2 Reyes 13 - Dupade Uruode

Jehú ujnacari Joacaz basája dáringai israélgosode ore eduguéjna nanique, mu isocade jé gajnarécho to

¹ Uje Ocozı́as ujnacari Joás guejnanie siquerei chise 23 años nanique iji dáringai judágosode ore eduguéjna, ga quene Jehú ujnacari uje i tu Joacaz basája dáringai israélgosode ore eduguéjna to nanique. Ga Joacaz guejnanie siquerei chise 17 años iji dáringai eduguéjna uje chácariji dayaridi iji Samária uté nanique.

² Mu Joacaz uté pésu pisijnaringuéone iji Pangarádejnai edominone gatuaque. Ga jé chopise eduguéjnai Jeroboam jmapié, uje Nabat casicaite ujnacari tu Jeroboam uté. Uje Jeroboam inejerãte darasade aja pisijnaringuéone úringane pipesucho, ga Joacaz uté chajnera uté isoca gajnaréngone údi, ga que chicai ti yui ome cucha gajnaréngone úringane pipesucho nanique.

³ Jecute ájningaránguipı́se Pangarádejnai ome israélgosode ore nanique. Enga chicha ore aja sı́riagosode ore eduguéjna cuchábi Hazael jmainie gatuaque nanique, jé aja uté ujnacari Ben-adad uté jmainie. Enga iyajmaque uje sı́riagosode udore sué israélgosode ore gáyode nanique.

⁴ Mu chise diri nanique uje israélgosode ore eduguéjnai Joacaz chijócha Pangarádejnai uté ajei údi jeta chosõre ore, enga Pangarádejnai chajnai Joacaz icatecãraitigade. Uje Pangarádejnai chidójnanga gu uje israélgosode ore chejnárenguipı́se re iji sı́riagosode eduguéjnai josipiedie jmainie nanique.

⁵ Jecute Pangarádejnai chisi ome israélgosode ore irotangóri ome ore nanique, uje chijnime ore iji sı́riagosode ore josipiedie jmainie nanique. Ga jé u uje israélgosode ore chajniapója daguı́jnapisode nanique rı̃ ga quene tijode chopo jnángome ore nanique rı̃.

⁶ Uje israélgosode ore chimo Pangarádejnai osongaquéode ome re nanique, mu jé ore chajo raja Jeroboam jogasúode ore jmapié gajnarénguenie, uje ore eduguéjna casicaite Jeroboam uté inejerãte darasade israélgose aja pisijnaringuéone úringáringo pipesucho nanique. Enga que israélgosode ore chibéro rome date gajnaréngone udore. Que gusu israélgosode ore isijnaringuéone udore, mu ore angurené ayoré gajnu Asera oré uje pipesudé iji pore pajénique jé jogate gaté iji ore idai Samária nanique ome uaté úringa pisı́gai.

⁷ Uje jiei Joacaz isoldádode nanique iji taningai, mu e garósi gu uje sı́riagosode ore sué ore gai nanique, ga chosi ore iji jnumi, chosi ore iji jnumi, jé aja ujetiga gusu 10.000 Joacaz isoldate diguijnutı́ode amirámone sudore. Ga buricade orusórone amirone ore batigai chise 50 nanique, ga ore gachidode guebéquedatéo garósipise batigai to ga gusu 10 nanique. Enga israélgosode ore isoldádode ore gajnui tu pasigode iji sı́riagosode ore eduguéjnai jocaningai jmainie, ga cho ujetiga isoldádode ore chuchiéjna israélgosode ore iji jnumi, uje ore guejnaque ore nanique.

⁸ Enga cucha dacate amirone jnese iji Joacaz uté úringai eduguéjna, jé aja ipesudode cucha jnese, jé aja etotiguéode, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.

⁹ Uje Joacaz uté toi nanique ga ore chijóchame iji idai Samária uté. Ga uté ujnacari Joás basája dai charidi nanique ome dáringai israélgosode ore eduguéjna.

