2 Reyes 14 - Dupade Uruode

Aması́as basája dáringai judágosode ore eduguéjna nanique

¹ Uje Joacaz ujnacari Joás guejnanie siquerei e gare nanique ome dáringai israélgosode ore eduguéjna, ga Joás uñai ujnacari Aması́as quene basája dáringai eduguéjna ome judágosode to nanique.

² Enga Aması́as uté guejnanie siquerei 25 años nanique uje quene basája dáringai eduguéjna. Enga 29 años nanique uje chácariji dáringai judágosode ore eduguéjna iji Jerusalén uté. Ga Aması́as daté i tu Joadán, ga jerusaléngoto uaté nanique.

³ Enga Aması́as uté pésu cucha arégode iji Pangarádejnai edominone, mu que ate arégode udore chopise dáqui gatei casicaite David jmapié ueratigai ome Pangarádejnai uté, bası́ji yui. Ome Aması́as adode jnese, ga uté ajnai tupúsu dai Joás uté iji jnumone nanique.

⁴ Gusu cucha gajnareque chojmarai uje qué déji Aması́as uté, enga u uje que chejnápise ore aseradéjnane jogadébeode jnese gotique iji cucarãte umarone, orónenie iji daniri uté. Enga urasade judágose jecucha ijo ore aseranone udore ome dẽrapáidode cucha, jé aja uje ore chãru cucha ai unérone iji to, uje que ore isocade urásu mu.

⁵ Uje Aması́as e chise dáringai uajate nanique ome dáringai eduguéjna, ga jogadi jé u nanique uje jı̃raque Aması́as uté chujé dai casicaite Joás yungórone uje Joás uté iróquegaté ore nanique.

⁶ Mu Aması́as que chijocase dai yungórone udore ore abode to nanique, mu chedu ore dayode nanique uje chujé ore. U gu uje Aması́as uté chajna Moisés urusarane iji jnumone. Uje Pangarádejnai uru pirosobádode quigode udore chojninga: –Ujetiga gajnareque gosi danique isocade ga ajéyo dai ga jé ca ajéyo abode to uje que ore bárique cucha cuse gu. Ga jé adi tupo rı̃ ujetiga gajnareque gosi abode adode ga ajéyo gosi abode, mu jé ca ajéyo dai to uje que bárique cucha cuse gu. Ga gusu márai tiji ore jeta cho daba date gajnaréngone ga gosi eruei jé u iji dı́nique.–

⁷ Judágosode eduguéjna cuchábi Aması́as uté jé u nanique uje cho dajocaningame edómgosode ore iji tuijnai uté uje i tu Echoi. Ga judágosode ore yugode batigai chise 10.000 nanique iji edómgosode ore ujade. Uje ore suépise ore gai, ga ore cho dajnéngu edómgosode ore idai uje i tu Sela. Mu Aması́as chécãre edómgosode ore idai uté i nanique ga chı̃́care Jocteel aja uté nanique. Ga i jé u to iji deréjnane udojo.

Judágosode ore eduguéjnai Aması́as uté chosi riji gaté ga pota cho dajocaningame israélgosode ore eduguéjnai Joás uté

⁸ Uje e judágosode eduguéjna Aması́as, ore yuchome edómgosode ore, ga e chosi riji gaté. Ga chiroque datocaitı́go aja israélgosode ore eduguéjnai Joás uté yui. Enga Joás uté dayé i tu Joacaz, jé basa ga dáquide i tu Jehú nanique. Ga Aması́as utocaidode chajnerame deduguéjnai uruode ome Joás, uje chósi te: –Joás, be ga abágui yu ga yajico ñane edodie gajiné.– Mu Aması́as uruode udore qui jé upúsu jeta ore pésu dajocaningai ome ñane, uje a jos eti sué Joás ore gai jne.

⁹ Mu uje israélgosode ore eduguéjnai Joás chudute judágosode ore eduguéjnai Aması́as uruode, enga jé u uje Joás chirócapo daruode aja rı̃. Ga Joás cho dojñame Aması́as uté ga chacãra Aması́as uté aja ugarabátaque ojnatéraque; jé basa ga chacãra raja poredaté ueradé cédro uaté iji abué Lı́bano, ga chojninga: –Ugarape ojnatébia iji abué uje i tu Lı́bano catecã́ri poredaté ueradé cédro uaté iji Lı́bano ga chirógaja ujetiga chisı́ome uro ome ujnacari jetiga chóji gari jne. Mu jı̃raque cuchiso sijnátique iji Lı́bano di ga chuchiéjna ugarape ojnatébia suaté aja jnumi ¡jnámu, jnámu! ga arime iji údi.–

¹⁰ Enga Joás ojñane udore qui tu uje chetaque Aması́as isocai uje chosi riji gaté, jecute iboyaquéode ome Aması́as qué jno dádi, ga chósi te: –Yiraja arı̃a uje bajnuépise edómgosode ore gai dirı́ca iji bajocaninga casé, enga e ijoyataguipise ua. Be ga ejna ua aja báringai ijoyatáquedaté, mu ácariji bajnepı́di unire uté. ¿Ama cuchárique u gu a uje bapota jeta aringare pujuredie? Bacueguedie pujurei udire a jé chiborátarásaja báringárique pejnaque, ga a jé chuságaja barasade judágose uaque jnese jne.–

¹¹ Mu judágosode ore eduguéjnai Aması́as que tangári dajnetique paquı̃raqué nanique. Ga jé u uje israélgosode ore eduguéjnai Joás chamáta dasoldádode nanique ga Aması́as ore chicáji ñane tiógareode ujetiga ore chajirape ñane iji judágosode ore idai Bet-semes uté. Ga e dimane ore ome dajocaningai jeta ore chujé ñane, uje Aması́as que tangári paquı̃raquérique gu.

