¹⁵ Iji cucha dacadode udojo quigade ga eduguéjnai Acaz uté chutṍri sacerdote Urı́as ome daroquéode, ga chósi tome: –Yipota jeta edu borai gaserãte queru uté ome yoquẽrapáidode cucha jnese. Jecute ãru yoquẽrapáidode cuchiso udore iji uté gai jne iji durasedie jnese. Enga que gusu uté mu jecucha ãru yoquẽrapáidode arroze quedéjna ubucho udore to iji gaserãte querui uté gai gatuaque iji guedéjnoringáne. Enga que gusu cucha pẽrapáidode udore, mu ãru yẽrapáidode cuchiso iji gaserãte querui uté gai to, jé aja yẽrapáidode arroze quedéjna ubucho. Enga ãru yocurasade judágose ore guẽrapáidode cuchiso iji gai jnese to jne, jé aja ore guẽrapáidode arroze quedéjna ubucho. Ga átaja judágosode ore guẽrapáidode vı́no aja udore to, ga ójneja gaserani uté gai jne. Jé aja yoquẽrapáidode cuchiso iyojnanie jnese rı̃, gusu ome yocaserãte querui jeta amesẽre iyoi gai gatuaque to, ujetiga yoquẽrapáidode cuchiso udore u uje bãru udore gáyode, jeoga yoquẽrapáidode cuchiso uñane u. Mu gaserãte bajai uté uje pipesute iji bronce, a gusu yu ome jne, ujetiga yucué Pangarádejnai áyipierágome cuchade gatuaque jne.–

¹⁶ Ga sacerdote Urı́as uté que chimoque deduguéjnai Acaz utoquérique uñeque jeta jé ca pésu.

Judágosode ore eduguéjnai Acaz chejñu Salomón ipesudode cucha uñane aja jnumone, ga chécãre ore jogadode iji Pangarádejnai iguı́jna cuchábi ejoi nanique

¹⁷ Iji cucha dacadode udojo quigade nanique ga judágosode ore eduguéjnai Acaz chejñu cuchade aja jnumone iji Pangarádejnai iguı́jnai uté ejode. E doi eduguéjna casicaite Salomón oragadé utugudé dugurenie udire nanique, ga chamurase bajo quedéjnanie iji ore édajidóde, ga chejñu táblade iji udire dosadode to. Quigade ga Acaz dopoi bajodaté cuchabé uaté rı̃ uje ore chı̃́care "yote quedéjnai" aja bajodaté uaté nanique. Uje bajodaté cuchabé jogadi tu tórodatéode gajnúone gáyode iji taningai, uje pipesucho udore iji bronce to nanique. Mu Acaz chamurase bajodaté uaté iji udore gai. Ga chicha bajodaté uaqué aja dora uñáraque gai uje uja jnumi, ga ora uaté pipesudé iji cucaranenie nanique.

¹⁸ Que gusu udore, mu Acaz chejñuápo eduguéjnane gajnei piago aja jnumi nanique rı̃ iji ore ujuyaquei uté iji Pangarádejnai iguı́jnai gai. Mu gusu uje eduguéjnane gajnepite nanique ujetiga ore chacája piagoi uté. Ga Acaz uté chejñuápo ore imeñéraque rı̃ uje déji Pangarádejnai iguı́jnai yui to, uje eduguéjnane gajné to. Ujetiga eduguéjnai chisı́rase Pangarádejnai iguı́jnai iji sábadode, jeoga dire puyade uñeque, mu purúdejna ome uté iji imeñé uaté údi. Mu judágosode ore eduguéjnai uje i tu Acaz doi ga chijnime cuchade udore iji jogadode nanique. Acaz gaidi tu ujetiga ası́riagosode ore eduguéjna cuchábi chimesẽre uté gu.

Uje judágosode ore eduguéjnai Acaz toi ga ujnacari Ezequı́as basája dayé charidi nanique

¹⁹ Enga cucha dacate amirone jnese iji Acaz uté úringai eduguéjna, jé aja ipesudode cucha jnese, ga purusãracho iji darujna aode uñane uje ore churúsãre judágosode ore eduguéjnane adode iji udore nanique.

²⁰ Uje Acaz toi nanique ga ore chijóchame iji dáqui cásodicáite ore ódedie jogadi iji David idai Jerusalén to. Ga Acaz uté ujnacari Ezequı́as basája dayé charidi ome dáringai judágosode ore eduguéjna.