Joacaz ujnacari Joás adode gajnarécho gatuaque nanique iji dáringai israélgosode ore eduguéjna

¹⁰ Uje judágosode ore eduguéjnai Joás chise 37 años nanique iji dáringai eduguéjna, ga Joacaz ujnacari Joás quene basája dáringai israélgosode ore eduguéjna to nanique. Ga Joás ejoi uté chácariji dedai Samária nanique ome dáringai eduguéjna, ga guejnanie siquerei chise 16 años ome dáringai eduguéjna iji uté.

¹¹ Mu Joacaz ujnacari Joás uté pésu pisijnaringuéone gatuaque iji Pangarádejnai edominone. Enga que chibéro rome Jeroboam casicaite ate gajnaréngone udore uñeque. Uje Nabat ujnacari Jeroboam uté inejerãte darasade israélgose aja pisijnaringuéone úringane pipesucho nanique, enga israélgosode ore eduguéjnai Joás uté qué chajo raja Jeroboam jmapiedie udire.

¹² Enga cucha dacate amirone jnese iji Joacaz ujnacari Joás uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore. Ga israélgosode ore eduguéjnai Joás ejoi uté jocaningai ome judágosode uje sué ore eduguéjnai Aması́as gai ome dáringai dicase jé déji ore urusarane udore to.

¹³ Uje israélgosode ore eduguéjnai Joás ejoi uté toi nanique ga ore chijóchame iji dáquiode eduguéjna ore ódedie jogadi to iji Samária. Udojo quigade nanique ga Joás ujnacari Jeroboam disi ejoi uté basája dayé charidi ome dáringai israélgosode ore eduguéjna.

Pangarádejnai iroi proféta Eliséo isocade u udojo uje toi nanique

¹⁴ Uje cáma israélgosode ore eduguéjnai Joás ejoi toi nanique, ga Joás uté taquirı́ji Eliséo iji charidi uje Eliséo e chejnáreque dejnarei uté uje a chiborátarásaja datoringai jne. Ga eduguéjnai Joás uté chise nanique ga tajirome iji jnumi ga popı́siji ejode nanique. Enga Joás ejoi uté naráraja dáringai ugo nanique ga cho daji Eliséo uté uje chojninga: –¡Iapá! ¡Iapá! ¡Uje bagúsi israélgosode yocujade, ga yoquirotangóri tu ua! ¡Ga bajnui tu guebéquedatéode udore ome uyoque uje buricade orusórone soldácho ore choru aja dagaidi pocaninga yui ome dáringane pujnuéngaisóño!–

¹⁵ Enga Eliséo chajnai Joás uruode ga chojninga: –Be docojitique ga bepoi docojodie uñáringui rı̃ enga ajnája de jne.– Ga jé u uje eduguéjnai doi docoji nanique ga chátaja docojodie uñáringui nanique.

¹⁶ Ga Eliséo chojningame: –Be ga ajmare bojo aja boji carubi.– Ga jé u uje eduguéjnai na dojo aja doji carubi. Ga jé u uje Eliséo chaco eduguéjnai jmanáyone gáyode nanique ome dajmanáyone.

¹⁷ Enga Eliséo chojningame Joás uté: –Achẽre yiguı́jnai bocadi gai jne iji guedé garani yui.– Uje eduguéjna cuchábi chuchẽre bocadi gai iji guedé garani yui, ga jé u uje Eliséo chojninga: –Be ga achóngara ¡bu!– Ga jé u uje eduguéjna cuchábi chichóngara dojo ¡bu! Ga Eliséo tibite ga chojninga: –¡Docojo uaté imoi tu báringai pujnuéngaisṍre jne uje tṍraji Pangarádejnai! ¡Docojo Pujnuéngaitó uaté u ome sı́riagosode ore úringane pejnaque jne! ¡Uje a ajnué sı́riagosode ore gai iji ore idai Afec uté ome bajocaningai, jé aja ujetiga anoningasipise ore jnese!–

¹⁸ Ga jé u uje Eliséo catecãrápoi isráelgosode ore eduguéjna cuchábi Joás uté rı̃ ga chojninga: –Asa bojo amirenie udire.– Uje eduguéjna cuchábi chisa dojodie ga Eliséo chojninga: –Acangurásiji jnumi ¡jnac! ¡jnac! ¡jnac!– Enga ore eduguéjna cuchábi chicangurásiji jnumi dojo amirenie ¡jnac! ¡jnac! ¡jnaque! Ga gadioque uje chicangurase dojodie iji jnumi ga jé gusu.