¹² Ga jé u uje israélgosode ore sué judágosode ore gai nanique ome dajocaningai ga judágosode isoldádode ore chayója daguı́jnane jnese ome dáringane bayácho nanique.

¹³ Mu iji ore idai Bet-semes uté, ga israélgosode eduguéjnai Joás chisa judágosode ore eduguéjnai Aması́as nanique, uje uté dai i tu Joás to, ga dáquide i tu Ocozı́as. Ga jé u nanique uje israélgosode ore eduguéjnai Joás, isoldádode ore chicai Jerusalén yui nanique. Uje ore chise ga ore chajnangarase Jerusalén ujuyaquei pei aja jnumi iji ore idai uté gai. Enga ore ajnangarañapı́di uté tṍraji piago uñai iji ore idai Jerusalén ujuyaquei gai uje i tu Piago Efraı́n, ga jé chuságaja piago uñai uje i tu Ajidé. Ga querújna ore ajnangarañapı́di uté iji piago gárode udore ujai, ga métrode chise 180 nanique.

¹⁴ Ga ore isocai jé u uté nanique uje israélgosode eduguéjnai Joás, isoldádode ore quene chise ore idai Jerusalén ajei. Enga ore chacája Pangarádejnai iguı́jna cuchábi ajei, ga ore chase ajei ga ore jno deyade cucha oreránguejna jnese údi iji Pangarádejnai iguı́jnai ajei. Ga ore jno órodie údi jnese, jé aja plátapı́sedie jnese, jé aja Pangarádejnai iguı́jnai jogonórone cucha oreránguejna jnese uje pipesucho udore iji óro, pláta ore nanique. Mu que gusu Pangarádejnai iguı́jnai uje ore chase ajei nanique. Mu Joás ore chasápo Aması́as iguı́jnapı́si nanique rı̃. Ga ore chajnose uté ome añerane cucha orerã́cho udore jnese ga ore jnopo údi rı̃. Ga israélgosode ore eduguéjnai Joás chijna dasagode jerusaléngose uñane ga ore jnopo udore údi rı̃, enga jé u uje Joás chajnı́ja dedai Samária uté.

Israélgosode ore eduguéjnai Joás toi nanique, ga ujnacari Jeroboam disi ejoi uté chácariji dai charidi iji quigade

¹⁵ Enga cucha dacate amirone jnese iji Joás uté úringai israélgosode ore eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore. Ga ore urusarane udore chatatapo Joás uté úringai dicase, jé aja jocaningai ome judágosode ore eduguéjnai Aması́as to nanique rı̃.

¹⁶ Uje Joás uté toi nanique ga ore chicha ode taja israélgosode ore eduguéjna bajade ore ódedie jogadi to iji Samária nanique. Ga jé u nanique uje uté ujnacari uje i tu Jeroboam disi ejoi basája dayé charidi nanique ome dáringai eduguéjna.

Uje judágosode ore eduguéjnai Aması́as toi nanique, ga uté ujnacari Uzı́as chácariji dai charidi ome dáringai judágosode ore eduguéjna

¹⁷ Uje israélgosode ore eduguéjnai Joás toi, mu judágosode ore eduguéjnai Aması́as uquécasicá qué eca iji Joacaz ujnacari Joás uté quigade. Ga Aması́as uté guejnanie siquerei chise 15 años nanique iji uté quigade uje qué eca nanique.

¹⁸ Enga cucha dacate amirone jnese iji Aması́as uté úringai eduguéjna, ga purusãracho jnese iji darujna aode uñane nanique uje ore churúsãre judágosode ore eduguéjnane adode iji udore.

¹⁹ Ga Aması́as uté cachodi isocade u udojo nanique: Aması́as umajosórone uñane iji Jerusalén cháta dáyipiedie aja ñane ome deduguéjnai uté úringárique chuque yui. Mu Aması́as chiraja uje ore jmongarája ga chijna dagajñua taja ore idai Láquis uté. Mu uté umajosórone ore chiroque datocaitı́go aja uté quigade, ga ore chise uté ga ore chicha uté cachodi taja ore idai Láquis uté nanique.

²⁰ Iji udojo quigade ga urasade ore jno uté údi aja Jerusalén ome úringai toque, ga buricade jnuque nanique. Enga ore chijóchame uté iji dáquiode ore ódedie jogadi to nanique iji David Idai Jerusalén uté nanique.