¹⁹ Enga jé u uje Dupade iroi Eliséo ájningarángome eduguéjna cuchábi Joás uté ga chojningame: –Ujetiga ajérase jnumi ome bojodie ga chejna yijmanai, jeoga chojmára iji ti enga imoi turásu jeta pejnanguipı́siráse sı́riagosode ore jnese jne. Mu gusu gadiógosi uje bacangurase bojodie eruéode iji jnumi, ga imoi tu ujetiga gusu gadiógode ujetiga ajnué sı́riagosode ore gáyode, ga a jé ca anoningasipise ore jnese jne.–

²⁰ Enga chise cucha dacadı́so udojo quigade nanique ga Eliséo ejnarei chequésãre uté, ga jé u uje ore chijóchame uté nanique. Jecucha ga jé ate nanique uje oriechoquı́ode iji Moab uniri uté chamáta ñane nanique ga ore pésu dajochade aja quedéjnane ome dáringane oriéo ga ore chicáji israélgosode ore yui nanique. Ga jecucha ga moábgosode udore isoca nanique uje ore diji putaningane jogadode iji siqueredie jnese gatuaque.

Jnani totique ecáji datoringai quigade uje chinguı́ra raja Eliséo ajnoquéode iji ode nanique

²¹ Ga chise diri uje jnani uñénguiji israélgosode toi nanique ga ore jno údi aja ducódedie jogadi. Enga ore chijócharásome uté, mu ore chimo oriéode nanique, enga moábgosode ore u uje e ore diji ore. Enga jé u uje jnani toi uté jochasórone ore edosare re ga jı̃raque ore tṍra uté aja Eliséo ode ¡tuc! Ga jé u uje ore chayome oriéode moábgose udore. Mu uje jnani toi uté chinguı́ra raja Eliséo ajnoquéode ¡tétere! iji ode ajei, ga jı̃raque jnani uté ecápo rı̃, ga jé chague.

Sı́riagosode ore eduguéjna cuchábi Hazael cho dajosipié ome israélgosode ore nanique

²² Sı́riagosode ore eduguéjna cuchábi uje i tu Hazael jecucha pésu dajuré gajnéone cucha ome israélgosode udore nanique iji Joacaz úringai eduguéjna údi jnese gatuaque, ga jé chuságaja Joacaz uté itoringai yuábi.

²³ Mu Pangarádejnai chajire israélgosode ore yui nanique gu uje e chichaga daru iyiejnane aja ore dáqui gatéode Abraham, Isaac, Jacob, ore yui nanique. Enga Pangarádejnai uté osongaquéode, icaniratiguéode jé chuságaja ore ape disi ejode nanique. Enga que Pangarádejnai juéga nanique ujetiga pejnanguipise ore, enga que juéga jeta parãte ore aja quedéjnane nanique iji daquei. Enga jé chuságaja deréjnane udojo to uje que Pangarádejnai tṍra ore.

²⁴ Uje sı́riagosode ore eduguéjnai Hazael toi nanique, enga uté ujnacari Ben-adad uté chácariji dai charidi nanique ome dáringai sı́riagosode ore eduguéjna.

²⁵ Enga Hazael uté jé u uje chijna israélgosode idáyode uñane iji ore gari nanique uje qué ore eduguéjnai u Joacaz uté nanique. Mu Joacaz ujnacari Joás u nanique uje chijnápo guidáyode udore iji Hazael ujnacari Ben-adad gari nanique rı̃. Uje Joás uté jocaningane gadiógome sı́riagosode ore eduguéjnai Ben-adad uté uje sué gai, ga jé u uje chijnimápo guidáyode udore iji Ben-adad uté jmainie nanique rı̃.