²¹ Udojo quigade ga judágosode ore jnese doi Aması́as ujnacari uje i tu Uzı́as nanique, ga ore chicha uté aja dayé charidi ome dáringai eduguéjna. Ga Uzı́as uté guejnanie siquerei 16 años nanique uje quene basája dayé charidi nanique ome dáringai eduguéjna.

²² Ga Aması́as ujnacari Uzı́as uté u uje chijnápo judágosode ore idai Elat iji ore umajosórone gari rı̃ iji dai casé quigade, enga jé u uje Uzı́as uté chopo judágosode ore idáji Elat uté rı̃. Udojo quigade ga Uzı́as uté chirópo ore idai uté aja gaté to nanique rı̃.

Jeroboam disi ejoi basája dáringai israélgosode ore eduguéjna, ga gajnarenguipise adode nanique ome Pangarádejnai Dupade uté

²³ Uje Joás ujnacari Aması́as guejnanie siquerei e chise 15 años nanique ome dáringai judágosode ore eduguéjna nanique, ga Joás uñai ujnacari uje i tu Jeroboam, disi ejoi uté, quene basája dáringai eduguéjna ome israélgosode nanique. Enga chise 41 años nanique uje Jeroboam uté chácariji dedai Samária uté nanique ome dáringai israélgosode ore eduguéjna.

²⁴ Mu Jeroboam disi ejoi uté pésupúsu cucha gajnaréngone iji Pangarádejnai edominone. Enga que chicai ti yui ome jnani bajai Nabat ujnacari Jeroboam jmapié gajnarénguenie udire quigode gotique. Uje Jeroboam bajai uté inejerãte darasade israélgose ore aja pisijnaringuéone nanique enga ore chiradája ipesudode cucha gajnarécho. Enga Jeroboam disi ejoi uté qué chajnera uté jmapié gajnarénguenie údi.

²⁵ Israélgosode ore umajosórone ore chajnose israélgosode ore ome ore gajnei jnupe péode, péode nanique iji ore uniri uté eruéode. Mu iji deréjnane udore uje Jeroboam ejoi uté qué déji dáringai israélgosode ore eduguéjna, enga uté chijnapo ore gajnéone daniri casodica jnupe jnese tiji ore umajosórone gari nanique rı̃, ga pésapo eruéode rı̃. Enga Jeroboam ejoi chijnapo ore idai Hamat uté rı̃ uje déji ore uniri cacadi iji casaque garani yui, enga jé chuságaja jómiodatéi uje uté chijnapo rı̃ uje i tu Arabá, ga dépisi ore uniri eruei iji umusoi garani yui. Enga jé u uje israélgosode ore chopo dajnéngu jnumi jnese iji udore ujade to nanique rı̃. Enga Pangarádejnai, israélgosode ore angureni Dupa uté, iroi proféta déji nanique uje chatata Jeroboam ejoi isocai uté iji cucha dacadode ore iquéode bajaque nanique. Ga tocade nanique ga jé upúsu Pangarádejnai uru quigode ome israélgosode ore nanique. Ga Pangarádejnai iroi proféta uté u Amitai ujnacari Jonás uté nanique, enga idai i tu Gat-hefer.

²⁶ Enga Pangarádejnai chátaja Jeroboam ejoi uté ome isocade udore gu uje chimo israélgosode uje cuchade na ore aja jnumi ga que jé ore uajatiguérique cusapo rı̃ iji dajnenie pijosipiei jmainie. Ga ore chejnárengui jóroque re iji daniri uté nanique. Ujetiga ducañerájma gosi, jeoga ducañeraque gosi, mu jé ore cho ñane iji jnumi nanique uje que qué ore agutı́yabátique ayoré cusipise nanique rı̃.

²⁷ Mu que dépisi Pangarádejnai ajénique nanique jeta chı̃ro darasade israélgose ore ¡tácatác! uje que pota ujetiga tita erámi ome ore. Jecute Pangarádejnai chátaja ore nanique ga angúromei tu Joás ujnacari Jeroboam uté ome israélgosode ore úringane piquetacho.

Uje Jeroboam disi ejoi uté toi nanique, ga ujnacari Zacarı́as basája dayé charidi ome dáringai israélgosode ore eduguéjna

²⁸ Enga cucha dacate amirone jnese iji Jeroboam disi ejoi uté úringai eduguéjna, jé aja ipesudode cucha jnese, jé aja uajatiguei, jé aja jocaningane adode, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore. Ga ore urusarane udore chatata Jeroboam uté isocade to uje cho dajocaningame israélgosode ore umajosórone ore, ga chatirépo ore oidode pidáyo daniri Israel gai rı̃, uje pidáyode udore ı́ode u Damásco, Hamat ore. Enga jé u uje ore chopo dajnéngu pidáyode udore rı̃.

²⁹ Uje Jeroboam disi ejoi uté toi nanique ga ore chicha uté ode aja israélgosode eduguéjnane udore ore ódedie jogadi uté iji Samária. Ga jé u uje Jeroboam ujnacari Zacarı́as basája charidi nanique ome dáringai israélgosode ore eduguéjna iji quigade.